728x90 AdSpace

Hot
Menu
Zon-ol na Donate

Latest News

GUALZAWH THEIHNANG NUNTAKPIH AKUL THU PAWLKHAT

Gualzawh theihna’ng Nuntaakpih akul Thupawlkhat



“Na nuntakna-a thupit lam na tel mateng,

na hun thupi na sa thei ngei kei ding hi.
Tua mah bangin,
na hun na thupi ngaihsut mateng,
‘na’ nasem ngeikei ding hi.”
M. Scott Peck



Gualzawhna-a ngah nuamlo kuamah omlo hi. Naupang khat nagawn apil, asiam leh a gualzo ut hi. Mi khempeuh pil ding leh hauh ding ki ut ciat hi. Tuaciang bek hilo in, leitung bup ah ihmin bangh a thangzo hi leh a lungdamlo kuamah omlo ding hi. Tua bangin gualzawhna, minthan-na, leh lawhcin-na te ih ngahtheih na dingin ih nuntakpih ding a kisam thu pawlkhat om hi, tuate ahih leh:- Sunmang neih kul. Stephen R. Covey in “na khempeuh nihvei kibawl hi. Lungsim sungah muhkholhna leh bawlkholhna om masa lo in mit-tawh muhtheih bawlkhiatna piangthei ngeilo hi. Na lungsim sungah na ngaihsut bang leh nageel bangin a semkhia theipan nahi hi.” Lungsim sungah muhkholhna thupi mahmah hi. Mi gualzo ihcih te in sunmang neiciat uh aa, tua-a sunmang te uh a thupit lam zongh tel sinsen uh ahih manin, hangsan tak in mainawt in hanciam ngam uh-hi.


Dr. Stephen R. Covey


Mawtaw bawlthei masa, Henery Ford in khatvei Mawtaw Engine tuampian khat bawlkhiat ding sunmang in nei hi. Tua-abawl nop Engine namte tuhun in V8 kici hi. Ford a sunmang tawh buai mahmah in a nasemte pawlkhat tawh a muhna zia te laitawh ciamteh keei uh-hi. Nikhat Enginneer te lak uh-hi. Munthum munlii ah lak kawikawi uh-hi. Engineer khempeuh in Ford kiang ah hi bangin genkik ciat uh hi.

“Hih muhna pen engineer ngeina tawh kituak theilo hi. Hih ngaihsutna piangthei lo ding hi.” Ci kik ciat uh-hi.

Ford in “piangthei mah ding hi. Hong hanciam pih un.” Ci thapaai mawk hi. Engineer te in a cihngei bangh un, “piang theilo hiveh aw…” cihsan zeel uh-hi. Ford in: “piangthei mah ding hi. Hun sawtpi abei zongin phamawhlo hi… hong hanciam pih un” citeeiteei hi.

Engineer te in zongh kha (6) sung hanciam uh hi. A cihna ding uh theilo uh-hi. Kha (6) hun laak beh in hanciam leuleu uh-hi. Hizo tuanlo hi. Ford in “lungkia kei un… hong hanciam pih lai un” ci teeiteei aa, engineer te in zongh hanciam niloh in, hunsawt sim khitteh, Ford’ deihdeih engine koici bawl ding cih idea ngahkhia theita uh-hi. Ford in: “lamdang lo hi… ihmuh bangh ihnagh ding a ngeina ahi hi…”

Khatvei, Midwestern College ah Pasian nasem khat khualzin in pai hi. President pa’ inn ah zantaam hi. Tuapa pen Physics leh Chemistry ahilh professor khat zongh ahi hi. Nitaak an a neek-kawm un kam ki kumkum uh aa, Pasian’ nasem Pastor pa in: “mikhempeuh a sawtlo in liangko kikim ta dingin ka um hi. Bang hanghiam cihleh, nate’ thu khempeuh lah mipil te in theikhinzo ta in, a omngeilo bawltheih bawlmawh khempeuh lah ki bawlthei khinta…” acih leh, professor pa in sangthei hetlo in: “hilo ee sia… a ki bawlthei nailo bawltheih lai ding tampitak omlai hi…” a cih leh pastor pa heh mahmah in,”…aw… tua ahih leh nang na bawlsawm na peuhpeuh khat hong-gen pah dih vele tuabang ahih leh?” Ci guapguap hi.

Professor pa in, “hilo hi sia aw… ke’n kahih thei loh hang’ hih theih ding tampi omlai cih ka thei hi. Tuzawh kum (50) pawl khawngah mihingte vantung ah leengthei ta phial ding uh hi ei, na en gige lecin.” Cimawk hi.

Pastor pa in: “ha!!! khiatna neikei mahsi. Mihingte vangtung ah leengding cih bang. Tun’ bel dawite a leengleeng mah vevua…” Cih sanziau leuleu hi. Tua pastor pa pen Wright ahi hi. Tapa nih nei aa, a tapa te ahih leh a pa’ sangin a muhna uh zaizaw tham hi. Sunmang thupi nei uh aa, tua-a sunmang uh a sawtlo in taksuah sak zo uh-hi. Pilna neilo uh-hi. Zongh-hau beeklo uh-hi. A sunmang uh a thupit lam thei-in, hanciam uh ahih manin gualzawhna ngahzo uh-hi.

Tua Unau te ahih leh Vanleeng bawlmasa ahi, Orville leh Wilbur te ahi hi.



Thumaan-na nuntaakpih kul

Thumaan in a ciampel ngeilo Vaphual tawh a ki ciamteh zomi te ih hihi. Pu le pa te’ hunlai-in thumaan-na nuntaakpih takpi uh-hi. Tuhun ciang bel Vaphual lim bekmah kisuai kawikawi-in ki nuntaakpih nawnlo hi. Thumaan thutak a gente peuh zuau gen tangzaw in, zuau gengen te peuh mi thumaan suakzaw behlap phial ta hi.

Bangbang ahi zong, gualzawhna lampi azui mikhat in bel thumaan-na a nuntaakpih loh in a tupna tungzo lo ding hi. Tanglai-in Sengam makai te in agam uh it mahmah hi. Galte in a lakzawh ngiatloh ding deih uh ahih manin, agam uh khulhpi tawh umcip hi. Tua kulhpi Great wall ci-in leitungbup ah tuni dong thang vangvang lai hi. Tua kulhpi saang mahmah ahih manin kua mah in kantan theilo hi. Hoih mahmah in, sah mahmah ahih manin, a phukham zo omlo hi. Kulhpi muanhuai mahmah ahih manin gam-mite khempeuh lungmuang mahmah uh-hi. Ahi zongin, kulhpi a kilamh khit kum (100) sungin (3) vei sitset galte in Sengam vatzan zihziah mawk uh hi. Galte in kulhpi phukham lo in, zongh kantan lo uh-hi. Khulh kongcing te tawh ki thuzawh uh ahih manin lau hetlo tak in, kulh kongpi mah zui-in alut uh ahi hi. Gam makai te in kulhpi cian ding bek naphawk in, thumaan gamtatna ki hilh ding mangngilh kha uh hi keileh, galte in thumvei tak la zolo kha ding hi.

Thumaan-na lo tawh gualzawhna ki ngah zo ngeilo hi. Thuman-na lo tawh mi kisuak theilo hi. Mang te’n paunaak ah:- “na neih na lamh khempeuh abei zongin, bangh mah na sumh naikei hi. Na cidamna ahoih keileh pawlkhat a sumh nahi hi. A hi zongin gamtatna hoih na neih kei leh na khempeuh a sumh khin nahi hi.” Thumaan lopi tawh nuntaakna hangin bang zahin kisuplawh thei hiam cih, H. Chomondelay in lakam aphuah khat om hi…



“Simleitung gua bangh hin’ na, zaangpeh siik bangh to lah ee…

Va bangh hamsa pupa te’n zongh ee…
Min leh vaang hailawh liang uh ee…
Judah in dangka sawmthum tawh khek ee…
A Topa azuak in ki ngaihsun kha ee…
A ma nuntaakna ngiat zongh a zuak-khak lam mangngilh ee…”



Cihtakna nuntakpih kul

Khatvei Africa gam ah a om Pasian nasem te’ kipawlna khat pan David Livingstone lai kikhak hi. Tua laikhak sungah “… Pasian’ nasep nading munhoih leh lampi kihong natheih a om leh hong zasak in! Hiah, Pasian’ nasem-nuam-mi om hi. Kong paisak thei ding uh-hi…

Livingstone in laikhak thuk-kik in “… munhoih leh lampi nuam bek ah na-asem nuam-mi ahih leh hong paisak-kei un! Kadeih kei hi. Kei tawh a kithuah ding mi ahih leh lampi haksa ciang bek hilo, paina ding lampi a ki siatcip nangawn ciang, nungkik lo in a mainawt-teitei ding mi kadeih hi…”

Cihtakna neilo pi-in gualzawhna kingah theilo hi. Lai Siangtho sungah zongh ‘haksatna natuah ciang, nalung akiat leh a ginalo mi nahi hi.’ Ci-in kigelh hi. Haksatna ki hello nuntaakna cihbang omlo hi. Tua haksatna sungpan cihtakna tawh nungkik lo in hanciam na in zawhna piangsak zo bek hi. David’ gelh Late Lai Siangtho bup-pi en lehang, a tamzaw haksatna sungpan gualzawhna-a ngahna hang aa-a lungdamna thu vive ahi hi. Mi tampi takin Pasian muhlawh in, a pianthak lawh uh, nungzui Paul’ laikhak te zongh Thonginn sungpan agelh vive himai hi. Leitung ah mi minthang te khempeuh zongh a ki patkhiatna uh haksatna kuampi vive mah ahi hi. Leitung tangthu bekbek Vol. (20) ciang bangh a gelhzo Francis Parkman, leitungbup ah mihau minthang mahmah Fred Smith, Pasian deih penpen itna nuntakpih in leitungah ki-itna aphut zo Mother Teresa, gam leh lei makaih in mitampi sihna ding sungpan a honkhia Winston Churchill, muhna thak leh ngaihsutna thak tawh leitung a khangto sak Marie Curie, a kipan mi minthang tampi te ahih uh leh, thumaan-na leh cihtakna te nuntak pih in, haksatna sungah a lungkia het lo te ahi uh hi.

General George Washington, a nasep hunsung in Revolution War tawh kitalsik hi. Thumvei bekbek galzo hi. Lungkia lo in hanciam hi. A nunung na-ah British te in gallel takpi ta hi. Yorktown ah Washington tawh ki lemna bawl uh-hi. Tua lai ah British general Cornwallis in America Commander pa’ tungah hi bangin gen hi.

… Sir aw, nungkiklo in na mite uh na makaih zawhna uh leh, a lungkia ngeilo ding Christian nungzuihoih nahihna hangun kong pahtawi hi…” Hihi… ihtup ihsawmna ih tunzawh na dingin nungkik hetlo in, cihtakna nuntakpih aa, mainawt-tawntung ding kisam hi.



Pasian muanna nuntakpih kul

 Pasian in amah bek ih muanding lung-gulh mahmah-hi. A mah banghzah ciangin muang ih-hiam cih zongh theinuam mahmah hi. A mah a muang ngiat te’ tungah lungdam mahmah ahih manin, a tawntung in ompih in panpih ngiat hi. Pasian in tuazah in mihing te hong lung-gulh mah bangin, mihing te in zongh amah ih lung-gulh loh in hitheilo citciat hi.

Mihing te in Pasian lo tawh bangh mah ki hih zolo na pi, Pasian kihel peuh leh a hitheilo omlo leuleu hi. Khat veivei Pasian’ hong ompih lam ki mangngilh in ei leh ei bek ih ki ngaihsut khak ciang, lungkiatna leh thaneemna in ih lungsim hong luahcip thei hi. Watchman Nee in a laibu gelh ‘The Normal Christian Life’ acih sungah “Pasian’ tate in dahna leh khasiatna-atuah hun uh ciangin, a lungtang sunguah aneih uh lungdamna thumanpha te a phawk kik theih dinguh thupi mahmah hi. Na ki sapna khempeuh hong cingsak thei ding vanzat hoih mahmah khat na sungtawng ah na neih gige lam na thei hiam? Na teen-na khuapi nangawn ki khin khiatsak theih nading vangletna naneih lam na theikha hiam? Leitung khempeuh a lokzo ding vangletna na neih lam ee, na kithei kha hiam? Deihsakna tak tawh kong-genlai ding hi. Pasian’ kha siangtho sungah a suak-kik-khin mikhat nahih leh na sungtawng ah Pasian nungta hi.” A sungah Pasian’ kha siangtho a nungta mikhat a dingin banghmah lungneu nading leh lungkiat nading omlo hi. Bang hanghiam cih leh Pasian in hihtheihloh neilo hi. (Luke1:37).

 Pasian in Samson a ompih laiteng, Samson in lelh neilo hi. Pasian in ompih ahih manin La khaguh bek nangawn tawh a galte tampi thatzo hi. David in zongh Pasian a muan mahmah lam Pasian in thei-in, lungdam ahih manin a vangletna thatawh Goliath zawhpih-hi. Tua banglian mah in Pasian vangletna bek mah tawh Jericho kulhpi kicim hi. A nuntaakna sungah Pasian bek muan leh suan in-nei-in, thumaan-na-a nuntaakpih; bangbang haksatna leh ze-etna-a tuah-hangin lungkia lo in cihtakna-a lenkip tawntung, Joseph ahih leh Pasian in mawk-koih lo hi. Mite’ tungah lamsang takpi-in, leivui lak pan kumpi-inn tut takpi hi. Pasian’ nasepna ihmuh theih na dingin ki niamkhiat natawh amah bia in ih muan ngiat-theih ding kisam hi. Watchman Nee in:- “Topa-aw na khempeuh nang a’ hi khinta hen. Ka nuntaakna mahmah zongh nadeih na banghbangh in piang ta hen. Na deihna tawh a kituaklo thudang ka ngaihsun ngeikei ding hi, Pasian aw… ci-in ih ki ap ap masak loh in ih Topa-a biaktaak taktak a hih lam koicih muhtheih ding ih hi hiam?” Ci-in gelh hi. Ih hihna khempeuh tawh amah muangin, ama deihna bangh in ih nuntaak naak leh ih muanna zah ciangciang, ama’n hong sepsak ding ahih lam zongh kamciam hongpia khin lai hi.

Pasian anei mikhat a dingin zawhlah ding omlo hi. Thugen siam, laigelh lah siam in makai hoih khat lah ahi, John C. Maxwell in: “Mi gualzo khat ka suahtheih na dingin Pasian ka theih masak photphot kul hi. Tua khitteh kei a dingin Pasian in bang hong deihsak in, bang hong sepsak nuam hiam cih ka theih ding ki sam leuleu hi. Tuateng ka theihna tungtawnin ka neih vision (sunmang) ahih leh manpha in thupi hi. Tua ka sunmang ka ngahzawh na dingin ka hihna khempeuh sungkhia in ka hanciam a kul ding ahi hi. Cihtakna ka nuntaakpih kul ding aa, thumaan tak in ka gamtat kul ding hi. Tua teng khempeuh ka neih khitteh midang te ading khaici manpha ka vawh ding kisam hi. Hi bangin ka nuntak theih takciang, mi gualzo ka hita hi cih ka um hi.”

Source : 
Khaikok Guite

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: GUALZAWH THEIHNANG NUNTAKPIH AKUL THU PAWLKHAT Description: Rating: 5 Reviewed By: Cinpu Zomi
Scroll to Top