728x90 AdSpace

Hot
Menu
Zon-ol na Donate

Latest News

I Gam le I Lei Kemsiam Ni. Gelh - Lucas Cin Than Kham





Ih Gam leh ih Lei It in Kemsiam Ni.

Gelh - Lucas Cin Than Kham
Photo Credit : Cinpu Zomi


Thupat na
Ih gam ihlei cihciang namnih in kigen thei hi. Khatna ah lungmuangtak aa ihten na leh ih nuntak’zon na kumpi ki ukna thuneihna huamsung teng cihnop na hi-in, anihna ah tua huamsung leisung leipua aa om muhtheih muhmawh, hinna a nei leh a neilo na khempeuh; azu ava, sapi saneu, singkung lopa, asing asuang, tuisik, mihing te leh tua khempeuhte kibusakna gam leh leitang cihnopna hi. A tom in ih logam, luidung luivai, gamlak leh tua sung aa om khempeuhte ahuam hi. Gamlak niimleh khuahunhoih in guahtui maan aa, gamkolh leh khuahun sia in guahtui maanlo in gamkeu sak hi. Ei singtaang lokho te leh guahtui bel aa tuilo kho tezong guahtui maankei leh bangzahtak ih hanciam hang ih khamkhop ki kho khiazo lo in kiallawhhi hang. Logam, singkung lopa leh singhalh kemlo aa thaangzat man in aminthang tangkhuapi te mangthang in tu hunciang tangthu bek in kigen in kisim hi. Tua ahihman in logam, singhalh leh gamlak leh leitang kepsiam kul hi. Hih te pen asiampa ihpa Pasian in leitung ah mihing te aa kipan hinna nei khempeuhte nuntak zonnang leh khuasak nading go’ dia ongsiamsak ahihi. Go’ ih cihciang ongpiang lai ding tukhang takhang te a’ dingzong hi aa, en’ ana lepsak ana batlaksak suak hi hang. Ihkepsiamleh khang khempeuh in nuntakpih suakthei ding aa, khantawn kimang dinghi. Aleipuak zui in ihkepding zia zong kibanglo ding hi. Ahih hang, a thupi masa pen in mipi mahmah in hibang aa kepkuldan thuktak aa thei aa ih lungsim tawngpan  sepnopna neihding thupi masa hi. Tua ding tup natawh hihlai kong at ahihi.

Leitung mihingte nundan, khuaheekdan leh khuahunsiat zia
Mihing te ihkhantoh semsem leh kiduhhop kihuaiham semsem in, alimkhempeuh ciamkha ki nekhanuam aa anuam akicikhempeuh tanuam in ahoih akicikhempeuh ngahnuam tang’nuam in, tuate ngahzohnang in leisung leipua aom na khempeuh ciangtan neilo tak in zangtum zialtum ziahziah ihhihman in; gammaang zapipi te vatsiang in setzung khuapisuahna pan, ih mawtaw zat te’meikhu te, setzungte meikhu te, lohal leh gamkang meikhu te pan  huih hoihlo kaabon oksait te, khualum votsakna-aircon te leh tuikhalkuang te’pan huihhoihlo(fluro carbon) te vanlam ah khahkhiattamlua ahihman in – in ihtenna leitung pen ongtuamcip aa nii pan nizangte leitung ah onglutpaisuaksak theihhang ciahkiksaktheinawnlo ahihman in nisanuai aa tuipuantawh ihkituamcip ciang asatmahbang in leitung khuahunpen sagawp sak hi. Tua ahihman leitung saklam leh khanglam tuikhal te tuisuakgawp ahihman tuikhal nuai aa a omcip methane gas te ongpusuak khia aa leitung tuamcip huih hoihlo(gas )dal sahsak semsem ban ah alauhuai nizang ongna dalsak ozone huihdal vang liansak semsem aa tua alauhuai nizangte ziak in natna hoihlo/lauhuai tuamtuam tam semsem aa, tuikhal tui te ziakin tuipi tuimaitang asan’na leh tuipi tui lumna khangsak in tuipituiluanzia zong kikhel sak ahihman khuahun kikhelsak hi. TV leh news khawngpan ih zakzak mahbang in leitung or gamkhat sung munkhat ah guahtamlua huihpi piingpei ki vial in tuiciin atun’lai tak in, mundang khat ah guahzu vetlo in dawnding tui nangawn hamsa hi.
Tumaa kum zakhat zanih hunlai khawng in ih zogampen singkung lopa tawh niimdildial in, guahtui maan in tuisamphul in luita luipi te ah tuisiangvotsilsial te luang sialsial in, gamlak ah paakhoih no no tawh kidim in, azu ava, sapi saneu ham te kiza ziahziah theihzah in tamlai aa, gamtaaklo bekno khat kholeng ihkhamkhop ngahhak kisa lo in, sa ih duh leh daipaam agamla lo ah beng ahihkeh thaangsiah leng zingmeh nitak meh khop baihno tak in ki ngah theilai hi. Mi kikhang semsem aa lomunhuam za semsem in lo khul’ te agamtak’ dong ki ngakzo lo semsem aa, ihlogam zuatte saino semsem in lohak thei semsem ban ah guahzuk hun maan/kician thei nonlo ahihman; ih antuh, ih lokhawh leh ih anlak hunte a ngeibang in kizui thei nawnlo in a zu a va in zong ongduhpih semsem aa, ankhing zong ki kham nawnlo semsem ta hi. Khua hun ki khel zia tawh kituak dia ihnuntak zonzia leh ihlo khawhzia ih kheltheih kei leh zawnlam leh puuksihding lam ihma suat ong hi ta mai ding hi.
Bangteng, Bangci Sepding
A masa in, ihnuntak’nang ih zing ann nitak ann leh ihkisapbulpi te leinang sumte ;
1) eima khawhsa tawh zon sawmding maw, 
2) ahihkei leh siamna, kivakna zang in ahunzui aa kituak sumzon na khat pepeuh tawh sumzong in kivaakding maw cih in ongsaiding hi.
1) Ei ma khawhsa tawh kivaak sawm ihhihleh:
Khamtung gam ihlo gamte pen atamzaw in kenhamtang in, mual leh guam lak ahih ban ah ih pupa ngeina singtaang lokhawhdan zong tuktui’luan ongkipat khuapi’guah ongzuk’ciang leihoih khempeuh leh ih hamhal’vu te khempeuh hawktui in ongtaihmang’sak gawp ahihman in ankung a’ding ann leh tui kicing nawnlo ahihman gilkialdangtaakpi tawh limcitak in ongvui ong’gahsuang zo nawnlo hi. Tua ban ah miki khang semsem aa ih logam kicing nawnlo semsem ahihman in akum akum in ih annpi ahi vaimim leh singtaang buh annpiang kiam semsem in kikhamlo semsem hi. Tua ahihman, hih vaimim leh singtaangbuh tawh khamval khawhkhiakding baihnawnlo ding ahihman in lahkipai khia theilo veve ding ahihman in, thazawh mahmah zahbek sem in zuaktheih sumngah baihlam thei eimun tawh ki tuakding siing, malta, aisan, naiilung khoi, mehtehmehgah a tuamtuam ciin leh, singgah huan leh ganneu- vok, aak, kel cihte khatpeuhpeuh tawh thuah huai hi.
1.1)       A hoihpen in bel, mang or ham ihtom ciang mang leh hamte haltum nawnlo in ihlolai ah leilup kantan in a kivangkim in tangluang in pheikhun leng hawktaih aa abeimangding teng damdam in ongmuat dia ankungte in ne’thei ding ban ah lolai hawknil aa sia gawplo ding, lo leitang sungah tuisauvei nomzaw ding aa khua hunkeu lehzong annkung te hoihzo veve ding hi. Tua hamtangluang khuntawn in mehtheih anteh theipuam- malta, mantaa, mantakha, mehnal, tangmaai, beilawi, bethumang, maai te tuhsuak leng innkuan khamkhop ongpha thamding hi. Niangteh huan ding aa hoihmun bang ahih leh buh atkuan niangteh gahte ongtakciang lo in tuhsuak pah leng tukmaa in ongpo to pahlel dinghi.Zawngtah huandia hoihna mun ahih leh atangtak hun in tuhpah inla ano suansawm nahih aa tui nabuahzawh keidingleh tuktuiluan ongkipatciang suanpah in. Kumthum sungbang khawhsuak sawmleh kummasa buh tuh inlaa, kumnihna mawngphal or bekan or bekung nam khat pepeuh, kumthum na taang, vaimim, buh khat pepeuh tuh kik theih hi. Alak aa nasuan huansingno te zong onggol ta ding hi.
1.2)        Vaimim lei lak ahih leh vaimim haamkhawh khitciang belawi, belii, behiang khat pepeuh aki kal ahtuh inlaa, huandia natupleh atung aa genbang in sem in.Vaimimlak khitciang vaimimkung te belawi or belii mung ongsuak lelding hi. Hihbang hi leh akumsim in tukhun in vaimim kicing suaktheiding hi. Vaimim pen zotu tawh nihvei thumvei tawh aa tuhziau sang in, leilup kantan in guam neu to suak in tua sung ah ganek leh singteh muat a nuai ah phah in atung ah apua thaam leihoihte tawhvukkik in vaimim tuhzo leng annkung hoihzaw in tampiang zawding hi.
1.3)       Na lo pen keenlak guamlak ahihleh, buhlei ahi aa vaimimlei hita leh mang or hamtawh hawkdal akivangkim aa nahih ban ah guamte ah suangtawh or singkung leh lopate tawh guam khak in hawktaihmang ding lei hoihte khamle cin asawtlo in guamdung tawn ah leicial adandan in ongpiang dia tua te ah aman pha singkung leh annkung te ciingthei ding hiteh. Tua bang leihoih guamdung leicial bungkhatmun pen keenlak logam bung thum bung lii munsang manpha zaw dinghi.
1.4)       Sumngah nading in pawilei (malta lei, siinglei, silei, zanahlei) na bawl leh a annkung deih leitang leh logam te telciat ciat inla theihdia ki lawmte kanma sa in. A diakdiak in siing ahih leh aci na lakciang siing taam natnaa a omna lo te pan aci la kha het ken.
1.5)        Gamtaak lo ah kumkhatna ban kumtampi annkung or vehtehmehgah kungte nacin sawmleh eklei or muatlei piakzawhding phamawh hi.
Eklei bawlnang silngo bawldan namnih na: leihoihna singtehlouteh muat om leitang puathaam letmat khat pan nih asahding tupek tawh kiatkhia inlaa vui or nensak in. Tua leineen bawngnawi haisawm leh guk pen buh or vaimim or maangbuhv vaainel hai sawmleh guk tawh hel in toh inlaa, thangkhuai tikal 10 pen tuisiang thol dim khat ah tuisak in zankhat diahsa thangkhuai tui tawh buakzel tokzel inlaa khuttawh kilom’thei aa leilak ah khiatsuk ciang akitapelh akawtdan ahoihbek cih kithei hi. Tua pen lomlum inlaa, singtehmuat or singhawngmuat tung aa atuam akaangbiikbiak patehmul la inlaa, tua vaainel leh leineen nalom’sung ah phumsuk inlaa, nahtangtehtawh or tuipuantawhkhuh in koihlecin ningaa-niguk khitciang atungdim in patehmulkaangbikbiaak in ongtuamcip dinghi.
Eklei bawlnang silngo bawldan namnih na: buhminsa pen letmat nih athuk singtawh kibawl kuang or lawh or plastic kuang sungah letmat khat leh sehlii suah seh khat( 1.25”)ciang dimsak in laisah khattawh atung ah tuam in. Tua pen gamlak singnuai ah leitawmkuaksak inlaa na koih khitciang zusa in anektheihloh nang in siklenvaangneu tawh atung ah sinn inlaa, atung ah patehkaang tawhkidim singtehmuat leh singteh keu tawh khuh inlaa, tukhun ahihleh guahtui alutloh nading in atung ah tuipuan tawh khuhsuk in. Ni 4-5 khitciang buhtungteng ah patehmul kaang dim in abuhmahmah zong kawtsuak nipsuakding hi. Tua buh pen azah 3, thangkhuai azah 1 tawh hel in tok khawm inlaa, thambelsung ah koih in thambel gongpen laisah tawh tuam in sinn inlaa bilh in. Nipi khat khitciang buhteng ong tuisuak aa ongthawhkhitciang atui khikhia inlaa, buhzuu tuicil 2cc or sikkeu khat leh tuisiang tholkhat hel lecin tuapen zattheih hipahhi. Tua tui tawh vaainel damdam inbuak inlaa khut tawh akilom theih aa khia lecin ongkitap leh akawtna ahoihbek hi-in tui buah phat kul nawnlo ding hi.Ni 4-5 khitciang silngo kingahta dinghi.
Gan-ek amuat baihdia bawldan: Tua pen eiklei/muatlei bawlnang silngo kici thei aa tua penla inlaa, gan-ek athak or amuatnailo azah 30-50 leh puathaamlei neen azah 10 tawh tokin helin. Bawlsa a omleh, singteh leh dawnngek zuu tawmtawh helthei lecin hoihzaw’sem hi. A sawtlo in ongsa veva ding aa, nipi thumbing khitciang tuagan-ek pen huan or lo ah kizang thei pahding hi.
Gen-ek kicin lohna te ah eklei muat bawldan: Lopa, amuat thei ham tuamtuam, gan-ek, te kaikhawmma sa inlaa buknuai or limm nuai ah khol in laa vut, thangkhuai tui leh vanzatding akisam khempeuh kaikhawm in. Lopa leh hamte tannen inlaa,letmat 6 asah inciang inlla atung ah leineen letmat 2 asah vuk inlaa, thangkhuai tui tawhbuak in, atung ah gan-ek letmat nih asah sung in zalh in atung ahvut leh silngou thehzaak inlaa thangkhuai tui tawh buakkik in.Tuabang in pii thump ii lii dong asandong thuapto to in.Atung ah leitawh sinn in. Atung anuai lumletzel kul hi.   
2)         Lokhawh ahilo sumzonna tawh nekzon nasawm leh:
Khangno lai  tupna kician neihmaa in or kei uukna banghiam cih theihciat nai loh-hun in na tuamtuam kisin koikoi huai ahih hang, ei uuk na ahihloh hang nasep ngahnang leh khantawn septheih aa khantoh nang lampi a omleh siamdong sin theih hi lel hi. Siamluat na tumtel neilo in na tampi septheih sang nuntak nekzon nadia natel ahihnak leh tua bekmah akuitundong nasiam nading sinzui in. Tua hileh hunkhatciang nagimna agahlo hamtang ding hi teh. Mimal ciat tupna gelna atuamtuam kineiding ahihman hihzahbek cimai ni.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: I Gam le I Lei Kemsiam Ni. Gelh - Lucas Cin Than Kham Description: Rating: 5 Reviewed By: Cinpu Zomi
Scroll to Top