728x90 AdSpace

Hot
Menu
Zon-ol na Donate

Latest News

I GAM A HOIH NADIN EIMAH KIKHEL MASA NI Agelh : Rev. Go Za Nang

I GAM A HOIH NADIN EIMAH KIKHEL MASA NI
Agelh : Rev. Go Za Nang

Ei Zomite’ kikhopnate-ah thupha ngah minam i hi a, Pasian’ mizatte hi hang, ci-in angtang takin kigen ciat hi.  Tua bang danin gentheih nading thu tampi om khamah ding hi.  Ahi zongin thupha ngah, Pasian’ mizat cih pen thupi pha mahmah ahih mah bangin i thupha kepsuak ding le Pasian’ hong zatnate khosak mahmah ding cih zong thupi khading hi, ci-in ka um hi.  Nidang lai-in Zomite hong kithei khollo hinapi-in, tuni ciang khuapi sungah hotel pipi nei-in, sumzon’ paizon’na, pilna zon’nate-ah mi tawh liangko kimin i kalsuanna ciang zong mun khatkhat ah, hun tomno sungin hong omta mah hi.  I pilna zon’nate sawt nailo lua, i hauhnate zung saupi kha nailo lua ahitam zatkhialhna mun tampi zong hong om veve tamawk hi.

Kawlgam ah AG maikai pipa Rev. U Myo Chit in deihsakna tawh hong thuhilhna pawlkhat ngaihsuthuai ahih manin kong hawmsawn nuam hi.  “Kawlgam ah Karente Pasian in teelin hauhna, pilna, za le min tawh pahtawi hi.  Ahi zongin Pasian’ laptohna pen kumpi langpa’nna peuhah hong zat uh ciangin ameivak uh kikhin a, tu-in Deekte pen a enhuai lohna tampi omta hi.  Tua mah bangin Kachinte thupha pia a, sawt nailo kumpi mah langpan ahih manun ameivak uh Chinte kiang kikhin hi, ci’n ka mu hi” hong ci ngiat hi.  Tua ahih manin na gamtatnate uh ki-enpha un, kihilh den un, Pasian kihtakna, Siate itna, Kumpi ading thunget saknate, na mangngilh ngeiloh ding uh thupi mahmah hi.  “Na gamtat, kampaunate uh mite ading luaksuahhuai a suah loh ding thupi mahmah hi” hong ci tangtang ngei hi.

Kawlpi khua sung pen vengpi 5in kikhen a, tua veng lakah numei kizuak tamna pen, thau kizuakna, guihtheih khamtheih kizuakna veng pen Zomite tamna pen ahi, Pinlong veng hong kici hi.  Tua zomah Tahan hi ci lailai uh a, ei mite tenna teng mah hi.  Kalay University sangnaupangte in i ngaihsut diak dingin tai 9 luidungto khawng pai lehang zusa zawi bangin ngil hithet liang hi.  Nungak tangval kithuahna-in tua zahtak i zat pen thupha ngahna ahi hiam?  Ngaihsuthuai pha mahmah ding hi.  Unicef te in Kalaymyo khangnote lakah HIV positive pen 70% bang om cimawk uh a, dahhuai mahmah hi. Khangno momlai mailam makaipi ding tampi hanmual lam manawhna asuah ding lauhuai mahmah ka sa hi.  Thupha ngah hang, i cihte hibang thute hang peuh ahih lebel thupha taktak hithei lo dinga, a khem hizaw khathei ding hi.  Pilna neite in zong mite tawh kitawtna, kikhiatna lai-atna, buaina piansakna peuhin i zat mawk lebel kingaihsut huai mahmah ding hi.

I kipuahphat nadingin anuai-a thute i kikum ding hi:

Thu khatna ah: Gupna na ngah nai hiam?

I kisit phat mahmah ding kisamta hi. Bang hang hiam cihleh gupna thu pen neilopi-in, a theory-in kithei naalgawp pongta hi.  Khanlawh cil lai khawngin piangthak hong kicih ding akimulkim bang loin, tuhun ciang mi khempeuh in, piangthak hi’ng kicitek pongmawk hi.  Mi khat thugen ding kipanin, Lai Siangtho munkhat hong sim lian ciang, agen ding thu kimatheih khol liangta hi.  Tua ahih manin theihna bek hilo gup ngah takpi mah na hi hiam, cih pen thupi mahmah mawk hi.  Zeisu a um mite in nuntak tawntungna nei, ci hi.  Nang na nei nai hiam?  Zeisu a um mite mithak suak a, alui nate kikhelin mithak suakzo ci hi.  Nang mithak na suak takpi nai hiam? Na up leh Zeisu nei na hih manin mithak na suak takpi ding hi.

Thu nihna ah: Pasian kihtakna tawh nuntak ding kisam hi.
Pasian kihta icih ciangin sahang kihtak, sikha kihtak bang hi loin, itna tawh ama deihlohte gamta lo a, nuntakna ahi hi.  Tua Pasian kihtakna a om kei leh mite kidiktat thei ngeilo ding hi.  Pasian’ nasem Bill Gotard in “Na pianzia na theihnop leh kua man’ nang hong theihlohna munah na om laitak a, na lungsim le na gamtatzia pen nang nuntakna taktak hi” ci-in gen hi.  Pasian kihtakna in i nuntakna hong kem ding ahi hi.

Thumna ah: “Sianthona nuntakpih ding kisam hi.
“Sianthona a om kei leh, kuamah in Pasian a muthei kei ding hi” ci-in Lai Siangtho in hong gen hi.  Tua ahih manin sianthona i cih pen, Pasian kihtakna ahi hi. Sianthona i cih ciangin akimukhia le akimukhialo sunglam sianthona ci-in nam nihin kikhen thei hi.  Akimukhia i cih ciangin tep le muam, guihtheih khamtheih zatna-a kipan kampau mukpaute ahi hi. Akimukhia pakpak lo sunglam aninsakte pen hazatna, muhdahna, thangpaihna, mawhmaisak zawhlohna, lunggulh luatna, en’na, ki-elna cihte pawl ahi hi.  Hih bangin sunglam siangtho lo nuntakna pen Kha Siangtho in luah theilo ahih manin mite gamtatpha gamta theilo uh hi.  Siat nading bek ngaihsutin nei uh hi.

Lina ah: Nuntakna-ah i nuntakpih ngiat ding thute: 
1. Pawlpi tungah cihtakna ahi hi. 
Pawlpi i cih pen Khazih tungah kilam a, tua tung pan Sawltakte, Kamsangte, Evangelistte, Laihilh siate le Pastor-te tawh a kilam pawlpi ahi hi.  Nekkhawm i nek ciang “Hih leenggah tui in ka sisan tawh kiciamna thak alak ka si ahi hi.  Kei nong ngaihsut nadingun hehpihna phatin na ne un” hong ci hi.  Tua ahih manin pawlpi-ah i om ciang kiciamna tawh a om i hi gige hi.  Pawlpi nasepna neng khat nangawn ei thu-in nial, zuilo cihbang omtheih ding thu hilo hi. Sehsawm suah sehkhat bang pen ut leh pia ut kei leh pialo cih bang piang theilo hi. I pawlpi ciatah piak teekteek ding ahi hi. Mission nasepna, tagah huhna, sangnaupang huhnate pen sehsuah val pan piak ding hipan hi.  Pawlpi tungah na thuman ciangin Pasian tungah thuman na hi pan hi. 

Ka biakinn lam lai-un, generator neu Yamaha (W950) te khat zang nuamin ka zon uh leh sun annek kal sungin na mang mawk hi.  Ka biakinn nasemte un “Hih pen Zomite hiding hi” ci uh a, zadah pian ka hih man “Bang hang maw?” ka cih leh “Ko Kawlte upna-ah Pasian biakinn sungah kizang vante innah zang lehang Hellkhua tung ding cih um ka hih manun singbek khat nangawn inn kiciahpihlo hi” hong ci hi.  “Tua ahih manin Kawlmi in gulo dinga, Kawl ahilo minam dang khat hiding ci-in a genngam hi’ng” hong ci mawk hi.  Tua ahih manin i biakinn, i pawlpi zahtak ding, it ding kisam mahmah hi.  Pasian sumpi khawng sumbawlna peuhin zat zanzanna, biakinn vante innah ciahpih a, ei aituam van ding khawngin, i lak ziauziaute kidawp huai mahmah hi. 

2. Pasian nasemte it ngiat ding kisam hi.  
Leitung na nuntakna-ah na thupha nakte lakah khat ahi hi.  “Pasian nasemte angaite kei mah hong ngai hi” ci-in Lai Siangtho sungah hong gen hi.  Ei Zomite lakah i kikhel mahmah ding akisam khat in, Pasian nasemte zahtakna lamah i lim kilamdangsak ding hi hang.  Pasian’ nasemte pen Pasian’ tangmi ahih manin amah na limbawl leh Pasian alimbawl na hipah hi.  “Keima min tawh tui haikhat apiate in keimah hong pia ahi hi” ci-in Lai Siangtho sungah hong gen hi.  Na siampipa ahi pawlpikempa zahtakin kihta in, Pasian’ tungah abawl na hi hi. Korea mite in a pastor-te uh itin anvak, letsong puak uh a, limbawl ahih manun thupha angahna lampi khat hi ci uh hi. Milimbia Kawlte in nu le pa, siate le phongyite ci-in na khempeuh ah masak uh hi.  Anlim pia uh hi.  Puansilh hoih guan uh hi.  Lungkim sak hi. 

3. Nu le Pa zahtak ding hi.  
“Leitungah nuamsa-in na khan’sau nadingin na nu na pa zahtak in” ci-in Lai Siangtho in hong gen hi.  Ei mite pen ki-itdan siam nai hetlote i hi hi.  Khatvei lungdambawl khatin nungak khat in tangval khat hopih a, “Hey! hiah hong pai sin! zalo maw, na beng ngong ahia?” acih gaihgaih leh ka gei-a nupi khat in “Nogel lah nong ki-innkuan ho keeimawk uh a” ci zawsop mawk hi.  Cihnopna-ah nupa, nute pate le tate pen kilimho ngeungeu lo cihna ahi hi.  I nu i pate bangci-in i bawl hiam? Na nu ateek ciang, na pa ateek ciang alungsim manlang nawnlo hi.  Na hong mangngilh ding hi.  Bang ci-in na hopih a, na tai gaihgaih mai hiam? Na nuteek na pateek tawh biakinn sung khawng, mi lak khawng na vak ding zumkha mawkmawk ke’n, na nu na pa’ lungnopna in na thupha ahi hi. 

Tua ahih manin IIKhang 7:14 ah “Keima min tawh a kisam ka mite amau mahmah kiniamkhiat in, a gitlohnate uh nusia uh a, Ka mai hong zongin, thu hong nget uh leh Keimah in vantung panin a thungetnate uh ka za dinga, a gam uh ka damsak ding” ci-in hong kamciam hi.  Tua ahih manin i gam hoih nadingin ei mahmah kikhel masa phot lehang i gam hong cidam ding hi.

Etkak laibute:
1.  Your best life now; By Joel Osteen (The #1 New York time best seller of the year)
2.  Carmel AG, Tuithang Silver Jubille laibu; By Carmel, AG Tuithang
3.  The Sherperd’s Staff; By Raph Mahony 4.  Tedim Holy Bible; 1978 Edition.

Rev. Go Za Nang,
Senior Pastor Agape Ministries
Center No. 14/10 Pinlong, Kalaymyo
Ph. 073-21613
Email: agapegnang@mptmail.com; g.agape@gmail.com

Source :
ZOMI SIAMSIN MAGAZINE [ Vol 2, 2008 ]


Page 99-101.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: I GAM A HOIH NADIN EIMAH KIKHEL MASA NI Agelh : Rev. Go Za Nang Description: Rating: 5 Reviewed By: Cinpu Zomi
Scroll to Top