728x90 AdSpace

Hot
Menu
Zon-ol na Donate

Latest News

SUANGPI MUALSUANG (1931-1981) Laibu.

SUANGPI MUALSUANG
SUANGPI KHUA TUIPHUM PAWLPI
KUM SAWMNGA CIN’ (JUBILEE)
1931-1981
Ciapteh na

Sing Khaw Khai

SUANGPI MUALSUANG
Laimai Masa

(1) Tuhun kawlgam leitangh maitang tawh, Thangmualpi na piang khawm hi. Tua mualpi lukham in, mualdungneu khat, ni tumna lam ah ki khung in, Phului leh Sialtaang lui ki tuah na ah sun suk hi. Tua mual pen “SENA MUAL” ki ci hi.Tua Senamual lai ah suang tumpi khat, mualzang khaktan in lum a, tua pen “Suangpi” ki ci hi. Tu ma 1855 kum hun pawl in, sunghta putu pasal guk in, tua suangpi dang ah khua na saat uh a, tua khua a min “SUANGPI” na ci uh hi.

(2) Taanglai in pute pate in,Tibet gam pan in, Gunkhawm gam ah,tua pan in tuhun saizang gamsung ciimnuai leh luikaa ah khua hong saat in, tua mun pan in asuan akhak te, tuhun Tedim gamsung mun tuamtuam leh Indiagam kawlgam dong ah na ki theh thaang khin hi. Pu SUAN TE in tuupa 4 na nei in, tua pasal 4 teng in Kalzang khuapi pan in, Suante cih beh min na pua uh hi. Pu NAULAK in tuupa nih na nei in, Dimpi khua pan in, tua ii suan teng in, “Naulak” cih behmin na pua hi. Tua mah bang in, Pu KAIH THANG ii suanteng in, kalzaang khuapi hun in “Tomu” cih beh min na ngah uh a, Pu BUANSING suanteng in, ciimnuai ma hun a ki pan in, “BUANSING” cih min na nei khin uh hi.

(3) Tuhun in Tedim mite pen, Dim, Guite, Hualngo, Khuano, Saizaang, Sihzang, Tedim, Teizang, Thahdo, Zo, ci in mipawl pawl (10) in ki ciamteh hi. Tua mipawl lak ah, Suangpimite pen, KHUANO pawl ah kikoih hi. Tuhun minam pawl kilawhna pen, behmin pu-min pa-min tawh kilawhna namminte sangin teen na mun leh gam nuntakna leh kampau ngeina zatdante tawh kizui a kilawh na hi zaw hi. Ahih hangin tuhun in, mi pawlkhat te’n, tua pen behmin nammin bangkhat in ngaihsun uh a, khuanote pen, ‘nam neu’ ‘sila nam’ bangdan in niam-et tuan uh hi. Tua a hih manin, Suangpi khua saat pu leh pa te pen, kua suan kua khak ahi uh hiam, cih ka kan a, ka mu hi.

(4) Suangpi khua pen, Suante, Naulak, Tomu leh Buansing, behnam pasal gukte ii khua saat khua a hihi. Suangpi khuasat Makai Zong Tuang ii pu le pa te pen, taanglai Dimpi khuasat nam, Dim khuapi uk El Thuam ii a suan a khakte na hi uh in, Lam Tuang, Lam Kip leh Ngiak Tun te pen, Mualbem Khan Thuam Khan maa, Kalzang khuapi uk, Suan Kai ii suan le khak te na hi hi. Suangpi khuasaat Dongh Ngen pen, Hau lua, lian lua ahih man a, “tungah aksi phe leplep, nuai ah Tomu phe leplep” a ki ci, mikang gaalte athau uh pia lo in, “ahui atang a na pia zaw” minamte na hi uh hi. Hong Tuang pen, Ciimnuai khuasaat, khuasaat tuikhuat nam, Buansiingmi Phaipi hausa Hang Sum, “Kalzang Sung Hang” te a na hi uh hi.

(5) Tuhun in, ‘Suangpimi’ ki ci, tua pasal gukteng ii suante pen, Tedimgam, Kawlgam vaigam dongah kitheh uh a, kumpi na sepna ah, abu amang na suak in, Leitung pilna le siamna lamah zong, B.A, I.A, na ong thei uh hi. Suangpi khuasaat leh tu ki kal in, Pute Pate in, Suangpigam leitangh tungpan in, mimza, taangza na pua in, na tong in na haang uh hi. Suangpikhua ah gaalmanglu samanglu na tun in na mualsuah uh hi. Suangpikhua pen Tedim Zongeina a kikep na mun zong a hihi. Mikang gaal hong khang a, ahui atang tawh na vaitut uh hi. Sukte leh Sihzang tawh sial ban in, ‘miau uk’ na suam uh hi. Suangpigam ah Japan gaal hong leet a, Suangpigam sungpan Japan te na beng khia uh hi. Kawlgam hong piang a, akip akho na ding in asi san na bua uh hi. Tua bangin Suangpikhua ah taangthu na piang hi.

(6) Tua hi a, Suangpi ii tute, Suangpi ii tate, ahong liat uh a, a hong hauh uh leh, a pu uh gui azuih na, apa uh gui azop na hi zaw kha ding hi. Tua bang taangthu te, Tedim Zolai a kizat laitengin, Tedim Zokam abei matengin, tu leh tate in a ciin’ ciin’ dinguh deihna in hi laibu a hong kibawl a hi hi. Tua bangin hih laibu amin ding, “SUANGPI MUALSUANG” ka ci hi. Hih “Suangpi Mual” bawl la in, anuai a bangin ka cihi.

     (A) Suangtui vangkhua aw ka ngaih manin, pupa khan sul in va kan ingh ee.
     (B) Pupa khan sul a ka kan leh, mual lumsuang tembang ka deih hi ee.

     (A) Anglai tansiam tuan a pupa Dimtui Lunlai te hi ee.
     (B) Mim bang pian na sen puvonte kaltui lun laite hi ee.

     (A) Suangtui vangkhua lia le taang aw, ih laamtual sai siam leng ee.
     (B) PUPA khan a siahtaang kai sa ih laamtual sai tuan leng ee.

(7) Hih “SUANGPI MUALSUANG” bawlna in dangka ks.3000.00 val bei hi.

(8) Hih laibu sung a thute leh la te, akhang akhang ah ki ciamteh suak ta hen.                                                         
  (SING KHAW KHAI)

( Hih pen Suangpi mual suang laibu  laimai masa ahihi.)

-----------------------------------------------------------------------------------------


Laibu hawmkhuan ngahna thu.

Tizua Ohsuh Pyituh councilzum,
Suangpi khua.
Lai nambat. Spi/-4/81
Nimit.14-3-81.

To,
           Using Khaw Khai
           Building No 14, Room No 10,
           UWIZARA Ward, Rangoon.

A thu: Suangpi Mualsuang cih Laibu hawmkhiat theih nang.
            Atung a thu tawh ki sai in, Suangpi khuami zangkung khua a om, U Sing Khaw Khai in, Suangpi Mualsuang cih min laibu abawl pen, Suangpi Ohsuh Pyituh Council tungah hong ngen ahih manin, Ohsuh Pyituh Council in, hawmkhuan zuakkhuan ki pia hi.

                                                                                 Sd
                                                                     (ZEN KHAW HAU)
                                                                           Ohkathah
                                                             Tizua Ohsuh Pyituh Council
                                                            Suangpi Tizua Tiddim myonee


THUPATNA

1.         Khamtung Tedim gamsung, Suangpi khua ki ci “khuano” khua khat ah kum 1935, January ni (3) ni zan nai 10:30 hun in, ka nu NGAIH DIM sungpan leitung mihing khat in, na hong piangkhia hi hong ki ci hi.

2.         Ka nu sukongkhak nautum bel ka hih manin, nau cin’ ding ka nei kei a, ka gol deuh ciangin sial ka cing hi, Sialcin leh laisim ka zom a, Phunom Zolai saang ah, Kum 1945 in tan (1) ka sim hi. Tua pan in, Tedim Manglai saang ah ka kah a, kum 1956 March kha in, Tedim Manglai sang pan tan (10) ka ong hi. Tua kum mah in, Yangon sangpi (University) ah ka kah a, kum 1960 B.A tan ka ong hi.

3.         Kum 1960 mah in, gaalkap ka lut a, 1974 ciangin bawk thum (Captain) tawh pensen ka la hi. Kum 1966 pan ki pan in, Lanzin pati sungah na ka sem hi. Ka nasep pen Nainganzi nasep ahih mah bangin, Nainganzi thu ka kan a, Kawlgambup taangthu pan kipan Zomite tangthu dongin ka kan hi. Tawlanzi kumpi hong khan ciangin, Kawlgam minam khempeuh, ih pu ih pa ngeina tawh, anungta ciat sa, mikangte in lum tei tawh hong suan a, English Innpinu ii siahgam khat hong suahna thu, minam khempeuh khua-ul leh sisan tawh Kawlgambup suahtakna ih suhkik ih ngahkik na thu, tua suahtakna akip akho semsem na ding a, Kawlgam minam u le nau khempeuh ih ki it ih ki lem loh a phatmawhna thu, cih thute ki bulphuh in Kawlgam Nainganzi ki sem hi.

4.         Tua thute a ki hilh na dingin Kawlgam Pu le Pa ngeinate ki kanpha a, mikang gaal ih do na te khempeuh ki phonglo kik in, gam itna lungsim ki satsuah kik sak hi. Zomite in zong mikang mivom na do in, Kawlgam u leh nau dangte mah tawh a sisan uh na bua khia hi. Tua bang a, Zomite gam itna taangthute lai tawh ki at pha kik hi. A hi zongin, thu ciaptehna laipawl a om nai loh manin ahi zong in, a hih kei leh, eimau pu le pa te gamtatna tengbek mah thupi lua ki sa kha a hi zong in, adiakdiak in Teddim mite i mikang galdona thu te ah a kicing in ki at ngei nailo hi.

5.         Nikhat Rev. Pu Thang Kam in miau’ uk suamna ding in ih khua khuathang khua na thei hia Phung u’ah sial kiban hi, hong ci hi. Tua ka thuzak in ka lungsim hong phawng pah siau suau aa, u kam aw tua ahih leh i khua taangthu na theihbang na ciamtehna bang in hong pansak in ka cih ciang in Suangpi khuasaat thu, leeitang thute hong at sak pah hi. Tua Pu Thang Kam ii hong patsak thu laingil teng tawphah in Suangpi khua tang thu at ka ki pan hi. Ka at phot leuleu ciang in, mong hong nei toto a, thu kan tawh at tawh ka thuah aa. Kum 1978 June kha a ka kipat kum 1980 October kha in ka hampi ka zawh bawl hi.

6.         Hih laibu sungah Suangpi mite pian khiatna, beh khang tangthu, suangpi khua sat thu, Suangpi khua khantohna

7. Zomi te i vantung leitung thu tawh kisai aa, ngaihsut muhna leh gamtat luhelna ngeina te, Zomite i lokhawh singpuak nuntakna ngeinate, sih leh nop hun aa gamtatna ngeinate, dong in ka at hi.

Tua bang a hong ki atna, a atpa up leh uploh hoihsak leh hoihsak loh thu tawh kisai lo in a piang ngei a ki gen ngei bangbang a pianna a ki gen ngei bangbang in ki at hi. Tua in Zo ngeina tawh kisai in dot theih ding etteh theih ding in a ki at khinsa laubu pawl na om nailo ahih manin pulepa pan a kipan ahunhun, akhangkhang aa, hong ki gen suksuk thute tawphah in hih lai at pa mahmah i a khan sung hun aa, Suangpi khua sung nuntakna ngeina thute hong ki at ahihi.

8.         Tua bang a ki at thute khempeuh man kim lo ding hi. A kikhelh leh mail amah amanzaw ahoih zaw in khangnote in na puahpuah ta uh hen. Zo ngeina cih min tawh laibu sungah aki khum na ding deihna bek hi aa, mi khat peuh beh khat peuh melsiat nopna, zahpihnop nate hang tawh ahi zong in, ahih kei leh phattuam poktuam nopna hang tawh a hi zong in hih laibu hong kibawl hilo hi.

9.         Hih laibu bawlna huhau a, a tuamtuam pan a honghuh hong pan pih hong hanthawn nulepa lawm leh ngualte khempeuh tungah tampi tak in ka lungdam hi. A diakdiak in hih laibu hongpian khiat theihna ding aa, hong patsak Pu Thang Kam tungah ahi zong in, zin leh vak siksan aa thu hong kansak pa, tano Khai Khen Thang tungah ahi zong in, Thu kaihzia leh thu ngualh zia lam ah ka kiang pan a, a hong huh Khai Ngen Zo nu tungah ahih zong in ka lungdam diak hi.

                                                                     Sing Khaw Khai

*************************************************
Suangpi Mualsuang Laibu in Zomite ading a manpha mahmah Mualsuang ahihna tawh kizui in Zomi eLibrary / Laibusaal in, hanciam in a-ki teikik/type kik ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

1 comments:

Item Reviewed: SUANGPI MUALSUANG (1931-1981) Laibu. Description: Rating: 5 Reviewed By: Cinpu Zomi
Scroll to Top