728x90 AdSpace

Hot
Menu
Zon-ol na Donate

Latest News

AW! KEI HAMPHA SI’NG! Tg. Hau Khan Tuang, LL.B

AW!
KEI
HAMPHA SI’NG!
Tg. Hau Khan Tuang, LL.B

Ommuanin ngaihsun le’ng, vak kawmin khuadak le’ng, mualtung pan mualnuai lam en lehang leitung pen kilamdanna le kikim lohna tawh akidim nahi gige hi.  Mihingte genloh ganhingte singkung lopate mahmah zong amaute pianpih zui-in aneu alian, atom asang, avom, akang cih bangin kilamdanna tampi mah nei uh hi.  Gtn; Ak nam hi napi’n aneu deuhte Zo-ak, agol deuhte Mang-ak kici a, “Zomite-a” le “ Mangte-a” zong aneuna le agolna tawh kibang saklo hi hang.


I tenna leitang mahmah en lehang, zanggam dawhtaam akici munte nangawn ah a deptuam, a komtuam, vumdeuh, bawkdeuh cih bangin kilamdang lailai hi. Asanglam en leuleu le’ng mualsang, mualdawk, mualpum, mualdung cih bangin mualte zong anam namin kibanglo sawnsawn uh hi.  Luitui, ciktui, tui-al, tuisi, tuivot, tuilum ci-a kilamdanna anei tuite zong gen khit zawh ding hih tuaklo hi.

Pilna siamna theihnate mahmah zong teh theihloh zah dong mahin khangto a, tangzai semsem hi.  Tua banga khantohna a om ciang, tuate mah tawh hong tonkhawm hi dinga upmawh huai phial khat in gitlohna le siattatna zong tawh khangkhawm pah hi. Gitlohna le siattatna pen zanni sangin tuni’n tamzaw, tuni sangin zingciang tamzaw lai ding himawk hi.  Tua siatna le hoihlohnate sung mah pan apha le ahoih mah na om lai veve hi.

Singkung lopa ganhingte pan kipan nuntakna nei khempeuh mun le mual zuiin, khuahun zui-in etlawm taka anungta ciat ahi uh hi.  Sehnel gama nisuh kungte bang leitawlam (south pole) ah suan lehang hingzo tuanlo ding hi.  Zogamah ahoih mahmah phuitong kungte bang Mandalay khuapi sungah suan le’ng ahin zawh loh ding banah etlawmna neilo ding hi.  Hih singkungnote pen khuahun le amun tawh kizui-a po uh ahih manin amaute’ mun bekah hingzo, etlawm thei bek ahi hi.  Hih banga nuntakna neite pen pau hetlo a thugen gente hi gige uh hi.  Khiatna nei mahmah a nuntak tawh thugente hi uh a, eite nuntakna ah etteh thei le’ng manpha mahmah ding hi.

Koi koi-ah i om a, bang dinmunah i om zongin pawilahna taudawh (stage) tunga alamte mah tawh kibang mawk hilo i hi hiam?  Tumging tum, a diangdiang, a tawntawn, kah le nuih tawh limlak cih bangin manlahna tuamciat nei uh hi.  Tua bang teekteek mah hi hang.  I dinmun ciat, i sepciat tawh tua stage tungah kilakkhia hi hang.  Kineihna tawh limzil kihi nawn lo a, i dinmun ciat tawh a kilampah ziahziah himai hi.  Tua bang hi napi’n ei sang ahauzaw, apilzaw, akhangtozaw i muh ciang lungkiatna peuhin kineithei dihdih lai hi.

Tuukpeng suih siam minthang Beckham’ tapa pen Ganan (Maths) tuat theilo ci citciat se hi.  Apa sun leh kilawm i sak pongmawk hangin a tapa dinmun atuampi khat hi gige hi.  Mihau, mipil, misiam i cihte’n na khempeuh hihthei tuanlo uh hi.  Ei sangin a cimawh zawte, a genthei zawte, zinga azon nitaka nete’ nuntak zia zong manggilh ding hi peuhmah lo hi.  Tuilu tuitaw, sim le mal, kiim le paam, en kawikawi le’ng ahau apil amawl i vekpi’n an le tui mah tawh kinungta ciat hi.  Tua ahih manin muthei-in telsiam peuh le’ng leitung pen anop mahmahna na tel dinga “Aw! Kei Hampha Si’ng” “Hampha Zen Si’ng” ci-in nang le nang na kitel pan ding hi.

Mivom mikang i om a, pau le ham kibang lo, nampi namneu mah omsak lailai, hihte khempeuh lamdang sak luat ding hilo hi.  Mualdawna teeng, zaang gama teeng, maulak a teeng, tuipi gei-a teeng, sehnel gama teeng cih bangin tenna mun le mual zong kilamdang sawnsawn hi.  Tuate zong lamdang sak ding hilo hi.  Amau pianpih (natural) zui-a teenna mun kibanglo himai hi.  Mi khempeuh kumpi hikhin le’ng gammi (mipi) om nawnlo ding hi.  Mi khempeuh motor hawlin motor neikim mawk le’ng omna munin cin’ lo leuleu ding hi.  I vekpi’n pilna siamna kikim khin lehang innkuan sungah nisimin kiphunsanna, kithusim lohna om dinga kitotna le kiselna tawh hun bei ding hi.  Leitung galpi nangawn kinawh mahmah ding hi.  Tua ahih manin zalian- zaneu, apil zawdeuh, athei zawdeuh le avom akaang teng mah in eite lakah kipumkhatna kipawl theih nadingin hong vaihawm sak pen le hong lemtuah pen hizaw hi.

Kikim lo, kilamdang i cihte pen mite bawltheih thu hilo hi.  Lungkim huai khollo thu hi napi’n tuate pen Pasian’ hong piak kikimna khat hizaw thamtham hi.  Apiang na khempeuh “TOPA” deihna hi ci-in ahoih lamin sansiam ding kisam hi.

Source :
ZOMI SIAMSIN MAGAZINE [ Vol 2, 2008 ]

Page 96-97.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: AW! KEI HAMPHA SI’NG! Tg. Hau Khan Tuang, LL.B Description: Rating: 5 Reviewed By: Cinpu Zomi
Scroll to Top