728x90 AdSpace

Hot
Menu
Zon-ol na Donate

Latest News

KHUAHUN PAIZIA TELTHEIH NADING. Agelh - Tg. Khup Kang Cinh

KHUAHUN PAIZIA TELTHEIH NADING
Agelh - Tg. Khup Kang Cinh.
Senior Observer.
Department of Meteorology and Hydrology,
Tedim. Ministry of Transport.

Thupatna
Leitungah minam tuamtuamte in a minam zui-in Kampau-Minlawhna atuam, a neih ciat mah bangun, Ei Khamtung Zomite in zong kampau kician i nei a “KHUAHUN” cih minlawhna zongh i nei hi.

“KHUAHUN” i cih pen a paizia nam nih-in kikhen thei hi.
(i)            Nisim a piang khuahun paiziate; (Gentehna-in: Khualumna, Khuavotna, Meii omzia, Huihnun’zia, Guahtui luanzia cih bangin)
(ii)           Nisim nisim a apiang thute kigawm Khuahun paiziate; (Gentehna-in: Khasim- Khacin’sim le Kumsim- Kumsim a kigawm Khuahun paizaite)


“KHUAHUN” cih kammal i neih mah bangin nisima khuahun pianziate theihtel nading Kaalkhat sung Nisimnate zong i nei a,
(i)            Thaangsa ni,
(ii)           Lakmaiciin ni,
(iii)          Ningthokah ni,
(iv)          Leipakpawi ni,
(v)           Zumsakeih ni,
(vi)          Sakawnsiam ni,
(vii)        Laai ni-te ahi hi.

Nisim a Khuahun paiziate kigawm kumkhat sung i teltheih nading Khasimnate in
(i)            Theinosih kha,
(ii)           Dota kha,
(iii)          Dopi kha,
(iv)          Ziing kha,
(v)           Gam kha,
(vi)          Taangvuih kha,
(vii)        Taangsih kha,
(viii)       Khuado kha,
(ix)          Tang kha,
(x)           Phal kha,
(xi)          Noo kha,
(xii)        Kaau kha-te ahi hi.

A tunga Nisimnate le Khasimnate i tel khit ciangin Kumkhat “KHUAHUN KHENNA” zong i nei hi.  Tuate in
(i)            Tuuk hun, (Taangsih kha pan Phal kha sung);
(ii)           Phalbi hun, (No kha pan Dota kha);
(iii)          Khuakhal hun, (Dopi kha pan Taangvuih kha) ahi hi.

Tuhun ciangin Ei- Khamtung gam pan kipan Leitung buppi-ah Khuahun paiziate a ngeina bang nawnlo a, Khuahun lam a kan Mipilte (Meteorologists) a patauh mahmah uh thulianpi ahi hi.  Hih thu tawh kipawlin, Khuahun lam a kan Mipilte bek hi loin, tangpi tangtate dong in a lunghih mawhhuai thu hong hita hi.

Tuk hun sung hita kei leh a hun zui-in guahtui hong pai a, ahi zongin tuk hun sungin guah tam zupen hi.  Nidang hunin Khuapi guah hong zuk ding ciang Khuaphia-in, Van-ging a, Huih nung hi, Thakhatthu-in guah zu ziahziah a, thakhatthu mahin theu pah hi.  Ni tang paha gampate keu pah ahih manin gam kihal thei pah hi.  Tua ahih manin Khangluite in “Khuapi guahzu-satang’ kihal zo” ci-in Paunak na nei uh hi.

Tuhun ciangin khuapi guahzu dingVan-ging tei napi ahun sialin ging lo; guahzu tei napi mal phiin lel; Meii peuh kaai nilhnelh lel hi.  Tuk hun sungin guahtuite a zukzah ding a hun manin zu nawnlo a, gam mite adingin supna tampi piang hi.  Guah hong zuk vanglak ciangin a theu thei nawnlo ding bangin ciin suak leuleu a, Khangluite in “Ni sagih guah” a cih bangin zutan suak hi.  Hih bangin hong zuk leuleu ciangin Zanggam lam-ah tui khang gawpin, sihna, supna-baina tampi piang hi.  Nung kum 2006 kum bang, guahtui tawm mahmah a “Guahsia, Gahawngzial, Innlaam delh” guahte zong hong pailo hi.

Tuk hun sungin guahtui paizaite i et ciangin guahtui man nawnlo ahih lam kimu thei hi (Table 1). Banghang hiam cihleh i gam i leitang tungah thukhualna i neihloh manin singkung tampi om nawnlo phial hi. Mual sangpipite-ah singkung lian zong om nawnlo a, singkung nam limlim pozo nawnlo hi.  Mualsangte-ah huihpi bek kidiik kha thei lai hi.

Tua banah Gam le lei itna lungsim kivom nawnlo a, thukhualna i neihloh manin gan’ neek ding deih man leh sa-nautaang khatpeuh mat nop manin gam kihal ziahziah a, singkung lopa a om sunsun kangtum hi. Kumsim, kumsimin gam kihal tawntung a, a khang a dawng nuam kisa a, a dum diidee - a eng kiuh-keuh Singnote, lopate kangtum zelzel hi.

Singkungte phukphukin, i gamte haltum tumin i om tak ciangin guahtui paizia man nawnlo hi. Guah zuk khit ciangin lolai en lehang hawklam tampi kimu hi.

Phalbi hun sung Van panin tangtel hong kia a, Lailen hong kua-in, Vuklam om hi. Ziingsang tungin Gunmeii- Sumpi kai hi. Vanlam en lehang, siang kiuhkeuh in, Aaksite tee zihziah hi.  Khangluite’ Tangthu gen: “Seguk, Zawlzawng, Unau belkang kituh, Khualei ui kai, Dahpa guaton” cihte kimu thei hi.  Khua hong dam mahmah ciangin vuk kia-in, tui zong khal zo hi.  Tun guahtui tawm hang hiding hiam?  Daitui/ daikhi zong kai nawnlo mawk hi.

Phalbi hun sungin nitang khauh lo, nisa khollo hi.  Sunin khuadamin, Puantungsilhpuanlum kisilh hamtang hi.  Khangluiite in “Phalbi ni” mah ci-in, ni tomin, nizang khauhlo hi.  Tuhun ciangin khualumna, khuavotnate a beisa khuahun bang nawnlo hi.  Nitak pan zan sung teng- zingsang tung’ teng bek khuadamin, sun hunin ni sa lela hi.  Sunin Puantungsilh-puanlum kisilh theilo hi.  “Nisuak tung hi” cinapi hang, ni hong sa pah lela hi.  Phalbi sung zanin Mei a om leh khualum a, sunin mei a om leh huih zong nung deuhin khuadam hi. Khangluite in “Meii semkhia nuam hi” a cih bangin huih limnun’ diak hi.  Phalbi hun sung sun tomin, zan sawt ahih manin, la-in zong na kiphuak hi.

Khuakhal hun sungin adiak diakin huih nung hat phadeuh hi. (Table 2).  La phuak siamte in zong la tawh na phuah liang hi. Sun le zan alum avot hoih bek hi.  Ni sau ahih manin nasep hun sawtin, kitawl diak hi.  Ahi zongin nasep khawl ciangin huihvot hong nung hiauhiau-in, i tawldam baih tuam hi.  Tuhun ciangin Khuakhal sung- sun hi taleh zan hi taleh, zanggam mah bangin nasem silbawl lopipi mahin, khua-ul tolh thei hi.  Guah a zuknop bang ciangin hong uuk-in lum heha hi.  I kiim i paam-a huihte zong lum heha hi.  Khangluite in “Tangham nisa” a cih pen Tangvuih kha sung hi a, nizang khauh-in ni sawt lai hi.  Tangham nisa pen thuak hak kisa hi.

Tua ahih manin Tuk hun, Phalbi hun, Khuakhal hun hi taleh khuahun paiziate man nawnlo a, mihing’ bawlin (man made) hi banga hong piang ahi hi.

Khangluite in mailamah a piang ding khuahun paiziate Ciaptehna - Thucinna a tuamtuam na nei uh hi.
(i)            Phulum a phul ciangin a niam len’ leh guahzu baih ding a, a sang len’ leh guahzu hak ding hi.
(ii)           Singkung i sat ciangin Singtui a kai leh guahzu baih ding a, singkeu sat banga ahul bekbak leh guahzu hak ding hi.
(iii)          Keutawlek a ham zawh sawtpi ciangin “Khia khia” a cih leh kum hoih ding a, a hamzawh a sawtlo a “Khia khia” a cih kei leh kum hoihlo ding hi.
(iv)          Guahzuk laitak Aak in guah a thuak leh guahciin ding hi.
(v)           Guahzuk laitak Phukkeu a lam leh guahciin ding hi.
(vi)          Khuamui a kai leh kidam mawh thei a, khuamuui pha lua kilipkhap hi
(vii)        Khuaphat laitak Meiisan (khua pangsan) hong suah leh guahzu baih ding hi.
(viii)       Guah zuzu kimlai Meiisan hong suah leh khuapha baih ding hi.
(ix)          Tuksung nidangte in thosi na lo napi in thosi hong lan’ leh guahzu baih ding hi.
(x)           I kiim i paam ah Ukeng hong ham leh guahzu baih ding hi.
(xi)          Haikung pan kipan Meitei cih bang singkung ciin namte a paak ciangin a bullam pan a paak a kipat leh Kumpal ding a, a dawn paak leh kumsang ding hi.
(xii)        Thete a khuan ciangin mualsang lamah a khuan leh kumsang ding a, a niam lamah a khuan leh kumpal ding hi. (I teena khua mun i saklam/ Khanglam cihna)
(xiii)       Vaksa zong mualsang lamah a khuan leh kumsang ding a, a niam lamah a khuan leh kumpal ding hi. (I tenna khuamun i sak le khang cihna)
(xiv)       Meitei gun le Ciau gunte huihpinung banga mau’ henhan, ahih kei leh a hawk banga a gin leh “Luangdok thei” kici hi.  Gundung gunvai-a a zin a vakte kidop ding hoih hi.
(xv)        Guahzu zo kimlai- nitum kilanga nitang akimuh leh “khuapha ding hi”.
(xvi)       Zan sung i mangin zukham i mangmat leh “guahzu thei ding hi”.

A tunga thute tung tawnin Tanglai i Pu i Pate in Khuahun paiziate a teltheih nadingun, a zu’ a va hamzia, Phulum lenzia, Khuamui kaizia, Singkungte paakzia, Thete khuanzia, Meisan (Khuapang san) suahzia, Thosi lanzia, Guntui le Ciautuite mau’ zia, Singtui kaizia, Ukeng hamzia, Aak guah thuakzia, Puakkeu lam zia, Van gin’ zia, Khuaphiatziate tawh hoih takin na cing, na ciamteh ngiat uh hi.

Hih a tunga Khuahun paiziate tung tawnin a beisa guahtui paiziate kitel muh thei hi.  Mai lamah guahtui hong koici pai ding cih zong, tampi tak hong mukhol sak hi.

Thukhupna
Mailam hunah i gam i leitang itin, i kepcing siam ding zong kisam hi.  Kua-kua hita lehang, singkungte i suanbeh zo kei zongin, mawkphuk loh ding kisam hi. Adiak diakin mualsangte-a om singkungte le a mundanga po singkung lianpipite ahih theih laiteng mawkphuk kei ni.  Tui laknaTuibulte ah guahtui a kemcing singkung nam 5 te-
(1) Hiangsing,
(2) Tehno sing,
(3) Khuangkhi sing,
(4) Pakngiam sing,
(5) Lingsii singkung namte suan ciat ni. Lotulsa a khote in lolai-ah hamte khol kawikawiin, haltum zaw loin, dum bawlin phum ciat ni.  Ahih theih laiteng lo zuanthak kei ni. Lo zuanthak loh phamawh ahih leh lothak i hal ding ciangin a kiim a paam gam a lawhloh nading hanciam ni.  Thukhualna om loin gan nek ding deihna le sa nautang khatpeuh mat nop manin, gam mawk hal nawn kei ni.  Khuapi sunga teng Van zuakte in Van tunna lainahte, laipante hoih tak kholin, haltum loin, leisungah hoih takin phum ciat ni.

I kiim i paam-a om huihte siangtho saklo ahih manin mihingte, ganhingte le singkung lopate ading lauhuaina tampi piang hi.  I tuinekte le guntui, luituite zong a siantho nading ngaihsuthuai mahmah hi. A kiim a paam ah ninthel nahthel, a kihhuai nate bua loin, dum sungah phumin, hih le’ng, hoih ding hi.  I tuizatte siangtho kei leh mihingte, ganhingte nuntakna tampi susia thei hi.

Tua hileh Khuahun paizia man ding a, huihte siangtho-in, i tuizatte zong siangtho ding a, i nuntak hun sung zong sau tuam ding ahih manin, kua mah ciat in a ngaihsut huai thulian ahih lam kong tangko hi.


Source :
ZOMI SIAMSIN MAGAZINE [ Vol 2, 2008 ]

Page 140 -145.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KHUAHUN PAIZIA TELTHEIH NADING. Agelh - Tg. Khup Kang Cinh Description: Rating: 5 Reviewed By: Cinpu Zomi
Scroll to Top