728x90 AdSpace

Hot
Menu
Zon-ol na Donate

Latest News

REV. THAWN ZA NANG TANGTHU.

REV. THAWN ZA NANG 
(BIOGRAPHY OF REV. THAWN ZA NANG)
Rev. Thawng Za Nang te Innkuan.

Pu Tuang Hen Thang (Guite) leh Pi Ning En te tapa nih leh ta nu khat aneih sung pan Thawn Za Nang pen anau tumpen ahi hi. 1938 March khasung in Pakzaang khua ah suak hi. 1943 kum in Tapidaw suak uh a, 1945 kumteh apa uh Tuang Hen Thang in azi leh ata te thum nusia-in vantung Pasian kiangah ciahsan hi. 1953 April 17 ni-in Rev. Mang Kam in Pakzaang ah Tuiphum hi.


Apa un anusiat ciangin anu-uh Pi Ning En pen Tapidaw suak masa Pu Vungh Ngo unumei ahih manin apute un itna, khualna tawh keemin a en uh ahi hi. A diakdiak in Thawn Za Nang bangpen apu Vungh Ngo pattah sa bekbek ahi hi.

1948 kum in Mission sang, Zolai tan 4 sang hong omteh Pu Vungh Ngo-in Thawn Za Nang kah sakpah hi. Pasian hehpihna tawh Laikia ngei lo-in zoto suaka, 1968 March kha-in High School Final, Tedim sang pan ong hi. Sangkah zomzo nawnlo in Suangzang ah Manglai sang Private tan 7 sangah siasem hi. 1958 June pan 1961 March dong Kum 3 sung sem hi. Tua hunsung in Mualbem pawlpi akem Rev. Hau Do in Insein Divinity School ah Lai Siangtho vasin in ci-in thapia zel hi. Sumneih loh pau lap in utngei lo hi. Ama ut pen Siavuan ahi hi. Siavuan neu H/A angah ding hina pi-in Pasian vaihawm na khat hiding hiven hong kipelh lek hi.

1961 March khabei pan Private sia tawlnga in Humalyn lamah sumbawl in zin hi. Tua laipan Mangkang Tourist khatin hongzui-in mikhat kongsuah ding hi ci-in zol thapai in ut lo hi. A sumbawl tuahsia sawnsawn in khualam hong ciahkik in PAT siau-in ngah hi. 1965 kum ciangin ten tan kuantheih nading laihuan na omin ngahpah bilbel napi'n akhasum tawh kahsak lo-in Styphen bektawh kahsak hun tuak kha hi.A man ciangin 1966 July khapan kipan Dolluang ah State Primary School ah sempah hi. Azi tawh hihlai khua-a tuncil un thu lamdang atuah khak uh :-

Amau zong atun uh nipi masa-in Biakinn ah ki-ap pah uh hi. Tua nipi Upa Sunday School laivuan nitawh kituak hi. A questions papers val lai ahih manin Pastor Thang Za Pau in phipeuh un nasim loh uh hang! natheih uh om kha ding hi cini loh ahih manin aphi uh leh Sia Thawn Za Nang in Marks 100 ngah in, a zi Ciang Za Niang in Marks 80 ngah hi. A khatna leh anihna hipah uh hi. Pastor pa-in apawlpi te lakah "Mi thaw thong hi ngawl tu hi, Comma khat zong khial ngawl hi"ci-in phat gawp hi.

Sia khasum hongtun ciang Sia Thawn Za Nang laihdingpa Sia Son Thawng pen June kha ni(1) pan atawp in akikoihna hi-a, Sia Thawn Za Nang pen June 1 pan kipan in Kumpi-in akipsak na hi hi. Amah pen July 15 nipan laihilh kipan theipan ahih manin keisep lohpi sangkei ning ci-in kha(lang) aibek sangin Sia Son Thawng kha (1 leh alang) asang sak hi. Tuapen lam dang.sa mahmah uha, Lai Siangtho sangmansa, Pasian nasem sa khat hi ding hi, Tedim mi hibang ding baihlo hi ci-in muang mahmah uh hi. Pastor te tawh akibang in koih in hunzang (sermon) sak uh hi. A thugente thupisa in kikum tangtangh uh hi.

Sia Thawn Za Nang in TBA gambup thusin napan pahtawina letsong laibu D.V.B.S bu khat angah ngei hi (Tuapen thusin nate laivuan akibawl akhatna pan athumna ciang bek aki pia hi.) Laymen training thusin napan zong mat a sang ngahna letsong laibu khat mah angah ngei hi.

Dolluang ah sangsia asep sungin Kuathum pawlpite ah aPastor te tawh kithuah in hunzang khawm zel hi. Tuaciang in, nidang a-utloh Lai Siangtho sang kahding hongut kik hi. Pawlpi mintawh kah dingin Mualbem pawlpi ah siau hi. Pawlpi in sumsik ding haksa hi ci-in lamsap ding Ks. 150/- vaihawm sak uh hi. Pawlpi siapa Rev. Hau Do in deihsak mahmah in amin puakpah a, Insein Divinity School ah kah hi ci-in Lungvak laibu sungah amin suak hi. Ahi zong amah kahloin a sangsia mah zom suak hi.

1969 kumciang Primary Headmaster ngah in Falam gam Sial lum ah sem hi. Tua leh Methodist pawlpi upa Len Thuana (President) leh Khuang Bura (Secretary)te hongpai-in pawlpi in Lai Siangtho sang hong kahsak nuam ung ci-in cial uh hi. Amau pmcsKyfbawlpah ding : 1. Asang kahna abei khempeuh leh 2. Asangkah sungin azi atate pawlpi in tavuan la ding 3. Sang aman teh pawlpi in khasum azi atate tawh akhom piading, lo kho lo ding, meh ciin na huanbek bawlding, Methodist pawlpi sungbek mah ah semding, a innkuan un asep theihbang ciatun pawlpi sungah sem ding cih ahi hi. Sia Thawn Za Nang deihdan lian hinapi'n Tuiphum Pawlpi ahih loh manin thukim zolo leuleu hi.

1972 kumteh State Primary School Pakzaang akhua tung leuleu hi. Tuasung in Mualbem pawlpi in asia pan tawpin, Pawlpi sia, pastor sem ding in 4/3/1973 ni-in upa ahi theiteng pai uha, cial uh hi. "Tangval zizon dan hilo in, meingong papi zizon akizong akongdot uh hi"ci-uh hi. Ahang in Pawlpi sia Rev. Hau Do in hong nusia khinta ahi hi. A ngaihsutna ah Pawlpi sia khasum Ks.80/- khawng tawh ka tate pilna guanzo kei ning cih ahi hi. Tua hi-a, a Lai Siangtho sangkah loh mah pauhlap in, "Khentat pah kei ni, Pasian' deihna lungngai lai ni " ci-in dawngkik hi. Amah pen JAT siau khin aa tua husa a ngak na hi gige hi. Tua leh JAT ngah takpi in Mandalay ah kum khat kah hi.

1976 January in Falam ah JAT sem dingin a zi a tate tawh pai hi. Falam a om sungin Falam Lai Siangtho sang siapi Simon Pau Khan En in nitak sang phuanin tua lai-ah kumkhat vakah hi. Tua sung mahin Tan 10 phi kik a 1978 March kha-in A list tawh ong hi. June kha hong tuntoh teh Lawibual ah piang leuleu in kum 5 sung om hi. Tua pan Mualbem ah tungin Kum 11 leh ni 5 sem in Service Pension a la hi. Mualbem a om sungin "donghu" sia dingin Pawlpi-in cial leuleu uh hi, a Pastor te uh kua mah om lo sang zom vive hi uh hi. A Pension lak ding Mualbem Pawlpi-in na thei uh a, tua kumin Budget geelna-ah Full Time Pastor dingin zat sawm in geel pah uh hi, mipi mai-ah zong pulak uh hi. Sia Thawn Za Nang in Lai Siangtho sangkah loh mah a pauh lap zel ciangin "Hong sem phot phot in Nang ut na munah Pawlpi-in kongkah sak ding uh hi " cih dongin Pasian min tawh kizol uh hi. Tua khit nipi zawh ninga (Friday) ni-in a khua Paakzang ah a ciah leh hi thu teng na thei khin uh a, Pawlpi panmun len teng hong pai-in Lai Siangtho sangkah ding, Pawlpi sia sem dingin cial leuleu uh hi. "Inn gua hah lo, gamgua hah ding na hiam" Mualbem Pawlpi-in sia nei-lo hilo-in nang a behlapna hi cih, ei Pawlpi-in aneilo taktak ih hih lam na theih hi kici liang uh hi. Aman zong Mualbem Pawlpite cih a sang hi nailo hi. A tawpna-ah hong kiho thei uh hi.

1993 June khabei kuanin amah sangsia Pension cing pan hi-a, tua khitteh (Tedim Theological College - TTC)Tuiphum sangin sang nawnlo, mai kumah hong kah vetin ci-ahih manin lungbuai uh a, tua leh E.B.C te neih Faith Baptist Bible College & Seminary in sanglai bilbel ahih manin kum 4 sung tawntung Topa'n gualzawhna ngah pih hi. Subject 60 val sin uh a Bachalor of Arts in Biblical Studies degree 1997 March khasungin Yangon pan a ngah hi. TBA in sia kipawlna (TSK) ah lut sak pahlo-in kum 2 et cik dingin koih uh hi. Ahi zong Falam nitak sang a kahnate a lah teh kum 2 sawt saklo uh hi. MBC pan Minister Identity Card No.3980 na tawh MC letmat a ngah hi. A (52)vei TBA khawmpi lawibual pan 26.3.2000 ni-in Ordained Pastor (Siampi za) angah hi. Mi 76 Tuiphum khin hi.

Pasian hehpihna tawh a Pawlpi-in it mahmah uh ahih manin kum 76 bang ahih hang Pension ding phallo uh hi. Kum 20 sung bang Pawlpi tawh a ki thuahna-ah Pasian om pihna tawh paubanna bang mah tu ciangah ki zalo hi. Naupangneu pawlkhatte bangin Pasian sa uh hi. 1961 October 28 ni-in Pastor Ngin Khan Do (G.Nekngen) tanu Lia Ciang Za Niang tawh pum khat suak uh a, tapa 5 leh tanu 5 a neih lakah tapa 3 leh tanu 4 in tu ciang dampih uh hi.

Source :
Pakzang Khua Tangthu.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: REV. THAWN ZA NANG TANGTHU. Description: Rating: 5 Reviewed By: Cinpu Zomi
Scroll to Top