728x90 AdSpace

Hot
Menu
Zon-ol na Donate

Latest News

ZOMITE LEH LAI TAWH PASIAN NASEPNA. A gelh - Rev. Dr. Jacob Kham Khan Mung

ZOMITE LEH LAI TAWH PASIAN NASEPNA
A gelh - Rev. Dr. Jacob Kham Khan Mung

Laitawh Pasian nasepna in Zomite ading a thupi mahmah nasepna khat ahi hi. Zomite I cih ciangin hong tangzai lua mahmah a,  tua sungah Tedim mite lai i neih zia tawh hong pan khia nuam masa ing.

Pasian hehpihna tawh i Zogam sung  Tedim mite lakah 1910 kum aa ki pan Sangmang  Rev Dr. J H Cope in Pasian nasep hong kipan khia hi.  Tedim mite in lai kinei nai ngiat lo ahih manin Roman alphabet bulphuh in lai hong bawlsak hun aa kipan Tedim lai kinei aa, Pasian nasepna zong tua lai mah tawh a kipankhia thei hi ci-in hong pulaak masa nuam ing. 

Lai kician i neih ma-in i  pu i pate in ni thupi, khathupite ahi zongin a nuntakna vuah a ciapteh huai a thupite kigensawn in khuakah ciaptehna tawh ahi zongin, mualsuang tungah limsuai-in ahi zongin na ciamteh uh hi.  Laipian pawl  a phuankhia  Pu Pau Cin Hau in a mangmuhna tungtawnin Zolai hong phuankhia hi napi, tampi in kithei man lo hi. 

Cope Topa pen pil mahmah in ama hong phuatkhiatsak lai zong olno tak a,  sin theih dingin hong bawlsak hi. Ni 7 sungin Tedim lai kithei zo hi kici zawzen hi.  Tua dungzui-in Tedim lai zong theih baih mahmah pah hi.  Tu hun semsem ciangin computer ah bangmah haksatna om lo i zat theih ziauziau pen Cope Topa thu muhkholhna le hong hanciamsakna a thupi mahmah ahih lam phawk semsem le telsiam semsem hi hang.

Cope Topa hong bawlsak lai tawh,  Thu kizakna, laibu tuamtuamte le Thu Ciamthak Lai Siangthote kinei thei pah ahih manin, Pasian thu leh leitung thu tuamtuamte kithei pah hi. Tua dungzui-in Tedim mite sungah lai sim thei khempeuh pilna, siamna, theihna  Pasian thu, leitung thute ah mite kidelhto zo ahi hi.

Tua ahih manin tu hun Zomite in Pasian hong hehpihna leh Cope Topa hong kipiak khiat na tungtawnin hih ciang i tun theihna thute phawk kawmin mai lam hunah i lai thupisakin hun tawh kizui-a i  mi lipin i khantoh theih nading LAI TAWH  PASIAN NASEPNA nakpi thupi sak a, i  hanciam semsem ding kong hanthawn nuam hi. 

Pasian thuthuk a thei mipil misiam Thomas A Kempis in lai tawh kisai hih bangin gen ngei hi.  “Tuisik hai khat piakna tawh thaman ngah ding ahih leh tawntung nuntakna a pia ding laibu a veeng a paam, a lawm a gualte khutsungah a tun  nading a semte in thaman ngah lo-in om thei ding ahi hiam” ci ngei hi.  Hih in eite ading a ngaihsut huai mahmah thu khat ahi hi.  Lai nasepna in Pasian teel(elect) leh sap(call) mite sep ding ahi hi.  Lai nasepna a thupi zia a nuai aa bang ahi hi.

Thu Khatna:   Pasian in laibu thupi sa hi.  Ih Lai Siangtho mahmah pen, "laibu", "laizial" cih bang in kigelh a, Lai Siangtho bu 34 sungte ah 180 vei bang kimu thei hi. “A kigelh mah bangin”  “hih thute at in” cih bang kammalte 400 vei bang kimu hi.

A beisa thute, tu hun thute leh mailam hunte tawh kisai thu leh late laibu ah kiciamteh hi.

Piancil 5:1 ah “Hih laibu in Adam khang tangthu kiciaptehna hi” ci-in at ngeu zen hi.  Mangmuhna alian 22 ii a nunung pen tang lite sungah “laibu” ci-in at ngiat hi.  Hihte i et ciangin Pasian in laibu ahih kei leh lai nasepna thupi sa in tua tungtawnin hong hopih hi cih thu kimukhia thei hi. 

Laibu in mite thapiakna, pilna piakna, lamlahna leh  thalak nading aa ki-at kibawl ahi hi.  Zeisu in a nungzuite kiangah vantung aa laibu sungah na min uh akigelh manin lungdam un(Luke 10:20) ci hi.  Cih nopna ah a kiphiat nawn lo ding, a kip, a kician thute ciapteh na in lai ahih kei leh laibu kizang hi. 

Mailam hunte tawh kisai mite in i theih nadingin Pasian in laibu sungah hong ciapteh sakin tua tungtawnin a theithei i hi hi.

Tua hi aa  laibu leh lai nasepna in Pasian in thupi a sak  a zat mahmah nasepna ahi hi.  Tua ahih mah bangin Pasian a um mite ading lai nasepna thupi hi.

Thu Nihna:  Mite lungsim zo hi.  Russia gamah communist hong kipat khiatna makai pa ahi Lenin (amin taktak pen Vladimir Ilych Ulyanov) in mipi kikhopna mun 20 ah thu ka gen sangin hih laidal khat hawmkhia lengh ka thu in bun zaw ding hi a cih zah khatin,  1907 in mi 17 tawh communist upna hong dinga, 1917 takteh 40000 ngah ta hi.  1990 Berlin kulhpi hong kicip taktak ciangin leitung bupah mi 5 ah 1 in communist upna nei mawk hi. Communist upna a pun a khan nading Soviet kumpi in kum khatin sum dollar trillion thum bang zangh ziahziah ngam mawk uh hi.  Pasian thu maan a thei, a nei thu-ummite in hihte nasepte tungtawnin ngaihsut huai leh sep leh bawl ding a thupi ziate phawk huai mahmah hi.

Abeisa kum 150 kiim pawl in American mi Daniel Webster in hih bangin gen ngei hi.  “Hih gamsungah Pasian thu in hong zel lo hi leh siatna in bang ci bangin mun la in gamsungah siatna om ding cih pen kingaihsun thei hi” ci ngei hi. 

Ngaihsut piakna, upna thute telsak theih nading lai nasepin a kician pen leh a mui bun pen ahi hi.

Thu Thumna:  Tangthu kikhelsak hi.   Laibu hoih i cihte in tangthu ki-atna cih bang bek hi lo-in mite ngaihsutna puahpha in, kikheelsak hi.  Leitung tangthute sim le hang Thuciam Lui sunga Josiah,  Thuciam Thak sunga Zeisu cihte aa kipan ahun zui-a kikhelna lianpite in lai nasepna hang ahi hi.  , 

Tu khanga mite ngaihsutna, upna, uplohna,  theihna, kikhelna a bulpi in lai nasepna hang ahi hi ci-in Billy Graham in gen ngei  hi. Laikung in namsau sangin vanglian zaw hi cih paunak in man pha mahmah hi. 

A thu a la tomno khat hi phialta leh a deihna, a khiatna kicing leh thupi mahmah ahih lam i theih ding thupi hi.  Lai Siangtho sunga  Topa thungetna, Mualtung thuhilhna cihte in hong bun mahmah hi. 

Europe gam sungah Nazi te ong thahat tak uh teh,  Mangkang mite patau lung himawhin a om laitakun Winston Churchill in “Hihte i tuahna mun khempeuh a mual a guam cilo-in do ding hanga, lel ngei lo ding hi hang” ci-in a hanthawtna lai tawh gelhin hawmkhiatna tungtawnin a gamsungah kikhelna hong om hi.

A kigen thu le late lai tawh ciamteh in sepkhiatna tawh tangthu kikhelsak zo hi.

Thu Lina:   Nuntakna kikhelsak hi.   Biakna laibute tungtawnin a piangthak mi bangzah om ding cih kisim zolo ding hi.  John Wesley in Luther laibu at Galati Hilhcianna tungtawnin kikhel hi.   John Newton in sal zuak nasep semin tembaw tung a tuan laitak,  Thomas A Kempis lai-at Khazih limpha ciinna(the Immitation of Christ) laibu a simna tungtawnin piangthak hi.  Hudson Taylor in biaknalai a simna tungtawnin piangthak hi.  George MacDonald lai-at tungtawnin C S Lewis hong kikhel hi. CS Lewis lai-at Mere Christianity laibu tungtawnin Charles Colson piangthak hi.  Sadhu Sandar Singh in Thuciam Thak a simna tungtawnin piangthak hi. 

Tua hi a, tu ni aa kibawl laibute tungtawnin a hong tung ding kum 10 leh 20 sungah  gah pha kimu thei ding hi. 

Thu Ngana:  Pawlpi kilamsak hi.   Thuhilhkikna 31:9-13 sungah,  Mawsi in thukhamte atin,  Israel mi Siampite leh makaite tungah,  "Hih thukhamte, kum 7 a cin simin mite kaikhawmin mipi(numei naupang aa kipan) tungah na sim khia dinguh hi. Tua hi leh a tawntung Pasian thugente za in zahtak zia ding a thei ding uh hi.”ci-in vaikhak hi.

Khang khat khit khat Pasian thu tawh mite khangto in a picin nading laibu in a kul leh a kisam mahmah ahi hi.  Martin Luther in kipuahphatkikna nasiatakin hong bawlnate a ma at laibute tungtawnin Europe gamsungah hong zel hi. 

Pasian kammal Lai Siangtho hi ta leh, upna laigil tawh kisai laibute hi ta leh,  Pasian nasemte taangthute leh kha lam tawh kisai laibu, Magazine ah thului hoihte tungtawnin thangahna leh kiphuahphatna thalakkikna hong piang hi.

Thu Gukna:   Sawtpi kimang hi.  Campus Crusade for Christ a phuankhia Bill Bright in hih bangin thu gen ngei hi.  “Thu gen ding leh lai at ding hong kiteelsak hi leh lai at ding teel zaw ding hing. Banghang hiam cih leh thu gen pen kimangngilh ziau a, lai ahih leh sawtpi nungta hi.”  ci ngei hi.

Lai nasepna in sawtpi kimang hi.  Khatvei a kibawl nak leh kimang suak pah lel hi.  Thu leh la a ciaptehhuaite lai tawh kiciamteh tanghtangh hi.  Lai Siangtho sungah zong hih bangin hong gen hi. “Lai tawh kiciamteh leh a thu kikhel nawn lo ding hi(Dan. 6:8).”

Mite in thu a gen uh ciangin ut bangin pau gawp thei uh a,  lai tawh ciamteh ding a kicih ciangin a khialhloh nadingun kidawm mahmah uh hi.  

Puritan laiat Thomas Brookes in hih bangin gen ngei hi. “Thugenpa in a gentheihloh hangin laibu in mun khempeuh ah gen thei hi. Hangsan takin gen ngam hi.  Tua banah thugenpa a sih khit ciangin ah zong gen lailai ding hi.”

Thu Sagihna:  Mite a lunglut ciang bekin thugen pan hi.  Laibute a kikoihna mun peuh ah om hithiat lelin, mite in a lunglut uh teh kisim hi. A lunglut lo mite tungah zawhthawh thu tawh simsak lo hi. Khat veivei, hehsak thei, a zaknop loh thute gen thei hi na pi, a sim pa/nu tawh kizopna hoih den hi. Khat vei simna tawh a tel lote in sim kikkik thei lai hi.

Gal leh sa hangin Serbia gam sung kisia cip zihziah hi.  Tua gamah gal a ven khit a sawt lo-in Pasian thu-um mite a zah nih kibeh lap hi.  Serbia Pastor khat in a genna ah,  “ka gamsung uah Pasian thu-um mi tunai aa hih zah ta hong kibehlapna pen a beisa kum 500 sunga kihawmkhia laibu zah tu nai kum 5 sungin kihawmkhia zo ahih hang hi” ci hi. 

Thu Giatna:   Pasian nasepna khempeuh panpihin huh kawikawi thei hi.  Radio, TV, Micimawh huhna,  Thu genna, Thu hilhna, Pawlpi phuhna,  counseling bawlna cihte banah Pasian nasepna a kici khempeuh lai nasepna tawh nasiatakin kisemkhia thei hi.  Nasep kipat ma athu a late zaksak kholhna, nasep silbawl zia leh nasepna khempeuh a nungzui dingin lai mah tawh kician takin kisemthei hi.

Thugenna thupi zaw maw? Ahih kei leh lai nasepna bek mah thupi zaw maw cih dotna ah vanleeng in kha(wing) nih a kisap mah bangin a nih aa, kisam tuak ahi hi. 

Khazih Pawlpi a khantoh nading, a picin theih nading leh gupkhiatna thupha mun khempeuh ah a kizelh theih nading lai nasepna in a kisam mahmah, a thupi mahmah nasep ahi hi. 
India gam sungah Pasian thu-um mi a tawm mahmahna mun khat ahi Orissa ah mite hong kikhel theih nadingin lai nasepna tawh nakpi ka hanciam uh hi ci-in Amar Jyothi in gen ngei hi. 

Lai nasepna in mite ading phattuamna, kikhelna, khantohna leh picinna neih theih nading ahi hi.

Thu Kuana:   Pasian nasepna tangzaisak semsem hi.  Thugenna, thuhilhna  i cih in mikhempeuh sep theih hi khin lo hi.  Ahi zongin mikhat peuh in laibu hawmkhia thei aa, tua tungtawnin mitampite in phattuamna ngah lawh uh hi.

Pasian mizat mi minthang tampite thugente zong kiza kim zolo a, ahi zongin a mau thu gente laibu in hong kibawl takteh tua thuphate tungtawnin hamphatna kingah thei hi. 

Lainasepna in khuapi sung bek tuh lo-in khua neu khua  ta, lam dung, kong zing ciangtanna omlo-in mun khempeuhah pha kim zo pen hi.

Thu Sawmna:   Leitung bupah Lungdamna thu kizelsak hi.   Thu-ummite khempeuh in i theih leh i zuih ding thu in,  “Note in Jerusalem, Judea gam, Samaria gam leh leimong dongin ka teci na hi ding uh hi(Sawl 1:8)”  cih kammal phawk den ding hi hang. 

Canada gama Pasian nasem minthang Oswald J Smith in leitungbup ah kum 50 val gupkhiatna thu a taangko khit teh “Leitung bup ah Pasian hong Gupkhiatna thu a ki zelh theih nading lampi khat bek om aa, tua in lai tawh sepkhiatna hi” ci-in hong pulaak hi.

US Center for World Mission pan Pasian nasepna ah a thupi pen in bang hiam ci-a dotna a kineihna ah Lai Siangtho leh lai tawh nasepna mah in mui bun pen, thupi pen hi ci-in Pasian nasemte in kithukim diam uh hi. 

Topa Zeisu Lungdamna thupha leitung bupah mikhempeuhin a zaktheih nading Pasian zat pen khat in "lai nasepna" ahi hi.

Tua hi a, Pasian gam leh lei, a kikeek semsem theih nading lai atna, lai  bawlna, lai hawmkhiatna leh lai simna-ah mapang khawm a i sep kim ciat theih nading deihna leh lametna tawh hih thu sawmte kong gelhkhia hi.   Hih thului a sim kha a kua mapeuh i biak Pasian in thupha hong pia hen la, lai tawh Pasian nasepna-ah Khazih leh a Pawlpi a kilamthak nading, a khantoh nading, a pun nadingin lamkhat teitei tawh hong zang kim ciat ta hen.  Amen.

Rev. Dr. Jacob Kham Khan Mung
National Director CLC Myanmar
Pastor Bethel Baptist Church
Yangon, Myanmar

Rev. Dr. Jacob Kham Khan Mung

Hih lai-at pa Rev. Dr. Jacob Kham Khan Mung in lai nasepna tawh Pasian nasepna 1991 aa kipan Yangon, pansan in nei hi.  CLC International  tawh semkhawm a, Kawlgam ading National Director ahi hi.  Lai nasepna vai tuamtuam tawh  SE Asia, South Asia, Korea, Brazil, UK leh USA gamte ah zin zelzel hi.  Pasian in ama nasepna tungtawn a piangthak Dr Sandar Nwe @ Niang Lun Cing tawh 1997 April  11, ni-in gawm a, kum 5 a pha tapa John Nang Sian Khai nei uh hi.  2009 kum June 15 ni-in Anchor Theological Seminary and Bible Institute, USA  pan Doctor of Divinity honorary degree kipia hi. 


**************************************

Sia Rev. Dr. Jocab Mung in Zomi eLibrary / Laibusaal ading in Phalna ahong piak ngiat ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOMITE LEH LAI TAWH PASIAN NASEPNA. A gelh - Rev. Dr. Jacob Kham Khan Mung Description: Rating: 5 Reviewed By: Cinpu Zomi
Scroll to Top