728x90 AdSpace

Hot
Menu
Zon-ol na Donate

Latest News

KAMPAU, LAI, NGEINA LE MINAM. Agelh - Eddie N. Hang

KAMPAU,  LAI, NGEINA LE MINAM
Agelh - Eddie N. Hang
Pastor of Zomi Baptist Church
United State of America

Amaute in Pasian nalamdangte a taangko uh ei kam ciatin i za mawk hi (Acts 2:11b). Hebrew kam tawh hopihna aw khat ka za hi (Paul). (Acts 26:14)

Pentecost pawi pen Jew mite pawipi hi-a Paisan pawi Sabbat khit ni sawmnga a cin ni a (Lev. 23:15-16) kibawl ahih manin Pentecost na ci uh hi.  An alak masak pen lomkhat Pasian tungah a ap khit ni sawmnga a cin ni hi a, Nipi ni tawh kituak hi.  Topa Zeisu thawhkik zawh ni sawmnga cin ni zong na hi hi.

Hebrew kampau Jewte le Aramaic kampau Jewte in Nipi pawi (Det. 16:10) ciin zong thei uh hi.  Anlak pawi (Ex. 23:16) ahih kei leh anpal pawi (Num. 28:26) zong ci uh a, tua ni-in anpal lomkhat ciat hong kengin Topa tungah lungdam ko ziahziah den uh hi.  Jerusalem biakinnpi sung bekah Pentecost pawi kikham thei ahih manin kum simin Jew mite khempeuh a ten’na gam ciat uh pan tua pawi zang dingin Jerusalem khuapi-ah hong pai den uh hi.  Acts 2 sunga Pentecost ni-in zong Parthia, Media, Elam, Mesopotamia, Judea, Cappadocia, Pontus, Asia, Phygia, Pamphilia, Egypt, Cyrenea, Rome le Care pan Jew mite pentecost pawi siim dingin Jerusalem khuapi-ah hong zin uh hi.  Amau tenna gam zui-in kam nam tuamtuam pau uh hi.  Nungzuite ahih leh Galilee kampau uh hi.  Pawi a kham laitakin Vantung pan huihpi nung bangin Kha Siangtho hong kum suk a, nungzuite in Pasian nalamdangte a tangko uh pawisiim mi khempeuh in amau kam ciatin za uh hi. (Acts 2:6) Lamdang sa-in: “Hih mite Galileemi vive hilo hiam? Pasian nalamdang a tangko uh bang ci-a ei kam ciat a za thei ihi hiam? ci-in kidong kheukho uh hi.  (V. 7-11b) Peter gen khempeuh amau kamciata azak uh ciangin telpah uh a, tua ni mahin mi 3000 in Zeisu thawhkikna thu umin sangthei pah uh hi.  (V. 41).


Hih Pentecost pawi ni-a thupiang i sim ciangin a nungta Pasian’ thu pen ei kam ciatin i zak ciangin tel baihin sannop hi ciin kimu thei hi.  Adam le Eve a mawh ciangin Eden huan sungah Pasian hawhin Adam le Eve na bu uh ahih manin, “Koi-ah om na hi uh hiam? ci-in zong hi (Gen 3:9). Pasian in kamsangte tungah thu a gen ciangin amau kam tawh na gen hi.  Hong itna lian teltaka, hong gen thei nadingin mihing bangin hong piang hi.  (Jn. 1:14; Phil2:7) Topa Zeisu in sawltak dinga Saul a sap ciangin Hebrew kam tawh sam hi.  Paul in bang ci: “Hebrew kam tawh hong hopih aw khat ka za” (Act 26:14) ci ngiat hi.  “Ci le sa tawh ka mai-ah a kisial ngamna om uh leh hong kisial dih un; kei zong kisial nuam sem ing.  Ka suah zawh ni giatni a, vun a ki-at Benjamin suan Isreal mi hi ing.  Hebrew mi sung pan Hebrew mi hi ing.  (Phil 3:45) ci a, a kisial zah khatin Saul pen Hebrew kam tawh a nungta akhangkhia ahi hi.  Tua ahih manin Topa Zeisu in a sap ciangin Hebrew kam ngiat tawh na hopih hi.  Pianpih kam mah kisam pen ciat, ei kam ciat mahin Pasian’ thu za le’ng telbaihin san nop hi.  I tel lohpi kisang thei lo hi.

Pasian in singkung lopate a bawl cilin anam, anamin bawl hi.  Ganhingte zong anam, anamin bawl a, amau nam ciat zui-in ham uh hi.  Vasate zong anam, anam mahin bawlin amau namciat zui-in ham uh hi. Mihingte hong bawl cilin ahih leh nam khat bek a, hong bawl, Genesis 2:7 pan 11:7 dong leitung minam khat bek om a, pau nam khat bek na pau uh hi.  Babel tausang lamna (Gen 11:8) pana kipan a kam uh hong kitel nawnlo, a kam nam tuamtuam hong pau uh ciangin minam tuamtuam hong piang hi. Kampau le minam kikhen theilo ahihna kilang mahmah hi.  Vasate le ganhingte nangawn amau nam zui-in a ham uh mah bangin ei mihingte zong i nam zui-in pau hi hang.  Kampau in minam hong neisak hi.

Tulai takin leitungah pau nam 6,800 om hi, ci-in pau lam a kante in ciamteh uh hi.  Nipi nih simin paunam khat ta mang ahih manin tulai takin a mang dekdek zong om a, AD kum 2100 ciangin paunam 3,400 pan 6,120 bang mang thei ding hi, ci uh hi. Tua banga, paunam khat peuh aman’ theihna hih bangin ciamteh uh hi.

Galpi hangin bei thei hi.  Minam lian khat in a neuzaw khatpeuh tualthah gawp thei a, minam neute a pau uh tawh minam neute kam a, a zat ding khamcip thei-a, a kam uh mang suak thei hi.  Ahih kei leh minam neute in a lian zawte kam a zuihna lamin amau kam zong mansuah thei uh hi.

Hih a tunga thute i et ciangin Zokam zong limtak i kepcing keileh aman ding lauhuai mahmah hi.  Zomite mi lakah i om ciangin i pau, i ngeina le i minam mangngilh baih phadiak hi hang.  Ei le ei kineumuh gawpin midang peuh thupimuh zaw den le’ng kilawm hi.  Pasian nangawn kamdang tawh phatle’ng a lungkim zaw ding sa hile’ng kilawm hi hang.

Pilna, siamna, sum le paai zonga paikhia i hih manin i omna gam a, mite’ pau ahih leh i siam ding hanciam ding mah hi. A siam zozo a hampha hi lel hi.  Tua loin an kinelo mah ding hi.  Ahi zongin Zokam zong mangngilh sese kei le’ng deihhuai hi. Zokam mangngilh lianga, kamdang i pau ciangin a lauhuai mahmah na a nuai a tawh genteh hang.

Uiphuk khat tuivot kuang khat sung koihin akuang damdamin satsuahin sosakle’ng uiphuk in tuiso lam zong phawk loin tuiso tawh sikhawm hi, ci’n scientistte in gen uh hi.  Uiphuk i bat ding lauhuai mahmah hi.

Geneva Woomayoy ah Navarro pen Red Indian i cih, Americante’n Native Indian a cihte sung pan Comanche nam hi a, aneu lai-in banglo teng tawh Oklahoma khuapi-ah teeng kha hi.  Agol ciangin pilna hong sin toto-a Camanche kam zong damdamin hong mangngilh hi.  Asawt ciangin a pianpih kam hong thei nawn lo hi.  A pi, a pu, a nau, a meltheihte tawh hong kihothei nawn lo hi.  Comanche kampau mi 900 khawng bek nungta lai, cih a theih ciangin a kam uh zong aman ding lau-in Navarro in kam hong puahkik hi.

Cornish zong nidangin England gam Cornweel a cihna-ah kizang ngei a, AD kum 1777 khawng ciangin kizang nawn lo hihtuak hi.  Henery Jenner a cih pa khat in a kam uh mah itin paukik a, tu-in Cornish mite in a bangkua sung ciatah kamdang zang loin Cornish bek zangta uh hi.  A tu, a tate uh Cornish kam hong paukik uh hi.

Ei Zomite in zong i kam it a, i bangkua sung ciatah i zat tangtang ding thupi mahmah hi.  Banghang hiam cihleh Zomi i hihna Zokam in hong gen hi.  Zokam pau kei le’ng i minam zong mang ding hi. Zokam pen midangte tung pan i ngah hi peuhmah lo a, i nute tung pan i theih ngiat ahih manin ithuai mahmah hi.  Leitung bekah i zat ding hi leh “tua Zokam peuh”, ci thei ding hi hang.  Ahi zongin Vantung dongah Honpa i phat nading kam ahih manin ithuai seem hi.

Mangmuhna Lai Siangtho pen ni nunung ni cianga, a piang ding thute Topa Zeisu mahmah in nungzui John tungah a na hilh ngiat ahi hi (Rev 1:1).  Gam khempeuh minam khempeuh pan a, kikaikhawm simzawh loh zah donga, a tam mihonpi in Vantung tokhom le tuuno mai-ah dingin kam namcin tawh Pasian’ tuuno phat uh hi. (Rev 7:9) ci-in kigelh hi.  Tua minam khempeuh sungah Zomi zong kihel a, pau namcin sungah Zokam zong kihel hi. Zokam mahmah tawh Vantung Honpa phat ding hi hang.

America tung Zomi pawlkhat in tua bangin i pianpih kam ka itna uh tawh America pan hong khang ding i tu i tate in Zokam a mangngilh loh nadingin Zomi Baptist Church ah Zokam ngiat tawh Nipi simin Pasian ka na bia uh hi.  Zokam pen midangte tung pan i ngah hi peuhmah lo hi.  Kua mi ka hiam, cih i kam in hong theisak hi.  Ithuai mahmah hi.  Thupi mahmah hi.  Tuamah bangin Zolai zong thupi mahmah hi.  Ei Zomite banga, minam neute in i ngeina hoihte kam bek tawh i ciapteh ciangin i mansuah tam mahmah khinta hi.

Pasian’ Kammal Lai Siangtho nangawn amangthang lo dingin lai tawh na kiciamteh hi.  Lai Siangtho luite Hebrew tawh na kigelh masa a, 400 BC khawngin kiman khin hi.  250 BC khawng ciangin Greek tawh kitei a, Septuagint kici hi.  Daniel, Ezara le Jeremiah sung pan pawl khat zong Aramaic tawh na kitei hi.
  
Lai Siangtho Thak ahih leh Greek tawh kigelh a, AD 400 ciangin Jerome in Latin tawh na tei hi.  AD 1382 tak ciangin John Wycliff in English tawh na tei hi.  Tua-a kipanin kam tuamtuam tawh kitei a Wycliff Bible translators bang in leitung kam om khempeuh tawh teikhiat sawm uh hi.

Dr. Joseph Herbert Cope in zong Zolai hong bawlsak a, Zolai tawh Lai Siangtho le Pasian phatna labute i nei khinzo hi.

Ahih hangin Kawlgam kumpi in Zolai simbu ei mite sum bei-a bawl ding, a cih ciangin kibawl zolo-a khamtung sangte-ah Zolai kisin zo lo hi.  I tu i tate Kawlkam peuh pau mawlmawl khin.  Zolai khawng hong thei kei lailai leh i minam mangthang taktak ding ahih manin America, Florida State-a om Zomi Baptist Church in minam itna le Zolai itna tawh Zolai simbu committee bawlsa Zolai simbu kong khenkhia uh hi.  Tanlang bu 4000, Tankhat bu 4000, Tannih bu 4000, Tanthum bu 3000, Tanli bu 3000 kikhenkhia a, Kawlgam sum Ks. 1,592,500.00/- bei hi.  Hauhman neihman hi peuhmah loin khamtunga, i tu i ta laisinte in Zolai thei sa-a hong khan ding uh koikoi tung taleh Zokam, Zolai a mangngilh nawnloh ding uh i deih bulpi hi pen hi. Khamtung zong kipuak khin zo a, khamtung sang khempeuh sangnaupang khempeuh in a ngah ding deih hi hang.

Laibute mai-ah Thumasa ci-a kong gelh uh mah bangin kampau in minam keemcinga, lai in kampau ngeina le i tangthute keemcing hi.  Ei Zomite in i kampau i ngeina le i tangthute kam bek tawh a khang a khang i ciapteh ciangin a manpha tampi tak mansuah khinzo hi hang.  Tua hia i kam ciik, i ngeina le i tangthu hoih tampi tak laibu-a i neih ding deihhuai mahmah hi.

Zomite aw, Zomite mah Zokam i pau kei leh midangte Zokam hong pau lo ding uh hi.  Midangte neihloh ngeina hoih tampi zong nei hi hang.  Tua ngeina hoihte Zomite mah in i it kei leh midangte in hong itsak zenzen lo ding uh hi.  Hong kepcingsak zenzen lo ding uh hi.  Zolai zong Zomite mah in i puah kei leh midangte in hong puahsak zenzen lo ding uh hi.  Zomite mah in puah a, Pasian thu ahi zongin, leitung thu ahi zongin, i ngeina hoihte ahi zongin Zolai tawh gelh a, i hawmkhiat zawh ding hanciam ding kisam mahmah hi. Khamtungah i om zongin, Kawlgam ah i om zongin, gamdang mun tuamtuam i om zongin, i omna peuhah a tung a, kigen Geneva Woomayoy Navorro le Henry Jennerte bangin i kam, i ngeina, i lai le i minam i it ciat ding kong hanthawn nuam pen hi.  I innkuan sung ciat ah Zokam pauin i tu i tate Zolai zong hilhzawh nading hanciam lai ding hi hang.

Minam, kampau, ngeina a hoihte le Zolai itna lungsim i neih theih nading khat le khat kihanthawn in mailam ah i minam khantoh nading hanciam ciat ni.

A tunga ka gelh thute hoih a sa ahi zong, hoih a sa lo ahi zong, i om leh hih email enhang@beelsouth.net tawh hong kuppih le-uh cin nuam mahmah ding hi’ng.

Zomi, Zokam, Zomite ngeina le Zolai it a, a keemcing nuam, na sanggam uh, Eddie N. Hang.


Source :
ZOMI SIAMSIN MAGAZINE [ Vol 2, 2008 ]

Page 59-62.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KAMPAU, LAI, NGEINA LE MINAM. Agelh - Eddie N. Hang Description: Rating: 5 Reviewed By: Cinpu Zomi
Scroll to Top