728x90 AdSpace

Hot
Menu
Zon-ol na Donate

Latest News

Laisiangtho leh Democracy. Gelh - Lian Muan Kim Ph.D

Laisiangtho leh Democracy
Gelh - Lian Muan Kim Ph.D

Ei Pasian thu-umte in i gamah banghangin democracy (mipi ukna) maan taktak lunggulh ihi hiam! Laisiangtho (LST) in gam ki-ukzia ding a kician sitset-in hong gen lah hilo. Gam ki-uk na dingin mipi ki-ukna na zang un, ci-a hong sawlna lah om lo. Mipi ukna na lunggulh un, ci-a hong sawlna lah om tuan lo. Banghangin mipi ukna i ngah theih na ding hanciam tantan ihi hiam? Haksa pipi mah, banghangin khawlsan tuan lo ihi hiam? Lauhuai pipi mah, banghangin sem veve ihi hiam? Hun bit-a Pasian nasem pipi mah, banghangin politics (gamvai) tawh buai ihi hiam?
LST sunga gam ki-ukziate en le hang a vekpi phial-in “kumpi ukna” vive ahi hi. LST Lui sungah Saul kumpi pa in kumpi ukna hong pan hi. David in hong zom suk-a, a khang a khangin kumpi ukna vive tawh kalsuan uh hi. LST Thak hun hong tun ciangin Zawma-te hong khang uh a, kumpi ukna namkhat mah tawh hong kalsuan uh hi. LST sunga kihel lo, gam tuamtuamte zong leitung tangthute-ah en le hang kumpi ukna vive mah tawh kalsuan uh hi. Ahi zongin kumpi ki-ukna na zang un, ci-a thupiakna LST sungah om lo hi. Kua kumpi, kua kumpi khang ta leh hong uk kumpite thu i man ding (Pasian deihna tawh a kituah leh) leh thu i ngetsak ding pen LST hong sawlna hi bek hi. LST sung leh leitung tangthute ah kumpi ukna vive tawh kalsuan uh ahih leh banghangin mipi ukna man taktak i ngah na ding lunggulh-in hanciam ihi hiam?
LST sungah kumpi ki-ukna nam bekbek tawh kikalsuan ta leh mipi ki-ukna tawh i kalsuan na ding hong thapiakna/deihsakna ciang khat om a, gam ki-ukzia ding thukhun hong bawlsak lian loh hangin mipi ki-ukna tawh kisai thu pawlkhat hong hilh veve hi. Tuate kikum ni:
1)      Mi khempeuh i kikim hi. Pasian in Ama lim le mel sunin mi (numei le pasal) bawl hi (Piancilna 1:27). Mi khempeuh Pasian lim le mel sun-a hong kibawl ahih manin (Piancilna 9:6; Zakoh 3:9) Pasian mai-ah mi khempeuh i kikim hi. Mi khempeuh kikim ihih leh banghangin innkuan khat peuh, mi khat peuh i kumpi hi thei ding hiam? Ei thukimna om lo pi-in banghangin ei tungah thu hong nei thei zenzen ding hiam? Ut in ut takei le hang eite tunga thu hong nei thei khat bek om hi. Tua pen Pasian ahi hi. Ama hong bawlsate ihih manin Ama-a’ ihi hi. Topa Zeisu hong paikik ciangin kumpite Kumpi, tote Topa-in hong pai ding hi. Ama hong pai ciangin kumpi ki-ukna taktak hong om pan dinga, Amah longal mi dang khat peuh ih ukna nuai ah ut lo pipi-a i om ding pen LST hong hilh hilo hi. LST tawh kilehbulh zaw ahih manin mipi ki-ukna pen ei a nungta Pasian a umte, Pasian kammal ahi banga a umte in i thupisak ding kisam hi.
2)      Kumpi thuneite pen mipi hamphat na ding hi. Rom 13:4 ah kumpi thuneite pen note phattuam na dinga na a sem, Pasian nasemte ahi uh hi, ci hi. Kumpi nasem, icihte pen kumpi pa/nu a ding, ahih kei leh kumpi u liante a dinga nasem hilo-in, mipi a dinga na sem ahih zawkna uh kimu thei hi. Ahi zongin mipi ukna tawh a kalsuan lo gam tampite ah kumpite in mipi phattuam na ding a sep uh sangin amau phattuam na dingin mipite na semsak zaw uh hi.
a.       Kumpi thuneite pen mipi hamphat na ding ahih leh kumpi thunei dingte kuate hiam? Mipi hamphat na dinga na a sem dingte pen mipi mah in a teel ding uh ahi hi. Banghang hiam cih leh mipi deih loh khatpeuh in bangci bangin mipi hamphat na ding na sem thei ding ahi hiam? A deihloh uh mi khatpeuh in amau tungah thu nei ding cih limlim zong hamphatna hilo khin hi. 
b.       Mipi mah in kumpi thunei ding a teel uh ciangin a thunei taktak pen mipi ahih zawkna kithei hi. Tua ahih manin kumpi thunei khat in ama thuneihna (power) pen a ut bangin zang theilo ding hi. Mipite’ piak zahzah bek zang thei ding ahih manin ama thu tawh a ut bangin gamta theilo dinga, mipite’ piak thuneihna tawh mipi a dingin na hoihtak hong sem thei pan ding hi. 
3)      Mipite thukimna mah tawh kimakaih ding hi zaw. Moses a sam taktak pen Pasian ahih hangin Moses in Israel upa-te leh mipi nautangte thukimna mah na la hi (Paikhiatna 4:29-31). Samuel in zong thukhenmang a sep ding ciangin mipi thukimna mah na la hi (1 Sam 7:5-6). Saul in zong kumpi dingin sathau a kinilh khit ciangin mipi thukimna mah na la hi (1 Sam 10:24). Tua mah bangin David in zong Judah kumpi a suah ding ciangin mipi thukimna mah na la hi (2 Sam 2:4). Solomon kumpi a suah ciangin mipi in thukimpih mahmah ahih manin: Solomon kumpi pa aw, na khan sau ta hen, ci ziahziah uh hi (1 Kumpite 1:39; 12:1).
Nungzuipite in zong pawlpi sunga makai thunei ding, pawlpi mite kisapna banga vai a hawm ding kisam ahih manin mipite mah teelsak uh hi: Sanggamte aw, no sung panin Khasiangtho leh pilna tawh a kidim, mi hoih mi gina sagih hong teelkhia un, ci hi (Nasemte 6:3). Gam kimakiahna bek hilo-in pawlpi kimakaihna ah zong mikhat thu tawh ut bangbanga hih ziauziau, cih omlo hi. Pasian makaihna nuai ah mipite thuneihna mah tawh a kikalsuan ciangin gamkhangto-a, pawlpi khangto hi.
Ahi zongin mipi thuneihna a kinawlkhin ciangin kiamsukna leh manthanna piang hi. Mipi-te thu a kuppih nuam lo, mipi-te’ thu a mang nuam lo kumpi makai pawlkhat en suk ding hi hang: Rehoboam in mipite thu mang nuam lo (1 Kumpite 12:15, 16) ahih manin Israel gam kiphelkhap hi. Rehoboam ukna nuai-ah om nuam nawn lo uh ahih manin saklam gama Israel minam 10-te in amau a dingin kumpi tuam neih uh hi. Herod kumpi pa in mipite thu a man loh bek hilo-in, ngattak in uk ahih manin ukpi gilo pen khat-in kiciamteh hi. Tua banah amah zah-a sihsia zong om lo khamai ding hi (Matt 2:16-17; Luke 13:1; Josephus, Eusebius).
Mipi ukna tawh a kaalsuan masa pen leh tu ciangciang a enhuai pen gam in USA ahi hi. Tu ma kum 400 dektak lai-in Mayflower gunkuangpi tawh suakta tak-a Pasian a bia nuam, kumpi ukna thuakzo nawn lo-a mimal mahmah suahtakna a deih mi pawlkhat England gam panin hong paikhia uh a, America gam hong tung uh hi. LST mah bulphuh in ki-ukna thak that hong kipan uh a, tua pen tu-a i gengen mipi ukna ahi hi. Mipi ngiat in makai thunei ding teel ding uh a, tua a teelte tung uah “ki-ap in thumang ding uh,” cih khensatna nei uh hi. Ahi zongin a makai teelte tung uah a ki-apna uh leh tuate thu a manna uh pen amau utthu hi ding, zawhthawh thu tawh hilo ding, cih zong a thu khensat khat uh ahi hi. Mi khatpeuh, kumpi khatpeuh in zawhthawh thu tawh makaih thei lo ding hi. Ahi zongin mipi teel sa, makai-te tung uah kiphaltak-in mipi ki-ap/thumang ding, cih bangin khensat uh hi.
Mipi ukna tawh a kalsuan masa pen gam hong suak-a, 1776 kum England-te khutsung pan suahtakna a ngah khit uh ciangin leitung ih theihpih mipi ki-ukna gam hong suak hi. 1776 kumin mipi ukna tawh a kalsuan gam khat bek a om hangin 1950 kum teh mipi ukna tawh a kalsuan gam 22 pha hi. Tua pen leitungbup milip ih 31% ahi hi. Tu-in ahih leh leitung gam 192 lakah 120 sanga a tawmzaw lo pen mipi ukna tawh a kalsuan gam hita hi. Leitungbup milip ih 58.5% bang hita hi. Tua laitak-a gam buaibuaite zong mipi ki-ukna mah lunggulh uh ahi hi.

LST in mipi ukna i zuih ding hong sawl lian loh hangin hong hanthawn gige ahih lam i thei hi. Pasian theilo tampitak in hih mipi ki-ukna a lunggulhna uh leh tu laitak-a a ki-ultungsak “human rights” a kicici pen LST hong hilh mah ahih manin gamvai-a nasemte in zong nasep hoih taktak khat a sem ihih lam a thakin i kiphawk ding hong hanthawn nuam ing. A diakdiakin ei Pasian thu-umte (Zomi) leh hih mipi ki-ukna pen kituak penpen hi. Ei ngah ding taktak ki-ukna a ngahkha nai taktak lo hi hanga, i gam taktak ding pen a ngah kha nai hetlo ihi hi. LST hong deihsak ki-ukna i neih theih na dinga nasepna zong Pasian na sepna khat mah ahih manin hih tawh kisai nasep pen gamvai nasem icihte (politicians) sep ding bek hilo a, Pasian thu-um khempeuh ih sep ding ahi hi. Pawlkhatte banga hunbip-in sem zolo kha mah ding hi hang. Ahi zongin thungetna leh lamkhat teitei tawh mapang khawm thei hi hang.
Lian Muan Kim, PhD

Source :
From: lian kim <lmkim27@gmail.com>

Date: Fri, Jul 8, 2011 at 9:12 PM
(Global Buanli Family) 

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Laisiangtho leh Democracy. Gelh - Lian Muan Kim Ph.D Description: Rating: 5 Reviewed By: Cinpu Zomi
Scroll to Top