728x90 AdSpace

Hot
Menu
Zon-ol na Donate

Latest News

A MANPHA NUTE’ NI! Rev Khoi Lam Thang

A MANPHA NUTE’ NI!
Rev Khoi Lam Thang
Rev Khoi Lam Thang leh a Nu

Zomite pen tangtawng a kipan nu le pa a it mahmah minamte ihi hi. A sih khit nangawn ciangin Pu’ sha pa’ sha ci-in zahtakna na pi alai uh hi. Sente le Kawlte in nute pate pen pasian gui-in koih uh hi. Amai-uh ah kun uh hi. Rhea kici nu-sian a nei Greek-te le Cybele kici nu-sian a nei Rom-te in Jesuh suahma kum 250 pawl in nute zaktak piakna ngeina nei khin uh hi. AD kum 1600 pawl in England gam-ah "Mothering Sunday, Mothering Cake" cih na nei uh hi. Nute’ Ni bawl ding Julia Ward Howe in kum 1872 in na phuang masa ngei hi. Anna Jarvis’ in anu a sih (1905) khit ciangin nute’ thupina phawk semsem a, nute pahtawina ni bawl ding vaihawm hi. 1914 kum ciangin USA President Woodrow Wilson in May kha nipi nihna Nute’ Ni dingin phuangkhia hi. Tu ni dong leitung gam tampi ah kizang suak hi.

Lai Siangtho in: Na nute na pate uh thu na man ding uh Khristian ngeina hi a, zahtak lecin nang adingin thu hong hoihin, leitungah na khan a sau ding hi, (Pai 20:12, Efesa 6:2-3) ci hi. Nute pate’ thuhilhna in tate gamtat hong hoihsak ding a, kizepna lukhu le kizepna khi bangin hong etlawmsak ding hi, (Pau 1:8-9), na ci hi. Tua cih loin pianna pa' thu ngai lo, pianna nu a simmawhte khuamial sunga om meivak kisumit bang dinga (Paunak 20:20), va-ak in a mittang khelkhiat sakin musanete in a sa ne ding, (Paunak 30:17) ci zen hi.
Mihing a piang nute it lo kua om ding hiam?. Pawlkhatte in nu nei nawn lo hihang. Nute’ dam lai taleh ciah khin ta leh nute’ hangin angtang mahmahin Pasian min phat ding ahi hi. Tua ahih manin 2016 NUTE’ NI in a nuaia bangin Nute’ Ni zang ciat ni.
Kam tawh “Nu aw hong it ing” ci ni.
A diakdiak-in nu a damlaite in kammal mahmah tawh “Nu aw hong it ing” ci ciat ni. Na nu tawh na kigamlat leh telephone in hopih inla, “Nu aw, ka lungdam, Nu aw, hong itlua ing, Nu aw, hong maisak in” cihte gen hamtang in. Na pau theih cil lai, “NU” na cih masak lai a, a lungdam mah bangin lungdam mahmah ding hi. Na aw a bilkha ah khum ngaungau ding hi. Ging kikkik ding hi. Na genkhiat loh hangin na nu in na it lam hong thei khin napi, ‘Nu aw, hong it ing’ ci le cin, a lungdam lua kisa in khitui luang ding hi. Nuam mahmah ding hi. A ci dam tuam ding a, a khan sau tuam ding hi. Tua in thupha hi. Na nu a khasiasak ngei na hih leh zong, tu kum Nute’ Ni in kisikkik inla, na nu tawh kikal ah tangthu thak pan pha in. Zekai nai lo hi.
Gamtatna tawh itna kilangsak ni.
Nute pate a upat deuhdeuh uh ciangin nuam baih phadiak uh hi. A lian a mantam kisam masa lo hi. Na nu na itna bang hiam khat tawh pulak teitei in. Nik hoih leisak in. Puan hoih pia in. Delhphah puan thak kheksak in. Samkilh hoih leisak in. Sum bawm hoih leisak in. A duh diak an lim nekpih in. A lemna munte ah ansai ah paipih in. A singgah duh diak khat leisak in. Na neihna tawh kizui-in a limpen, a hoih pen, a thupi pen tawh Nu aw hong it mahmah ing ci in. A nam thei in nam un. A kawi theite in kawi un. A lu sawpsak in a sam hiatsak un. Kisilsak in khutcin khecin tansak un. Tua cih le cin leitung nuntak nuam nuamsa ngaungau dinga, cimtak ngei lo ding hi. A tate a tute itna siangtho a san khak uh ciangin kum tampi nungta nuam semsem ding uh hi. Ahih theih leh a kiangah sau veipi tut sawm in la, a neulai thu khawng dongdong in. A aw khum in. Thupha kipiasak in.
Nisim-in NUTE’ NI bawl ni
I gensa thunihte pen nu damlaite ading ahi hi. Ahih hangin nu damlaite le a dam nawn lote adingin a kibang in ihih theih lai thu khat om hi. Tua in nute’ hong itna thuhkik ding ahi hi. Khangluite in “Ka si zongin muat kei ning” cih kammal zang thei uh a, a muat nuam lo hi loin, a tate a lung hihmawh luatna a genna ahi hi. A diakdiak in a tate khat peuh thumang kei leh, koikoi a tung zongin ihmu thei lo, lung nuam thei loin om den uh hi. Tua ahih manin nute pate in a sih khit nangawn in hong vilvil, hong enen ahi hi. Thupha hong piapia ahi hi. Tua ahih manin:
Nute theihin hi ta leh a theihloh in hi ta leh,
Nute dam lai hi ta leh a sih khit ciang hi ta leh,
Nute tawh i om khop ciang hi ta leh i kigamlat ciang hi ta leh
Nute lungtang a nasak thei dingte pelin,
Nute a lungkimsak thei dingte semin,
Sih dong nuntak ding ahi hi.
Tua hi leh na nu vang a piapia na hi hi. Nang hangin na nu angtang kinken ding hi. A omom na pan LUNGDAM TAWNTUNG  dinga, thupha hong piapia ding hi. Na nahlawh peek ding hi. Tua hi leh Nute’ Ni kum khat in khat vei a kibawl hia hangin, nang nisimin NUTE’ NI a bawlbawl na hi ding hi.


Rev Khoi Lam Thangte nupa....

*******************************************************************

Sia Rev Khoi lam Thang in Zomi eLibrary / Laibusaal ading in hong piak, hong khak ahi hi.


date: Mon, May 2, 2016 at 11:40 PM
subject: 2016 NUTE' NI

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: A MANPHA NUTE’ NI! Rev Khoi Lam Thang Description: Rating: 5 Reviewed By: Cinpu Zomi
Scroll to Top