728x90 AdSpace

Hot
Menu
Zon-ol na Donate

Latest News

THEIHHUAI NUCLEAR WEAPON THU. Agelh ~ Mooli writer, Moreh

THEIHHUAI NUCLEAR WEAPON THU
Agelh ~ Mooli writer, Moreh

Tu laitak leitung bupah alauhuai pena akigen a minthang Nuclear Weapon bomb kici pen atamzaw in thei dingin ka ummawh hi.  Hih Nuclear galvan bang hangin kibawl hiam?  Banghang lauhuai hiam?  Hong kizang leh bang i cih ding hiam? cihte gena genkhia vanglak, ciama ciamkhia vanglak ankam lim nadingin gencian vet ni.

Amasa pena i theih dingin hih bombte pen atangpi’n nam 3in kikhen hi.  Tuate in
(a) Atom bomb,
(b) Hydrogen bomb, le
(c) Neutron bomb cihte ahi uh hi. 

Tu laitak akitamzat pen in Hydrogen bomb ahi hi. Hih bombte pen Chemistry pau-in gencian ni.  Atomb bomb pen Uranium (U235) pan hong kibawl hi.  Plutonium (Pu239) zong kizang hi.  Hih element te pen “Radio Active Element” kici hi.  Ahih hangin radio active element khempeuh kizanglo hi.  Ahang in amaute pen “Stable” le “Unstable” ci’n kikhen uh hi.

Hih munah unstable te bek kizang hi. Atomb bomb ii uranium pen neutron zangin kisu-a puakkham ahi hi.  Hih a puaksak pen “Neclear fission” ahi hi.  Fission pen energy tampitak kipiakhia ahi hi.  Uranium gram khat in 8.60x107 KJ energy piakhia hi.  Hih energy satdan gending hile’ng suangmeihawl (coal) ahoih mahmah 2.5 MTS kihal khin leh tua tawh akiteh thei pan hi.  Hih banga ahat energy pan hong kibawl bomb pen agihna gram kigen nawn loin Megaton a kisim hi ta hi.  Hih pan bomb khat ahat ding dan kitel mahmah ta hi.

Alang khat lamah Hydrogen bomb i cih ciangin Atom bomb kilehbulh tawh kibang hi.  Ahang in hydrogen pen Uranium in puakkham sak lo, ahi zongin Hydrogen Atom pen agui zoma energy kipiakhia hi zaw hi.  Hydrogen Atom nih kizop ciangin 62x107 KJ energy piakhia hi.  Atom bomb sang azah nih hatzaw cihna hi.  Tua pen Nuclear Fission kici hi.  Hih bang bomb pen tuni dongin kizang nailo hi.

Alauhuai dan gen ding hile’ng August 6 le 9, 1945 a Hiroshima leh Nagasaki-a kikhiate ngaihsut huai hi.  Hiroshima-a kikhia pen “Little boy” ci-a kigen, Robert Lewis in ahawl vanleng B-29 pana na kikhia hi.  Hih Little boy pen 12.5 kiloton agik, mihing 70,000 tang bang amunmun asih banah anunga sihlawh 100,000 bang sizo hi.  Scientist te’ genna-ah hih bomb apuakkek laitakin 3000-4000°C bang asa hi ci uh hi.  Tua leh hi bomb puakin radiotion (meivak banga vaak) in mihing-vun hong kapkhak leh skin cancer (vun cancer) natna kingah thei hi.  Bomb puakkhama si lote zong meivak hanga si veve ding cihna ahi hi.

Tua lauhuai pen i gen Hydrogen 5000 Megaton agik khat hong puakkham hen la hileh Dr. Carl Sagon le Dr. Turco in agelhnaah hibangin gen uh hi.  “Tua huntak ciangin mihing a million simin amun munah sihna thuak ding, a satluat manin gam tampitak hong kang ding, tua gamkang a, meikhu 225 million tons hong khu ding hi.  Hih meikhu in van hong tuam ding a, nisa vakin leitung vak zolo ding a, mial khipkhep ding hi.  Hih meikhu in 30' North le 70' North a gamte hong limtuam mahmah ding hi.  Tua meikhu in Heart Cancer hong piangsak ding a, mi tampitak in sihna tuak ding hi.  Tua bek hi loin adam sunsunte zong hun haksa Nuclear Winter kici phalbi vot sanga votzaw meikhu in nisa vak hong dal ciangin, leitung vot dan 30’c a hong vot ding, tua pen hong thuak ding uh hi.  Hibanga vot pen mihing a thuakzo omlo ding cihna hi.  Tua hun ciangin coastal storm (tuipi huihsia) zong hong omthei lai banah meikhu hang a, huih hoihlo, Carbondioxide, Sulphurdioxide le atuamtuam hong piangkhia sak dinga, hih hangin “acid rain” kici guah hong zu ding hi.  Hih acid rain hangin mihing in sihna tuak banah singkung lopa bel genvet om loin nungta zolo ding hi.

Tua ahih manin singkung lopa om loin mihing kinungta zolo a, akuamah peuh in hibang bomb azang dingte in hong tung ding khempeuh atunga i gensa thute adal nading i bawlkhiat masak hong kisam ding ahih manin ei siamsinte’n zong i lungngaih ding kisam ka sa hi.

Source :
ZOMI SIAMSIN MAGAZINE [ Vol 2, 2008 ]
Page 152 – 153.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: THEIHHUAI NUCLEAR WEAPON THU. Agelh ~ Mooli writer, Moreh Description: Rating: 5 Reviewed By: Cinpu Zomi
Scroll to Top