728x90 AdSpace

Hot
Menu
Zon-ol na Donate

Latest News

PAU LE LAI. Rev. Hen Khan Go (Th.D cand.)

Pau Le Lai
Rev. Hen Khan Go (Th.D cand.)

Thupatna: Pau panin Lai piangkhia a, lai om masa hi lo hi. Kam paupau napi’n tuni dong mah lai a nei nai lo leitung ah tampitak mah om lai hi. I thulu zui-in, tangpau le tua pau pan lai hong pianzia i gen ding hi.

            Tangpau i cih in bang hiam? Late Lai Siangtho a siamte in Egypt kumpite in kumzalom 16th lai-in Hebru pau na zang khin hi, ci uh hi. Scotland James IV in (16th Century) hunin zong tua bang mahin na gen hi. Ama genna ah Lai Siangtho sung mimasate in Hebru pau pau uh hi, na ci hi. Anreas Kemke (17th Century) hunin a genna ah: Pasian in Sweden-te' pau-in pau (God spoke Swedish), Adam in Danishte pau zang (Adam spoke Danish) in, Gulpi in French (Piantit) pau zang (The serpent spoke French). Becanus in a genna ah: Pasian in Germante pau zang hi na ci hi. Zomite tangpau bang pau ahi tam? Hih pau sungah a kihelkha nam li tawh i en suk ding hi.


I.          Pau (Language) i cih in ngaihsutna genkhiat theihna (Arbitrary) hi na ci uh hi. Tangkamte sungah paudan (form) le khiatna (meaning) a kizopna om vet lo hi na ci uh hi. Kammal cih pen ciamtehnate (symbols) hi a, lamlahna dana suan (signs) dan hi lo hi. Mihingte kampau dan zui-in nuntakna a nei khempeuh ganhingte’ ham nangawn a kikhen thei ahi hi. Tua kammal ciaptehna "Symbols" le lahna "signals" bangci kilamdang hiam? Nawitep ganhingte lakah a sanglen zawdeuhte in hih launa, thangpaihna cihte lakkhia thei uh hi. Zawng gol mahmah (Chimp) a kicite in nulepa lungulhna kilakkhia thei uh a, ahi zong hun tuamlak khop (date) cih tuam nei thei lo uh hi.

            Khitui luanna pen i pumpi i thuakna zia a lakkhia (sign) hi=in mihingte, ganhingte in lakkhia thei hi. I nuamna i dahnate tua khitui in lakkhia hi. Ahi zongin mihingte bek in lahkhiatna (action) kinei hi. Apau thei lote nangawn in a khut uh tawh pau ding teng lakkhia thei uh hi.

II.        Pau i cih in malkhat le khat a kizomsak ( System ) ahi hi. Kizopna a nei mel lo pau cih bang om lo ding hi. Gentehna in India gam pan hong pai American-te in a kigawmzau pau nei uh a, a kigualh zia (system) dan gina takin nei lo uh ahih manin, a pau uh khangto lo pen pah hi. Navaho-te pau theih zawh nadingin kum 30 sawt hi na kici hi. Hih minamte in galpi nihna lai-in amau’ pau pen kizopna (communication code) in na kizang hi.

III.       Pau i cih in a gingkhia ( Vocal) hi. Tu laitak i zat ngeingai paute a tungin kammal tawh a kigen a sa hi a, a kigelhkhia kuama a' om tuan lo hi. Nitumna lam gamte’n a kigelhkhia pau a neih zawh kum 5000 bang sawtta hi, na kici hi. Tua manin pau pen a hunhunin kikhel toto thei a, leitung ah pau nam 6280 om hi ci-in kimukhia hi. Tuate lakah gindan a kilamdang phadiak 450 in kikhen thei hi na ci uh hi. Pau namkhat peuhpeuhin gindan (sound) tam nei loin tua gindan a huh dingin laimal a kibawl behbeh ahi hi. Gentehna-in Mangkangte in laimal 24 nei uh hi. Mi pau tampi amau pau suaksak uh a, tu lianin leitung ah a kithei pen pau suak hi. Zulu-te in mal sawmlilegiat (48) nei uh a, Hawaiian-te’n mal giat (8) nei-in, Cambodia-te’n sawmsagihlenih (72) nei uh hi. Zomite in Pau Cin Hau lai le Mikang lai namnih i nei hi. Pau khat peuhpeuh sungah a tangpi-in awsuah 100 kiim om hi. A tawmpente ah 15 om thei-in mikangte a' 46 om hi.

IV.       Pau i cih in ciaptehna (Symbolic) hi. Ciaptehna i cih ciangin ngaihsutna genkhiatna zong kici thei hi. Ciaptehna’ gennop i tel zawh loh thu pawlkhat zong om thei lai hi. I Lai Siangtho zong tuadana ciaptehna tawh a kidim paupi nam thum bang a kizang ahi hi . Gentehna-in: Khut, khe, tokhom cihdan a tuamtuamte na om hi. Tua ahih manin tanglai biaknate, Buddha biakna bang ah lim tuamtuam na om hi. Tuate pen a tungin pau hi a, tu-in muhtheih lim tawh a lahkhiat uh ahi hi. Lim khat ahih nakleh paukhat hi-in khiatna khat nei hi. Zomite mualsuangte tungah zong lim tampi a kisuai om a, tuate in gennop/khiatna (meaning) nei ciat hi.

            Pau i cih sungah Grammar le Vocabulary namnih kihelkhawm leuleu hi. Grammar (Syntax) i cih pen a kikhak le ciangtan nei ahi hi (Grammar-Syntax is closed and finite). Laimal (Vocabulary - Lexicon is open and infinite). Laimal pen a kihong ciangtan om lo ahi hi. Kiimlepam kikhelna, gam ki-ukna, mi le mi kizopna, ngeina cihte sungah tuate om kim hi. Laps a kici minamte in Vuk a lawhna mal bekbek uh sawmlilekhat ( 41) nei uh hi. India a om Quichua minamte in Alu (potato) a cihna bekbek uh mal 200 nei cizen uh hi. Mikangte in a vom/ a sialam genna bekbek cihna 120 nei uh hi.  A hoihlam a kang cihna bekbek 134 nei leuleu uh hi. Zomite in zong Zasan i cihna bekbek kawlsing, zasan, thaksing, malta, maza cih bangin i nei hi.

Thukhupna:             Tua ahih manin, mi khat kampau i tel keileh ama ngeina-dan (culture)te kitelsiang zo taktak lo hi. Hih a tunga i tom gen mah bangin, ei Zomi khat mikang gam ah suakin, tua mun mah ah khangkhia leh mikang pau bek mah nuamsa ding a, mikang ngaihsutzia mah tawh thu le la zong hong ngaihsun ding hi.

            I phawk mahmah ding thu in 2014 kum ciangin minam lian khat ihihna UNO le Kawl kumpite in hong ciaptehsak ta ahih manin, nidanga i Zolai tan 4 ciang i sinnate ah, phuahtawm le ahi takpi dinga i up tangthu, Gamthu, Cidam bu cihte pawl ban ah, Kammal (Word) le Kampau (language) tel sinna ban ah, i Zolai zatdan zong a tuamtuam mikang lai (Grammar) danin sin ngiatngiat leng mailam ah i zatzia, gelhzia hong kibang dingin ka lamen hi.

            Hih ZYA in laigelh ding hun hong piak ciang ka angtang mahmah hi. Mailam ah Zolai limsim mahmah leng cih ka lunggulhna tawh Tedim pau i cih pen Zomi pau ci-in, Tedim lai i cih zong Zolai ci-in, Tedim Lai Siangtho zong Zomi Lai Siangtho ci-in, Tedim labu zong Zomi Khristian Labu ci-in, limtak zunkik lehang, Zomi, Zolai pen minam dangte nangawn in hong sin nuam ding lam-ethuai hi.

            Mailam ah i Zokam pen i Zolai tawh sinin tua laite sungah A Awsuah (Tone) le Awgin (Sound), Awsang (High Tone), Awlai (Level Tone), Awniam (Low Tone), Awsuah tom le sau khawng limtak i sin hun hong tung ding lametna lianpi hi. Laimal (word) kibang khiatna tuam ciat nei zong tampi i nei a, laimal kibang lo awsuah kibang zong tampi mah i nei hi. I picin semsem nadingin i Zopau zangin, i Zolai mah thupisak mahmah dih ni! A neuneute beisak in, i tangpau pawlkhat zong a kigawm thei teng gawmkhawmin Zomi-Zolai ah tuibang gawm ni cih tawh i lai a khum hi ni. I biak Pasian in Zomi-Zolai thupha hong piaksak ta hen! Amen.

Rev. Hen Khan Go (Th.D cand.)
Church Pastor, 
Zomi Baptist Church, Tahan Kalaymyo.
gopucingtom@gmail.com
09400307703
*******************************************

ZYA - Myanmar in Zomi eLibrary / Laibusaal ading in phalna hong piak ahi hi.

Source : 
ZYA Tin Jubilee Magazine Laibu (2005-2015)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: PAU LE LAI. Rev. Hen Khan Go (Th.D cand.) Description: Rating: 5 Reviewed By: Cinpu Zomi
Scroll to Top