728x90 AdSpace

Hot
Menu
Zon-ol na Donate

Latest News

TUIPHUM PAWLPITE’ TANGTHU A TOMIN. Agelh - Rev. Kam Khaw Thang

TUIPHUM PAWLPITE’ TANGTHU A TOMIN
Agelh - Rev. Kam Khaw Thang
Zogam huam Chin State sung pan Avmasavbel Biakbuuk Khuasak Khua 1906.

            Zomi leh Biakna a kici laibu sungah hel ding in Tuiphum Pawlpite Tangthu gelh dingin hong kisawl ciangin, a haksa khollo ding tawh kibang napi in I gelh taktak ding ciangin baih tuan lo hi.

            ‘Tuiphum’ cih kammal in pawl tampi huam a hih manin Zomi cih tawh a kizopna hangin Kawlgam, Zogam, Tedim gam a hong tung masa Tuiphum Pawlpi ngaihsun pha deuhin gen ding hong hi ding hi.

I.              KHRISTIAN PAWL TUAMTUAM A HONG PIANNA
Khristian a kici khempeuh pen Jesuh Khrih bul phuhin a piang biakna hi a, a cilin pawl khat bek a hi hi. A hi zongin a hun sawtin a mi a tam ciangin, nautang sung panin makaite’ paizia lungkim lohna hong lian zela, khat leh khat kithuak zo nawn loin, pawl kikhenna hong om zel hi. Tua pen Pawlpi Kipuahphatna(Reformation) kici hi. Tua banga Pawlpi Puahphatna hong om ciangin, gam tuamtuam ah Pawlpi makai tuamtuamte in min tuam hong guanin, Khristian veve hi napi, pawl tuamtuam a hong piang suak hi.


II.            TUIPHUM PAWLPI HONG PIANNA
Tua pawl tuamtuamte sung panin Tuiphum Pawlpi zong khat mah hi a, pawl kikhen main Khristian sungah mi kilutsakna ngeina cingtaksa loin, maan a sak bangun pawl a phuat uh ciangin amau sunga a lut nuamte pen Khristian a suaksa hi napi-in, tui na kiphum phakik uh hi. Tua a hih manin Tuiphumkikte cihna (Anabaptist) min kivawh Tuiphumte kici hi.

III.           TUIPHUM PAWLPITE’ THULET GUIPITE
Pawlpi khat panin pawlpi tuamtuam a pian ciangin, pawl masa a a om lai uh a, maan a sakloh teng uh ngaihsutna tawh tua a kiphuan thak pawl sung panin maan a sak uh zuih ding ngeina thubul na khung uh a, tuate in:
1. Lai Siangtho hilhna bek thupi-in saan ding cih thugui khatin na na koih uh hi. Pawlpi hong golin makaite a vangliat ciangin, Lai Siangtho thu sangin makaite thu kithupi ngaihsutkha pahpah a hihna hang a hi hi.
2. Biakna leh leitung ki-ukna a tuam tuakin din ding hi, a ci uh hi. Biakna makaite leh leitung uk makaite na kipawlbawlin, leitung kumpi sum tawh biakna nasepna kihuhin, biakna sungah kizanga, biakna makaite in zong leitung ki-ukna makaite thu a zuih lohin a phatmawhna hong tam zel a hih ciangin, biakna sung siangtho sa lo uh a, biakna nasepna adingin a biate piak sumte bek kizang henla, a tuam tuakin om leh, biakna siangtho thei bek ding hi, cihna hang zong hi.
3. A phualphuala om pawlpite, amau leh amau ki-ukin vaihawm tawm leh thuman theizaw, cihna thugui zong a nei uh hi. A beisa hunin biakinn sung nasepna leh vaihawmna pen a bul lam pana thupai bangin zuih loh phamawh a hih manin, a hun leh  mun tawh kizui-in phualpi pana vaihawmnate zuih theih lohna, a nop lohna hong om ahih manin, Lai Siangtho tawh kituakin a phualphual a omte in vai hawm tawm le uh thanopna leh khantohna omzaw ding hi, cih ngaihsutna hong om hi.
4. Thu-um Pawlpi mi khempeuh in biakna sung ah siampi za neita hi, cih thubul khat na hi leuleu hi. A beisa hunah biakna makaite’ thungetna bek Pasian in sang hi, ci a upna om a hih manin Pasian tawh kizopna thu khempeuh a makaite loin hi thei lo hi. Jesu’ sihna in siampi nam leh nautang nam phiatkhia zo a hih manin, biakna makaite(siampite) kalh se kul loin Khristian ahi khempeuh in Pasian tungah ama mawhna pulakin, thu ngenin, a lungdamna a ko thei ding hizaw hi, cih ngaihsutna hang a hi hi.
5. Biakna thu ah mi khempeuh in suahtakna nei hi. A beisa hunah pawlpi thu in a gamta lote in vantung gam ngah lo hing hi, cih upna om a hih manin, pawlpi’ thu a mang lote in gupna a taan sangin a leitung puimpi sizaw leh, a vantung gam nuam ngah zaw leh, cihna tawh bawlsiatna kipia in sihna dong in kithuaksaka, pawlpi thu mang leh kideih hi. Tua a hih manin Lai Siangtho tawh kituakin, maan i sak bangin kigamta thei henla, midangte i nawngkaisak kei nak leh, eima upna tawh kisai-in kuamah in hong bawlsia kei leh, cihna a hi hi.
6. Thu-um taktakte bek pawlpi mi kisuaksak ding hi, cih thu om leuleu hi. Pawlpi kipat cil lai-in thu-um taktakte bek pawlpi mi a suak hi napi-in, a hun sawtin pawlpi mi hong tam ciangin, upna leh lungsum kikhel takpina bek kilen cinten nawn loin, a pualam gamtatna a tuamtuamte hang tawh pawlpi mi kisuaksak zel mawk a hih manin, pawlpi sung siangtho thei lo hi. A kipat cil lai a mah bangin lungsim khensat thei, thu-um mi a kikhel takpite bek pawlpi mi suahsak ding, cihna a hi hi.

IV.          TUIPHUM PAWLPI A TANGKAINA
Tuiphum Pawlpite leh Khristian pawl dangte a kilamdanna thu nih om hi. Tuiphum Pawlpite in biakna thu ah a kisam thu nih bek na omsak uh a, tuate in tuiphumna leh nekkhawm bawlna ahi hi. Pawl dangte in hihte geel baanah a dang tampi om sak lai uh hi. Tuiphum pawlpi mi a suak nuamte in lungsim kikhela, tui a kiphumsate bek pawlpi mi suaksak a hih manin, midang a na omsate tawh innkuan khat suahna lim nekkhawm bawlna ah kihel ding ngeina a hi hi. Hih thu nihte a bawl manin vantung gam ngah ding cihna hizaw loin, vantung gam ngah thei dingte in hih thute a zang khinsa hi ding hi, cihna hizaw hi.

V.            TUIPHUM PAWLPI A TUAMTUAM OMNA
Kawlgam leh Zogam ah Tuiphum Pawlpi a hong phut masa America mite a hi uh hi. Tuiphum pawlpi in biakna thu ah suahtakna na bulphuh uh a hih mah bangin, ei gamah Tuiphum pawlpi a hong kipattkhiat ma in, America gam mahmah ah zong Tuiphum pawlpi nam tampi a na om khin hi.
1.    Thuguk Len Tuiphum Pawlpi: Amaute in Heb. 6:1,2 sung thu siksanin thu 6 a bulphuh uh hi. Tui kiphum khit ciangin upate in tui a kiphumte’ lu tungah a khut nga leh, Kha Siangtho piakna lim hi, ci-in um uh hi. Hih pawlte pen 1670 kum pawlin a piang hi.
2.    Sani Tang Tuiphum Pawlpi: 1671 kumin England mi Sani tang ahi Stephen Mumford makaihna tawh a piang hi. Germany gam zong lawh a, tua pan in mun dangdang zong lawh kawikawi hi. Hihte panin Seventh-Day Adventist (SDA) hong pianga, SDA min a kiphuah khit ciangin Tuiphum cih min a kihel nawn loh hangin, a cilin Sani Tang Tuiphum Pawlpi a kici ahi hi (Seventh-Day Baptist).
3.    Original Freewill Baptist: Hihte pawl pen 1729 kum pawlin kipana, amaute in biakna vai in khe silna, cinate sathau nuhna, leh pawlpi tungah aana a nei kipawlna nam a zangte ahi uh hi. Hihte tawh a kipawl lo, Free Baptist a kici pawl lian dang khat zong om a, Benjamin Randall a kici lokho mi khat makaihna tawh a piangkhia hi. A hi zongin a nung ciangin, pawl tuamin ding nawn loin American Baptist Convention (ABC) tawh a kipawl thei uh hi.
4.    Southern Baptist Convention (SBC): Hihte pen American Baptist Convention tawh a kipawl ngei sa hi a, 1845 kum pawlin lungkim lohna neia pawl tuama om ahi uh hi.
5.    American Baptist Assocoiation: Hihte pen Southern Baptist Convention panin 1905 kumin a lengkhia sawn hi a, Baptist General Association, ci-in min a phuak masa uh hi. A hi zongin 1924 kum ciangin American Baptist Association, ci-in min thak a phuak uh hi.
6.    General Association of Regular Baptist Churches: Hihte pen 1933 kumin ABC panin pawlpi 50 bang lenkhiat khatin lengkhia uh a, hih min thak khat hong phuankhia uh hi. World Council of Churches te thangtat lua a sate a hi uh hi. A cil mahmah pawlin a kingaihsun uh hi.
7.    Conservative Baptist Association of America: Hihte pen 1947 kumin ABC pan mahin lengkhia uh a, 1933 kuma lengkhia General Association of Regular Baptist Churches te tawh a thu paizia uh kibang hi napi a tuam om veve uh hi.
8.    American Baptist Convention: Kawlgam leh Zogam sunga thuhilhsia a hong puakte a hi uh hi. 1907 kum pawlin Northern Baptist Convenrion, ci in min a kiphuak uh hi. 1950 kum ciangin American Baptist Convention, ci-in a khel uh hi. 1973 kum ciangin American Baptist Churches in U.S.A ci in min thak phuakin a khel leuleu uh hi.

VI.          KAWLGAM TUIPHUM PAWLPI A HONG PIANNA
Kawlgam ah Tuiphum Pawlpi a hong phuankhia American Baptist Convention hi a, July 13, 1813 in Judsonte nupa Zangkong a hong tung uh hi. Rev. A.F. Carsonte nupa in Halkha khua ah 1899 kumin phual a hong sat uh hi. 1902 kum ciangin zatui lam siamna a nei Dr. E.H. East zong Halkha hong tung napi in, pumpi cidam loh manin a ciah ki hi. 1904 kum ciangin a zi thak tawh hong pai kika, Halkha khua ah lupna 20 a ta thei ding Zato inn lam nading sum tawh a hong tung ki hi.

Halkha khua panin Tedim lam zong a hong vaan zel hi. 1904 kumin Sihzang gam sungah Pa Thuam Hang te nupa leh, Pa Pau Suante nupa Khristian hong suak uh a, May 11,1905 kumin Dr.East in tui a phum hi. Carson pen April 1, 1908 in Halkha khua ah si hi. Halkha khua mah ah a kivui hi. Biakna nasep a zom to dingin J.H.Cope te nupa 1908 kum lungdambawl hun pawlin Halkha a hong tung uh hi. 1910 kum ciang in Cope te nupa in Tedim khua ah phualpi thak khat satin nasep a hong kipan uh hi.

Tedim khua a hong tun zawh uh kum 50 a cinna Golden Jubilee pen 1960 April kha in kibawla, tua hun tawh kituakin Cope Phawkna Biakinnpi(Cope Memorial Church) honna zong kibawl hi. Hih Jubilee leh Biakinn honna sunga hong kihel dingin America gama Cope topa pawlpi panin amau taang dingin Gordon Leech te nupa hong pai uh a, biakinn honna khau zong Gordon Leech in attat hi.

Tua a kipan Gordon Leechte nupa in Tedim gam Tuiphum pawlpi mite hong phawk mahmah uh a, a sih ding ciangun Tedim gam Tuiphumte hong na piaksak un, ci-in a laigelhna tung tawnin $ 7,000 (Kawl sumin K.53,246,.50) hong kikhak hi.

1985 kuma Cope Diamond Jubilee bawl ding a kivaihawm lai takin, hih Jubilee phawkna dingin bang bawl ding i hi hiam, ci-in kikupna a om ciangin Cope Golden Jubilee lai in Cope Memorial Press kivaihawm a, tu in Dak Khaina Tausang(Bell Tower) lam ni, kici hi.
Gordon Leechte hong sum piak a hong kikhak ciangin, bangin zang ding na hi uh hiam?, ci a dotna tawh hong tung khawm hi. Diamond Jubilee hun a kigeelsa “Bell Tower” lam nading leh, Nipi Sang Thusinna leh a tuamtuam a zat dingin biakinn lui tuahna in zang ni ung, ci-in a kigen ciangin amau zong thukim uh a, biakinn mai a kilam tausang, dak leh biakinn lui tuahna in kizang hi.

VII.         ZOGAM TUIPHUM PAWLPI VAIHAWMZIA
Kum 1948 mateng Tedim, Falam leh, Halkhate in a tuamin vai kihawm loin, sumpi khempeuh mun khatah kigawm khin hi. Siate khasum zong mun khat pan mahin kipiakhia hi. Halkha gamte in biakna na semte bek khasum piak dingin seh loin, Farrawn khua a a phuat uh laisinna sang adingin zong a zat ciangun, lungsim hong kituak nawn lo hi. Tua thu hangin khat leh khat kiko bawlna leh kam kiselna tampi a hong om ciangin, nuam kisa nawn lo a hih manin, kum 1948 March Nipi masa sungin Satawm khua a kikhopna panin a tuam ciatin eima sum kholin, eima gam ciatah eima deih bangin zeek ni, ci-in thu khensatna hong om hi. Tua tawh kizui-in Tedim, Falam leh, Halkha, Association tuam ciatin ki-om hi. Kipawlna a zat dingin General Fund 10% tawh kipawl in kizopna kinei lai hi.

VIII.        ZOMI BAPTIST CONVENTEION A HONG KIPATZIA
1952 February ciangin Zangkong a om Mission Secretary Rev. E.E. Sowards pen gam sung vaan ding in Zogamah hong zin hi. TBA Kumcin Kikhopna’ Laitui khua ah hong kihela, tua khit ciangin Falam leh  Halkha lamah a va zin kawikawi hi. Hih banga a khualzinna ah a gam mite adingin thu lian mahmah thum hong vaihawmsak hi.
1.    Association tangdin lo in mun tuamtuam a om Association dangte tawh kipawl khawmna a sangzaw neih theih nading.
2.    Tua kipawlna min tawh Lai Siangtho Sang leh lokhawhna sang khat neih theih nading.
3.    Mission Zato neih nading.

Hih ngaihsutnate tawh kizui-in vai kihawma, Zomi Baptist Convention kiphuankhia hi. A masa penin Rev. S.T. Hau Go in ZBC General Secretary hong sem hi. Zato vai pen a mi leh sum om lo hi napi, gam nawl khata siavuan a hong om ding deih huai hong saksak lo a hih manin Zato vai pen a bei suak hi. Lai Siangtho Sang leh Lokho Sang a kithuah ding pen 1953 kumin kihonga, tu dongin Falam ah Zomi Theological College kinei lai hi. Gam nawl khat a hihna tawh kizui in Lokho Sang a hilh ding siate zong hong om thei lo suak hi.

IX.          ZOGAM SUNGA MISSIONARYTE NASEPNA PHUALTE
Zogam sung pen Tedim, Falam, Halkha ci-in khen thum kisuah hi. Halkha khua pen phualpi in hong nei masa uh hi. Nasem a kicinzawk deuh ciangin Tedim khua ah phualpi thak khat a hong sat uh hi. Tedim gama hong sem Dr. Cope pen 1938 kumin si a, tua kum mahin Nelsonte nupa Tedim a hong tung uh hi.

Japan gal a hong tun ciangin va ciah uh a, gal ven 1946 ciangin Tedim a hong tung kik uh hi. Tedim a sangmang inn pen galpi sungin kisia gawp khin a hih manin, a omna dingun biakin lui pen a kiim leh a pam kipem a, tua sungah a hong om phot uh hi. Sia nasem ding mi kisam lua a hih manin kum 4 sung sinna Lai Siangtho Sang khat kum 1947 in Nelsonte nupa in a hong uh hi. A kisapna bangin tua  Lai Siangtho Sang pana ongte 1950 kumin mun a tuamtuamah a koih uh hi.

1951 kum ciangin amau ngeina bangin a khuanin kum khat a va ciah uh hi. 1952 kum ciangin a hong tung kikta ding uh hi napi, thu tuamtuam a om manin, kumpite in phalna pia nawn lo a hih manin Tedim gamah sangmang a kinei nawn lo hita hi.

Halkha gama sem dingin 1946 kumin Johnsonte nupa a hong tung uh hi. Nelsonte nupa in Tedim a Lai Siangtho Sang a hon uh mah bangin, Halkha gam sunga sia kisapnate donghupi khat hong suak hi. Amah zong a hunhunin a khuan a ciah zel hi. Bang mah nawngkaina om se loin a hong tung kik zel hi. Tua a hih ciangin Kawlgam sungah gam dang mi a ki om sak nawn het loh ngeu 1966 kum dong Halkha khua ah a om paisuak thei ahi hi. A ciah khit ciang in pahtawina kipia a, tu in Dr. Johnson kici hi. A innkuan un tu dong dam kim lai uh hi.

Tedim leh Halkha ah sangmang om a, Falam ah a om ngei kei hi. 1948 kumin America ah M.R.E sin dingin Rev. S.T. Hau Go va pai a, a hong tun kik 1950 bei kuan lam ciangin Falam gama sangmang tavuan la dinga kiseh ahi hi. A hi zongin ama hong tun zawh a sawt loin, Rev. Nelson leh Rev. Johnson te innkuan 1951 kum ciangin a khuanin ciah uh ahih manin, Tedim gam mi hihna tawh Tedim mah ah Sia Hau Go a om suak hi. 1953 kum ciangin Zomi Baptist Convention kiphuan a, Rev. S.T. Hau Go in General Secretary a sem hi. Halkha ah Rev. Johnson om a, Tedim in sangmang kinei nawn lo hi. Tu a Falam a Zomi Theological College pen hih kum mahin Tedim ah kihong a, Rev. S.T. Hau Go in Principal sem hi.

X.            TBA PAN PAWL TUAMTUAM A PIANKHIATNA
1948 kumin Tedim, Falam leh, Halkha a kikhen ciangin, Tedim gam sunga Tuiphum pawlpi Kipawlna pen Tedim Baptist Association kici hi. Tuiphum Pawlpi in suahtakna bulphuh den khat a hih manin 1950 kuma Tedim khua a Lai Siangtho Sang pana a ongkhia Rev. Kham Za Mang makaihna tawh Zo Baptist Association khat hong kiphuankhia hi. TBA tawh a kiza kimin a kikoih hi a, ZBC leh MBC sungah Association khat ahi hi.

Japan gal ven khit ciangin Tedim kiimah huhsia khat a kikoih Sia Thang Za Kam in pawl tuam khat hong phuan hi. Tua pawlmin pen Thang Za Kam Tuiphum Pawlpi (Thang Za Kam Baptist Churhc) kici hi. 1947 kumin Nelsonte nupa in Lai Siangtho Sang a hon ciangin amah zong hong kah a, a lai tan a tawm luat manin ki zomsak lo hi. Baptist min a puak tei hangin ZBC leh MBC te tawh kizopna nei loin a tangdin a hi hi.

1950 kuma Rev. Nelson’ Lai Siangtho sang pan a a ongkhia TBA ah zong Daily Vacation Bible School(DVBS) nasepna ah Rev. Tun Za Lang tawh a sem khawm Rev. Go Za Kham huhna tawh 1953 kumin Seventh-Day Adventists(SDA) pawlpi hong lut hi. Hih pen Tuiphum Pawlpi panin pawl thak phuat hi loin, Pawlpi kipsa khatah va lutna a hih manin, Tuiphum Pawlpi tawh a kizopna uh om lo hi.

1962 kum ciangin Kawlgam ki-ukna hong kikhelna tawh kizui-in, leitung ki-ukna vaiah Tedim gam leh Tonzang gam hong kikhen ciangin Association khat hong piangkhia a, Tonzang Township Baptist Association kici hi. Pawl vai a kikhenna hi lo a, gam vai a kikhenna a hih manin, TBA tawh a kiza kim hi a, ZBC leh MBC ah kizom hi.

Tedim gama om Sihzang mite in zong, ko pen minam tuam khat hi a, Tedim pau zong kithei lo a hih manin, Association tuamin hong om nung, a cihna uh tawh kizui-in, 1976 kum ciangin Kaptel khua a TBA Kumcin Kikhopna ah phalna kipia a, Siyin Region Baptist Association a kici a thak khat hong piang hi. Hih Kipawlna zong Tuiphum sung mah ah a om hi a, TBA mah tawh a kiza kimin ZBC leh MBC sungah a om hi.

1970 kum pawlin Tedim gam sungah “Piangthak” a kici pawlkhat hong khanga, TBA sung panin leng khia in a tuamin a om uh a, Evangelical Baptist Church min tawh tawlkhata om uh hi. Tawlkhat khit ciangin EBC sung panin pawl omsa Assembly of God a kicite tawh pawlkhatte kipawlin, EBC tawha kikhen uh hi. EBC pen Tedim gam panin a kipan tawm hi a, Tuiphum min a puak hangin ZBC leh MBC ah kipawl loin a tangdin a hi hi.

Hihte baanah Tuiphum sunga omsa sung mah panin leh pawltuam a tun khit uh ciangin, a pai khia sawnsawn pawl tampi om lai hi. Ei Zogam ah Tuiphum Pawlpi a kiphut masa a hih manin, Pasian a bia Lai Siangtho len, Khristian in a pua masa khempeuhte Tuiphum pawlpi mi na hi masa zaw deuh uh hi.

XI.          TUIPHUM PAWLPI KIPAWLNA ZIA
Sia khat cial zoin Association ah Pawlpi khatin a kisangte pen Pawlpi, a hih kei leh, Sia Khawk Pawlpi a kici ahi hi. A phualphuala om pawlpite i cih ciangin Association in pawlpi in a saan hih pawlpite, cih nopna hi pha pen hi. Tua bang pawlpi tampi kigawmna pen Association kici a, tua Association teng kigawm kik leuleu pen Zogam ah Zomi Baptist Convention, kici hi. Kawlgam sungah minam zui leh a gam zui-in Convention in kipawlna kinei a, Myanmar Baptist Convention kici hi.

XII.         TUIPHUM PAWLPI MI LEH SIA OM ZAH
1988 kum thuzaksakna ah Tuiphum Pawlpi mipha zah leh sia om zah hih a nuaia bang hi:
1.    Zomi Bapist Convention sungah tui phumsa mi 91,170 hi a, sia 363 om hi. ZBC sungah Association 16 om a, tuate in hih a nuaiate hi:
1.    Tiddim Baptist Association
2.    Tonzang Township Baptist Association
3.    Zo Baptist Associaton
4.    Siyin Region Baptist Association
5.    Falam Baptist Association
6.    Halkha Baptist Association
7.    Thantlang Association of Baptist Churches
8.    Zotung Baptist Association
9.    Matu Baptist Association
10.  Kale Valley Baptist Association
11.  Kale Zomi Baptist Association
12.  Chin Baptist Association
13.  Kabaw ValleyThado  Baptist Association
14.  Tamu Balley Baptist Association
15.  Kuki Chin Baptist Association
16.  Gangaw Baptist Association
2.    Myanmar Baptist Convention sungah tuiphumsa mi 468,726 om a, sia 3,608 om hi. MBC sungah Convention 14 om hi. Khristian Pawlpi a cilin khat bek hi napi, a nung ciangin pawl tuam tampi hong pha hi. A sia lamin ngaihsun loin, eima san tekah khat leh khat kisang thei kim leng a hoih pen hi.


********************************************

Source :
Zomi leh Biakna Laibu
Zomi Pawlpi Tuamtuamte le Amau Upna
- Pages 17-28.

Zomi eLibrary / Laibusaal in Zomi leh Biakna Laibu bawl leh ahawm khia Dr. Khen Za Sian tung ah phalna ngen in aki tei(Type)kik ngiat ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: TUIPHUM PAWLPITE’ TANGTHU A TOMIN. Agelh - Rev. Kam Khaw Thang Description: Rating: 5 Reviewed By: Cinpu Zomi
Scroll to Top