728x90 AdSpace

Hot
Menu
Zon-ol na Donate

Latest News

KHUA AA DING GIMNA LEH TAWLNA. (Suangpi Mualsuang Laibu)

(D) KHUA AA DING GIMNA LEH TAWLNA


Khua aa ding in Pu Kip Zel, si.
               Thuklai khua kamphen Ngo Khaw Thang in, “Keli mangpipa hong matsak, na thau uh lawng 14 teng kei man kong ngah sak kik ding hi; sum nguuk hong pia un” ci in, kamciam pia hi. Ahih hang in tua thau te ngah sak zo tuan lo a hih manin sum ki pia lo hi. Tua ciangin kamphen pa in, Pu Tawng Phut Sial la khat a khumna pan zawhthawh na tawh matsak hi. Tua ciangin tua sial man ding, Rs 80/in khuapih in sehsak a,taangpi in a lohsak ding in vaihawm uh hi.


             Tua sum a ngahna dingin Thangkai gamah Pu Kip Zel, Pu Tuang Ngul, Pu Awn Vungh, Pu Khan Eng, Pu Tuang Khup leh Pu Thang Phut te pawl pai-in, Tuzang khuai a aat uh hi. Keen ah khuai a at uh leh Pu Kip Zel, khuai in deh gawp a, keen pan a kia hi. Pu Kip Zel in tawmvei sung a husan theih lai in, “Ka nau te ka ta te aw, a tuahsia hi hang, vaidang hawm lo in hong ciah pih ta un” a cih khit phet in, a husan a bei hi.

              Pu Kip Zel luang pua in, khuai aat pawl khua ah ciah in, inn tun thau a lawn uh hi. Pu Kip Zel a kivui na dingin, a thau (Tumpang te) lawngkhat zuak in, Dimlo khua Kip Khup in, Rs.70/ in lei-a, tua pa tungpan in, Sezang Khai Kham in leisawn hi. Tua thaulawng man tawh sialpi kangkhat lei in, Haaipak-tawng a galtai bukpan, Pu Kip Zel ki vui hi. A nung ciangin, Pu Tawng Phut sialman ki loh tuan lo hi. Pu Tuang Ngul te Pu Kip Zel luang tawh ciah in, inn a tun ciangin, inn tun thau lawn uh hi ki ci hi. Tua hunin Suangpi khua thau teng kingah kik khin hih tuak hi.

            Pu Kip Zel khua a ding a sih huhau in, a zi (Pi Awn Vung) in, a nuai abangin la na phuak hi.
“ Tuai nih thum vailo kuan aw e, sang kop tawh mualsuak sa’ng e. Sang mual suah bang, lal mual suak bang phamsa zua min na lawhna aw, vonkop kawl-ciang tung a thangvan mau bang e”

Pu Kip Zel thaulawng zuak in, tua tawh amah leh amah in kaw-sah a ki san a thu tawh ki zui in, Pi Awn Vung in hi bang mah na ci lai hi.

“ Vangkhua an bang na it man-a, lang lam tui bang kang hi ve cia nua ciang al bang mang aw e. Seino na gual haizu zawnpih gel in cing e, mu bang na ngai ta nam aw.”
Suangpi khua a ding a si mipa(Mytyr) Pu KipZel sihna thu pen ngilh ngei lo ding hi. Hih lai a sim khangno te in, a phawk tawn tung ding uh hi.

Khua aa ding beina.
             Kamphen Pau Thang kawi na in, sum ki don na ah, a nuai a bang in ki khia hi.
(a)        Tawng Phut, Tuang Thual, Kip Zel, Tawng Nok, Tun Thual, Tawng Tun, Awn Thual, Tun Son te-in, inn khat Rs.15/ pai.
(b)        Suan Lam leh Phut Ngak te-in, Rs.10/ tuak khia uh hi.
(c)        Kop Ngulh leh Hong Tuang te ki liau sak lo hi.
 Ngun tang Rs.140/ tawh Pau Thang ki thaai hi.

                Betman Mangpa tungah khua ngetna thu hong panpih na ding deihna in, Lophei Khup Lian Kikawi hi. Tua huhau in, a nuai a bang in ki bei hi.
(a)        Taangpi min tawh vok tuk thum khat.
(b)        Taangpi min tawh zu beel nih.
(c)        Taangpi ki don taang khum (10).

       Pu Tawng Phut makaih na tawh khua teen kik theih nang a, hanciam Pute pawl, a nuai a bang hi.

              Tawng Phut, Tuang Thual, Kip Zel, Kop Ngulh, Tawng Tun, Tun Son, Tun Thual, Hong Tuang, Thang Phut, Suan Lam, Lam Thual, Awn Thual, Phut Ngak, Tawng Nok.

               Miau-uk suamna thu hangin a hi zongin, Khuaipi deek-ah mikang galkap Havidal khat a kithah lup  na thu hangin ahi zong in, Hawp-ah la-uk te khat ii khukkep a ki kap thapsak huhau in tavuan nei hi ci in, mikang kumpi in, ngaihsun a Miau-uk luangtuam ki liau sak hi. Tua liausum dingin innkhat ah Rs.3/ innmi (16) ai, Rs.48/ a pia hi.

                Thuklai kamphen Ngo Khaw Thang in, “ sum hong liau un” ci-a, Rs.80/ liau leu leu uh hi.

                Suangpi khua a nih vei na a kip nadingin, beina leh zatna a tuam tuam a kigawm in a nuai abang ahi hi.
(a)        Tawng Phut leh Tun Thual te’ luang tatna in,-----Rs.80/
(b)        Keli mangpipa liau daan. Rs.80/
(c)        Keli mangpipa daan (anih veina)------------Rs.50/
(d)        Ngo Khaw Thang hong nek . Rs.80/
(e)        Miau-uk luang tuamp.---------RS.48
(f)        Thau nungzuihna innkhat Rs.1/ ta in,-----Rs.16/
(g)        Kamphen Pau Thang kawina --------Rs.140/
(h)        Khup Lian kawina, Vok tuk thum khat zu bel nih taang khum sawm (a sumin Rs.10/ in ki seh hi.

     Dangka tangin a vekpi kigawm, Rs.504.


                 Leitangh tawh kisai ahi a, ki-uk na lam tawh ki sai ahi zongin beina dang a tuam tuam te pawl, leitang tangthu leh ki-uk na tangthu te ah ki at pha lai ding hi.

***************************************************
Suangpi Mualsuang Laibu in Zomite ading a manpha mahmah Mualsuang ahihna tawh kizui in Zomi eLibrary / Laibusaal in, hanciam in a-ki teikik/type kik ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KHUA AA DING GIMNA LEH TAWLNA. (Suangpi Mualsuang Laibu) Description: Rating: 5 Reviewed By: Cinpu Zomi
Scroll to Top