728x90 AdSpace

Hot
Menu
Zon-ol na Donate

Latest News

PAKZANG KHUA GUITE BEH TANGTHU. (HISTORY OF PAKZANG GUITE GENEALOGY)

PAKZANG KHUA GUITE BEH TANGTHU. 
(HISTORY OF PAKZANG GUITE GENEALOGY)

Tulaitak Pakzaang khuasung ah ateng, Guite beh kizop zia laibu in bawl dingin thukimna-a om tak ciang, thu kaaikhawm dingin Rev. Thawn Za Nang aki sehna tung tawnin ama kaihkhop thute endik bawl dingin vaipuak hong ki ap takteh, muhna, theihna tuamtuam te tawh etkak in, a hong kibawl khia laibu ahihi. Hih laibu sungah a om thute khen III in kikhen hi.Guite cih behmin hong pianna, Guite beh khangsimna leh tulaitak Pakzaang khua-ateng Guite beh kizopzia cihte ahihi. Hih sungah ih theih dingin:- Tapasal tebek kigelh hi. Pakzaang khua-ah ateng te lobuang atu ata te uh kizom suak nawnlo hi.


Ciaptehna: (ZN) pen zinung hi-in, (ZM) pen zima cihna-ahihi.
Ciaptehna:(*) a omleh zineilo ahih keileh taneilo in a site ahihi.
Ciaptehna: (+) a om leh zi nei-in ta neinailo cihna-ahihi.
Ciaptehna: (x) a om leh zi nei ngei-in a kikhen kik te ahihi.
Ciaptehna: (#) a omleh zi neithei ding, anei nailo te cihna ahihi.
Ciaptehna: (-) a omleh zinei tanei napi tapasal nei nailo teahihi.
Bangmah aki ciapteh lote zinei-in tanu/tapa nei hi ding hi. Tua ahih keileh, naupanglai cihna hi ding hi.
Mingelhna te ah (T) ding leh (S) ding aki khial om kha ding hi.

Hih laibu sungah kihel leh ii ut aki helkhalo, kihel kei leh ii ut kihelkha cihbangh a om zenzen leh unau khat ihihna leh Pasian ii zahtaakna tawh kimaisak ciat ni.
Beh Committee teng:-
1. Pa Eng Khan Kham (President)
2. Pa Dongh Sian Langh (Vice President I)
3. Thang Khan Kam (Vice President II)
4. Pastor Do Khaw Mang (Secretary)
5. U Dongh Khan Suan (Asst. Secretary)
6. Pa Thang Ngo Khai (Treasurer)
7. Pa Ngin Sian Pau (Asst. treasurer)

Teng tangin;
Pastor Do Khaw Mang
Secretary
Pakzaang Guite Beh kipawlna

Lungdam Kohna
Pakzaang khua Guite beh kipawlna leh beh pawi bawlna thu atom in lai sungah kong gelhnuam hi.

Beh pawi bawlna-ah hong makaih masa pa Kam Cin Thang hi-in, kum sawtpi hong makaih khitciang leitung nusia in Pasian kiang hong zotsan hi. Ama’n hong nusiat khit ciangin, Guite beh phung papi te lung himawh uh ahih manin, Phungsung thu kikupna hong neihpih uh hi. Tua thu kikupna panin beh kipawlna ihneih ngeisa, zopsuak ding leh beh pawi bawl zel dingin thukimna kinei hi.

Tua thukimna tawh kizui mahin, Jan 2, 2012 ni-in Guite beh an neek-khopna kinei pah hi. Nitaak anneek-khit phetin phung papi te in ki muhkhopna hong neihpih uh aa, tua ki muhkhopna panin; khua dangdang ah aki hawmkhia zokei zongin, Pakzaang khuasung ah ateng Guite beh khangthu kanin, phungsung ah a om alian aneu a kuamapeuh in ih tangthu ih theih theih ding lung-gulhna tawh beh khangthu kaihkhop dingin thukimna khat kinei hi.
Thu hong kaihkhop sak dingin Rev. Thawn Za Nang muanna tawh kiseh pah a, ama’n a kaihkhop khitciangin hong etciksak dingin Pastor Do Khaw Mang vaipuak kipia pah hi. Etcik (Endik) na akiman khit ciangin Computer tawh hong khetsak dingin Sia Tuang Za Khai muanna tawh kicialsuak pah hi.

Tua ahih manin Guite beh kipawlna mimalbuppi tangin, Committee Chairman mintawh anuai ateng tungah lungdamna lianpi kinei ahih na thu kong pulaak hi.

Guite beh kipawlna-ah hong makaih masa ahi Pa Kam Cin Thang (hong nusia khin) tungah lungdamna beingeilo ding hi.

Beh laibu bawltheih nadingin tangthu hong kaihkhop sak Rev. Thawn Za Nang tungah zong lungdamna lianpi om hi.

Aki kaikhawmsa tangthu te laibu in apian theihna dingin lungduai takin akisam khempeuh hong puahsak in, endik hong sepsak Pastor Do Khaw Mang tungah zong lungdamna ih pulaak hi.

Laibu in bawltheih dingin a om laimal khempeuh, manlahna tampi kawmkal panin hanciam takin Computer tawh hong gualhsak Sia Tuang Za Khai (Kalay University) tungah zong genzawh loh lungdamna kinei hi.

Phungsung ah sep ding leh vaihawm ding a om ciangin, aneu alian thalawp tak leh lungduai takin na ihsem a, ih beh leh ih phung a dingin deihsakna lungsim neiciat ihih manin, Guite beh Uu le nau a kuama khempeuh tungah zongh lungdamna kong ko hi.

Beh Committee te’ tangin;
Pa Eng Khan Kham
President
Pakzaang khua,
Guite beh kipawlna.

‘GUITE’ CIH BEHMIN HONGPIAN NATHU
Guite pen tangtawng pekin nampite ci-in kiciamteh a, atangthu zongh atuamtuam in kigen hi. Tua tangthu tuamtuam te ihgelh khinzo kei ding a, theihna leh muhna namthum atom theipen in ihgelh ding hi.

Aison Khangpan Muhna:
Nidangin zomite’ tencilna Ciimnuai ah mitawm khatbek aten hunlai-in amakaipi (tuhun hileh Hausa) asem ‘Aison’ kici om hi. Tuapen Aison pa ci-in sam uh hi. Hih mipa in taamgam lokhat kho a, tua alo ah nisim in lo hung ding leh nasem dingin lokuan den hi. Tua hunin alo galkhat ah vantung pan nizang phekhualcia kiphutsuk in hual singkung liankhat kap in atang tawntung khat muden hi. Asawtna ciangin bang hipeuhmah hiamcih theinuam ahih manin pai-in a et leh, tua nizangin akapsuk hualsing pen aheng (avang) nahi-in, tua ahengsung paihlet in nizangin ana kapsuk den ahihi. Hoih takin a et leh tua singheng sungah tuii (eggs) nih na om a, tua singkung tungah Sansamang khat tuangthei tawntung ahih manin, Sansamang’ tuii ahitam? Ahih kei leh bang ahi tam? Bang hangin nizangin kap dense ahitam? Cihteng ngaihsun in Aison alung himawh mahmah hi.

Tua tuii nih te, Sansamang’ tuii maw, bangtuii ahiam, cih a theihnop manin, la-in a inn ah ciahpih hi. A taangbeem sungah akeuh thei dingin tua tuii te nih koih pah hi. A sawtna ciangin tua atuii koih te hongkeuh takpi-in, naungek numei khat leh pasal khat hi dihdih hi. Lamdangsa mahmah ahih manin aveng apam te sam kawikawi-in amuh dan leh apianzia teng gen buatbuat hi. Lamdangsa in a ot ngeingai khit uh ciangin, tua naungek nih te’ min ding bang phuak ding cih kikum pah uh hi. Aphuah zia ding uh theizo lo in, anunungna-ah, “hih naungek te pen nipan apiang suak ahih ciang, ‘nigui’ ci ni. Naungek numei pen ‘Niguinu’ ci-in apasal pen ‘Niguipa’ ci ni-in agol uhciang amau tenih mah kitengsak pah ni.” Ci-in kipsak uh hi.

Tua bangin amau gel hong lianto in akiteen khit uhciang asuan akhak te uh abanban in, Nigui, Guite, Guigen, Guimang cih banginakhang khangin ‘Gui’ cih kammal zangh suksuk uh a, acih nopna uh pen nipan apiang nigui acih nopna hi, ci-in kiciamteh hi.

1. Song Thu Khangpan Muhna
Mongolia gamhuam Santohho khua-ah ukpi masa pu Song Thu in, a melhoih mahmah anuakhat Neih Cong akici zikhat nei aa, kumsagih sung bang a ki teen khit uh hangin ta a neikei uh hi. Song Thu in a sila numei te apil pen, a melhoih pen Tawi Ciin tawh lumkhawm dingin a zi kiangah a gen hi. A zi-in a pasal’ vangbei ding a ngaihsutna kawmin a phalkei hi.
Nikhat a sila te misawm tawh lovat uh a, tua mun pen Ciimnuai lo aci uh hi. A lovat uh ahal khit uh ciangin sila te lokho dingin kuanzel uh a, Song Thu, Tawi Ciin leh anau Nee Nep te anhuan dingin Buk ah (lobuk) angiak uh hi. Lo agiak zawh uh aninih niteh Song Thu in Tawi Ciin kiangah “tuzan nang kiangah konglum ding hi,” cisim hi. Logiak ding a kithawi lai un, innteeknu Neih Cong in Tawi Ciin kiangah “napu in hongkhoih leh na kiphal mahmah kei-in” acih sim khitsa ahihi. Hih thu hangin Tawi Ciin in, apu’ thugensim lah nialngamlo, api’ kamvaikhak lah phawk gige ahih manin, alungsim lauthawng tawntung hi. Tua ahih manin anau Nee Nep kiangah “ih lupna kikhek ni! Kei’ lupna pen aging ging omthei-in, tuzan zongh ihmu thei keng.” Ci-in apu leh api alau na hangin anau khemziau hi. Nee Nep in zongh bangh mah theiselo ahih manin a Uu’ cih bangin a lupna uh a kilaih pah uh hi.

Song Thu zongh Zozu adawn khitteh am phingphengsa in Tawi Ciin’ lupna lamah apai pah hi. Tualam ah Nee Nep alum ahih lam theilo in tua nizaan khempeuh Nee Nep tawh a lumkhawm uh hi. Nithum bang a lup khit ciang zong athei naikei hi. Song Thu in Nee Nep tawh alum khawmkhawm ahih lam atheih hun ciang zongh, Tawi Ciin kiangah pai kik ding ngaihsun tuan nawnlo in, a logiak sung khempeuh uh Nee Nep kiangah a lumsuak hi. Logiak te hongciah ciangin Innteek pinu ahi pi Neih Cong in Tawi Ciin kiangah thu tuamtuam dongsim zel a, Tawi Ciin in bangmah a genngam kei hi.

Nee Nep in nau apaai sungin mang tuamtuam mangmat thei zel hi. Zankhat a mangin huankhang a hualsing pi hengsung zingsang a nisuak in asalh/akap bangin kikap zeza hi. Tua nizang pen tangpha mahmah a, Sakhi tuihup tawh kibang liang hi. Tua amang lamdangsa ahih manin pu Song Thu kiang ah agen pah hi. Pu Song Thu in zongh lamdangsa in tua hualsing heng a et leh nitui ai, aktui cia apha suang vom kilkel khat na om hi. Tua nitui ai la in a sisan nuh a, a tangbeem sungah koih in abia hi. Tua a biak pan kipan a lamdangin pu Song Thu a daupai mahmah hi.

Zankhat Nee Nep in mangman leuleu a, nitui ai a koihna uh nizang in kap zeeza in tua nitui ai pen naungek in piang a, nakpi takin kap ahih manin tua naungek la dingin a thawh leh a takin thokha in a khanglo suak hi. Song Thu in, “ni-in hongsiam taktak hi.” Ci-in a ngaihsun hi.

Khalii bang asawt khitciang Nee Nep naugil kiselzo nawnlo ahih manin lo lamah sila numei nih tawh a giak dingin pai uh a, ciah nuam nawnlo uh hi. Nee Nep in sa duh lua ahih manin lohial aa luidung ah Aisa sawk in sawm bang amat khitciang, agei a umgui tungah um pum nga agah mukha hi. Tui kholna dingin pumthum alo hi. Nee Nep a suah ding ciangin Song Thu a zasak sim hi. Nau kap leh Vompi Sakhi te hawk ngeingai zel ahih manin, lau mahmah uh a, a umneih te sungpan a lianpen sungah tua naungek koih in a gongvang ahu zel uh hi.
Kaalkhat khitciang Song Thu zong lo hong kuan a, hih Nee Nep leh naungek thuteng a muhciang a lung himawh ahih manin thukhat ngaihsun hi. Nee Nep a ding Inn neukhat lamsak a, a ki atkham nailo um pumnih te sathau bing dingin bawlin Nee Nep innpua lamah apho dingin sawl niloh hi. Khalii khit ciangin Nee Nep te ciahta uh a, khua mi te’ ihmut kalin khua sungah daitak in a lutsak khiankhian hi. A gelsa uh bangin Nee Nep in a naungek um golpen sungah kuama theihloh kalin koihsim in nisuah tungin apho khia hi. Nee Nep bang mahlo bangin om in lokuan dingin kithawi thawi a, upa pa tawh a kiho ho uh hi. Tua laitak um sunga naungek hong kap vangvang hi. Nee Nep ahih leh ki theih mawh bawlin, upa pa in tua um va en hi. Um sungah naungek khat a om a muh ciangin upa pa in lamdang sa mahmah in, awng khia zalzal hi.

Tua takciang, Nee Nep zongh lamdang a sa mahmah dan khatin om deep hi. Awng zalzal uh a, naungek a etet khit uh ciang in, Pu Song Thu ko pah uh hi. Pu Song Thu in zongh lamdang a sa mahmah bangin om leuleu hi. Pu Song Thu in: - “… aw nizung in hih umpi kap veva zel hiven maw… tuapan naungek hongpiang himai lo ding ahia…lamdang mah si” ci-in tua umpi-inn sungah tumpih a, tua naungek a koih ding lai un umtaw a-atkhap na uh, tua a-atkhapna pan un naungek a guan khit uh ciangin a belh kikna mun uh, phelkhia in naungek a lakhia uh hi.

Naungek min bang phuak ding cih kikum pah uh a, nizung gui bangzah hiam khat a lut khitciangin hih nau ngek hong piang ahih ciang, ci-in, “Nizung Vaang Guite” hita hen ci-in a kipsak uh hi. Upate in Vaang guite ci uh a, midang te in Guite ci uh hi. Song Thu in a zipi tawh a kiteen khit kum 8thna-ah Guite piang a, tua numbat (8) pen Khrih numbat ahih manin, Khrih bangin kumpi hihna lam ah vaang anei ding hi, ci-in upa te in a genthei uh hi. Song Thu in a zipi tawh a teen khit kum (13) ciang tapasal khat nei hi. A zi a thupit bawlna a thusiamna leh ngeina man a deihna hangin,Guite inn luahsak lo in a zipi’ ta a luahsak hi. Tua pen Thahdo te’ pupi hi a, a piang masa Guite in inn a luah loh hangin a Uu hi ci-in, sa-agawh in, tuabangin sa a gawh uhciangin a ciingsa pia ngitnget uh hi.Tua pen tuni dongin ngeina in nei uh hi.

Pu Guite pan simsuk khang (4th)na, pu Ciang Khou Khang dongin Santohho khua ah teng uh hi.
2. Thu Kaikhawmpa Ngaihsutna
Song Thu pan apen aman dingin ngaihsun leng, eite pen Song Thu beh hi lehang a kilawm ding a hihi. Banghang hiam cih leh pi Nee Nep tapa pen Song Thu ta ahih lam a thei ih hihi. Tua Song Thu in a tapa pen a phualselna tawh “Nizung vaang Guite” aphuak ahih lam zongh teltak in a theita ih hihi. Tua ahih manin ih beh min ‘Song Thu’ cileeng a kituak leh ahi ding thu a hihi.

Aison pan a pen zong thumaan ahih leh hih Aison gui leh zaam kuate hiam cih kat huai mahmah hi. Banghang hiam cih leh a ma hangin Guite cih a om thei hi a, a ma kep leh khoi sa hihang cih ding a hihi. A ma suan te’ tungah lungdam koh huai hi. Ih nu leh ih pa luang (tang) hong hi mawk uh hi.

‘Nakhempeuh Pasian bawl hi’ ci-in ii up leh Pasian in ahih theihloh cih bangh omlo hi. Pasian a dingin a hitheilo omlo hi, ih cih theih ding hilel hi. Nipan ahi a, Khapi pan ahi zongin, ahih kei leh meii sung leh tui sung pan ahi zongin Pasian in a piansak nop nakleh a piangsak theilua a hihi. A ma a dingin a haksa omlo hi.Tang-gol khat Simbeng a suak, a kimkhin nailo deuh ka mukha ngei hi. Simbeng cih a nam omkhin hi napi, Tang-gol pan zongh Simbeng piang thei hilai hi. Mi pawlkhat te in, vasa Nahkhok tuii sungpan Musi suak thei ci uh hi. A hitheilo omlo hi, ci-in ka ngaihsun zaw hi.Tua hi a, Pasian in a bawlnop leh ‘Ni sungpan Tuii (egg), Tuii (egg) sungpan Mi’ cih bangin a piangthei ding mah hilel hi.Bangbang ahi zongin eima upna ciat hithei hi.A phatmawhna omlo hi.

GUITE BEH KHANGSIMNA
Song Thu Khangpan Etna
(Ciimnuai-Santohho gam-Sengam-AD 45)
Tung Chin
Zo (Chawn Kim), Pong (Shan), Karen, Wun Pong (Kachin), Tasel (Meitei).
Chin Lung, Sung Lung
Song Thu, Song Za, Song Kip, Za Hang, Hang Mi, Song Hen, Song Mang, Khawng Thang, Thang Tawl, Thang Thu Rip3
Song Thu
Guite( (AD 45-165)4
Ni Gui (
Lam Lei (, Hau Zel, Dou Sel
Ciang Khual(
Lei Mang (, Ngaih Te
Mang Vum (, Sin Te
Ngek Nguk (
Bawk Lu (
Gui sum (, Duh Lian (Sailova)
Mat Lun (
Ton Lun ( (AD 830)
Go Vum (, Mun Song, Ton Sing
Ton Mang (, Mim Vak( Gui Leng
Ton Lim (
Ton Thuam (, Hil Thang, Siah Khum, Lam Tun, Sim Phut, Nawt Gam, Mu Nei Thang Daal
Gui Gen (, Sam Te
Gui Mang (, (AD 1150)
Mang Sum (, Kul Gen (, Nak Sau (Kul Lai)
Tuah Ciang
Kul Gen ( Khanggui ah (Numbat 18 na enkik in)
Gen Dongh, Thing Thang((Neek Ngen te’ pianna pu), Zong Hau, Vongh Son, Biing Ciang, Sot Kim
Luah Thuam, Vai Vial, Sung Niang, Mang Tawng3
Mang Kim, Zom Kai, Hang Khiap
Ngo Phung, Man Tong, Tong Lai
Ai Son Pan
(Ni Gui Nu leh Ni Gui Pa Pan Etna)
Ni Gui Nu leh Ni Gui Pa
Guite (A tapa)
Gui Ngen (A tapa)
Gui Mang (A tapa te thum)
Mang Sum, Kul Gen leh Nak Sau
Gui Mang Khangpan (Ciimnuai-Tedim-Myanmar-AD 1150)

Gui Mang in tapa thum nei a, Mang Sum, Kul Gen leh Nak Sau tea hi uh hi. Hih Unau thum tengin mun tuamtuam ciat zuan uh aa, Mang Sum pen tuinaak lam ah pa to in a ma suante saklam ah( Mal Guite/Meitei lamte ahi uh hi.

Kul Gen pen tuitaw lam ah paisuk in, a ma suante pen Vangteh Guite pawl ahi uh hi. Nak Sau pen Lushei gam lam (India) zuan to hi. A ma suante pen Lushei/ Mizo gam ah a om tea hi uh hi. Gui Sum sang-gam pa Duh Lian (Sailova) suante zongh Lushei/ Mizo gam ah na tungkhin zo uh hi. Tua bangin Guite pen tuilu tuitaw ah hong kizeel uh hi.

Tuitaw Lam Guite Khang (Vangteh Guite-Kul Gen Suante)
Kul Gen
Gen Dongh
Mang Tawng
Mang Kim + Hang Khiap
Go Phung
Zang Mang
Man Pau
Mang Pau
Kaih Mang
Hau Khai
Mang Sel
Kai Pum
Go Thawng
Pum Kam (Vangteh a ih tulpi pa)
Pum Kam tapa Thawng Do Cin hi a, ih tulpi ahihi. Vangteh khua ah teng uh hi.

Hih laibu sungah ih gelhnop bulpi te pen, numbat (4) na, pu Mang Kim tate sungpan a nau tum pen pu Tong Lai tute leh pu Hang Khiap suante ahihi. A maute pen tulaitak a Pakzang khua Guite pu minlawh te ahih hang ahihi.

Numbat (4) Pu Mang Kim leh Pu Hang Khiap Khangpan Etkikna
Pu Mang Kim :- tate :
Go Phung, Man Tong leh Tong Lai te hi uh a, hih unau thum te min pen Beh min leh bawng min suak pah hi. (Go Phung tute
/Bawng, Man Tong tute/Bawng, Tong Lai tute/Bawng- ci-in kisam thei hi.)
Pu Tong Lai Suante:
A zimasa tawh a tate :- Zang Mang leh Man Khup
A zikik tawh a tate :- Lai Phung leh Man Thang
Pu Zang Mang tate:- Zang Pau, Vung Son, Pau Tawn leh Ton Zom te hi uh a, Pu Pau Tawn tapa Zom Kai hi-in, Pu Zom Kai tate pen Do Tuang, Tawn Ngul, Vungh Tun leh Son Kam te a hi uh hi.
A Tomin Etna:
Mang Kim, Tong Lai, Zang Mang, Pau Tawn, *Zom Kai, Ton Ngul, a nau Son Kam te hi uh a, Pu Son Kam pen Pakzang ah hong teng hi. Pu TawnNgul zongh a nau Son Kam kiang ahi Pakzang ah hong teng leuleu hi.
Pu Hang Khiap Khangpan Etna
Hang Khiap, Hang Kik, Vungh Thang, Thang Kap, Thang Kam, Suan Tuang, Hang Kip.
Pu Hang Kip tate:- Tawn Thang leh Tuang Awt te hi uh a, Tuang Awt tate:- Awn Khual leh Dam Tual te hi uh hi. Pu Dam Tual pen Pakzang ah hong teng hi.

4 . LAITAK, PAKZANG KHUA- AA TENG GUITE BEH KI ZOPZIA- ETNA
Pu Son Kam Suante:-
Pu Zom Kai suan sungpan in a tate Do Tuang, Tawn Ngul, Vungh Tun, Son Kam te hi a, Do Tuang leh Son Kam pen Pakzang hongzuan in, Do Tuang pen Tuipi ah tai leuleu hi. A ma tate Pakzang ah kua mah om lo in, Tuipi lam ah om zaw uh hi. Son Kam pen Pakzang khua a om Sukte te’ thu ciaptehna ah zongh na ciamteh uh hi. 1886 kumsung hi-in, sikseek dingin asap uh ahihi. Ci-in ki ciamteh hi.5Tua hi a, Pu Son Kam pen Pakzang ah hong teng suak in tapa thum nei hi. Tua te pen, Kai Thawn, En Kam leh Thuam Vungh te a hi uh hi.

Pu Kai Thawn tu le ta te:-
Pu Kai Za Tuang: A khangno lai-in a sibup bang danin puk thei zelzel hi. Tua bangin apuk ciang telmelloh kam pau, lai lamdang namkhat zongh thei-in, dawi hawlkhia, innphiat, lasa, beltung mut, cih bangin om in, zumkah dan khat in, ‘Suai Cin zumkong khak o! lai at o!’ acih khit ciang bek in khawl pan zel hi. A tapa te, Thang Khan Do, Kam Khan Thang, Khup Sian Thang(*) te ahi uh hi.

Thang Khan Do tapa te:- 
Tuang Sian Pau, Lian Za Cin (Zozang ah teng) Dong Khan Suan(#), Cin Ngaih Sian Thang(#), Kam Suan Sing(+), Thang Sawm Cin te ahihi. Pa Tuang Sian Pau tapa Do Sian Zui(#) ahihi. Thang Sawm Cin in tapa nih nei-in, Do Sian Tuang leh Nang Deih Mang te ahihi.

Kam Cin Thang pen Galkap tum in Pension tawh ciah a, a zi Ngoih Za Cing hi-in, a lawmpa’ pension tu ni dong sansak lai hi. A tapa te:- Tuang Sian Dongh, Do Sian Nang(#), Thang Gin Mang(#) te hi uh hi.(Do Sian Nang pen tulaitak Galkap tum in om hi.)

Tuang Sian Dongh atapa te: Thang Sian Muan leh Kam Khan Lian te hi uh hi.
Pu En Kam Tule Tate:
Pu Kam Khan, Khai Khaw Dongh, Thawn Gin Thang leh Kai Za Dal te ahihi.
Pu Kam Khan tapa Lut Khaw Thang bek hi-in, a ma ta te pen, Khan Lam Thang, Suan Khan Lian, Thawng Khan Khual, Cin Khan Langh te ahi uh hi.

Khan Lam Thang tate: Thawng Khan Khai leh Kap Lian Pau ahihi. Thawng Khan Khai tapasal te:- Thang Thawn Muang(#), Dongh Ngin Thang, Pau Khan Mung te hi-in, Kap Lian Pau tapa Thang Lian Pum ahihi.

Suan Khan Lian tapa te:- Thawng Za Mung(x), Cin Khen Thang(#), Khual Lian Kham(#), Langh Pian Vai te hi uh hi.Pa Thawng Za Mung tapa Lian Lam Dal ahihi.

Thawng Khan Khual tapa te:- Thawng Sawm Tung(#), Do Mun Thang(#), Lian Khan Dal, Langh Sian Tung te hi.
Cin Khan Langh tapa Lian Sian Muang ahihi.
Pu Khai Khaw Dongh tapa Zam Khaw Suan (*), Tuang Do Kap, Sian Cin Thang (Kawl,tai-9-ah teng) leh Kam Pau(*) te- ahihi.

Tuang Do Kap tapa te:- Dongh Sian Langh leh Zam Za Cin te hi-in, Dongh Sian Langh in tapa Dongh Suan Mang(+) leh Cin Khat Suan(+) te nei hi. Zam Za Cin tapa te:- Thang Lian Muang(+), Pau Deih Mang(#) leh Pau It Kim te ahihi.
Sian Cin Thang pen Kawl (tai 9) ah tengin tapa thum nei a, Dong Sian Mung, Ai Khan Suan (#) leh Tual Sawm Pau (#) te hi uh hi.
Thawn Ngin Thang tapa te Kam Do Pau, Khan Do Cin(zm), Dal Za Thang, Thang Khan Langh(zn) te hi uh hi.

Khan Do Cin tapa te:- Thang Khan Dal, Ngin Do Khai(+),Thawng Khan Nang(*), te hi uh hi.
Thang Khan Dal tapa te:- Thang Ngaih Langh(X), Cin Ngah Pau(#) (Galkap tum), Khai Cin Mang, Langh Sian Muang leh Do Khen Nang te ahihi.

Dal Za Thang tapa te:- Thang Khan Kam, Langh Do Khual, Thang Khan Suan (a vek un Zozang ah teng) te ahihi.
Thang Khan Langh tapa te:- Thang Khan Nang(#) leh Pau Khen Mung(-) te ahihi.
Kai Za Dal tapa te:- Ngin Khan Thang leh Kam Za Langh te hi a, Ngin Khan Thang pen Galkap pension tawh Zozang ah teng hi. A tapa te Do Sian Khai leh Thawng Neih Pau te ahi uh hi.

Pu Thuam Vung Tule Tate:-
Phung Ngo, Thawn Khan Eng, Lian Khan Do leh Tuang Hen Thang te hi uh hi.
Phung Ngo in tapa khat bek nei a, Vungh Khan Khen ahihi. Vungh Khan Khen pen Galkap tumin pension hun cing nailo pi-in inn lam kisap luat na tawh kingen khia in Galkap pan tawp a, Pakzang khua ah Hausa kum (10) sung sem hi. Tapa khat bek nei-in silai ahih manin amah zong a sih ciangin inn mong suak hi.

Thawn Khan Eng in zongh tapa khatbek mah nei hi. A min Ngo Za Thang hi a, Galkap pension tawh hong ciah hi. Tapa nih a nungta nei hi. Tua te pen Eng Sian Pau leh Vungh Lian Kap te ahihi.

Eng Sian Pau tapa te:- Thang Vai Lian, Kap Lian Mawi leh Kham Sian Mung te ahihi.
Vung Lian Kap tapa te:- Thang Khat Kap Tung Nung, Thang Muan Kim leh Pau Suan Muang te ahi uh hi.

Lian Khan Do zongh Galkap tum in pension ngah nailo in ciah a, tapa khat bek mah aneih khit ciang sipah hi. Tua a tapa min Ngo Khen Thang ahihi.

Ngo Khen Thang tapa te:- Do Lamh Pau, Thang Lian Kap(#)(zm)te hi a, Ngo Khen Thang pen sumbawl in sumnei khat hi-in, zi khat nei kik a, tua a zi leh a ta te tawh Kawl (Munlai) ah teng uh hi. A zikik tawh a tapa te pen, Do Khen Khai(#), Hau Lian Mang(#) te hi uh hi.
Do Lamh Pau tapa te:- Thang Khat Khai, Thang Sawm Tung, Kap Suan Thang leh Khai Suan Lian te ahihi.

Tuang Hen Thang zongh tapa nih bekmah a neih khitciang si hi. Tua a tapa te Vungh Kam Thang leh Thawn Za Nang te ahihi.

Vung Kam Thang in Nu Suan Za Awi tawh tapa Ngin Za Thang nei hi. Zi hong nei-in tapa Thang Za Cin(zm) nei leuleu hi. Tua khitciang, Nu Cing Khaw Luan tawh kiteengin tapa Nang Khan Dal, Thang Khaw Lian leh Ngin Sian Pau (zn) te nei leuleu hi. Ngin Za Thang pen Kawl (Tahan) ah tengin tapa Pa Thang Mun Sing(X) nei hi. Thang Za Cin pen Pakzang AG pawlpi ah Dip.Th Degree tawh sia semin, Siampi (Ordaint Pastor) ahihi.A tapa te Thang Sian Langh (-) leh Kam Sian Tuang (#) ahihi. A Unau-un Mizo gam Aizawl ah Worshop nasem uh hi. Pa Nang Khan Dal in AD 2011-2015 sung Hausa asem ding hi a, tu’n zongh a semsem ta ahihi. A tapa te, Thang Sian Piang, Suan Khan Mang (#), Pau David te ahihi. Thang Sian Piang in tapa Dal Khan Kim aneih laitak ahihi. Thang Khaw Lian in tapanih nei a, Thang Sian Hau leh Sian Lian Khualahihi. Ngin Sian Pau tapa te, Thang Sian Kam leh Zam Kop Phawng ahihi.

Thawn Za Nang in tansawm ongin kumpina-asep (JAT Service Pension) ngah hi. Biakna lam ah B.A.B.S. a ngah khit ciangin a pawlpi Tuiphum Pawlpi sungah Siampi za (Ordaint Pastor Revd) tawh tu ni dongin pawlpi kem sia sem hi. A tapa te Thang Sian Kham, Do Khaw Mang leh Tuang Za Khai te ahihi. Thang Sian Kham tapa te:- Nang Tung Thang, Kam Cin Mung te hi uh hi. Do Khaw Mang (+) pen tansawm a zawh khitciang B.A; B.A.B.S; M.Div. Degree te ngah in Tuiphum Pawlpi ah Church Assistant Pastor a sep laitak ahihi. India gam Chennai ah a sangkah sungin pahtawina letmat nih ngah hi. Tua a ngah te pen (Outstanding Student leh Stewardship) cih letmat te ahihi. A sang uah sia a sempah dingin deih uh a, a nu leh a pa in phallo uh hi. Omkhop liiliai ding mah utzaw uh hi. A tapa neupen Tuang Za Khai hi (+) a, tansawm a zawh khit ciangin, sang a zop toh suak nading bangmah neilo in a lungkham mahmah laitak un, meltheih sung pilna-a deihsak mahmah te’ huhna hang tawh, B.Sc. (Hons) leh M.Sc (Credit) dongciang ngah to zo hi. A sang zomto lai-in M.Res ngahzo lai leh Ph.D. kah theih nading Viva (kam dotna) a tupah thei ding ahih manin, hanciam in zomto hi. A hi zongin, sum leh pai kicinlah na hangtawh, dinkhawl phot kik leuleu hi. A dinkhawl ciangin, NGO khat ahi, Unicef-tbc ah kumkhat sung nasem hi. Tua khit ciangin University ah Demonstrator ngah a, tulaitak Kalay University ah a sep laitak ahihi.

Pu Tawn Ngul Suante:-
Pakzang khua-ah Pu Son Kam a tunkhit zawh bangtan hiam, ahun akitel cianlo khatin a upa Pu Tawn Ngul zongh Pakzang hongtung hi ci-in kithei hi. Pu Tawn Ngul pen siampi lian khat hi a, Guahkoh ah gamkang baba pen a inn katang pan phuisam in tuiphih leh mitpah ziau hi, ci-in kigen hi. Tawn Ngul tapa Khai Ngul, Khai Ngul tapa Ngo Khup(zm) leh Neek Khual(zn) te ahihi. Neek Khual pen a nu tawh inntuan pah uh hi.6A mah pen Galkap tumin sawtpi tak gammangin ciahlo in om hi. Galkap atum ding ciangin aneih alamh te akepsak dingin a Uu Ngo Khup ap in, tua khitciang Galkap atum hi a, hong ciah theih nawnlo ciangin, athu ala kizalo ahih manin a si hi-in teh ci-in ki vuibawl hi. Tua khitciang amah hongciah leuleu ahih manin aneih alamh teng hong kankik aa, kim nawnlo ahih manin kibuai hi. Tua ciangin beh papi Pu Kai Za Tuang, Pu Khai Khaw Dongh te mah makai-in, beh tengin lemtuah a, a lepna bangin kimang uh hi. Ih gennop in, nidang a te’n, beh papi te a zahtak zia leh a thupitzia/ a thu kimanzawhna te uh etteh huai hi.
7. A ma tate:- Khup Cin Thang, Ngul Ngo Sing, Ciin Kan Ning te hi uh a, Kawlzang ah teng uh hi.4Pu Ngo Khup zongh, siampi mah hi-in, Khiang Khawh, Aitui pia lam sem hi. A ma tapa te:- Ngul Khan Thang, Ngin Khaw Zam, Nang Khaw Hau(*), Vungh Ngo Cin, Cin Za Neng(*), Khual Cin Kap te ahihi. Cin Za Neng pen laipil mahmah khat hi a, tan (6) pan sangkhawlin Galkap tum a, athu ala kiza nawnlo in mangthang ta hi.
Ngul Khan Thang tapa te pen:- Khup Za Cin, Tuang Khan Dongh, Thawng Khan Kam te ahihi.

Khup Za Cin tapa te pen:- Thang Ngo Khai, Cin Khat Sian, Kam Deih Lian Mung te ahihi.
Thang Ngo Khai tapa te:- Cin Lian Thang(+), En Sawn Mang(#), Sian Mun Dal, Mung Sian Hau, Dim Sian Sung(zm)tawh tate hi uh a; Cin Deih Thuam, Thawng Lam Thang, Dongh Ngim Sing(zn) tawh ta te ahi uh hi. Inn leh lo kician (simzang lo Acre 6 bang nei) nei ahih manin pasal kician mahmah khat ahihi.

Cin Khat Sian pen tulaitak Tedim Myo ah tengin, tapa Cin Lam Sing leh Sian Do Nang te nei hi.

Tuang Khan Dongh tapa te:- Thang Khen Pau, Cin Ngo Kham(si), Cin Heh Suang(-), Kap Sian Lian(-) te ahihi. Thang Khen Pau tapa Dongh Sian Tun ahihi.

Ngin Khaw Zam tapa:- Khup Do Kam hi a, Suangzang ah tengin tapa Zam Sian Mang leh Sing Khan Khup te nei hi.

Vungh Ngo Cin pen Mualzang ah tengin tapa Khup Za Hau, Cin Do Langh, Ngul Ngo Pau, Thang Cin Suan te nei hi.

Khual Cin Kap tapa Khup Khan Do(+) hi a, Myangmya(ေျမာင္းျမ) pan Lai Siangtho buaih Diploma Degree angah khitciang, a pianna Pakzang khua RCM pawlpi ah tawmvei sung sia semngei hi. A zimasa leh ata in nusia khin hi.

Pu Dam Thual Suante:-
Pu Mang Kim leh Pu Hang Kiap Uunau ahih na Kul Gen khang pan a ihsim suk, khang (4) na ah kimu thei hi. Pu Hang Khiap tate: Hang Kik, Vungh Thang, Thang Kap, Thang Kam, Suan Tuang, Hang Kip, Thang Awt, Dam Thual cihte hi a, Dam Thual hun panin, Dam Thual Pakzang hong tung hi.

Dam Thual Pakzang ah hongteen tak ciangin, a tapa Zam Do hi a, Zam Do tapa Thual Eng hi a, Thual Eng cih minin apu Dam Thual a tap hipah hi. Dam Thual tapa te: Zam Do, Thual Khaw Ngin, Awt Ngin te hi uh hi. Zam Do tapa te: Thual Eng, Nok Khaw Suan, Hang Cin Dai te hi uh hi.

Thual Eng pen Galkap tum in pension ngah hi. A mah pen Tuumang panin Tapidaw a tangh suah masa pen khat ahihi. A tapa Do Sian Mang ahihi. Do Sian Mang tapa te: Dongh Khat Sian Mung (zm), Ngin Sian Lian Muang (zn) tawh a tate ahihi.

Nok Khaw Suan tapa te:- En Khan Nang, Do Khan Cin, Eng Khan Kham, Dai Khan Khual(#), Zam Ngo Thang te hi uh hi.

En Khan Nang tapa: - Suan Khan Ngin hi a, tu in Sialtui ah teng uh hi.
Do Khan Cin tapa Thang Ngaih Lian ahihi.

Eng Khan Kham tapa te:- Suan Deih Kim(#), Nang Khan Mang, Cin Sian Sang te ahihi.
Zam Ngo Thang tapa Suan Sian Langh ahihi.

Hih lai ah En Khan Nang pen ta Uu pen hi napi-in, a tapa Suan Khan Ngin aneu lai-in, sihsan ahih manin, Suan Khan Ngin a nu in a inn lam ( anungsang) ahi, Sialtui khua-ah ciahpih kik hi. Suan Khan Ngin in Sialtui ah a pute a kem a khoidingin tengsuakhi. Tua hi a, En Khan Nang Uu pen ahih hang, a nu keem, a inn kem, a inn luah ding pen amau ki lungkimna bangin a nautumpen ahi, Zam Go Thang in a luah ding ahihi. Ih gennop thu in thulem vaihawm siamna te a thupitna a gennuam zaw ih hihi.

Hang Cin Dai tapa te:- Do Khan Pau(*), Nang Khan Ngo, Thang Khan Kam, Eng Khan Thang(#) te ahihi.
Nang Khan Ngo tapa te: - Dai Suan Kham (#), Kam Sian Zam te ahihi.

Thang Khan Kam tapa te:- Dai Sian Lian, Thang Sian Mung, Pau Sawm Mang leh Pau Deih Kham te ahihi. Hih Thang Khan Kam te innkuan zongh Sialtui ah tengto uh hi.

THU KHUPNA
Guite beh pen alian masa hi a, khang (7) sung tawntung siahkaai hi ci-in ki ciamteh hi. Tua a siahkaih sungun neektheih nam khempeuh tungah vokno siah, taangtang siah, aktui siah dongin a namkim in kaai hi, ci-in kigen hi.Khang (7) khitciangin amau hong kiam leuleu a, Sukte beh hong khangin hong lian leuleu a, siah hong kaai leuleu uh hi. A mau zongh, gamsa liang dongin kaai uh hi, kici hi. Mualbeem ah siah uk pi Pu Thuam Za Mang tungah kipuak ziahziah hi.

Leitung hun hong kihei, hong ki khelkhel in, Jan 4, 1948 zingsang nai (4) hun in, Mangkang te’ khutsung pan suahtakna kingah a, tua thu tawh kizom to pah in, ukpi siah kaihna sungpan zongh suahtakna kingah a, siah kaihna, ukpi ngeina cihte bei hi.Tua ukpi ngeina abeina dung zui-in, mipi te thuneihna bulphuh zawkna-ahi Zominam Ni cih hong piangkhia in, February kha 20 ki kipsak aa, tu ni dong ciang kumpi te in hongtheih pih in, kumsim in nuamtak in kizang den hi.

Guite in khang (7) siahkaai a, Sukte in khang (4) sung siahkaai hi. Tua hi a, tu dongin Guite maang (pu) leh Sukte maang (pu) kici hamtang sese hi. Sukte te in nidangin zi aneih nop ciangin amau beh mah kizong a, amau beh sungah numei a om kei leh Guite beh sungah zong uh hi. Tua pen nampi leh nampi mah kideih in, kilawm a sak na hang uh ahihi.
Guite te siah kaai, ukpi leh sila nei in a om sungun, a sila te’ pheitung leh ngaltak tung, khawng ah sing ahi a meilah ahi zongin ten(satkham) thei se uh a, “naveh naveh pu aw, naveh naveh pi aw” ci-in kap vangvang uh hi, ci-in kigen hi. Hih sangin zongh asia zawlai a gamtatna uh tampi omlai kha ding hi. Bang hang hiam cihleh, tuhun in Guite te a zawng teng, a hai a mawl teng iihi a, ii kipumkhat theikei lai hi. Tua ahih manin midangte in bangh mah in hong mulo uh a, ‘Guite zawng Guite mawl’ hong cilel uh hi. Hong khem ziauziau, hong peiziauziau lel uh hi. Hih thu ih ngaihsut ciangin tuni-in ei Guite khangno in, khua ngaihsut huai-in khuaphawk huai mahmah hi. Pasian tungah thu ngetnget huai hi. Ei bawltawm mawhna ban ah tanglai a, siah a kaai, ih pu te’ tatsiatna, kiletsak luatna mawhna te zongh a thuakthuak ihhikha tam-maw, ci-in, kiphawk in mawhmai na dingin Pasian kiangah ki apap huai hi.

Tua ahih manin, khang-gui suksatna, mawhsutna laidal khat kigelh in, behlaan (အလံ)kitawi-in tua laidal pen khua siansuah makaipa Pa Suan Mang leh Ai Khan Suan te ki ap a, mipi khempeuh mai ah meitawh kihal tul hi. Tua khua siansuah ni pen May 8, 2013 ahihi. Thungetna tawh ih kalsuan ding bek a kisam ahihi.

Beh kipawlna in khiatna nei-in, phat-tuamna-anei ahih theih na dingin, ngimna leh tupna kician te ihnei ta ding a, ki-itna leh ki pumkhatna te lenkip in, hanciamna leh thungetna tawh Pasian bek mitsuan in ih kalsuan ta ding hi.

Thu kaikhawm,
Revd. Thawn Za Nang
Church Senior Pastor
Pakzaang Baptist Church
Pakzaang

Source :
Khaikok Guite

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: PAKZANG KHUA GUITE BEH TANGTHU. (HISTORY OF PAKZANG GUITE GENEALOGY) Description: Rating: 5 Reviewed By: Cinpu Zomi
Scroll to Top