728x90 AdSpace

Hot
Menu
Zon-ol na Donate

Latest News

KUM THAK – 1 Agelh - T. Sawm Lian

KUM THAK – 1
Agelh - T. Sawm Lian




Kum thak a om nadingin kum lui a om kul a, a lui a om manin a thakin manphatna nei hi. Mihing zong nuntakna lui pan nuntakna thak a neih ciang a lungnuamin, nuntak nuam sa hi. Kum lui pen mi tampi adingin dahna, lunggimna leh haksatna thuak kum hi ding a, pawlkhatte adingin van thak, inn thak, nasepna thak, leh lawhcinna neih kum, kum lungdamhuai hi ding hi. Bangbang ahi zongin, kum thakah lungsim leh ngaihsutna thaksuaksakin, kum lui a nasep hoihte zomin, asiate apha a puah kisam hi. 

I.
Kum lui sunga nuntakna panin ngaihsut kik ding leh kum thak a kalsuan dan ding hong lak thei tampi om a, tuate tawmkhat en dih ni :

1)A hampha mi na hi hi :
Gitloh tuam hang hi het loin, kamsiatna leh accident tuamtuam hangin mi tampi in kumlui sungin sihna tuak uh a, nangma hoih man, kikepzawh man leh na thatang hatna hang hi loin, sihna na tungah hong tun lohna pen Pasian hehpihna hang hi a, mi hampha na hi hi. Tua ahih manin, na nuntakna lui-ah Pasian’ hong kepna hangin lungdam ko in.


2) Ki-en kik in :
Na sepsa nate, na ngaihsutna, leh na kiciamnate ngaihsun kik in. Na sepsate-ah na lung a kim hiam? Na tup na ngim bang-zah tangtung hiam? Society adingin mi noksak na hi hiam? Na nuntakna luiah na lungkimlohna banga na nasepna a om leh nusia-in, a thak, lampi thak ngaihsun in. Pasian deihloh bangte sem na hiam? I gamtatnasate ki-en pha kikin Topa’ lamah kihei kik ni (Kah La 3:40). English historian minthang Arnold Tonbyee in, “Nunglam thu kan masa loin mailam kikalsuan thei lo hi” na ci hi. A nun-takna lui a enkik nuam lo a, a hoih leh hoih lo zong a ngaihsun ngei lo mi pen mi zahtakhuai, mi thupi hi ngei lo hi.

3) Na meetpih hiam? :
Kum 2010 pen a ciamtehhuai mahmah kumin na zang kha hiam? Pianthak kum, LAITHAI kap, ZU dawn, ZA tep, TUIBUK muam leh Pasian leh pumpi in a deih loh tep le muam tuamtuam kikhel kum, innkuan kithutuak kum, lai zawh (passed) kum, siamna thak neih kum, midangte adinga na hoih sep kum etc. in na zang kha hiam? Na meetpihna a om kei phial zongin, tukum 2011 ciangin a ciamtehhuai dingin bangci bangin kalsuan ding cih kingaihsun in.

II.
Kum thakah kalsuanzia thak leh ngaihsutna thak tawh kalsuan kisam hi. A siate paiin, a hoihte zomsuakin, a thak nuntakna-ah nuntak ding kisam hi. Tua ahih manin kum thakah:

1)Kigingkhol in :
Kum thakah na ngaihsutna, na utdan, na lunggulh, na lawmte hong thak veva lo ding hi. Kum lui a na thuak haksatna pawlkhatin hong muak veve ding hi. Na lawm na gualte’n a hoih lo lampi na zuih nadingin hong zawn veve ding hi. A hoihlo lampi-ah hong paipih theih nadingin na puan pan hong kai veve kha ding a, lam na pial theih nadingin hong huausimin hong auhsan lai veve ding hi. Tua haksatnate na tuak ding lam theikhol inla, tua hun cianga na zawh dingdan ngaihsunin kigingkhol in. Lungdamna na ngah ding lam thei inla, lungzinna leh kamsiatna thuak ding na hih lam manggilh kei in. Leitung pen asia apha omna hi a, tuate na thuak ciangin a uanglua a lungdam leh, puklawhna ding a haksatna leh ze-etna a zang lo dingin kigingkhol in.

2) Ngimna/hanciamna nei in :
Ngimna kician nei loa a nungtate mi tungah leeng ngei lo a, tua mite in mite niam-etna leh pampaihna tuak hamtang uh hi. Lo kho mi na hih leh, ‘tua bangin sem leng lawhcing ning’ cih ngaihsun inla, sai (shop) nei na hih leh tukum sunga na van lak ding leh na zuak khiat ding tangpi khat ngaihsutsa-in nei in. Sang naupang na hih leh, tua divisionah ka pass ma teng, a siampen ka hih mateng, hua nu, hua pa sangin ka siam zawk ma teng, ciin ngaihsutna leh ahoih lamah gual-elna nei in. Siamna thak khat beek na neih nading hanciam inla, na manggilh ngeiloh ding na hoih sep kipat kumin zang in. Lungdambawl leh Kum thak pawi ka zatna-ah ngimna kician a nei nih in a ngimna uh hong pulak a, khat in “Tukum bul pan kipan ka innkuan uh a neupen pan a lianpen dongin sawma khat a maana piak ding hamciamna / ngimna ka nei uh hi” hong ci a, khatpa in, “Ko innkuan in zing thungetna neihzel ding ka hanciam uh hi” hong ci hi. A hanciam thei, ngimna a nei thei i hi a, Pasian hatna muangin i sep nak leh tangtung ding hi. Ngimna a thupi lo om lo a, lung nuntak a nuntak kaana a simmawhhuai nuntakna om lo hi.

3) Na bukmun khan in :
Kum 2011 ZBC thulu “Na bukmun kha in” cih ahi hi. Lai Siangtho in bukmun khana, tenna puanbukte kizalsak a, cilbawl lo dingin leh, a khaute sausaka, a khetphimte khenkip dingin hong hilh hi (Isaiah 54:2)

Kum luiah i bukmun bang cia hi a, koi lamah khan ding i hi hiam, cih ngaihsut kisam hi. Bukmun khan nading kibang kim lo ding hi. Kikhop hahkat lo na hih leh kikhopna lamah khangsakin, piakkhiatna - sawma khat; citpiakna tuamtuamah a hat lo na hih leh piakkhiatna lamah khangsakin, Lai Siangtho sim, thunget a hat lo na hih leh tua lamah khansak ding hanciam in. Itna, veina, khualna, mision nasepna lamah zong bukmun khansak ding thupi hi. Eima bukmun khan nading tek tel siam ni.

Tua banga bukmun na khansak a, Pasian lungkim bang na nasep ciang, na suan le khakte kizelin, minamdangte leitang luah ding uh a, a kinusia khuapite na mite tawh kidim ding hi (Isaiah 54:3).

Na bukmun na khansak nading lampi-ah haksatna, kosiatna, engbawlna, langbawlna leh zahpihna zong na tuak thei hi. Ahih hangin tuate hanga lau lo leh maizum lo a, “Pasian in mawhnate phawkden lo a, hong ompih ding hi”, cih phawk in (Isaiah 54:4)

Na bukmun na khan lai takin a khaute sausak a, a khetphimte khetkip ding mangngilh kei in. Khetphim na khetkip kei a ahih leh, thu tuamtuam hangin na bukmun khan pen kisia ding a, maizumna leh bawlsiatna na thuak ding hi. Thungetna leh thuakzawhna tawh na khetphim khenkip in. Pasian in hong panpih ding hi.

4) Mangngilh kei in :
Kum thak na zat ciangin nang leh leitung mite nuntakna a bei hun ding kum khatin a nai lam thei in. Kum lui sangin kum thakah sih na kingap zaw hiam? Ut leh utloh mana a kithuaka a kipelh thei hi lo, mihingte adinga a kisehsa sihna in hong nawk ding lam thei inla, ahihna banga Pasian tawh a sangsiam/thuaksiam thei dingin na lungsim kingaihsun in.

Thukhupna :
Na nuntakna lui-ah mawhna khelhna, a kisikhuai mahmah in zong na gamta thei hi. Nuntakna lui pen nuntakna thakah, asia pen ahoihah kibawlphat nadingin thuhun pen hun hoih ahih lam phawk inla, tuhun nuntakna pen na khantawn nopsakna leh na tawntung nuntakna tawh a kizop lam mangngilh kei in.

Na lungsim uh leh na ngaihsutna uh thaksuaksak un (Efesa 4:23).

~ Daihna Cabin
(ZBYF Tangko : January 2011)


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KUM THAK – 1 Agelh - T. Sawm Lian Description: Rating: 5 Reviewed By: Cinpu Zomi
Scroll to Top