728x90 AdSpace

Hot
Menu
Zon-ol na Donate

Latest News

GLOBALIZATION LE ZOMITE. Agelh - Rev. Nang Khen Kham

GLOBALIZATION LE ZOMITE
Agelh - Rev. Nang Khen Kham

Tu khanghun mipilte’n leitung pen khuata khat bangin ngaihsun lel uh a, “Global vil lage” ci ziau uh hi.  Khualu pan tangko pen khuataw-ate’n zong a zak uh mah bangin kihonate zekai cih omsak nawnlo uh hi.  I pute’ innah tuibukthei la i taipak bangin kikawmna-ah zong thu haksapi-in tuatlo uh hi.  Kum zalom 20 beikuanin globalization khangthak hun ci uh a, leitung omzia kikhelna khat kitung hi.  Mangpau-in Globalization cih pen paunam tuamtuamte’n zatpih ciat uh hi.  E’n zong i gamah hih kammal mah kizang lel hi.


Tanglai hun ci dihni; tuma pekpek kum zalom 14, 15 hun lai-in tuilu tuitaw, sim le malah kihona kikawmnate gamla kisa-in haksa kisa mahmah hi.  Pute’ Piancit (France) pailai hun (1914) bang bel tanglai hun mah hita hi.  Amaute pai lai-in kha 3 vingveng mah sawt hi.  Tu laitak tua zaha hun bei nading thu om nawnlo hi.  Ei mite sung pan globalization a zang masa pente hiding uh hi. 

Khua khat le khua khat thu kitheih sakna-in thaulawn, kamtai kisawl hun pen i Zogam kizopna thupipen khat ahi hi.  AD kum 2000 zawh i Zogamah kizopna, thukizakna manlang zawdeuh ta hi.  Laitai ding mihing kisawl kul nawnlo, kuli kipuaksak cihbang zong kullua nawnlo ding hita hi.  Zogamah sakol pai theih lamneu ahihnak leh motor cycle (bike) paisak gawpmai uh hi.  TedimCiau kikal bangah motor golpipi pai thei ding hita hi.  Laitui, Tuithang-ate bang bel zingmeh ding lei-in Tedim taipak ziauziau uh hi.  Kum 2000 cinzawh i Zogamah globalization tawh hong tonkhawm uh ahi kikawmna lamah zong khantohna tampi mah omkhin zo hi. 

Tuma kum sawm hun lai-in Kawlzang ah siksakol (bicycle) in hong taih kha-in teh, kidawm un, ci-in innkuan sung thukihilhna hipen hi.  Nupite bang siksakol tawh a kinawk kha tam thei mahmah hi.  Kum 2000 zawh ciangin cycle in hong nawk kha inteh, cih hi leuleu hi.  Siksakol zat hun lai sangin cycle zat hunah mihingte’ kidopna zong thupi zawdiak hi.  Tua mah bangin tuah-siatna thuak zong kitam simsim hi.  Globalization hong tu'n a kitheihna nam khat hi leuleu hi. 

Tangthukan siamte’n leitung bup huamkima kizopna ahi globalization pen 3M (Marchant, Military, Mission) tawh kipan hi, ci-uh hi.  Tuate in sumbawla zinna, galvai le biakna vai nasepte ahi hi.  Globalization kipatcil hun kum zalom 14 hun laihawl pawlin sumbawl sumzuakna thupi takin kisem khinta hi.  Vanpua lengte le gunkuangte tawh Europe mite Asia gamah zin uh hi.  Vanpuakna sunga a puakkhop khak uh zusate in pulnatna (plague) Europe gamsung tunpih hi.  Black death ci uh a, Europe mi 1/3 lalsak hiau hi.  Zomite sung pan sumzong theite’ genna-ah 1950 kum pawlin Lamka-ah Khamtawn (suai-tawn) pua-in sumbawl hun kipan khin uh hihtuak hi.  Tua teng mah tawh innpha lopha nei pawlkhat om uh hi.  Tua hun lai-in natna lamdang luahuai ding omlo hi-in teh. 

Africa gam sung pan hong piang hidinga ki-ummawh, America gam pan a muhkhiat uh HIV virus hangin natna minthang AIDS zong kum zalom 20 sungah globalization tawh unau bang ahi hi.  Zinna vakna olzaw ahih manin natna puakna-ah zong manlang zaw pah hi.  Zomite’n “tulai natna, natna minthang” kicihsak ziau lel hi. Globalization tawh hong tonkhawm hih natna in Zomite tam simsim mah hong bunuai hi.  Malaria, TB natna neite tawh kibang uh a, Zomite’n i khenthei pak kei hi.  A khansih tawh, agui azamin a lallawh zong i om hi. 

“Tullel dawna heisa paak aw kong lozo diam aw, tual hong niam dih aw” ci-a Pute Pate hunlai la kisa pen, tuhun ciangin phukgawp ihih manin lawhbaih ta hi. Sente’n Zogam sunga paak pawlkhat deih uh ahih manin sum zonna-in kinei hi.  Paak khat ngah theih ding ngimna tawh singkung golpipi kiphuk giapgiap a, i supna ahih lam kiphawk zolo hi.  Globalization hunah paak nangawn in man nei uh a, Zogam in tullawh hi.  Pute Pate’n sing dawnah kahtoh ding a sawmsawm uh pen, globalization hunah kah kulnawn loin phuktan ding hita hi. Singkung i suan beh zokei zongin phukbeh loh ding thu globalization tawh hong tonkhawm thu ahihlam phawkhuai hi. 

American scientist-te’n nuclear bomb abawl masak pen uh July 16, 1945 ni’n New Mexico ah asin uh ciang hoihlua kisa; tua zawh a sawtloin Heroshima le Nagasaki denna-in nei pah uh hi.  Mi tul tampi si uh a, awn tampite’n gauvei-in vei uh hi.  Hatna akici limlim pen Japan mite sungah tawkheuh ding nangawn om nawnlo hi.  Ei mite’n zong thupil khata i gen “Japan-gal lel (zolo) banga,” i cih tawh kizui-in Japante pen mun khempeuh ah a gammang tawh, asi tawh khuasuak zoding dan hilo uh hi. Bang mahin zangthei kholke’n teh ci uh hi ding hiven, Americante’n Japante kiangah computer technology le huhna tawm khat hong pia dihdih uh hi.  Mipil, miteisa cihbuang deihtak thasanin kipankik uh hi. Innbul muktu ahih uh hang kiphong kik thei ahih manun kum 30 sungin Asia gamte lakah apicing pen le akhangto pen hipah hi. 

Nidanga Japan-gal akici pen tu-in Japan pu, Japan-lawm hita uh hi.  Nidanga gal-ai, galmante khutah Japante tam simsim mah ommah ding hiven, tu-in eite adingin lawm hoihpente ahi uh hi.  Amau’ khut sungah eite omkik zaw hang cileng i khial zawdiam! Sia Do Khup’ vaihawmna tawh Japan gama kizaih ahi “Ngaih Ang Lai Ah” video minthang mahmah hi.  “Topa ahun tomno” la akisak nak leh, tulai natna tawh asi hi-in teh kicihsak liang hi.  Hih zong eite gamah globalization in hong puak khantohna nam khat ahi hi. 

Sente’ Prime Minister asem ngei Deng Xiaoping in suakta taka sumbawl theihna kongpi hong ding hihang, ci-in 1978 kum December in tangko khia a, khanlam manawh pah ditdit hi.  Gam tuamtuama sumbawl siamte tawh kizomin na sem uh ahih manun, “Europe gamte le America bang tawh kilamdang nawnlo ding hita hihang ei!” aci nuam ding hita uh hi.  Sen vante hong tam paha i gamsung sumbawlna, Mizogam sumbawlna dongah nuntakpih theita hihang.  Sente khantohna e’n zong noptuampih lua hihang.  Pasal bek hilo numeite’n zong lokuanna-in neithei uh hi.  Globalization tawh unau khat mah ahi uh hi. 

Italy gammi tangval gogamh khatpen laphuah siam a, England kumpi King George I in England gammi suahna lai tawh pahtawina apiak Handel in 1741 August in Messiah Lapi aphuak hi.  Pumlangzaw natna hangin pumpi zawngkhal kawmsa-in Messiah lapi ling-deldelin gelh hihtuak hi.  Handel in ni 14 sung sun le zan khen theilo liangin gelh a, akpi leiphiat mahmah bang hi kici hi.  Kikuigawpin simhak mahmah hihtuak lai hi.  1743 kum ciangin mipi zaktheih dingin sakding gelna nei a, langpanna le elna tampite hangin thumvei vilvel kibuaksuah hi.  1750 kumin Messiah lapi hong minthang mahmah a King George I lunglut lua ahih manin Hallelujah chorus khawk atun’ciang adinsain tua la ngai hihtuak hi.  Tua thu globalization tawh hong tonkhawn a Hallelujah chorus akisak sima dinloh phamawh bangin ngaihsun dihzen hihang.  Tua sangin Messiah lapi ding mah sathei hileng, dinhuai zawding hi.  Lasiam mi 500te’n 1750 kum pawlin Messiah lapi dawng cingin sa uh hi.  Globalization tawh i ngah khop pen Hallelujah chorus hi phot hi. 

2005 kum December in Tedim khua-a kibawl ZOFOP pawi-a lasa mi 3780 pha uh a, Hallelujah chorus asa ngeite sungah mi atampen hidingin kigen hi.  I gamsung khua tuamtuam, mun tuamtuam ah Jubilee le pawi tuamtuam kibawlna-ah Hallelujah chorus sakloh phamawh bang liangin kituat kha hi. Hih la akisak ciang pawi thupi deuh le kilawmsa pongmawk hihang.  Hih zong globalization in hong puak thu namkhat hi bilbel hi. 

1990 nung siah globalization in silh le ten hong puak leuleu hi.  Fashion show ci uha silh le ten lahna-ah lulam zepna, tawlam zepna-a kipan sut zawhloh ding kizepna tamlua himai hi.  Korea drama teng TV pan kimu ciat hi napi’n, athu-ah kinga loin silh le tenah a kinga tam simsim mah om uh hi. Samkil pan samtang; nikmong kaa liangluang peuh cihbangin ki-om hi.  Tua sung pan Zominam puan nangawn Korean style tawh kibangta hi.  Globalization pan hong tung i minam puante lungman huai sam ei guai! Puandum nikkaa teng puan a silh, pasal puanlaisan pen puan-aak akhui sese.  Zomi ka hi ci-a khauhpai mahmah napi’n minampuan awlmawh lote globalization pan pilna ngah hi loin gilo-bel-zat-siam hileh kilawm zaw uh hi. 

Sathau man khang hi, vanman kah hi ci’n kigen pahpah hi.  Meh kanna sathau bek hi nawnloin datsi, diesel zong sathau kici ta hi.  Sumsiam mipilte’ genna-ah leitung alauthawng sak pen in misuamte sangin sathau man khanna hanga apiang thuteng lauhuai zaw ciliang uh hi.  Tua hang mah ahi diammaw Zogam buste sungah van le mihing guan acihin kiguang hi.  Sathau man kah a, hibangin kiguang cileng, a mankiam hun ciangin kiguan dan ding bang mitkha tawh muthei pah ni. 

Gamdang paiding thumasa-in kikoiha pilna masuan tawh, thatang masuan tawh, khantohna khatin kingaihsun hi.  Khua sungah tangval vak khat kimu leh, huapa hong ciahkik maw! Apai nailo zaw! kici liang hi.  Kawlzangah pilna sinna sang tuamtuam om a, nupi papite’n telpaklo uh ahih manin- Tai 9 Sang, Thu-ma sang peuh, Cikung Sang peuh kineisak mawk hi.  Amin apuam a lawhsiam ding kisam lua hihang. Tai 9 Sang pan hong ciah bus tunga tangval pawlkhat bangin nuam sathei bilbel hi.  Misi inn mai khawng atun uh ciang Hallelujah peuh ci’n khutbeng gawp thei uh hi. Nuihsan ding lah kilawm samlo, hehding lah hi deuhlo cih bangin eite sungah globalization tuampian zong om kiukiu hi. 

Globalition khauhpai semsema minphatna, pahtawina zong khang deuhdeuh hi.  Pilna siamna tawh kizui-in doctor bang zong kibehlap semsem hi.  Zato doctor maw! Lailam doctor maw? i khensiam ding thupi sa ingh.  Gtn. Dr. Hang Sai ahihleh lailam hi henla, Siavuan Nan Tal ahihleh zato lam cihbang hileh theihnop ding hun hita hi.  Globalition in doctor lam zong hong puak leuleu hi a, nial khit ding kilawm lo hi.  Pawlkhatte kheltat sese uh a, nang’ koilai pan doctor ngah na hiam? ci-in kantel citciat uh hi. 

Khualzinna pan ka muhkhiat globalization khat, khuapi-ate sangin khuata-ate’n zudawn zaw uh hi ci-in ka mu hi.  Khuataah sumzuakte’n zu zuakna ah met pen uh ci hi.  Zogam khuata-ah laitan nei khangnote om khollo uh hi.  Kawlzang le khuapi dangte-ah pilna zongin khangno tampi tak om uh hi.  Khuata ah tan 10 sin numeite pen khangham kisa pianta uh a, tan 10 kia tangval khat pen zi neihloh phamawh bangin ngaihsun uh hi.  Pilna zonna ah khuapi le khuata kibang lo, omdan tatdan ah zong kikhai mahmah lai ahih manin globalization zatsiam ding le ngaihsun siam dingin kithawi phapha ni.


Source :
ZOMI SIAMSIN MAGAZINE [ Vol 2, 2008 ]

Page 163 – 165.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: GLOBALIZATION LE ZOMITE. Agelh - Rev. Nang Khen Kham Description: Rating: 5 Reviewed By: Cinpu Zomi
Scroll to Top