728x90 AdSpace

Hot
Menu
Zon-ol na Donate

Latest News

Pasian in Zomi (Chin)-te Hong Zangh. Tg. Chin Khua Khai

Pasian in Zomi (Chin)-te Hong Zangh.
Tg. Chin Khua Khai

“Zomi aw, nang in minam neu minam ginalo na hi peuhmah kei hi. Bang hang hiam cih leh, nangma’ sung pan-in Pasian’ naseem tampi piangkhia ding-a, leitung mong dong-in Pasian’ hoihna pulaak-in a khuavak na taangsak ding hi.”

“Pasian in Zomite Hong Teel” cih thulu tawh Zangkong Awging-ah lai (article) k’ong suaksak ngei hi. Lamka, India-a i sanggamte’n zong amau’ laihawmkhiat sung-ah na suaksak uh hi. Mi tampi in, “ Tha ngah ungh,” ci-in lai le kam tawh hong zasak kik uh hi. Tu’n “Pasian in Zomite Hong Zangh” cih thu k’ong gelh hi.

Kawl gam sung bek hi lo, gamdang mun tuamtuam-ah zong Pasian naseem Zomi tampi ki-om ta hi, cih pen Zomi tangthu sung-ah a thangah huai mahmah thu khat hi dingin um ingh. I gam veeng a hi Thailand, Malaysia, Singapore, India pan kipan Korea, Japan, Australia, le nitumna lam gamte ahi America, Canada, England dongin Zomi Pasian’ nasem ki-om kawikawi hi. Hih pen thu lamdangpi khat hi. A citawm mahmah Zomi, Pasian’ thu ih saan zong sawt nai lo, i pilna le i neihsa in zong hong cin’ lo hi napi, bang hangin Zomi-te gamdang mun tuamtuamah Pasian na seem-in ki-om thei hiam cih thu lungngaih huai ka sa hi. A hang tuamtuam a om thei dingte lak pan “Zomi kizelh khiatna (migration),” “Pilna, Sum le Paai zonna,” “Kha Khan’lawhna le a Gah” cih thu thum a tom-in en ni.


Zomi Kizelhkhiatna (Migration)
Taangthu kante in Zomite Tibet gam nisuahna-sak lam pawl pan hong kipanin Kawlgamah hong lal uh-a, Chindwin le Ayeyarwady gunte ii nitumna lam dung suk-ah tawlkhat teeng uh hi, ci hi. Tua pan hong lal-in nitumna lam zuan uh-a saklam-a-te Kawlpi zaang dung-ah, le khanglam-a-te zong mual le zaang kicin’-ah tawlkhat a teen’ khit uh teh, mualtung lam zuan-in tu laitak-a i teen’na Zogam mualtung-ah khua saat uh hi, ci-in na gelh uh hi. Mualtung-ah kum tampi mah kiteeng-a tu ni dong kiteeng lai hi.

Ahi zong kum 1900 khit-a ki pan pawlkhatte Kawlzang lam zuan-in nun’taakna ol zaw zon’ kipan kik uh hi. Tuma kum sawmnga pawl (1950s) pan tuni dong ahih leh pilna le sum zong-in khuapi sung kizuan hi. Kawlpi, Mandalay, Yangon le khuapi tuamtuam-te-ah Zomi tampi mah kiteeng khin hi. A diak-in Mandalay le Yangon khuapite-ah inn le lo nei tampi ki-om ta hi. Tua ciang bek tawh khawl lo-in gamdang kizuan lai hi. Tuhun teh gamdang-ah lalkhia-a a teeng tampi ki-om ta hi. 

Pilna, le Sum le Paai Zonna
I khawhsa kikhamlo, sumbawl sumzuak lah kimapai lo ahih hang hiam, Zomi te’n pilna ki zong mahmah hi. Pilna neite’n Kumpi nasep pen sum zon’na-in kinei hi. Tua ahih manin, Kawlgam sung minam dangte sangin, i mimal phazah tawh kizui-in, laithei mipil kitam zaw-a kumpi naseem zong kitam zaw hi.

Ahi zong ki-ukna kikheel-in, pilna zon’na, nasep zon’na, sum zon’na hong haksat teh gamdang paikhiat ding kihanciam ciat hi. Kum 1960 huam pawl-a kipan gam nuam zaw-ah lalkhiat kipan hi. 1970 huam sungin gamdang-ah a teeng honkhat ki-om ta hi. 1990 khit-in gamdang kinak pai mahmah ta-a tuni dong kitawlnga lo hi. Mimal bek hi lo-in innkuankuan-in kitung hi. Tun’tun’na-ah sep theih ciat kiseem-in nun’tak na’ng kizong ciat hi.

Gamdang a tungmasate inn le lo, le nasep kician tak tawh kiptak in kalsuan ta uh hi. Tunai lam aa  tungte ahih leh nun’tak nading zong-in kibuai mahmah lai hi.  Khangno zawdeuh pawlkhat-te saang kah kik-in lukhu neelkai zong ngah uh-a, nasep hoih ngah-in khasum tampipi a sang zong ki-om ta hi. A huam-in ci leeng nasep ngah theihna mun leh meltheih lawm le gual om nana kizuan hi. Tua ahih manin a mi in a kitawm lai hang mun khat bek-ah omkhawm cih om lo-in khua tuamtuam le mun le gam tuamtuam-ah kizeel hi.

Kha Khan’lawhna Thupha
Tuma kum zakhat lai pawl-in sangmaangte in Zomite kiangah Pasian’ khuavak hong puak uh hi. Amau’ nasepna tungtawn-in Pasian’ thu i saan’,  tu’n a kumza hong cing hi ta-a, kum za cin’na pawi i bawl thei ta hi. Kum tampi sung mah saangmangte’n hong pantah-in hong makaih uh hi. Ih gam ki-ukzia hong kikheel teh sangmangte kiciahsak hi. Tua-a kipan pawlpi sung-ah ei le ei in kimakaih-in kikalsuan hi.

Tua bang laitak 1970 kiim in Pawlpi sung ah Kha khan’lawhna pi khat hong tung hi. Hih khan’lawhna hangin mitampi ii lungsim kikheel-a, Pasian’ nasep ii a man phatna kimu-in kisang thei hi. Hunbit-a i sep ciang bek-a Pasian’ nasem hi lo-in, thu-um mi khem peuh in i sep theih bangbang-a sep ding hi ci-in Laisaingtho’ hilhna bangin kipom hi . Hih khan’lawhna ii a gahte en kik leeng Zomite tungtawn-in Kawlgam sung mun tuamtuam-ah Pasian’ thu a kizelhna kimu thei hi. Hunbit naseemte bek hi lo-in, galkap, kumpi naseem, sumbawl, le saangnaupang a kuamah ciat in a tun’tun’, a om-omna-ah hangsan tak-in Jehovah Pasian min pulak-in gupkhiatna thu gen-a, biakpiakna bawlin, pawlpi kiphut kawikawi hi. Yangon le Mandalay khuapite-ah tuma kum sawmli (1970s) lai-in Zomite’ makaih Pawlpi khat le nih bek om hi. Tu’n Zomite’ makaih Pawlpi kiphah zihziah ta hi. Laisiangtho sang zong tampi kinei hi. Kawlgam khuapi tampi-ah Zomite’ hanciamna tawh a piang Pawlpi tampi om khin ta hi. Mission lam mipilte’n “Lungdamna thu kizelhsak nading-a a hoih pen sep zia in Pawlpithak phuhkhiat ahi hi” ci uh hi. Pasian in Zomite’ nasep hoih mahmah khat hong guan’ khin hi.

Khan’lawhna hangin Pasian’ thuthuk sin nopna nakpi-in khang-a, Laisiangtho saangnaupang tampi hong piangkhia hi. Gamdang-ah pilna saangpipi sin-in kipaikhia-a mipil zong tampi kinei ta hi. I muhna i theihna, i upna hong khangin i ngaihsutna zong hong sang zaw hi. Nidang-a i kihtakna, i launa, i kineuseeknate hong bei zaw-in, leitung mong dong-in Pasain’ mizat te hi ding hi hang, cih upna kinei ta hi.

Leitung Mong Dongin (Sawltak 1:8)
Hi bang teng tawh Zomite Zogam pan Leitung mong dong kizeel khia hi. I tun’tun’na-ah Pasian’ thu mah ki nun’takpih-in kimasuan ciat hi. Nih le thum omnate-ah biakpiak khopna kinei hi. A pawl cing zawdeuhna munte-ah pawlpi thak phuan-in kimakaih hi. Sia seem thei dingte kiseem sak hi. Zomi sung bek hi lo, Kawlgammi minam tuamtuamte lak, bek tham lo in, gamdangmi innteekte lak mahmah-ah zong Pasian’ na kiseem hi. Khasum bang zahzah sang uh hiam cih dotna om thei zel aa, “Pasian in vaak uh hi” cih tawh kidawng kik zeel hi.

Hih gamdang-a Pasian’ naseem a tam zaw pen ih gam-ah Pasian’ nasem sa vive hi uh hi. Gamdang a tun’ ciangin zong a lungtang uh-ah Pasian’ nasep ding bei thei lo uh hi. Bang cih leng ka tun’tun’ ka om-omna-ah Pasian’ na seem thei ding ka hiam cih tawh kalsuan uh hi. A omsa pawlpi beel-in, a hih kei leh Pasian’ na sep theih nading lampi zong-in kipan tawmm uh hi. Missionary, saangsia, le inntek pawlpi tawh kizom-a a seem khat le nih in khasum man tak-in sang uh hi. Pawlkhatte a pawlpi uh pan huhna kipia hi. Pawlkhatte amau le amau in huhna ngen tawmm-in seem uh hi. A tam zaw pen khasum saang lo, a nun’tak nading nasep dang seem kawm uh hi. Pawlu bang aa “Puanbuk Khui” (Tent Maker) nasep tawh Pasian’ naseem vive hi.

Hih ci bangin Zomite’n zong tu hun nunung sung-ah “Leitung mong dong-in” Pasian’ thu kizeekkhia ta hi. Pasian in Zomite hong zang kei i ci thei diam? A nuai-a mimalte leh a Pasian’ nasep nate sim leeng tha ngah mahmah ding hong lam en ingh.  Zomi aw, thahat in la hangsan in. Topa in taanglai in Joshua a ompih bangin nang tawh hong omkhawm hi. Pasian minthang ta hen.

(Theihding: Amin, a nasep le a sepna pawlpi, a khua, pawlpi sung minam tuamtuamte, leh a dang nasep thupite ka ngah masak a banban-in k’ong gelh hi. Address kimtak-in kingah zo lo, le gelh khin leeng hong saulua ding ahih manin k’ong gelh nawn kei hi. Siate a vekpi phial in ordaination ngahsa vive hi. Doctorate ngahsate a min nung-ah kong guang hi. Information, a diak in Asia sung-a-te, deih zah kingah zo lo hi. Zomi ka cih ciang Chin buppi a gen nuam ka hi hi. Column 4-na-a minam tuamtuamte’ min munah amau pawlpi ii kilawh dan, zat dan-in k’ong at hi. Khialhna a om leh hong maisak un.)


Source :
Page  120  of  200

Vahui Magazine 2006

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Pasian in Zomi (Chin)-te Hong Zangh. Tg. Chin Khua Khai Description: Rating: 5 Reviewed By: Cinpu Zomi
Scroll to Top