728x90 AdSpace

Hot
Menu
Zon-ol na Donate

Latest News

A NIH VEINA SUNGPI KHUA PHUH KIK NA. (Suangpi Mualsuang Laibu).

(C) A NIH VEINA SUNGPI KHUA PHUH KIK NA:


Khua teen kiknang vaihawmna:
Suangpite in mikangte nasiatak in do uh a hih mah bang in, Suangpi khua pen, mikangte’ gaal khua khat in mikangte’n ciamtehin khua teenkik ding phallo hi.1894 ciang in, Tomu leh Khai Kam pawl teng in gaal honglut uh hi. Tua zawh ciang in, tedim gam ah mikang kumpi ki-ukna a kip na ding in, mikangte in hong vaihawm in, gamsung a om khuamite, a khua ciat uh ah teengsak kik hi. A hih hangin Suangpi khua teenkik ding phal tuanlo hi. Suangpite a khua ah ciah theilo in, gamsung mah ah om uhhi. Gamsung ateenna mun pan a vaihawm uh hi.


Khuadang gamdang ah peemding maw, ahih kei leh hibangmah in, gam sungah  omom ding maw cih a khentat zawhloh laitak un Pu Tawng Phut pau a,” Ka u ka nau ka ta te aw, Dimpi ah peem uh cin peemta mah hi nu teh.  Dimlo, Phunom te ah peem uh cin, peemta mah hi veve ding na hih uh ciang in, ngaihsun tek un, Pau Thang (mikang kam phen pa) kawi ning,” ci in, khua leh tui a han suah hi. Tua ciang in khua leh tui in, Pu Tawng Phut ngaihsut piakna bangbang in, Suangpi khua mah ah teenkik theihtheih na ding in, hong vaihawm uh hi. Dimpi, Dimlo a tai sa te kiangah, nong pawm ding uh hiam ci in kidong uh hi. Tua ciang in Dimpi a om Pu Kop Ngulh leh pute in” kong pawm ding uh hi” khua tawh kisai liauna zanghna a om leh no tawh kibang in ka bei ka zaang ding uh hi” ci uh hi. Pute pasal 6 in, lum leh tei kal ah, a san a ngial lai ah, a saatsa uh a siat hang in, a tate in ‘A nih veina phut kik ding ci in taigui sawm in hong ki thawi uh hi.

Khua ah ki kai khawm kik uh:
Mikang gaal sung in khua mite sial e’kdeen bang in, mun a tuamtuam, khua a tuamtuam ah kikhen thaang uh hi. Pu Phut Lam, Pu Tawng Phut, Pu Kip Zel, Pu Tawng Tun, Pu Tun Son, Pu Tun Thual, Pu Suan Lam, Pu Lam Thual, Pu Ngah Awn, hi pasal pawl pen, koi mah ah tai lo in, Suangpi gamsung ah ki zep kawikawi uh hi.

Tomute Pu Thang Phut bawng pawl, hong ciah in, Ngaal lo ah Pu Tuang gaaltaina ah hongtung hi. Dimpi a taai Pu Kop Ngulh leh Pu Hong Tuangte zong gaalven peuh ciang in hongciah uh hi.Suanphutte pu Lam Kip bawng pawl in,’ khuata vaihawm hamsa lua lawmlawm’ ci in, a taaina Dimlo pan hongciah kik nawnlo in, Dimlo khua ah teengsuak hi.  Dimlo pan in Sezang khua na saat hi.Pu Kim Zuan thahteng hong ciah in, Dimpi ah hong ki zinkhing phot uh hi. Dimpi ah a om sung in, Pu Tawng Nok zipi pi Dim Luan sihna tawh kisai in, pu Phut Lam in hibang na phuak hi.

“Sen puvon tawh tong kaciam in, tul nah nuai vangkhua hi cing e, ka tuai umbang khuai ing e. Phamsa in vangkhua zong tah e, na sesul sabang ka zuih aw, pheiphung simbang kha sa’ng e.”
Pu Tawng Nok in zong a zi sihna thu tawh kisai in hibang na ci hi.
“Siing khua mawng bang ih peemna ngauzu twaina ih sau thel nah leeng bang e. Sihtui gamzang liangthei nunnuai kawi aw na kiakna hi e.”

Hibang in khua teen kik theih nading thu ngak in, gamsung amunmun ah om in, khua teenkik theihna ding a hanciam ciat uh hi.

A nihvei na Suangpi khua kiphut zo:
Khamtung saklam gam mikang tawh kido na ah mikang lam pan a makaipi Keli (Carey) mangpipa hi a, Tedim vuandok pa pen Phokla(Fowler) ahi hi. Mangpipa Keli min pha in, mangpi man menzi za a ngah toh ciang in, vuandok Phuklaa in,Mangpiza ngahto in, Phoklaa mun ah Betmen (Bedmen) vuandok mang hong khang hi.Tua bang in gamuk mikangte nasep hong kilaih bilbial hun leh Suangpi khua phuhkik nang hanciam hun hong kituak hi.Tua bang in, gamuk nasemte kilaih ahih ciang ingamsung ki ukna nasepna ah kamphen te in, a ut bang in a sep theih hun khat hong om hi. Kam phen a cih pen pau ki theilo, mi nih kikal ah, khat ii kam, khat pa’tungah, tuapa’ theih pau tawh a gensak kik pa hi.Tua mah bang in mi-uk mikang miliante tawh a ki nai pen a kikhawl pen pa zong ahihi. Tua ahih man in, kamphente in, Paihnop a neih leh pai thei in, gupnop a neih nop leh a gum thei mikhat a hihi. Tua bang in mi-uk mikang mangte hong ki laih bilbial sung in, khua mite, sum kidong in, kamphen Pau Thang a kawi uh hi.

Khup Lian zong kithaii:

Tua laitak in sihzang kualah Lophei khua Pu Khup Lian a pil hi. Suangpi khua phuhkik na ding in, Pu Khup Lian in hong hanciampih nuam hi.Tua hih man in Pu Khup Lian in,”dangka 150/ bang hong ngah thei lai le uh teh hoihding hi” a ci hi.Tua ciang in khua sungahsum kidon kik ding kikum uh hi. Tua sum aki don ding ciang in, Pu Awn Thual in, Kei pawh, hi Naulak, Gualnam, Hatlangh gamsungah sum paaipaai nuam nawn ke’ng, liau lai ding na cih uh leh ngunngal ah tai zaw ning” a cih liklek man in, tua sum kidong nawnlo hi kici hi. A hi ta zong in ci in, Pu Khup Lian vok tuuk thum khat gawh in, zuu beel 2 luup uh a, tang khum sawm a pia uh hi. Tua ciang in Pu Khup Lian in, Suangpi khua phuh kik na ding a panpih pah a, atup na uh bang in, khuathang khua ah Suangpi khua ‘ A nih veina’ a phut zo uh hi.

********************************************************
Suangpi Mualsuang Laibu in Zomite ading a manpha mahmah Mualsuang ahihna tawh kizui in Zomi eLibrary / Laibusaal in, hanciam in a-ki teikik/type kik ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: A NIH VEINA SUNGPI KHUA PHUH KIK NA. (Suangpi Mualsuang Laibu). Description: Rating: 5 Reviewed By: Cinpu Zomi
Scroll to Top