728x90 AdSpace

Hot
Menu
Zon-ol na Donate

Latest News

Media & Zomite’ Mailam. Gelh - Joshua Thang, Th. M

Media & Zomite’ Mailam
Gelh - Joshua Thang, Th. M

Thupatna:  Khuang-le-zaam, thau-le-daktal icihte pen tanglai Pupate media vanzat na hingei-a, khua khat peuh in haksatna tuak in huhna akisap hun ciangun dahna, nopna a tuahna thu, lawm-le-gual thuzaksakna dingin khuang-le-zaam tumna leh thaulotnate in khangluite thukizaksakna ahihi. Thukin thukizaksakna pen mikang lai tawh “media” icih hi-a, a hunzui-in vanzat kilaih toto hi. Laikhak puakna, sikkhau satna, wireless message, telephone, radio, TV, video, e-mail, photo, newspaper, journal, magazine, books, camera, computer, internet, mobiles, sim / memory cards, satellite cihbangin media vanzat pen zatsiam leng, mihingte’ adingin manpha mahmah a, khua hun omzia, leitung thupiangte theihzawhna pen media hangin ih hamphatna lianpi ahita hi.

Media icih bang hi-a, Zomite khang tangthu ah koici kizat hiam?

Media icih “thukizakna”                                                                                                                 
 Media icih “Thukizakna” pen mihingte kizopna a manlang sak vanzat thupi khat hi. A beisa hun leh tulaitak hunin a thupi mah bangin mailam hun ah a thupi sem sem ding ahihi.  

1. Nidanglai hunMedia: (BeyondAD.2010)    
                                                                          
Tanglai Zomite’ media hun icihin M 0, M 1, M 2, M 3, M 4, M 5, M 6, M 7 …        
cihbangin media hunkhenna tampi na omlai ahihna pen a nuai aa bangin ensuk ni.   

M-0 pen Beyond Ciimnuai Media, (Ciimnuai ma pen a kitheibanlo thu tam hi.)                     
M-1 pen Ciimnuai Hun Media, (Unau sungsuak khat bangin nuntak nop hun kici!)         
M-2 pen Khuano Hun Media (Ciimnuai khua pan beel pawl zui-in pemkhiat hun), 
M-3 pen Siahkaih Hun Media (gtn: Kaalzang Hun, gal-le-sa lauhuaina a om hun),     
M-4 pen Ukpite Hun Media, (Mualbem pan Tonzang Innpite hun abei dong),        
M-5 pen Colony Hun (Mikang kumpite hun: (Piantit paina: WWI Hun & WWII),   
M-6 pen Pinlong Hun Media (British kumpi in khamtung mite thukimna kal uhi.),    
M-7 pen Independent Hun Media (ZBC in Chin State huam in tangthu gelh hi.!), 
M-8 pen Mahsahlah Hun Media (Zomite’ tangthu hoih tampi seelcip kipan ta hi.),     
M-9 pen Galkapte Hun Media (Zomite in Media ih septheih loh hun thupi ahihi.),           
Galkap Hun: USDP ki kihta lua! USA & gamdang ah akitai “R” hun kici thei hi.  
2008 Constitution (Ihmut kal a kibawl, ih zuih ding Law & Media ih neih hun hi.)

2. Tulai hun Media: (M-10 ‘ABCDEFGH’ is between AD.2010 to Nowadays Media) 
AD.2000 khit leitungbup khua hun kikhelna tampi aomhangin Zomite’ Media lam             dinmun kidomkang zawhna kician om zo nailo hi, cimaileng kikhial hetlo ding hi.          
2010-2015 pen ‘democracy’ ci-in hong ki-uk hangin media suakta zo nai het lo hi

3. Mailam hun Media: (Future Media Dreams! .2016 onward – Media Ages.)                   
Leitung bup Zomite in Media thu ih gen pen Chin State bulphuh masa ihihmanin Chin State leh Myanmar sung aa om sanggamte dinmun tawh lungngai khawm ni. Zomite’ mailam Hun Media icih pen tulaitak aa ih siksan, ih khekhaapte enkik ni. AD 2016 mailam hun media ah Zomite bang ci kalsuan ding cih ngaihsun ciat ni. Printed Media akici Weekly News tuamtuam khahkhiatna lam thapia ciat dih hi. Media & Zomite’ Mailam cih bulphuh ihihmanin mailam adingin sem khawm ni.                                                                                                                                                                                    
 a. Printed Media: Zogam sung aa om printed media a tamzaw pen nipi kalsim aa  kihawm hi a, khasim laihawm leh season letters ih cimai diam, kha 4 or 3 hal bangin a kihawm, kha nih hal bangin a kihawmzo bek laihawm ahihi.  Mailam ah weekly news zong Sunday bek aa kihawm hinawnlo in, nilai ni, Wednesday, Friday … nisim thukizakna – dai;ly news khawng ih deih hi.     Mizoram State ah YMA makaihna thapia ahihmanun amau tawh kituaklo,  nasep hoih tampi semkhia zo uh a, daily news zong hawmzo tazen uhi.  Laidal tampi khan in hawmzawhna zong thupi mah a, daily news dinmun, media malakna kalthak hong suan dingin printed media hawmkhiate tung Zomi & Zogam in lam-etna lianpi nei in muanna tawh kong mitsuan uhi.    

b. Internet Sai:  Yangon ah Internet sai kihong zihziah cih thuging akizak zawh hun sawt sim ciangin Tedim, Falam, Hakha, Kalaymyo ah Internet Sai kihong a, computer sinna sai ompah sam hi. Hanciam ciat in khangnote in sin ngeingai ihihmanin gualbatna khat a suak hi. E-mail khat khaknopna tawh Internet nai khat 1500 bangin kituzo a, inn ah ankam meh bek kimeh zel hi. Internet tut man a kiam hangin connection hatlo-in sum tampi beivat zel hi. Gamdangpai unau neite’n phone tawh kihopih mawk leng minute khat ah Ks.2000 beivat thei a, Phone bill piakna sumbei zah leh G-talk zatman sumbei a kituatkak ciangin connection a zekai mahmah hangin alai! meetlai, kici zen hi. Tuhun ciangin mikim phialin phone sung pan Internet kizang thei sam a, Internet sai beisak zo mah leh Tedim ah Nai 1 Ks.600 tawh tuttheihna mun omlai sam hi. Internet sai a bei hi ta! Phone signal omloh hun ciangin ki cimawh mahmah hi. Zato ah Internet Free Wi-Fi a piazo kipawlna khawng omthei leh hoih lua ding hi.   
   
c. Data Media: Internet zangin online media tuamtuam tungtawnin thuthak khah, thuthak puak, thuthak kaikhawm in a buai mah mah sanggam-unaute tung lungdamna tampi ih nei hi. Website bawl in media nasemte, blogsite bawl, face book, twitter, … social network tuamtuam zangin nasem khempeuh sum-le-pai, hun-le-vai, thatang gimna, tawlna tampi na thuak lawhna uh a mawkna suaklo ding cih lam-etna thak ka nei hi. Official Websites neite, YouTube zatsiamte hangin Zomite’ media lam maban khangto lai ding hi.   

d. Voice Media: Khut tawh kipei telephone pan auto phone ah kal khat kisuan a, auto phone pan mobile phone tuamtuam tawithei ta ihihmanin lungdam hi. Tuhun ciangin java system sangin android system phone in mun la khin hi. Nidanglai taang-au, zuasawte-in thatang saan in awngkhia gawp ngei uh-a,  tuhun ciangin zum sung (ahkl) room sung khawng pan kigen ziau hi.  Mailam ah FM system zangin genkhia thei lai leng nuam sem sem ding hi.    

e. Vision Media: 1990 kiim pawl pan TV ih muh ciangin ki lungdam mahmah hi. Leilum pan a khangkhia ka hihmah bangin Leilum aa TV anei masa pawl Col. Putpa, Dr. Go Za Kham, Pa Kam Za Pau cihbang hi-a, Sunday kikhop khit ciangin TV en dingin Pawlpi bup phial in akipai ziahziah ka theilai hi. Bo Putpa’ Inn ah Tuiphum Pawlpi Upa meeting omthei zel zel ahihmanin     Pawlpi Upa mah ahi, Pa Kam Pau Inn ah tu sun TV va en vou hong kici thei hi. Sia Go Za Kham in leitung bup EBC Pawlpi makaipi aseplaitak in meeting nei mun sim ahihmanun amau kiangah EBC Upate in TV en uhi. Hun hong paito zel a, tuhun ciangin inn kim ah TV kineizo ciat sam hi. Ahizong ka neulai mah bangin tudong TV sungah Zokam kiza khollo hi. 2015 Election huhau in ZCD Party pan GS. Pu Gin Kam Lian in 15 mins thugenna hong suak lak a, tuni dong aban zopkik omnawnlo, mangcip hi. Ih muh a tamzaw pen kawlkaa hi a, milim biakna tawh kipattahna hilai hi. Tua ahihmanin Media & Zomite’ Mailam khantohna dingin a thupi masa, minam, kampau, ngeina, biakna, dinmun, nuntak khuasakziate ah mainawt khangto nuam takpi ihihleh Local TV pen eimau’ khutzeek ahihpah kul hi. Kumpite in zong media lam hong khaktan loh ding kisampha ding thu hi.   

      Zomite’ mailam hun media malakna ding akisam thukin nam thum:
1.      Local News: Weekly Newspaper pan Daily Newspaper dinmun itunzawhna     ding, media lam nasemte thapiak siam ding mipite’n maban thupi ih nei hi. ZYA kipawlna thupi sem sem ding a, Pawlpi mailam kalsuanna ding zong local news tawh a tonkhawm gige nasep khat ahihmanin kinusia theilo uhi. Local news nam khat mah ahi,  Pawlpi tuamtuam leh kipawlna tuamtuam hawmkhiat thukizakna lai a tuamtuam zong hanciam huai mahmah thu hi. Tuabang laihawmte in ki-itna a khangsak laihawmte hi a, supna omlo hi. Biakna, Upna-le-Pawlpi, Minam-le-Lai kepna zong hi a, thupi mahmah hi. Tua bang laihawmte hanciam nawnlo-in ih khawl ni pen biakna dang, upna peeng, namdangte, upna hong lut ni, hong lut ih phawkloh ni hita ding hi. Biakna dang, upna dang ih cih ciangin Christian Upna a hinawnlo, upna nam tampi om a, local news a hatlai siah kipelh theihna lampi om hi.   Local news in local people leh amau’ haksatna tampi huh thei hi.      
                   
2.      National News: Zogam level in nasem zo, MP makaite in National News pen               a panpih ciangun amau’ nasepnate mipite tungah tungzo pan ahihmanin   kuamah a kinusia theilo thu ahihi. Myanmar gam mi kician hihna icard nei hang a, kawllai in kigelh hi. National level news khahzawhna dingin 2016 pan step masa ah Kawl lai tawh newspaper khat tei tei ih kisam ta hi. National level ah zuakzawhna dingin useable common name thupi ding hi. Lai gelh sawm ni. Article suahsakna ding tampi omkhin ta hi. Lai gelh ni. Burma Independent ngahna dingin Pinlong Agreement letmat thuh minam ihihna mangngilhlo-in nampi lungsim pua a, national level ah nasep ding maban khat peuh a om ciangin thasiallo-in a sem masa hih ding thupi hi. Tua bangin ih kalsuan takpi leh Pinlong thukimna tangtunzo ding hang a, National Level Media ah maitai takin “nasep thupi” ih semkhawm ding hi.   
                                      
3.      International News: Zomite’ mailam kalsuanzia ding ngaihsutna takpi tawh         “Media” mainawtna dingin kalsuan nuam takpi ta ihihmanin ka nuam hi. AD.1900 pawl in BS. Carey & Tuck in ih tangthu akaihkhopte uh mikang lai tawh report apuakna uh England tungkhin kici a, tuma kum 115 lai hi. AD.1917-18 in Piantit paina hangin Zomite pen mikang kumpipa tawh gal vai, sa vai ah akihuhthei minam ihi hi. Political view tawh ngaihsun ni. Mikangte tawh kizopna kum 100 cingdekta hi, bang dinmun ah om ihiam? J.H. Cope in Tedim Thukizakna Lai hong bawlsak kum pen AD.1919 hi.   AD.1938 in Cope’ sih ciang a lai nasep khawl a, dahhuai mahmah thu hi.  American Baptist Mission Head Quarter ah ama’ nasepte ki ciapteh sak hi.   Zomite hong challenge namdangte nasep manpha tampi omlai kha ding hi. U-le-nau, sanggamte aw, Mikang lai tawh News neih hun ta hilo hiam? Media lam ah kalsuanna thak ih neihpah keileh kum 100 zekai khin hang!         
            
Thukhupna: Media leh Zomite’ Mailam kalsuanzia ding laigelh kidemna sungah kong kihel khak theihna dingin Zomite’ mailam thukhualna tawh vaihawm makaite khempeuh tung leh laigelh thei dingin thupha hong pia ih biak Topa, a nungta Pasian tungah lungdamna ko ing.  
Laisim khempeuh kong vaikhak nop thu khat in Media icih pen Gam & Minam kilamna ah Inn khuampi khat bang hi a, amah kihello-in tua Innpi kipzo ngeilo ding ahihmanin thupi hi. “Zomi & Zogam it ing” na cih leh Zomi & Zogam khantohna dingin Media sem in, thapia in. Mihing nunkhua genkholh theihloh ahihmanin lai gelh in ciamteh in. Internet ah khahkhia in. Social Networks tuamtuam zatsiam ding kisin in la, a lem leh YouTube ah khahkhia ngam in.  Pasian maipha zong kawm in kalsuan a, Zomi & Zogam khantohna ding na hanciam lai siah,  Zomi & Zogam a bawl Topa Pasian in hong tavai sak ngeilo ding a, thupha hong pia ding hi.

References:
Ciimnuai akipan Zomite Tangthu kigenna a tuamtuam pan, … (oral histories)
Tuanpupate tangthu kigen ka zakna a tuamtuam pan, …                       (oral histories)
The Chin Hills Vol. I & II, (Carey & Tuck in tangthu tuanthu hong gelhsakte enkak ing.)
Tedim Thukizakna Lai: (JH. Cope 1919-1938, compiled & reprint by Job Thawngno)
2008 Myanmar Constitutions & Zomite hong ki-ukcipna thukhunte: 1947, 1974, 2008.   
Zomi Encyclopedia: Tedim Edition (Rev. Dr. Pum Khan Nang’ ZE nasep seppihna pan, ….) 
Genzo Khang Laibu (unpublished copy, 2012 by Pu Thuam Za Cin - Suante, Tedim, Zogam)
Zomi Research & Media http://zomiresearch.blogspot.com
NB: Ih zak ngei thu tampite ngaihsut-khinkhai tawm a, media article ah kong gawmkhop hi.

Min:                Thang Lam Mang
Phone:            (+95) 0936491305
E-mail:            tlmangpu@gmail.com  
Address:         L/110, Leilum yatkuat,  
Tedim, Chin State

Source :
Zomi Research

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Media & Zomite’ Mailam. Gelh - Joshua Thang, Th. M Description: Rating: 5 Reviewed By: Cinpu Zomi
Scroll to Top