728x90 AdSpace

Hot
Menu
Zon-ol na Donate

Latest News

Kumthak Ah Nasep Thak. Agelh – Hau Za Cin

Kumthak Ah Nasep Thak
Agelh – Hau Za Cin


Singapore ah kumthak a tun sim in, a diak in Sen Kumthak zawh ciangin mite in nasep khek zangzang uh hi. Ahang pen 13th month salary/bonus ngah khin, nasep khek leh khasum a ma kum sangin tamzaw ngah hamtang ahih man hi. Zomite adingin nasep khek ziauziauna gam ah i om ciangin bangcih ding?

1.Na seppih lawmte tawh kizopna tatsak kei in. Naseppih lawmte pen hun khat ciang i seppih kik ding hithei a, khatvei ciang i nuai ah hong lut thei in, khatvei ciang i tungah hong vaihawm thei uh hi. Tua manin lawm leh gual, seppihte te pen kuamah deidan lo, kuamah khasia saklo ding hi hang. Kitelsiam takin kikhawl ding hang a, nasep dangah i paisan leh zong amau tawh ni khat ni ciang semkhawm kik ding hi hang cih lungsim a koihsa in kikhen ding hihang. Lawm lui kem inla, lawm thak teng siam in.

2. Hun kilumlet manlang mahmah ahih manin tuni a nasep pen zingciang na sem lai ding hiam cih theilo na hih manin na Resume hoihtak in puahtoto in. Resume pen na nasep khempeuh leh na siamna khempeuh na khumna laidal ahih manin na nasep zawh thak, na laitan zawh thak, siamna thak na neihte na Resume ah khum pahpah in. Diah lecin a kisap ciang guang mangngilh, guang manlo, ahih leh a ni, a kha tel nawnlo cih om thei hi. Khat veivei kimangngilh suak kha thei lai hi. I siamsa, i sepsa khat i lawhcinna laidal tungah gelh khalo ding cih pen na mahmah a, pammaih mahmah hi.

3. Nasep na siam semsem bangin na nuntakna ah zong a manpha na hoih nono sep ding kipan in. A kipan khin na hih leh zopto suakin. A zomto sa na hih leh mite pattah kipan in. Mite pattah na kipat khit leh mipi makaih toto in. Tua hih leh na nuntakna mannei na sa dinga, na lung hong nuam mahmah ding hi. Nasep lah nuam, nuntak lah nuam cih pen mihing khatvei nuntak ciatciat ah mi hampha ahi hi.

4. Na siamna behlap den ding cih pen a hoih pen hi. A diak in gamdangah nasemte pen kumsim nasep zia kikhek den, kipuahto den ahih manin nasepdan thak a om simin theihsawm, sinsawm, hihsawm in manlah ding hi hang. Tua hi leh lawmte muhna ah ‘hanciam, kuhkal’ cih kingah ding hi. A kisin utlo, a kipuah utlo, a tu neepnaapte pen kuamah in a ban pan kai in phong to manlo ahih manin kitaisan ding hi.

5. Na siamna leh na nuntakna hong kilamsang semsem ahih manin nang hong pantah ding mi masa, na muan, na suante tawh kinaih in. Na pilna a khantoh bangin na ciimna zong kibehlap ding ahih manin nang hong makaih ding, hong thuhilh ding, hong lamlak ding, hong khoi ding (adviser) hoih na kisam hi. Na kalsuanna hong muhpih ding, na khantoh hong theihpih ding, na siksan hong muhpih ding mi na neih kul hi. Upa leh thutheite tawh kizopna kip nei inla, nang leitung pilna bek ahilo upa leh khanghamte kiang pan pilna leh ciimna, leitung paiziate sin toto in.

6. Tua mah bangin nang bek a khangto hilo in nang zong na pattah ding khangno leh naupangzaw te telkhia inla, mite pattah in. Na pattah siamna tawh kizui in mite in nang hong pakta ding uh a, nang zong na lawpna khang semsem ding hi. Vaihawm dan, vaisai dan, nasep dan, sumzek dan, makaih dan cihte nang theih bek hilo in a thei dinga hoih nasakte pattah mengmeng in. Makai hoih leh mipil khat ciamtehna khat pen a nungthuap ding mi bangzah pattah zo hiam cih ahi hi.

7. Midang namdangte theih sawm in. Leitung pen minam tuamtuam kihelzauna hong puang deuhdeuh ahih manin minam tuamtuam tawh kikholh theih ding, kilawmtat ding hong thupi semsem hi. Tua manin nasepna zonna ah, nasepna ah, nisim nuntakna ah zong mipihte bek hilo in midangte tawh kisawh khalo in omtheihloh hi. Tua manin Zomi bek tawh kikhawl ding cih hinawnlo in, Zomi khit ciang midang tawh zong kikholh ding a thupi mahmah hi. Na mipihte tawh kikhawl lo a minam dang bekbek tawh kikholh cih leuleu bel a kisam khat om cihna hong hikik ding hi. Tua manin lawm bawl siam in.

8. Thuthak a kizak zangzang mah bangin thusia zong kiza pahpah ahih manin nasepzia ah thu khentatna bawl manlang lua kei in. Nasep khat hoih ei, summuhna khat hoih ei, meet ei cih bek zakna tawh thu khentat pah kei in. Na tel ciangin na sum, na hun, na vai tampi mangthang khinta in na kilehkik hang na sup tamlua khin thei hi. Tua manin nasep laih pahpah zong hoih khin tuanlo a, sumbawlna laih pahpah zong meet khin tuanlo in, thuthak khempeuh zong hoih khin pah samlo hi. Pilvang siam inla, thu khentatna bawl manlang lua kei in. Kidawm in gamtang siam ding kisin in cihna hi.

Kumthak ciang tua hih teitei ning na cih leh zong limtak ngaihsun masa, en masa in khentat pan in. Mite in hih tah ci in nang zong bawhpah kei in. Mite in a hoih in gentah cih man tawh umsuk pah in bawh pah kei in. Na mit hak inla, na bil dawh inla, na kam ka nai kei in. Na lungsim ah lungmuanna kiptak na neih khit ciangin kalsuan pan in.

Topa in kumthak ah nasep dan a thak, nuntak dan a thak, ngaihsut dan a thak leh lungnopna a thak tawh hong kalsuanpihta peuh hen.

Hau Za Cin
Phuitong Liim

www.hauzacin.blogspot.com



Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Kumthak Ah Nasep Thak. Agelh – Hau Za Cin Description: Rating: 5 Reviewed By: Cinpu Zomi
Scroll to Top