728x90 AdSpace

Hot
Menu
Zon-ol na Donate

Latest News

KHANGNO LE ALAUHUAI GUIHTHEIH KHAMTHEIH. Agelh - Sia Pau Suan Kap

KHANGNO LE ALAUHUAI GUIHTHEIH KHAMTHEIH
Agelh - Sia Pau Suan Kap, Kansauzang
Civil Hospital, Tamu

Thangmual dungah ngeisok paakte apaak ziahziah laitak a etlawm pen hun hi a, ngeisok kung zong ateh dum kiuhkeuh lakah a paak san silhselhte i muh ciangin etlawm lua mahmahin i lungsim zong hong nosuaksak hi.  Singkung zong ateh selin adum kiuhkeuh laitak a etlawm penpen hun hi a, Singgah zong a mincil laitak a khumpen hun ahi hi. Gamsung zong tumtaite apaak laitak anamtui’ pen hun hi a, Zu lakah zong bangmah a kihel nailo zuning in a cilpen a limpen ahi hi.  Tuamah bangin mihing zong i khangno hun pen i thahatpen, i limcitpen, i etlawmpen i namtui pen hun ahi hi.  Tua i khangno hunin ahoih- ahoihlo kithei nuam, athak khat peuh kisilh kiteng kiciam kisin nuam mahmah hi.

Guihtheih khamtheih in mi ginalote asiasak apuksak thei khat ahi hi.  A palhkhia nuama ngum ngiu’ngeu paak bang ahi khangnote lakah guihtheih khamtheih hong kilui mawk pen i gam i minam adingin dahhuai mahmah hi.  Lim hoih mahmah khat a kisuaihna laidal kang tungah laitui vom akibuaksuah, bang tuak ding cih theih khollo a khuamial sunga khualzin tawh kibangin lipkhaphuai mahmah hi.  Atak takin khangnote in guihtheih khamtheihte kizo sakin khuamial sungah gamman mawk ding ahi kei hi.

Tuhunin khangnote in i gam i minam khantoh nadingin panmun hoihtak la-a sepkhiat ding ahi hi.  Buan lo tawh leisek kibawl theilo a, Khua-ul luang loin bangmah ma i tun’ kei ding hi.  Khut polloin sing i phukzo kei dinga, sisan luang loin galdonaah i gualzo ngeikei ding hi.

Mihing lungsim pen kiim-le-paam in hong zo thei a, kiim-le-paam zong khat le khat i kilawh thei hi.  Lawh sunga i koih khawm Apple pum khat sia leh adangte zong asiat theih mah bangin khangno ginalo tawmkhat hangin apil, ahau, athukhual, amuanhuai ding khangno tampi’n siatlawh thei hi.

Guihtheih khamtheih hangin khangnote asiat mang ding leitung gam khempeuh kilung himawh mahmah hi.  Tua hi a, leitung gambup kipawlna UNO in thusuah khat na gen a, tua in, “Problem of Drugs is Problem of People” “Guihtheih khamtheih buaina in mihingte’ buaina hi” cih ahi hi.  UNO in guihtheih khamtheih tawh kisai-in thubulphuh khat na pulakin leitung gam khempeuh na hanthawn leuleu uh hi.  Tua in “Drugs, Global Problem Requiring Global Responde”, “Guihtheih khamtheih hanga leitung buaina leitung bup in i do ding hi” cih ahi hi.  Tuhun ciangin Guihtheih khamtheih nam tuamtuamin kibawlin leitung mun khempeuh zel tamai hi.  Hong zongsang sak thei guihtheih khamtheihte anuai-a bangin kikhen thei hi.
(a) Khuak tha niam/nem sak namte (Depressant):  :Zavom zakang pan a kibawlte, gtn. Methadon, Pepthidin, Ihmutsuah zate (barbituates, Sedatives, Hynoptic, Valium, Dizepam)..
(b) Lungsim Loklawpte (Stimulants): :Cocain, Amphetamines, Methamphetamines.
(c) Mit haisak thei khialsakte (Hallucinogens):   :Peyote Cacuts, Psilocybin Mushrooms, LSD.
(d) Zakeu namte (Cannabis): Marijuana, Ganja, Hashis...  cih bang namte hi a, tawm leh lawpsakin tam leh hong hai-amsak hi.
(e) A khu’ namte (Volatile chemicals): :Thenner, Ether, Petroleum..
(f) Atui namte (liquor): :zu sungah hong zongsangsak thei Alcohol kihel a, Zu tuamtuam, Rum, Beer a tuamtaumte.
(g) Zanah namte (Tobacco):    :Zanah sungah hong zongsang sakthei ahi Nicotine dat kihel a, Zateppi, Cigaretee a tuamtaumte, Khaini ...
(h) Tuitawh pawi namte (beverage): :Cafee, Niangteh, atui a dawnding a kibawl namte sungah zong hong zongsang sakthei caffeine dat kihel hi.

A tunga i gen bangin guihtheih khamtheih pen a nam tuamtuam atui, avui, akhal, akhu-in kibawl hi.  A zatdan zong atep amuam, adawn, adik le asut cih bangin lampi tuamtuam tawnin kizang hi.  A tak takin pumpi adingin gu ahi kimlai khuaizu banga kigen mawka, sihtheihna ahih pen seltheih iptheih ahi kei hi.

Guihtheih khamtheih lakah akimu masa le alauhhuai pen in beng (Opium, number 4) ahi hi.  Amasapen in Europe gam nisuahna gam Mediterranean mun kim teng, Europe gam khanglam gam teng le Asia gam nitumna gamlam mun tengah kithei masa hi.  Kawlgamah zong Kungbaung dynesty hunlai pekin India gampan hong lut hi. Mangkangte uk sungin 1878 kuma India gama bawl uh Beng’ act Upadi pen, 1909 kumin Kawlgam ah kibawl hi.  Tua banah tua Upadi puahphatna le alauhhuai guihtheih khamtheihte upadi pen 1930 kumin kibawl hi.  Hong uk kumpite a hun tawh kizui-in upadi thakte zong bawlto zelzel uh hi.  Kawlgamah amasa in Shangam le Kachin gamah kiciing masa ahih manin Beng’ hanga siatna buainate zong amau na thuak masa uh hi.  Kumpi lam panin zong nasia takin akham uh hangin Singnuai mite hangin deihzahin khamzo khollo uh hi.

Khangno pawlkhat in guihtheih khamtheih zat pen mibatna khat hi ci-in, Pasal cihciang zatep tepthei ding, Zu dawnthei ding, guihtheih khamtheih zong suthei ding...  ci-in mi ginalote’ kampau peuh genin neithei uh hi.  A tak takin cile’ng Meimual pen, Khammual asa uh hi a, nak lauhuai mahmah hi.  Va-ak kimlai Utong a kineih liatluat pen muh thadahhuai-in zong huathuai mahmah hi.  Tua mah bangin i limcit, i melhoih thahat pen hun khangnolai a teeksuah mawk cih pen dahhuai mahmah hi.  Khangno pawlkhat kum 30 zong cing nailo pi-in teek mawkin khansih mawk uh hi.  A innkuanpih a minampihte kisum mahmah hi.  Zomi khangnote bel tua bang dingin i kiphal hetkei hi.

Guihtheih khamtheih zatkhakna a thu tuamtuam om hi.  Pawlkhatte’n thei nuam sin nuam pongin ahih uh pen a zongsang suak om hi.  Pawl khatte’n cigolh sagolh noptuamna, sungtholh khak nadingin zatuia azang zong om hi.  Lawmngaihte tawh lemtang lo, sumbawlna-ah asumh, a tuahsia pawlkhatte’n a heh a thangpaihnate uh a mangngilh pak nadingun ahih zong om hi. Pawlkhatte leuleu in nasep neilo lua-in hunawng’ ngahlua uh ahih manin cimthoihna-in ahih kha zong om hi.  Khuapi sunga khanno pawlkhatte in Sanglai lah zolo, matutna lah bangmah nei loin nu le pa le kiim-le-paam tawh alemtang mello uh ciangun lungsim ginalote in lamgei mite tawh kikhawlin zatep tep, zu dawn, zavom zakang tep, dik, kisunin damdamin khauhpai semsem uh hi.

Zatui tha tawh feeling angah laitakun mihau suakin huih lakah Taih (building) lam uh hi.  A lungkhamna teng uh bei-in angaihsut nop bangbang uh piang pahpah ding bang hi.  Khuak le lungsim azen nopna lamdang khat ngah uh hi.  A zatui tha teng abei teh alungkham, a haksatnate uh angei bang lel ahih manin amau zong a ngei bangmahun hong hihzel uh hi.  Tua bang danin hong tamvei luat ciangin khawlthei nawn loin hong zongsangta uh hi.  Tam kisam semsem uh ahih manin sum zong tam kisam semsemta uh hi.  Pasalte bang sum kicing cih om nawn loin neihsa teng abei teh inn sunga zuaktheih teng zuakin, inn sungah a om nawnloh teh midangte tungah guta zuaukhemin hong om uh hi.  Guihtheih khamtheih a kinakzatna khuapi khuaneuteah guta buluh tam phadiak hi.

Numei zatui zongsangte in pumpi kizuak (prostitute), vansai-ah na gusim cihbangin om thei uh hi.  Hih guihtheih khamtheihte tawh sumbawlte mi zatin om thei uh hi.  Sum tampipi ngah thei uh ahih manin guitheih khamtheih sila suak thei uh hi.  Zatui zat asawt ciangin annek tuidawn, nikten puansilh, pasal tawh omkhopnate damdamin kin nawnlo uh hi.  Tua bang danin ahun akumte hong sawt ciangun apumpi ci-le-sa in zo nawn loin natna ngahin si, Palikte’n manin Thong (jail) sungah khum’ cih bangin a lam tawpna uh hithei hi.

Leitung Galpi Nihna lai-in Kawl gamah zong guihtheih khamtheihte hong laang mahmah hi.  Bogyoke Aungsan in khangnote guihtheih khamtheih tawh asiatmang ding a patauh manin khangnote tungah a lunggulh kam khat gen hi.  Tua in “I gamah milian milui tamnawn lo hi. Khangthakte hun hong tung hita a, nidanga gamthu-uk mite khialh bangin kial nawn loin dan thak, lungsim thak tawh anuam mahmah gamthak khat nong bawl dinguh kong phawksak nuam hi” na ci ngetngut hi.

Guihtheih khamtheih zang dinga kipan khangnote khutzep a, etmawk ding ahi kei hi.  Nu le pa le biakna makaite mapang khawma i dal khop ding hi.  Tua bang siatna sungah abual loh nadingun khutlena ma i suatpih ding ahi hi.  Kumpite’n zong hih guihtheih khamtheih abei nadingin na tampi sem uh hi.  Aciaptehna (register) bawlin kem, a kep nading zato hon sak, a lauhuai a zia theihsakna thuhilhna, lim a lahna, kidemnate bawl, mi khempeuh muh dingin signboard te suang,..  cih bangin mipi tungah na tampi sem uh hi.

Kawlgamah natna suksia pen ahi , HIV/ AIDS, TB, Sin natnate (Hepatitis B, C) , Khangno natna (STD) te in guihtheih khamtheihte zatna pan kingah kilawh tampen hi.  Khangnote in athak khatpeuh mu-in zakha le-uh theinuam sinnuam pah uh hi.  Athak khempeuh sinding theihding athupit teisam hangin hih guihtheih khamtheihte-ah i kisinkhak hetloh ding kong hanthawn nuam hi.  Kam’ muanna tawh ling sikte hi kei ni.  Hong tuk ding cih thei gegu sa-in gul lawng ngamte hi kei ni.

Atatakin cile’ng guihtheih khamtheih i cih in singkung asihmai ding i deih ciangin abulah kal-in mei tawh i haltum bangin, i gam i minam mailamah a khantoh ding hong haza migilote’ nasep ahi hi.  Tuhun teh sumbawlna kivakna peuha neih khak hetloh ding kong thum nuam hi.  Tuhun teh na hoihlo sep pen akhanggui, tu le tate’n thuaklawh ci hi.  Tu le tate’ khang hi nawn loin ei muh tekteka agu akithuak pah ngekngek hun hita mai hi.  Lingkung pan theigah kilo ngei loin, Tahum kung pan mangbuh vui kila ngeilo hi, I suan bangbang singgah i lo ding a, i vawh bangbang khaici i at ding hi.

Guihtheih khamtheih hanga siatna pawlkhat en ni cile’ng mi cingtak zawh nawnlohna, akilawhthei natna lauhhauite ngah khak theihna, guta zuaukhemin gamtat siatna, tate tungah natna lawh sawnin mipoi khat hong pian theihna..  cihbanga alauhuai akhauh mahmah gukhauh tampi in nungzui thei lai hi.

I gam i minam’ neihsate deihgawh a hong susia nuam gamkekte i pu i pate’n nasia takin a nado khiatmang bang mahin, i gam i minam hong susia ding hih guihtheih khamtheihte i gam i tu i tate i khualna-in i do i dal, i suksiat mang ding ahi hi.  Hausa ulian, nu le pa, biakna maikaite le khangnote mahmah mapang khawmin i sepkhop leh kizo bek ding hi.  Tua ahih manin lung kituak ni.

Tua hi-a kong it khangthak momno lia le tangte aw, huih tamna mualsang pen, siattheihna gammang tulak, asaupen gimna gunpite khengin i biak Pasian’ deihna bangin gamta nungta-in gam le minam adingin apil, asiam athukhual khangthak momnote nong suah nading uh, i Zogam tunnu in hong lunggulh mahmah hi, ci-in kong hanthawn hi.

I biak Pasian in Zo Tunnu’ vontawi lia le tang khangthak momnote thupha hong pia ta hen. Amen.

Source :
ZOMI SIAMSIN MAGAZINE [ Vol 2, 2008 ]

Page 75 – 78 .

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KHANGNO LE ALAUHUAI GUIHTHEIH KHAMTHEIH. Agelh - Sia Pau Suan Kap Description: Rating: 5 Reviewed By: Cinpu Zomi
Scroll to Top