728x90 AdSpace

Hot
Menu
Zon-ol na Donate

Latest News

HIH LAM HONG NGA DIH UN. Agelh - Tg. Dai Suan Khai

HIH LAM HONG NGA DIH UN
Agelh - Tg. Dai Suan Khai, M.A. (Hist), Tuitum 
Model : Moe Set Wine. Tonzang, Chin State Zogam.


Simlei mi zatam lakah Zovontawite in nuntak khuasak haksatluat manin amoi aham cih om loin sesum sila suakin mundang gamdang, leidang, tuidangah Vansam bangin zung kha-in i tung zelzul ta hi.  Hih thute Zovontawite’n ngaihsuthuai ka sa ta hi.  Khatvei vei ka ngaihsun zelzel a, hih bang zelzul lawmlawm tung Sianmang thupha i sanna ahitak tam maw? ahih kei leh minam tawm nalailai i kithehthangna khat, manthanna khat, a bawl ihi mai tam maw? ci-in kei le kei ka kidot zel thukhat ahi hi.


Zo vontawite gamdang leidang a tung peuhpeuh Pasian’ thupha ngah ka cibit nuam kei a, a tung zolote zong Pasian’ thupha ngahlah hi’ng ci-in lungneu-in mangbang liang dingin ka tuat kei zel hi.  Gam le lei minam pen sum tawh leitheih zuaktheih hi zenzen lo hi.  Sesum tem bangin deihluat manin i gam i lei, i minam le i paute phawk nawnloin mun le mual, pau le ham kician mellopi khat akisuak kha thei ding hi tamawk hi.  Hih thute ka ngaihsut sut ciangin khang sawnsawnte adingin Va-ak Utong kineih bang suaksakin a tawpna-ah Baak i bat khak ding a lauhuai thukhat hong hithei kha ding hi.  Gam le lei, ci le nam aphawkkha nawn mello honkhat om pianpian ta i hiam aw…, ci-in ka lungngai deduu zel a, hih thulu kong gelhkhiat ahi hi.  Gamnuam, gamthupite kiangah daipaam, peemta lau giauguau-in i om sang i gam, i lei, i minamte lakah suakta takin innteek (teektang) a i om thilthel hoh…, ciin ka ngaihsun thei zel hi.  Inngua hahlo gamgua hah i suak kha tam maw?

Lai Siangtho Luke 15:18 sungah tapa taimang pa in “Kei Tho-in Ciah Ning” na ci lai hi.  Apa kiang atunciang innteekin (teektang) cih i muh mah bangin na maingal na teektang theih nadingin i gam, i lei, i khua, i tui, i minamte in haibang hong ngak lai…, Lengtong Pauno in la phuak a, “Vaimin ciim zong kham zolo Gatam ciim mah petpet ing,” na cilai buang hi.  Gatam ciim mah i pehpehna in i gam, i lei, i minam sungah i innteekna a na hi gige hi.

Tu laitakin bel Zo vontawi apil, asiam teng Tangval, Nungak thahat melhoih tata teng in khe thawlna na-ah ci-in mundang, gamdang, leidang, tuidangah vailo kuannain hong neihsanta uh hi.  Tua ahih teh i gam, i lei, i minam kua in hong zunin hong puah tam?


Kawlgam sunga om Zo vontawite banglam banglamah giautau keeita mai hi hang.  Vamimte kigen bangin asuak masa taivai ee…., cihbang gual peuh hita mai…, apil, asiam a kua mahpeuh Zo vontawite aw, na omomna panun HIH LAM ONG NGA DIH UN.



Source :
ZOMI SIAMSIN MAGAZINE [ Vol 2, 2008 ]

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: HIH LAM HONG NGA DIH UN. Agelh - Tg. Dai Suan Khai Description: Rating: 5 Reviewed By: Cinpu Zomi
Scroll to Top