728x90 AdSpace

Hot
Menu
Zon-ol na Donate

Latest News

TEHPIH OMLO TUNNU ITNA. Gelh - Dong Za Mung (Mauvom)

TEHPIH OMLO TUNNU ITNA
Gelh - Dong Za Mung (Mauvom)


Asung aom Thute :
THUPATNA
NU ICIH KUATE HIAM?
LST SUNG NU THUPI PAWLKHAT
LEITUNGA NU THUPI PAWLKHHAT
NUTE PAHTAWINA KAMMAL
ZOMI NUTE THUPI PEN
NUTE THUPHA
THUKHUPNA

Thupatna
Leitunga mihing khempeuhte muuk le kam tawh tatsat lo-a a kizom den kammal in NU cih ahi hi. A lianpen kumpipa panin  aneu pen khutdawh ngenpa nangawn le a kum tampen puteek/piteek-te a kipanin a naupang pen naungeek pau thei pan nangawn muuk ah NU tawh na kizom den hi. NU cih kammal sungah na khempeuh bucing a, vang nei-in muibun hi. NU cih kammal pen thuuklua in manpha lua ahih manin kam a genkhiat theih ding hilo hi. I kam in a pulak theihloh hangin I lungsimah a dim a ha in om phitphet hi. I dahna, I nuamna thu le la, vai khempeuh Nute mah kiko masa nuam hi. Nu-in a nuntakpih nawnloh mite in zong Tuun aw na Laukha mah ci-in Nu ngaihna mah kikoko lai hi.

A beisa, tulaitak, mailam  hun khempeuh ah Nu cih kammal in I sinlung sung hong zo pen leh I paih theihloh kammal manpha le thuuk pen ahi hi.

N -        Nunnuam a gil sungah sam bang hong zal sakin, simlei ah kilbang khan nadingin haksatna tampi thuak lawh in mim bang hong piangsak a, nunkhum tui tawh hong vakin zaitha khauh nading zing vai, nitak vai ah thu hong ngetsak den NU.
U -     U sung nau sung, mi zatam lai-ah sawlbang hei in, nuainet paampaihna le simmawhna ka thuakloh nadingin pilna sangah hong kha in, kei ading lunghimawhna tawh thu hong ngetsak den NU.



NU icih kuate hiam?
Nu icih ciangin ta nei, suan le khak neite ahi hi. Pasal nei-in ta neilote pen Nu hisam napi’n bucing zolo cileng kikhiallo ding hi. Ahizong amau zong nupi mah hiveve uh hi. Pasal neilo in ta a neite zong nu mah hi veve uh hi. Banghanghiam cih leh Nu icihte in suan le khak a neite ici khin hi. 

Tua ahih leh Nu icihte in bang mawhpuakna nei hiam ici kha thei ding hi. Nu icihte in hibangin mawhpuakna tuamtuam nei uh hi.
A pasal ading kizepna; a pasal ahuh thei; 
A tate lamhilh; thungetsak; kizep kipuahzia hilh; thungetsak;
Insungah Pasian nasem; 
Veng le pam tawh kikhuituah thei;
Thuhilhsia ;
Innsung zeem;

Laisiangtho sunga Nu thupi pawlkhat
1. Sarah- Sarah in Pasian sapna kician takin a telpih loh hangin a pasal nung limtakin zui hi.(Pian. 12:1). (Nu thupite in a pasal panpih in a pasal muanna tawh a nungzui uh hi).

2. Rebecca- Rebecca in Pasian gensa/kammal man ding hi ci-in a muh nailoh Isaac zi dingin a kuan hi.(Pian. 24:56-60). (Nu thupite in Pasian kammal muanna tawh kalsuan ngam uh hi).

3. Ruth- A pasal in a sihsan hangin a teeknu nusia loin a pasal lamte a vekpi in it hi.(Ruth 1:14-17). (Nu thupite in a pasal bek it loin a masuan lamte it uh hi).

4. Hannah- Pasian kiangah ta ngen a Pasian in a piak ciangin iksik het loin Pasian mah a pia kik hi.(1 Sam. 1:9-10). (Nu thupite in a tate Pasian kiang tun ngiat uh hi).

5. Abigail- A ngongtat a pasal adingin a thum sak nupi ahi hi. (1 Sam. 25:24). (Nu thupite in a pasal adingn thunget sak uh hi).

6. Mark ii nu Mary-  Zeisu le a nungzuite in Paisan pawi nuamtak in a bawl theih nadingin a innkhan khat apia hi.(Mark 14:12-16). (Nu thupite in Pasian nasepna dingin itsik loin piakhia ngam uh hi).

7. Bethany khua a Mary-  A manpha sathau namtui tawh Zeisu khe a zutsak nu ahi hi.(John 12:2-3). (Nu thupite in a neihsa uh leh a manpha nate Pasian adingin pia khia ngam uh hi).

8. Zeisu nu Mary

Leitunga nu thupi pawlkhat
1. Susana Wesley- Pasian mizat minthang John Wesley le Charles Wesley-te nu ahi hi. Ama tanu tapa 19 tak nei napi, pattah zo ahih manin Pasian mizatte suak khin uh hi.

2. Thomas Edison nu- Thomas Edison pen lai hai lua ahih manin a sang siate in a nu muh dingin a puan ah lai them khat belhsak in a ciahsak uh hi. Tua lai them sungah, “Na ta laisin dingin hai lua; sang twap mai hen,’ cih ahi hi. Ahi zongin a nu’n, “Ka t alai theilo dingn a hai lau hi kei; kei ma’n ka hilh ding hi,” ci-in lai ahilh hi.

3. Abraham Lincoln- Singluang inn ah a nu tawh om khat ahi hi. Ahi zongin a nu in hoih takin pattah to ahih manin mi vanglian khat hong suak hi.

4. Nick Vujicic- Khut gina, khe gina neilo sa in hong piangkhia hi. Ahi zongin ama a it, a kem,  a khoi a nu hangin tuni ciangin leitungah thugen siam minthang khat hong suak hi.

5. Jessica Cox- Khut neilo khat mah ahi hi. A nu kepna tawh hong khangkhia in, leitungah khut tawh loin vanleng hawl masapen hong suak hi.

6. Hellen Keller- A suah tungin cidam himah leh kum nih a phakin khuasik hang tawh a mit khuamuhna kisia in a mittaw suak hi. A nu kepna le khoina hang tawh mi minthang laigelh siam khat hong suak hi.

Nute’ Pahtawina Kammal Pawlkhat
Abraham Lincoln- Kumpi ka tun theihna pen ka Nu’n hong pattah hang hi.
Bishop Thomson- Nu cih kammal sungah lungnopna om hi.
D.L Moody- Nu khempeuh kei Nu a bang hileh leitungah thonginn omlo ding hi.
George Herbert- Nu hoih khat pen sia zakhat tawh kikim hi.
H. Benson- Gal hangte sangin Nu hoih manpha zaw hi.
Napoleon- French gam ii kisap in Nute hi.
Rosa Wallace- Nau luai a vei khutin leitung uk hi.
R.A. Torry- Nu hoih sang a zahtak huai zaw om lo hi.
Timothy Dwight- Ka lawhcinna thusim pen Nu hoih ka neih hang hi.
Winston Churchill- Ka sia thupi pen in ka Nu hi.
W.W. Curtis- Minam khantoh nadingin Nu ii ngaihsutna zong kisam hi.

Zomi Nuipite Thupi penpen
Zomite pen namdangte sangin I Nute’n hong it zaw uh a, a tate’n zong ki-it mahmah hi. Zomite Nute’ leitunga Nute dangte sangin thupi ka sa zaw hi. Thupi ka sakna pawlkhat
1. Hong paai lai hun--- Zogam singtangah teengin nek le dawn kicinlohna, pilna theihna a omloh banah naupaai sungin kidawp ding leh kikep dingzia thei hetlopi mahin hong paai uh hi. Khangluite’n a genna ah, ‘Naupaaite thaltang pua,’ na ci uh hi. Tua bangin haksatna tampi thuak lawh uh hi.  Nuntak haksat tawh kizui-in inn omin tawlnga hithiat ngamlo uh a, lokuan, singpua, tuitawi in khuisa kawmkawm mah in hong kem uh hi. A sunga om a ta hong khualna in maizumna thuaklawh in I duh I ngaihte hong nekpih uh hi.
2. I suahkhiat hun : 
A guh a taang kizomteng kitaamkham in khua-ul nel leh sisan nai san tawh hong hing khia uh hi.  Na sa lua in tau uh a, khapet teta in khitui luang liang uh hi. Tua banga pumpiteng kisia gawp lianga hong hanciamna tawh a itna hong lak hi.  Sisan nai san, khua-ul luang, gimlua in khuisa mah leh hong itluat manin a nunkhum hong tulhpah a, a tawl kidam sak hi.
3. I khantoh hun : 
Leitung mihing khat dingin I piankhiat khit ciangin I khantoh theih nadingin ama tha dim loin a mitte kilep dildel in, a cite liing deldel mah leh nisim in a nawizu tawh hong vak hi. A angah hong ihmu sak in, zaila tawh hong awi hi. A nungzang ah hong pua in, lungmuang tak hong ihmu sak hi. Namdangte a Nute’n puakpuan tawh a nung le ama ah a tate pua cih om ngei khollo hi. Ei Zomi I NUte’n hong it luat manin a angah hong pua, a nungzang ah hong pua uh hi.
4. I goltoh ciangin : 
I goltoh ciangin gualtawh a tate mi nuai ah omin, mite simmawhnate I thuakloh nadingin a samkhau phel liangin pilna hong sinsak a, Sunday School hong kah sakin, Pasian thu tawh hong makaih hi. I pilna sinna dingin haksatna le maizumna tampih hong thuaklawh a, ahizong hongitna tawh tuate phawk in nei kha lo hi.
5. Tulai hun :
Tu laitakin leitung khantohna tawh kitonin pilna siamna sangpi nei-in gamdang mun dang I tunga amah I mangngilh phial zongin khasia het loin ei ading thu hong ngetsak den hi. 

Zomite NU te mah ken thupi pen sa ing!

Nute thupha
Leitungah tuni dong a mangmawh ding tangthu a gelhkhia a, mi lawhcingte a tamzaw pen a Nu tawh bek(tagah khuasuak) nungta hipian hi. Zomite paunak ah, “Nu le pa thumang a nahlawh peek,” icih mah bangin Nu le pate tung pan thupha tampi kingah hi. A zenzen in Pa nei nawnlote’n Nute tungah thupha tampi om ahih manin Nute thupha ngah sawm ni!
A tunga I pulak Nute pahtawina kammal a gente in leitungah mi lawhcing le mi minthangte ahi uh hi. Amaute hiciang a tun theih nadingin Nute thupha a sangte ahi uh hi. 

Thukhupna
NU cih kammal pan I gensa le I theihsa mah bangin a vanglian pen kammal khat ahi hi. Naupangte vak inn tung leh, “Ka Nu e?,”ci-in dong masa uh a, Papite vak inn tung leh zong, “Na Nu e?,” ci-in dong masa uh hi. Leitungah itna khempeuh kiteh kawikawi hileh Nute itna a khupzo ding/ alekzo ding itna dang omlo hi. Laigelh siamte in a gelhna ah, “Tuipite a thukna leh vanpite a sanna kiteh theih kha ding a, ahi zongin Nute itna kiteh zolo hi,” na ci uh hi.

Nang hangin na Nu in:
A sam kaan lawh,
A mit mial lawh,
A baante zawtlawh,
A thanem lawh hi.
Tehpih ding dang om kei,Sianmang itna simloh, simlei mi zalai ah tunnu itna mah lianpen e!

Gelh - Dong Za Mung(Mauvom)

***************************************

Lai gelh pa Dong Za Mung (Mauvom) in Zomi eLibrary / Laibusaal ading in ahong piak, ahong khak' ahi hi.

to:Cinpu Zomi <cinpuzomi@gmail.com>
date:Wed, May 4, 2016 at 1:12 AM

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: TEHPIH OMLO TUNNU ITNA. Gelh - Dong Za Mung (Mauvom) Description: Rating: 5 Reviewed By: Cinpu Zomi
Scroll to Top