728x90 AdSpace

Hot
Menu
Zon-ol na Donate

Latest News

Zomi & Zogam Development (Part One)

Zomi & Zogam Development (Part One)

Zomi & Zogam khantohna ding:
1.      Bridge to Bridge Roads
2.      Tedim Area Ring Road
3.      Tedim Road
4.      Village to Village Ring Roads
5.      River Bank Hydro Power Project
6.      River Range Housing Project
7.      Radio & Television Private Services                                                                        

Introduction:  Zomi & Zogam khantohna ding tawh kisai mikimin deihciat ding leh deihsak ciat dingin ih ki lamen hi. Pasian leh hong uk kumpite in zong khantohna ding vaihawmin ma laden hi. Ih kisapte pen eimau khua aiding bek ngaihsutna tawh kingen hi. Budget tampi ih ngahnop hangin mi tampi hamphatpih ding akizom diudeu lampite, ahihkeileh vaipuakte ngetna lamsang ah ngaihsutna saupi kisam cih phawkciat ding ahihi. Democracy hunpi sungah lutkhin ta ihihmanin lungsim tawng ah pua venvan nawnlo-in suakta takin lungsim ngaihsutnate sunkhiat hun hong tungta a, Hlutdaw palaite-in tuate hong gensakna dingin Gambup $umpi pan khasum tampi tak kipiata cih theiciat hi hang.


          Gam sungah kumsialin lampi bawlna dingin Sum tampi kizeek den a, World Bank inzong Asian Highway bawlna dingin panpihna tampi mah a piak pen mikimin theiciat hihang. Myanmar Company tampi-in Zogam lampi zikna maban hong laktheih lungdamhuai sa in lungdam hang a, atatakin Zogam aa om Company tengin a septheihding uh hilel mawk hi.  Gamkhantohna tawh kisai thupi khat ah gamsung aa om mipite sum ngahna leh a sumngahte uh tua gamsung mah ah zeekkikna tungah tampi na kinga citciat a, Zogam leh Zomite neihsa Company tampi omkhin ahihmanin tuabangte-in nasep thupi tampi ngah henla, a sumngahte uh Zogam sung mah ah hong zeekkhia kik hileh khantohna hipah hi.

1.      Bridge to Bridge Roads: Zomi & Zogam khantohtheihna dingin kikawmna lampi thupi masa pen hi. Eimau ciatin zong kikawmna lampi akisapziate a phulkhakim dingin kong lamen hi. AD.2000 kum pan Zogam sungah Gospel pai kawikawi khat ka hihmanin khua tampi ah khe tawh ka pai a, Cycle hun hong tunciangin lampi kisapna thupi semsem tawh kibang kasa hi. 2014 Tedim GZA II khitciang Census madeuhin Tuithang Lei tawnin ZBCM Mission Director Sia Suan Khen Kap tawh Gawsing dong Cycle zangin ka pai uh-a, Mualnuam ah kilekkik in Laitui ah tua pan Mansuang Lei tawn in 11:30PM in Tedim ka tungkik uhi. Lampi om hizen leh Lunmual paisuak vatna ding thukin message om a, ahizongin lampi haksatna tawh kipaipah theilo hi. Banghanghiam cihleh Tuithang lei panin Laitui lei kizopna lampi aomnailoh mahbangin, Laitui lei panin Kaptel lei ah paiphei ziau theihna ding lampi om ngeilo, kigeel ngei nailo lai zen hi. Hih bangin Zogam kikawmna omleh a hunlapin kipai thei ding cih ka tuahkhak thu in pilna hong guan ahihi. Nopna-dahna vaikin khatpeuhah lampi thupi diak tawh kibang sese hi.

2.      Tedim Area Ring Road: Zomi & Zogam Development Part One, Step 1 a'dingin a thupi masa khat in Tedim Area Ring Road kisapna kikumkhawm masa dih ni. Tedim pen Zomibup Khuapi ahihna GZA II, Tedim ah 2014 in kipulak zihziah hi. Tu-in Gamsung Kumpi makaite, NGO, INGO'te hitaleh, Minam, Gam, Biakna Makaite hitaleng khantohna ding bangteng ihgeelkhin takpi uh hiam, …? Geelna thupi masa aa, tua geelnate Kumpi tungah akingeen thei ding teng pen Hluttaw khawng ah nget ding pawl omding a, pawlkhat pen NGO leh INGO tawh kop in sepzawh ding pawl om maithei tak hi. Zomi leh Zogam khantohna ding deih takpi, adeihsak takpite-in Tedim Area Ring Road vai thupi ngaihsut ding ahi hi. Sum lametna bek tawh a kineihkhem makaite in hih bang pawl thupi salo mah leh Zomi & Zogam khantohna ding adeihsak takpi Makai hong pianglai ding pawl in "Sep-le-bawl, Tup-le-ngiim sungah hong hel masa ciat tek ta un."
            Banghang hiam cih leh:
1.      High Schools Level: Collge om nailo! Ih Tedim khuapi sung bang ah High School 2 bek ompan a, Sangnaupangte ahihleh khuasung bek pan hilo-in khual-le-tual mun tuamtuam pan Sang kikah khawm ciat ahihi. Nu-le-pa in Boarder ah a koihzawhlohte pen amau-le-amau hanciam tawmna tawh Sangkah Sangnaupangte in Khuapi sungah Inn hawm tam mahmah taleh Innsaap ding muzolo, Innsaap mumah leh saap zolo cih phawk leng, tuabang naupangte hong khuasuahna ding, khuakiim bulphuh nuam naupangte a'dingin ngaihsutna, malakna thak ikisam hi. Amau septheih ding pen huan nasep khawng hi. Ih khuapi kiim tengah tui tampi om a, mehlei bawl, gankhawi kawm in sangkah thei ding uhi.

2.      Students: College bang omleh Zosuan Sangnaupang haksate pawlin amau' zontawm nasep ciat tawh sangkah theihna ding ngaihsut kul hi. Tate deih bangbang na leisakzo phial zongin amau' hanciam tawm nasep khat peuh tawh malakna aneihtheih ding uh thupi simgige zel hi. Gam khangtote bangin naikaal sial a sumthalawhna om nailo himahleh khuakiim bulphuh kawmin septheih ding tampi omkha maithei ding hi.    Gtn: Ak, Vatot, Ngasa, Ui, Vok, Keel, Bawng, Furniture Works ... etc.  Mehteh-mehgah limci ciingthei bek le'ng neek-le-dawn phatuam in sumzonna hoih hi a, Nu-le-Pa in hih lampi tawn in hong khansuah uhi. 

3.      Thanuamna in vaang: Mihing thanuamte in nasem nuamin nasep ding zong zong uhi. Nupi pawlkhat in atate nasep nop gige lam phawklo hiam, hehpihlua hiam ahihkeileh kiphasak sim hiam cihteng tawh a tate a thadahsak nupi tampi tak omthei hi. Na tate a thanuam kimlai na thadahsuah lohna dingin a sepnop nasepte sepsak ding ahihi. Ka muhngei naupang pawlkhat pen Mehlei ciin kawmin sangkah uhi. Thanuam ahihmanun nasem kawm thei, semman lel uhi. Laisim ding kipelh saklo in nasem, a kisapte uh tuabang sumngahna tawh leizo uhi. Tuhun ciangin eimau ciinsa mehteh, mehgah neek ahoih pen hun ahihi. Tedim khuakiim ah tuabang thanuam khangnote adingin mun hoih tampi omlai hi. Zogam khualam naupangte aw hanciamin hong pai un.

4.      Khuapi ih suahnop takpi leh khuakee tampi nei masa takpi ni. Tedim Khuapi in DC ngah ding cih thuging hong omciangin mipite lungsim pen "Van aa khai bang!" liangin ki nuamlua mahmah kawmkaal ah DC hong kipiakloh kikciangin ki khasia mahmah leuleu ngeiliangzen hi. Tua tawh kisai mipi deihna a omhangin septheihna nei pen mimal 2 leh thum khawng hilel mawk hi. Kee neihsawm masa ni. Baalpi mah bangin kee tampi neih ding akisam masa khat ahihi. Bangbang hitaseleh DC tawh kituak ding khop, DC Zumpi phuhloh phamawhzah dingin hong kipuah mawk leh lampi, lamlian, lamneu, kongzingte, zunbukte …etc, tungtawnin mailam ah Zogam makaite in hong dong niloh nawnloliangin DC hong piaknop zungzung ding khop ahihding makai thak pawlin hanciam khawmin DC hong geelciat ta un.

5.      Tedim Ring Road Projects: Zomi & Zogam khantohna dingin naseptheihna Budget Sumpi pen Kumpi khut sungah aom mahbangin Mipite khutsungah zong omta hi. Khua kiim hausate leh Khuakiim mipite in kipawlkhopna hong nei masa un la, tua dungzui-in Tedim Area Ring Road deihna thusuak ding khop in thuging hong omsak un. Tua bangin lungsim deihna pen Gam makaite kiangah pulaksiam lehang Hluttaw sung khawngah Development Budget kihawm hun, maipha ngahna hanghiam, banghiam, Pasian Thupha hamphatna tawh Development Project khat peuh vatuak kha geih lehang thakhat in Ring Road Project hoih mahmah khat neipak ziau in khangto khawm pak ding hang aa, Tedim khua sungah teenzawh kuul sese nawnlo-in na Inn mai ah Motor in van na deih bangbang hong puaktheipah ding, na painopna mun ah hong dawnziauziau hun hong tungthei ding aive! 

1.      Sangnaupangte Bus in hong dawn pahpah ding a, tua Bus pen Town Bus ciding maw, City Bus ci ding cihkhawng hi ding hi.
1.      Kikawmna ol mahmah peuhleh ki-it, ki-ngaihna khang ding hi.
1.      Kimuhna tungtawnin kizopna, kizopna tungtawnin kimuhna ol zawdeuh ding a, kipi-kiteenna zong baihlam tuam pah ding hi.
1.      Septheih ding leh sep ding hong tam mahmah lel ding hi.
1.      Sumzondan zong lem mahmah ding a, Biakna lam ah zong khantohna tampi ompha mahmah pah ding hi. Ahangbel Biakna lam Zum kici khempeuh Tedim ah kiphut kim ta hi.
1.      Tulaitak Tedim Khuapi sung sangin khuakiim aa mun-awngte  taanzau singsengin a ut-huaizaw mun nopcizaw tampi omlai hi. Lampi kihong hileh lamdungte khua hong suakthei pah ding a, Zogam mun tuamtuam pan in Tedim kizuan mahmahin Khuapi a suak semsem na di'n Inn hong kibehlap ziahziah pah ding hi.

Theihding: Ring Road Projects nasep a kisep kei buangleh hibang khantohna lam-en kei zaw ni. Ih khua lampi ciat bek thupi ih sak laiteng pen khuadangte tawh kizopna omlo in a picing khantohna cihbang hong omlo ding, om baihlo ding hi. Ki thadah suah kei ni. "Kei leh Pasian" kizopna phazo! aci vatvat pawl bang kei zaw ni.

3.      Tedim Road: The 1st  International Seminar on Translation for the Development of Zomi Language & Literature Society pan sapna tawh 2014 November in Tedim Road zuito in Lamka Khuapi ah Tedim Khuapi taangmi in va kihelthei-in Zomi, Zogam & Common Zolai vai tawh kisai thusunna Zomi Research & Media panin va neithei ing. Tua tungtaangin ciah-le-kuan cycle hawl in Tedim Road dungzui ka hihmanin thu tampi mah ka ngaihsun kha man leuleu zel hi.
1.      Tedim Road:   Tedim khua aa teeng pawlkhat in Tedim Road tawh kisai    a ngaihsun man khollo kitam mahleh Pasian in England Kumpi zangh in hong piak Political Road Map ahihlamtak ka phawk khia hi. Ahangbel Lamka ka omsungin Inn & Sai thupi tampi pen Zomi Sanggamte banah namdang sumhaute-in a neihhangun amau address gelhna ka muh ciangin a lampi min a gelhna uh ah Tedim Road cih kigelh tampi om mawk hi. Thamlo-in Google Earth pan Lamka zongleng Tedim Road kimu masa hi.

1.      Tedim cih min pen Pasian in Thupha a piak min khat na hi gige mawk hi. Tua manin Zomibup Khuapi ding pen Tedim a kithukim sak hikha ding hi. Pasian telhawm siam dan lamdang mahmah a, theihkimzawh ding hilo hi.

1.      Tedim gam sungah na teengkei phial zongin Tedim Road dungzuilo-in Lampi anopzaw kibawl nailo a, atatakin WWII lampi buang dingin limtak a kipuahphazo nailo lampi hilai mawk hi. Galpi nihna hunlai khawng aa, gamdang galkap hong kuan a damlaite lak khawngah hong paikikzo khawng om hizenleh hong khasiat mai liang ding uhi. Khantohna ding pen lampi kisam masa pen hi. Makaipite in ih Zogam lampite bangciang tungta cihkhawng records a hong bawlzelzel ding leh meter roads hong vaihawm mengmeng dingin lamen dih ni. Amau zong meet lawh veve tek in ciai!

1.      Lam hongte hizaw dih ni:  Tuni in Zogambup khantohna dingin Vision ih neizo naikei phial zongin ih mipihte teenna vangkhua a suahtakna ding leh Tedim pen Zogam sungah khua thupi mahmah khat a suahna dingin nasep hoih sem ciat ni. Hih lampi hoih a khaktante hikha peuhmah kei ni.

4.      Village to Village Ring Roads: Zogam khua kisatziate ih-etciangin mualkawm, Guamkawm teng beel in kiteeng masa ngei ahihmanin khua taanzau sing- seng tamlo-in kikawmna lampite haksathei mahmah hi. Ahizongin khangthak hun ah lampi thak zondaan kalthak suan hunta hi. Tuabang siamna nei, mailam saupi khualna tawh khuadangte nawk-in lampi zongthei, budget ngetsiamte maban ah mavanna thak omding hi. Zogam Lambupa Pu Vum Nang, ZRDP malakna tawh khua kizopna lampite kizom diudeu-in hong kibawlciangin khualzinna mazangin hun tomno sungin ih tunnopna mun kitai vingveng thei a, pahtak huai mahmah hi. Ama' mai aa Zogam lambu masapa Pu Kham Za Kap hanciamna tawh khua tampi mahin apheideuhin lampi kitawn a, "Zogam Tualsuak Lambute zahtakna ih pia hi."

Thu ngaihsuntheite leh hihtheihna tuamtuam aneite-in Tualsuak Rambo te bangin Zogam sung ah khantohna a-omna dingin malakna thak nei-a, ih ngaihsutnate sepkhiatna tawh laksiampah in mapangkhawm thei leng, khua-kiim kikawmnate kizomsuak in ih khangto baih ding hi. NGO & INGO tawh kikop siam sawm ni.   

5.      River Bank Hydro Power Project
1.      Mual-le-guam, lui tampi kigawm tawh Pasian in Zogam hong lamkhopna pen ngimna tampi nei ding cih ka um hi. Banghang hiam cih leh Zogam luituite siang kilkel, ciim sitset in mualdawn suangkawm khawng pan hong phulkhiat sak ahihmanin Tui Tanky bawlloh in zong Hydro power bawltheihna dingkhop in tuitha hatpha mahmah a, ph7 tuisiangtho vive hilailai tazen hi. Khuapi ki-eeng nawnlo zah ding dinmun ki manawh ta hi.                
1.      Water Bank ahihkeileh Dam: Mualkuam khaktan in tuikholna cihbang mailam ah bawlzo hilai lehang, Tuitha tawh 24 hours Electricity ngah bek-lo-in tua sung pan Ngasa namcin, Kaikuang namcin, … kingah ding hi.                
1.      Meiset Hoih neizo khin peuh leng, … sepnop leh septheih ding pen tampi thei ding ihihman in mi tampi kisam ding hang a, thatang koi ci ngah ding cih ngaihsutna khang ding a, robot na leng akizat hun hong tung ding hi. Zogam sung aa khangnote zong gamdang pai sangin private nasep nei in private company nasep ding vive, a thupi ngaihsut hun tung ding hi.                      
1.      Company Electricity: Tulaitak aa Zalui meiset ciacia pen mimal in neizo, bawlzo ding ahihmanun amau deih bangin asepnop peuh uh amau company meitha ciat tawh sem ziauziau ding uhi. Tua hun ciangin Meisum / Electric Bill apiak niloh sangun Private Hydro Power bawl ding ahihmanun gundung mualkuam tengah company tampi omzihziah ding hi.                                                                  
1.      Pilna nei khangthakte in nopsa ding: Tu ciangciang pen gamdang paizote bek a hauzo dingin ngaihsunkha ihihmanin amau bek mah a hausa hihang. Leitung khuahun kihekzia dungzui-in hunkhat ciangin gamdang aa om unaute pen Zogam ah hong ciah kik ding uh a, pilna siamna asinte uh zatkik theih hun hong omding hi. Tua hi-a, Mikang lai/pau sinzom ciat ni.                        
1.      River Bank Hydro Power neizo takpi le'ng tulaitak ih zakkhak ngei nailoh company tampi hong lut ding a, pilna tampi ih ngah ni ciangin Gundung kuam pen mi tampi teentheihna mun hoih suakpak ziau ding hi.               
1.      Lampi hoih mahmah ding ahihmanin kikawmna manlang mahmah ta ding a, septheih, bawltheih ding tampi ih theih semsem hun hong tuntak ciangin a beisa aa hun ih mawkzatkhak hun hoih tampite pen paammaihsa lua in a khuisa niloh leh a kap bang ih omkha phial ding hi. Khangthakte in pau manlo liangin nasep hahkat mahmah ding uh a, kikhangto semsem ding hi.                                                          
1.      Hun: Hun thupi mahmah icih pen second khat zong aki lakik thei hilo a, mi khat tawh ih kimuh ciangin ih hun hoih bangzah hiam khat a piakhia ihihmanin lungdamna meel atheinailote in hun thupina atelciangun mi tampi a kap ding uhi.  Pasian hong piak Zogam Mualkuam leh guundungte ih zatsiam HUN ciangin tulaitak ih dinmun zah 75% in kikhangto ding hi.

6.      River Range Housing Project
1.      24hrs Electricity: Meitha hoih tak kingah ding ahihmanin Inn tampi kilam ding a, teennophuai kisa pakziau ding ahihmanin Inn khang hathat ding hi. Meitha tawh an kihuan ziahziah in tui kinopzat mahmah ding hi.                    
1.      Khua hun: Tedim ah phalbi khuavot sungin Kalaymyo lam azuansuk pawl omzel a, gundung pen khuahun nop ihsakna mun hoih hong suak ding ahihmanin khua hun siim dingin mi tampi guundung kipai ding hi. Meilum kaai ahihmanin "ci-puakkham" omlo a, nuam kisa hithiat ding hi.                
1.      Dam/Tuikhollna lianpi omleh ngakawi tawh ngasa siah nuam khempeuh kiphal ding ahihmanin Resort, Picnic paina mun thupi khat suak ding a, tua dungzui in neek-le-dawn zuakna sai tampi zong om ding ahihmanin sumzonna mun suakziau ding hi. Inn-le-lo tawh kiteeng pahthei ding hi.                   
1.      Tuipeek kisinna Sangpi: Zomite pen Tuipek nuampipi a, tuipehna ding mun leh tuipeh siamna kihilhna atamlohmanin tuipeek theilo kitamlua hi. Hun khat ciangin guundung ah Tuipeh kisinna Sang hong om ding a, Letmat piatheite in hong makaih ding uhi. Tua hunciangin Zomite pen koikoi Gam ah ih tungzong tuipek siam lak ah kihelthei ziau ding hi hang. Tui hatna leh tui hatlohna mun ah Tuipehdaan, … Tui tawh kisai Pilna sin dingin March-May pen guundung Tuipeh sinna Sang ih kah thei ta ding hi.
                       
1.      Teekzang/Vialcian: Tuciangciang guundung ah a teengsuak kinken zo pen Tedim leh Tonzang gamgi aa Teekzang leh Vialcian khua bek ahih hang, hunkhat ciangin guundung khempeuh pen Inn mun asuah hun om ding a, pawlkhat in Dolsing leh Singkung manpha tampi ciing ding uhi.                  
1.      Sang Hoih: Gam sung aki khantohna dungzui-in sang hoih ngah ding ahihmanun Inn kibehlap mahmah hun hong tung ding hi.  Tuabangin Inn tampi aphak hunciangin Primary Schools, Middle Schools, High School abanban in kipia ding ahihmanin kumpi nasem tampi teengsuak ding uh a, kumpi Zum leh Sang Inn tampi om ding ahihmanin minamcin teeng khawm in Inn khangkhang ding hi.                                                                              
1.      Amau gam ciat guun dung ah teengnuam ding:    Mipawl khat in amau gamsung puah ding ngaihsun pan ding uh a, Gtn: Tedim leh Tonzang bang guundung ah kituhteh in, amau gamsung aa om gundung ciat Lei-le-Lei kizopna lampite om diudeu leh kizopna ol mahmah ta ding ahihmanin khantohna manlaang mahmah pah ding hi. (Tampaya pum khat Ks.100!)

1.      Kipi-kiteenna: Kikawmna ol leh nungakpi, tangvalpi tawmtuam ding a, meigongte'n zong koppih zonna lam ah baihlam deuh in, Inn tuan dingte adi'n zong baihlam pah ding hi. Kimuhna tam leh ki-itna khang a, ki-itna pan kiteenna piang in Inn khang hi.                                                                 
7.      Radio & Television Private Services           
1.      "R" = Radio nei thuthak thei: Zolai sinbu sungah Sangmangpa J.H.Cope & H. Gin En Cin maban zom in hunthak ah "R = Radio nei thuthak thei!" ci-in akisinzawh kum 100 bang cing ta himahleh Radio ih neizo naikei hi. Radio nei icihte in amau awsuah ngiat tawh thugen thei, thuzasak thei uhi. Kideidanna omlo in Radio Station a neizote pen Radio nei takpite ahi uhi. Atatak in Bochoh Aung San in Burma Independent lak ding hanciam a, British kumpi in Independent a piak noploh ciang, London pan kileh kik a, Burma proper leh Frontier Area thukimna letmatthuhna na ngen niloh hi.  Mualtung gam makaipite letmat thuhna adeihna tawh England gam, London khuapi pan hong ciah kik hi-a, Unoin of Burma lamna dingin "Mualtung gam & Zaang gam hamphatna kikim in vaihawm khawm ni" acih ngeu-ngeu ciangin Pinlong Agrrement na bawlkhawm thei pan uhi.  Tua zawh ciangbekin Independent akingahzo pan ahihna, Chin Hills pan Pu Thawng Za Khup, Pu Hlur Mung, Pu Kio Mang … in letmat thuh ahihna, Bochoh Aung San leh Pu Vum Khua Hau kikhawl den ahihna thu kicing na omlai hi. Tuni ciang dong Pu Thawn Za Khup representatives gamkuam mipite in amau awsuah tawh Radio nei ngei nailo, phalna zong omlo cih thu hangin thungaihsuntheite in R=Radio nei thuthak thei! pen Zogam khangthak momnote, Siamsinte, Makai thak, MP te maban ding hi.

1.      Thumuhna kisampha: Abeisa hun aa kumpi uliante hong pai ciangin lampi puahna ding, lei puahna ding, sang inn lam na ding, … etc … akingen hi a, minam level in ih zatkhop ding athupi Radio Station cihbang pawl kingen ngeilo, nget theih dingin zong kituatlo hikha ding hi. Ahizongin Democracy gam akici peuhmah in Radio Station leh TV Channel pen Minam Aksi ciaptehna anei khempeuh in aneithei ngeina ahihi. AD.2010 pan Democracy ki-ukna a zangh gam ihih ma pek in zong National Flag ah Aksi 14 kinei ngeikhin a, tua Aksi 14 lak ah 1 ihi gige hi.  Tua ahihmanin hong kipiak, hong kipiakloh athupi masa hilo-in nget hamtang ding akisam mahmah Minam level in a thupi pawl na om gige hi. A ngen ngei nailo ihihleh … hunkhat ciangin amau hong ngen ngeilo hi,... hong cihsan laidep ding uhi. Hih pen etsakna hi a, hihzah aa thupi tampi nget ding kimlai ih nget ngei mahmah loh tampi omlai maithei ding ahihmanin Zogam makaipite in thumuhna tangzaipi tawh hong makaih un. Hlutdaw sungah i kihelzawh den ding leh thumuhna saupi neih ding ahihi.       

1.      Thutheihtelna: Mi khat peuh in gam makai asepnop takpi leh abeisa hun- gam tangthute leh tu laitak gamsung dinmunte atheihtel masak kul a, tuakhitciangin mailam ah koici bangin mipite thapia thei ding, kalsuanpih ding, amau' kisap bangteng, … septheih ding bang teng, NGO leh INGO saptheih ding bang teng, Hlutdaw sungah nget ding leh ngetsak ding pawl khentel sitset theihna leh a hunlap in thuphawk theihna kisampha hi. Tuabang thuphawktheihna dingin lawm muanhuai leh lawm hoih kisam hi. Mipite lam pan zong makaite hong makaihziate ih telpih ding kisampha hi.

1.      Khantohna: Development    Hih ih thulupi tawh kisai kikum suak leng, gtn: FM Radio bang deih in aki hanciam saan laitak hi a, phalna kingahzo nai mahmahlo cih thuging omlai hi. Ei lam pan zong gam-le-nam adingin a muanhuai minam ihihzia ih gentheih ding leh gam makaite in hongtheihtel ding kisampha hi. Muanna aom masiah, bangmah akipia ngamlo mah hi-a, thu khat a, tulai khangthak makai pawl khat in minam level in a muanhuai leh a thupi minam ihihzia a theihcianlo, ki-ukna lam a leenkha makai omthei ding hi. Union of Burma ahuu, akeem, acing minam muanhuai khat in ngah ding kilawmte angahzawhna dingin backup laigelh tampi aomciang khamtung, mualtungmite dinmun hong kitelpih ciang bek in ih thusunte alutzo ding, hong kipia nuam ding ahihi. Khangthak makai tampi in Burma/Myanmar adingin Zomite mapannate, khua-ul, sisan, luangkhaam aa nasepnate atheih ciangun, ih deihngetnate hong kitelsiampih in hong kipia ding ahihi.           Hih bang ih dinmunte thei gige in hong kikhaktan teitei ahihleh mailam ah khangthakte in ngaihsun pha in mapankhopna tawh lahkhiat theih kul hi. Federal, Federal cih kammal ciang bek hilo in practical ih suahsakna ding, lampi maan tawnin abanbanin kalsuan toto leng mipite deihna thupi sim in kalsuan takpi leng, "Khantohna tawh a mainawt Zogam" ih mu ding hi.     

1.       Radio & Television Private Services ih kisap takpi ahihna:         Democracy lampi maan tawh mipite ih kalsuan theihciang bekin tulai hun aa, Radio & Television Private Services hong kipia nuamlote,  a semnuamte in semkhalo, akin masalote lah kisemsem sak, hibang, …etc ihcih hun hong bei ding a, Gam-le-Nam kikhualna takpi tawh suakta takin nasep theih hun hong tun mengmeng na dingin thungetna leh nasep hanciamna namcin tawh mapang khawm dingin ih kihanthawn phapha hi.  Banghanghiam cihleh Zogam mualkuam icih pen lampite haksatna hangin thukizakna haksa a, phone, internet, e-mail, facebook, … cihbang zangkim zolo ihihman, vai thupite ah thukin adingin thukizaksakna ding athupi pen Radio leh TV mah in mun angah ding akisam mahmah thu ahihi. A cithei zawdeuh unaute in MR, MRTV, Skynet, Tata, DTH, … atuamtuam tawh Myanmar News, World News ngah ahihmanun Local Radio & TV Station athupiziate kin masak in nei nawnlo lel uhi. I theihloh kal in khuazing hi.                                                   
        Tuni Zomi & Zogam khantohna dingin Local Radio & TV Channel tawh kalsuanzo photphot leng, gamsung khua gamlapi ah ih omzongin thukizakna baihlam takpi ding a, khantohna akibangin i neikhawm ding hi.     
        Khangthak Makaite in Gam sung khantohna dingin Radio & TV thupi ngaihsut in hong neizo hen la, Hlutdaw sungah ih thusun dingte lutzo masa leh gam sung budget tawh ahizongin, NGO/INGO pan huhna tawh ahizongin akisemkhia thei pan ding hi-a, DVB zong tua bang mah hi.          Ute-naute aw, Pute, Pite aw, Nute, Pate aw, Gam Makaite aw, …                    
        Tu Ni ading bek ngaihsun nawnlo in, Eimau' kungtung adingbek,             
        Eimau' Innkuan ading bek ngaihsun nawnlo-in kalsuan kisin ta ni.
        A Bucing Khantohna ah bangci khantoh theih ding cih ngaihsun ciat ni.
        Tua hileh Mihing hong bawl Topa Pasian lungdam in ih KHANGTO ding hi.



Conclusion: Zomi & Zogam Development deih in khangto nuamlua ihihmanin eimau' munsan ciat ah hong sukha geihgeih aomleh kimaai sak ciat ding hong ngen masa ing.    Kuamah kawktuam in kimawhsaknopna hilo, kigensiatnopna tawh kigelh hilo hi. $umhau Zomi tampi takin Kalaymyo, Yangon, Mandalay leh gamdangte ah sumngahna hoih tampi vaneithei uh-a, lungdamhuai mahmah hi. Gentehna: Zingsang khat sialsial in Bazaar paiman zong ci-ngamkhang ee, naupangte adingin Moh leh naupang deihtheih tuamtuam aleisakna uh Zogam ah akizeek hibek leh zong tua $um teng kilehkawikawi in gam sung sumzeekna, sumngahna, bank balance, sumpi, sumkholna tamsak ding thu hi. Pasian in thupha hong piaksak leh khantohna tampi a semkhiazo suakthei ding dinmun hi. Ahizongin tua $um khempeuh pen lawmte gam leitang tungah kizeek miahmiah den ahihmanin Yangon Mandalay Kalaymyo pen Kha 4 hal bang bekin pai lehang na khangto manzel aive, tua pen eimau' aa tengmah a kizekzekciangin a khangto kicithei veve lel hi.                      
           Tua hi a, Zomi & Zogam khantohna ding adeihsakte in Zogam ah Sum nong zeek ciangun Zogam khantohna ding a semsem na hih gige lamtak uh kiphawk in na hoih sepsawm ciat leng, ih Zogam khangto tuam tuam mahmah ding hi. Company a semtheite, mipil, misaim a samtheite in Zogam khantohna dingin mipil, misiamte sapsawm ciat ni.                   
           Zogam & Zomite khantohtheihna ding Pilna, Siamna aneite in hazalo, iik-siiklo-in nasep hoih a sem dingin hong ciah mengmeng ta un. Zogam Thak lamkhawm nuam hang. Pasian in hong thukimpih leh Israel gam nuam asuahthei, sehnel gam pen mun nopci tak suahtheihna ding pilna a pia Topa Pasian in ih Zogam zong thupha hong piakik ding hi. Tua pen Zomi khempeuh leh Zomi & Zogam a it, a khual khempeuh tungah kinga sak hi.           

         Eite in Zogam Nuam, Etlawm Mualkuam ih mu nuam takpi uh hiam?                                    
         (Dawnna pen eimau ciat lungsim sungtawng pan kidawng ciat ni.)
                                     
Zomi & Zogam khantohna dingin eimau septheih bang ciat, nasep hanciam ni.                   
Mipi sepkhop ding a omsialin a semkha masa ding kituh sawm ciat dih ni.                          
Pasian in a thanuamte panpih a, sepsuakzawhna ding thaguan in a zawh pih hi.                   
"Zomi & Zogam khantohna ding nasep akigeelsialin khutzep in ka enkei ding hi."

Theihsakna: Article reference cihbang omlo hi. Banghanghiam cihleh khualzinna tungtawn, thungaihsutna tungtawn leh phutkhak haksatna experiences tungtawn in kong gelhkhiat hi-a, midang khat peuh idea aki laksak loh ban ah, kuama laibu enkak in akigelh hilo ahihmanin laisim mipite in reference ih deih leh phalna kong piathei hi, ahizongin reference anuai aa bangin na gelhsak hamtang ciat un:

* Joshua Thang, Th.M     ZOMI & ZOGAM DEVELOPMENT pp.1-7, January 12, 2015, Tedim Post

*Zomi & Zogam Development by: Joshua Thang, Th.M "Zomi Research & Media" May Day, 2015

Online pan na etnop hun ciangin a nuai aa link ah enkikthei ni ciai,       Lungdam ei.

http://zomiresearch.blogspot.com/2016/02/zomi-zogam-development-part-one.html

Contact: Joshua Thang, Th.M     (+95) 0936491305

http://zomiresearch.blogspot.com

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi & Zogam Development (Part One) Description: Rating: 5 Reviewed By: Cinpu Zomi
Scroll to Top