728x90 AdSpace

Hot
Menu
Zon-ol na Donate

Latest News

Mihing taktak leh a maban. Agelh - Dr. Do Sian Thang

Thu paipih:    Mihing taktak leh a maban
Agelh - Dr. Do Sian Thang

Khatna:
Pasian’ liatna leh mihing thupina

Na ngaihsut tham ding-in bang hilel a, na phawk tham ding-in mihing’ta bang hi lee ahi hiam? Ahi zong-in, vantung mi sang-in a neuzaw deuh bek-in na bawl a, minthan’na leh pahtawina nangmah in na guan hi. La 8.4,5

Tua ahih ciangin Pasian in ama’ lim bang-in mihing piangsakin, Pasian’ lim bang in amah a piangsak hi. Amah in pasal leh numei a piangsak hi. Pian 1.27

TOPA Pasian in leilak pan a leivui tawh mihing bawl a, a nak sung-ah nuntakna hu sang suk hi. Tua mi pen leitung nuntakna a nei mihing hongsuak pah hi. Pian 2.7


Pasian in mihing mawkmawk hilo-in mihing taktak ah ding-in hong piangsak hi; thamlo-in hong piangsak kik kik hi.

            I nuntakna-ah gamtat hoih a nei ding-in a hongbawl ihi hi. Ef 2.10
            …eite a khangcing suakin, Khrih’ cingtaakna ciang I banto ding hi. Ef 4.13

Mihing taktak ahi ding-in Zomite in thu-dapphah ih nei hi; tuate lak-ah nihte in: Tual thukham leh vaphaul lim ahihi.
1.    Tual that kei in.
2.    Na nu leh na pa zahtak in.
3.    Zuau thu gen kei in.
4.    Gu kei in.
5.    Mi’ zi mi’ ta tungah khial kei in.
6.    Mi’ neihsa tungah tatsia kei in.
7.    Mi’ neihsa duhgawh kei in.
8.    Pau pha kei in.

Zomi hihna, khami hihna leh thumanna; hih thumte kikhen loin tonkhawm hi. Mikhat in ama’ lawmpa;/vengpa’ tungah a thuman na in ama’ tungah a thumanna ahi masa hi. Ihnu ihpate in tual sungah guktatna theilo uh hi. Kumpi sangnaupang masate in tual sungah lai-etteh cihte theilo uh hi. Hih guktatna leh lai-ettehnate pen tuaksuak/innteek ahi kei hi; lengla ahih man-in, a ciahkik kulding hi. Tapidaw kimkhatte in a hawlkhiatding dawi pen guktatna leh lai-ettehnate hipelmawh ding hi. Thamlo-in pulepate in zudawn mawkmawk lo uhhi; a dawn lehlah thupi lapi lelkhawm uh hi: lei leh ha pokhawm a kipeh hun ciangin a kilemkik nading in zu kilupin dawnkhawm uh hi. Khangthakte in kito nading in dawnkhial uh hi; tua in tualsuak hilo hi; lengla ahih man-in ama’ innlam a zuatkik kulding hi. Zomi piangthak kimkhatte in ahawlkhiatding uh dawi pen zukhamna leh kitotna cihte hipel mawh ding hi.

Tuhun ciang in model kinakzat mahmah hi. Ei’n zong model khat, David zang leeng. David pen mihing taktak ahi hi. Mihing taktak ahih man-in a thanem zel hi. [ Bathsheba khialhpih]. Mihing taktak ahih man-in thahatna ngen nuam hi; [hong sil in]. Mihing taktak ahih man-in lungdam takin Topa’ na sem hi;[ La 100]. Mihing taktak ahih man in hihzo hi. [David in a tulsawm in that]. Mihing taktak ahih man-in zawhna bek hilo in lelhna zong thuak hi [ a tapa in lehpei hi]. Mihing taktak ahih man-in kiniam khiat hi;[ eite pen leivui ihihna a phawk hi]. Mihing taktak David in Pasian’ liatna leh mihing thupina a sinden hi. A sindenna hangin: Pasian’ thu pomzia lui a thak tawh a laihngam hi [ 1 San 21.1-6]; sihna pomzia lui zong a lumletngam hi [2 Sam 12]; thuneihna’ laigil zong a kalhkhiatsak hi [2 Sam 23.13-17]. David in mihing taktak hihna bulpi na len kha hi. Tua in mihing pen leivui ahih lelna, Pian 2.7; tua mihing pen Pasian in amuan mahmahna thu, Pian 2.15 ahi hi.

Ngaihsut ding in:
1.    Mihing mawkmawk’ pianzia kimkhatte gen/gelh khia dih ni.
2.    Vaphual – ciamtehna tawh mihing taktak a kisuak thei ding hiam?
3. Singlamteh ciamtehna tawh a kizom theiding hiam?

Mihing taktak in Pasian’ liatna tawnin ama’ thupina a theician hi. Tua bangin mihing taktak in ama’ mabante a zom toto ding hi. Ama’ mabante namngah suah in isin ding hi. Tuate in: khantohna, pilsinna, cidamna, kimlepam kepna leh kizopna, cihte ahi hi.

            Mk 16.7 Note tung ah hong gensa bangin Galilee gam amaute’ mai-ah pai hi; tua lai ah amah na muding uh hi ……..

Nihna:
Khantohna
Mihing in akikhen theilo, a kibanglo namthum kigawm hi: tuate in, kha, lungsim, pumpi, ahi hi. Mihing taktak in kha, lungsim, pumpi, kalkim tak in a khangto ding hi. Khatvei lai-in singkung namli a om hi. Thkn 9.8-13 sim in. Olive kung, biakna-tua bek ci hi; kha-mi lua hi. Theikung dangka bek ci hi; haunuam lua hi. Lengkung, nopna bek ci hi; nam kinken nuam hi. Thangling kung, kineih-in zuau-phuak hi; hitheilo pip, hitheimah ing ci hi. A masa thumte in hithei gige, hitheilo ci uh hi. A vekin khangtolo dinmun ahi hi. Tua hi-a khantohna ding-in dinmun kitheih masak kul hi. Tua bang a dinmun kitheih masak na pen paulam pan-in hong pailo-in sunglam pan-in suakkhia zaw hi. Khantoh nading-in mihing taktak hihding kisam hi:
Nopsakna a hong pia Pasian in na khempeuh ah siangthona leh kicin’na hong peahen la, na kha uh,na nuntakna uh, leh na pumpi uh hoihtak in hong kemhen la, I Topa Jesuh Khrith hongpai ciangin mawhna kaht zong anei hetlo ding in hong bawl ta hen. 1 The 5.23
Na Topa Pasian uh, na lungsim khempeuh, na nuntakna khempeuh, na pilna khempeuh, leh na thahatna khempeuh uh tawh na it un. Mk 12.30

Eite’ khantoh nasepna ah: sumzuak, sumzonna, mawtaw nasepna lam leh lokhawhna gan-khawina, cihte ihsin ding hi.

Eimau leh Ih mipih ih sapihte hong sialnek,zuautana leh duhhawpna tawh sumzuak sumzonnate ih Pasian tading hi; eimau leh ih mipih ih sapihte hong tawisangthei citna leh thumanna tawh sumzuak, sumzonna lam ih manawh tading hi.

Sumzuakna leh sum zonna lam :
A bulpi inah : a-van leh a-man, a-maan ding ahi hi. Hih san-ah kihuhtuah, phatuam – khawm, cihnopna ahi hi. Tua’h a ki-nga zuakna leh zonna in mimal pan-in milom khantohna lam ah hong mualsuahpih ding hi. Lai Siangtho sinna azo ding khat in sumbuk vanzuak mah sepsawm hi. Asin maa sing in asin zawh-a sumbuk nasepna in muibun zaw ding hi: vante siangtho ding hi; tehnate zong man zaw ding a vanman zong kituak zaw ding hi. Gentehna Credit Union, Credit Cooperative cihte. Tapidaw sumbuk sumzuak sumzong khempeuh tua dan-in hiding hi; banghang hiam cihleh kha thu in tua sumzuak sumzon nasepnate sung ah gamtang in a om khinzo hi.

Mawtaw nasepna lawm:
Hunman henla, zatep ken, khaini muamken, ci-a alaisuan bang in kizui pahleh hoih hi. Banghang hiam cihle kha thu in tua mawtaw nasepna sung ah gamtang in aom khinzo hi. ZTC ah ka om hun lai-in mipi-mataw kizui zawzel hi; thu ngen in hong kisawl zel hi. A ki puahpuah mawtaw te in apuakzah dingval pua aa mihing le van thuap 3/4 bang hazel hi. Thu nget keikai mah ahi hi; Pasian in hong ngak ngeungau himai! A taktak in cileng, sumzuak sumzon na ah meetna le supna atonkhawm ding hizaw hi. Thna 11.1,2; Mat 6.21,33

Lokhawhna lam
Ihmual ihguam kolhsak keusak in kialgim anamsak kumsim lothaklak hunlui lokhawh dan ipaisan tading hi; Zogam akeusak hunlui lokhawhdan nusia in Zogam ahingsak thei hunthak lokhawhdan, SALT I Sloping Agricultural Land Technology ima nawh tading hi.

Kumsim lothak lak lokhawhdan izat man-in I ngaihsut dan I thukaihdan mahmah kipthei lo in tai kawikawi-in vakvai-in aom hi zungthuk kha theilo hi. Hihthu telcian lo hihang; telcian lopi in tampi hilhnuam hihang. Jesuh inbel: vantung ki-uk na pen lolai-ah a kisel sum tawh kibang hi,ci hi. Mat 13.44 sin in, sangpang Johnson kidong ngei hi: Topa aw, Zogam ah Zomite cikciang in annkhing khamthei ding uh ahi uh hiam? Johnson in dawngkik hi: Zogam-ah Zomi BA te in lokho aa aom hunciang in annkhing kham in na om ding uh hi.

Gankhawi nalam
Ihhuan sung ihlo sung aa annkung singkung hong suksiat sak gankhah zau hunlui gankhawi dan ipai san tading hi; ihhuan le ihlo ann hong nektum sak hunlui gan khawidan nusia in ann khing hong khamsak zaw ding hunthak gankhawi dan SALT II, Simple Agro-livestock Technology imanawh tading hi.

Lokhawh gankhawi nasepna thu ah GRET makai nu Ms Murielle Morison in lamdang asak mahmah thukhat om hi: Zomite in atai theilo ding ahuan alo uh khih in, ataithei ding agan te uh khihlo uhhi.

Ngaihsut dingin:
1.    Sumzuak sumzon nasepna leh lokhawh gankhawi nasepnate ah kha thu gamtang in a omzo hi, ci’n na sang thei/kei hiam? Bang hang hiam?
2.    Khantoh nading in van [kha] thu mah hiphot hi, naci hiam? Lei thu mah zong kul hi, naci hiam? Banghang hiam?

Thumna
Pilsinna lam
Mipil Solomon in kham sangin pilna hoihzaw a, ngun sang in thutheihna deihhuai zaw hi, ci hi. Pau 16.16. Pilsinna in nopsakna leh diktatna tawh mite a omkhawmtheih nading a tum hi. Khialhna peel in hoihna pom hi. Mite’ hihzawhna  akal hi. Telsiam sakin khensiam sak hi.

Zomite in telkhial ngei hihang; 1 Kor 1.27 sim leeng.

Ahi zongin Pasian in mipilte a maizumsak nading-in mihaite hong teel a, mi thahatte a maizumsak nading-in mi thanemte a hong teel hi.

Tua’ thu laigil in Grik mite’ pilna leh Jew mite’ hanta, leh Khrih leh ama’ singlamteh thu ahi hi. Tua thu laigil sang-in laimal leh kammal ih tekkhial kha hi. Tua banga teelkhialhna hang in zuau-in, gu-in, ki-om a cihmawh vai-in a piang bangbang phamawhsa lo-in sem-in bawl-in ki-om hi.

Eden huan-ah nuntakna singkung bek hilo’n a pha leh a sia theihna singkung zong a po hi. Pian 2.9. Nuntakna a nei khempeuhte pen mipa’ cih bangbang a min hi pahpah hi; 2.19,20. Tu hun: Eden khit hun  Post Eden ahih man-in min phuah hun hinon loin min theih hun a hita hi. Solomon’ mintheihdan nasia-in lamdang hiven!

Amah in Lebanon a om taamtak a kipan phungmai a po puknahte dong in singkung thu a gen hi. Amah in khelli nei ganhingte, vasate, a bokvak ganhingte leh ngasate’ thu a gen hi; 1 Kum 4.33

Sin lopi-a hilhhilh te pen khawlphot in sin-in hilh leng, eimah leh ihmi ihsate damtuam zaw ding hi. Banghanghiam cihleh pilsinna-te ah Topa kha in nasem-in a om khinzo hi.

Khangno makai khat in: Zomite leitung pilna kisam zawmaw, biakna pilna? Ci’n hongdong ngei hi. Biakna pialna tungah aki nga leitung pilna kisam mahmah hihang, kaci hi. Kha lam-ah ihsuan ihmuan Paul in kha thu leh pilna siamna thu, ki-unausak hi. Rom 12.1, spiritual= reasonable. Lungap laitak-a biakpiakna sang in lungven laitak-a biakpiakna mah hoih zaw hi. Give of your best to the master, cin la isa ve; 1 Tim 4.12 sim in.

Pilna namnih hilo in khat bek ahi hi. Thu ummi tading in Lai Siangtho sang gamtatzia leh leitung kumpi sang gamtat zia,ci’n gamtatzia nam nih a kikhen kei hi.

Topa zahtakna in pilna kipatna hi a, Pau 1.7a. Pilna phel nih ihsuah khialkhak pen pumkhat pumkhat suaksak kik le hang, tua pilna in siamna suakin tua siamna in eimah leh ihkim ihpam khantohpih theiding hi. Sumlepai zon ma-in pilna zong masa ni.

Hauhna pen pilna in makaih henla, pilna pen Pasian zahtakna ah kibulh ta hen.
C Thang Za Tuan in hih bang-in suahkhia hi:
            Zanni-in neihlelam kithupisak in tuni-in pilna siamna kideihzaw;
            Zanni-in kimakaihna kithupisak in tuni-in kipattahna kideih zaw;
            Zanni-in a tam theithei kithupisakin tuni-in a hoihtheithei kideihzaw;
Zanni-in makaite zahtak ding kithupisak-in tuni-in a zahtakhuai, a muanhuaihih ciatding kideihzaw.

Pilsinna a tha neem-lai aa leh a lauhuai mahmah thute main gat hihang; tu in khantohna lam [project] tuamtuam laang mahmah hi. Sin masa lo-in ahkl thu tawh lo-in:

Pawlpi makai nasep pen maizum huai hi; sangsia nasep zong hehpih huai hi; sumbawl sumzuak zong zong lauhuai hi; project nasep zong AIDS natna ahi hi.

Thu tawh a semte pen midangte’ phattuamna hiding-a  thulo tawh a semte pen amaute’ phattuamna ek mah hiding hi. Mk 10.45 sim lecin.

            Ihtu ihtate’ nuntak lamtam kituahna-ah lamdawt a tawnsak lai-etteh-a lai-onna nate ihpaisan tading hi; ihtu ihtate lamkabom panh lamman atawnsak tunglam pilna leh leilam siamna a pia thei pilsinna lammah ihmanawh tading hi.

Ngaihsut dingin:
1.    Pilsinna thu ah biakna lam, leitung lam, koi zaw in, Zogam Zomite hong damask baihzaw ding hiam? Bang hang hiam?
2.    Eden hun, minphuah hun; Eden-khit hun, mintheih hun; cihthu leh tuhun Zogam Zomite’ min phuahna leh mintheihna-te bang ci’n na mu hiam?
Phawk: In Man We Trust A kidahluah Lai Singtho-upna phel-lang-khat!

Lina
Cidamna Lam
Zomite’ kiangah lungdamna thu hong hilh masa sangmangte lakah khat East pen Zato mangpa ahi hi. Ama’ ciamthena diary sungah hihthu aom hi: tu ni Pasian thu kahilh kawm in cina vekpi 150 ka bawlhi; gim taktak ing. Tua kawmkal ah khuami te in pawi bawlin dawn in lamin om uhhi;tua danin dawndawn mawkle uh zu in nelum khin taktak ding hi: Burma Manuscript, 09 03 1910, Mualbeem. Tua zawh kum 40 [1952] ciang in EE Sowards in Zomite kipumkhat nading aa hong geelsak thu thum im aa khat in cidamna lamsang mah a hipah hi. A cil-in kha thu mahmah in pumpi damna ding in nasem-in gamtang khinzo hi, cih thu ih phawk ding hi.

Cidam nading in kidal kholhna mah thupi pen hi. Zomite in zunbuk, ekbuk limtakin bawl lehang kicidam zaw ding hi. Cidam nading-in huangsung huangpua innsung innpua siangtho sak-in pumpi tung nate zong siangtho sakding kisam hi. Cidam nading-in Zomite in ih thupomzia mahmah ih laihkul ihkhelkul ding hi. Eite in ta pasal deihzawkna nei in ta numeite pen pilna sang kahsak sawmlo hihang. Thamlo in numeite pen nausuak set in zangin nau-inn awng sak khol lo hihang. Pilna theihna omkhollo ahih man-in naukepdan siamlo hihang. An nek tuidawn mahmah zong vitamin kicing khollo ahih man-in natna dalnang haksa hi. Tua ahih man-in numeite lapsang kul hi: tua hileh pillah man a natna, siamlah man a natna, sum deihluat man a natnate ihdal zozaw ding hi.

Cidam nading hong nawng kaisak khat pen ta tampi neihna ahi hi. A tawm pen-in tate khatlehkhat kum nih pan-in kum li kihal leh hoih hi. Zomite in cina gimte hopih nuamse in umcihgawp thei hihang. Hih in pil-loh natna nam khat ahi hi. Eite in hong makaih-a hong ompih ding tuaksuak zato mangpite ih kisam hi. Cidam nading in misi kepdan zong ihsin kil laiding hi. Mihing taktak in misi a melhoih lai mah-in a tuhpah nuam hi. Cope tonu in: Cope topa abei khit a melsia ka muh sang in a cidam lai-a a melhoih pen mah ka mitkha ah luaisak den nuamzaw ing, a ci hi.

Ke’n zong hih bangin na ci ing; ka sih ciang in zan khat tungsiah hong kitutpih loding hi; sa zong kigo loding aa han ohgu kibawl loding hi.

1. Ngasa thum vei, be-ik nisim in
2. Sapit tui,nga vei
3. Kalape, ne nam nitak sim in
4. Aktui tang nga ciang 
5. Kapi sangin niangtui zatzawk nading in
6. Niangphan, nisim in; annnek zawh nai khat ciang in
7. Singgah tuamtuam, mehteh mehgah tuamtuam zatden nadingin
8. Sathau khiam ding
9. Zu, za, kunza, khaini, tuibuk, raja, kunpaung, cihte zang loding
10. Gatui, singgah tui cihte dawn zel ding hi.

Hihte: Zogam-ah a piang vive hi-a sepkhiat ding bek kisam hi.
Tua gun pang tuak ah nuntakna singkung po a, kha sim in gah ahih man-in kumkhat sung in sawmlenih vei a gah hi. A tehte zong natna damna ding zatui in kizang hi. Mang 22.2

Innkuan sung minam sung ah kha leh pumpi khenna, kha sim in kha bekbek, pumpi maimai; tua bang a theihloh natna te ih nungngat tading hi. Innkuan sung minam sung ah kha nuntakna leh pumpi nuntakna a nih in ton khawm; van malep innkuan nuam; tua dan-a theihcian damna lammah ih maingat tading hi.


 Ngaihsut ding in:
1.    Mihing taktak hihna [thumpomzia] in bangci bang in cidam zawkna piangsak thei ding hiam?
2.    Cidam zawkna ding in bangci dan-in a cidam an le tui organic food ih ngah thei ding hiam?

Phawk: Nutrient Cycle Suah-Zang-Sia Peivial

Ngana :
Kimlepam kepna
Kimlepam a kemding in Lai Siangtho in honghilh hi: Pian 2.15 Kimlepam kho-in a kem ding in Topa Pasian in hongsawl hi; ut le utlo thu ahi kei hi. Khristian kimkhatte in kha khanlawhna thu ah Adam hangin mimawh hihang, ci’n kinak hilh mahmah uh hi. Tua pen tunsa in ki kemden hi; kihongkhia khalo ahih man-in, misiangtho tampite a-nin kimlepam sung ah ki gamtang den hi. Mi Siangtho kimkhatte’ tatna hangin kimlepam nin in sia hi. Mithak ahkl mihing taktak in kimlepam a thaksak ding hiven!

NB ; Heb. Ruach―sprit―wind
            Van lam-et na lei lainat-na ahi hi.
            Na sanglen sawm leh saupi taiphot in.

Khapi tung pan-in ih tenna leitung a kimuh teltheih ciang in ih leitung in neucik hi-a dopkul hi ci’n ki phawkthak hi. [ apollp mission to the moon 1969 July 20 ]

            Meikhu khansakna sanga lauhuai zaw mawhna om nawn ding hiam?
            Meikhu kiamsakna sang a manpha zaw om nawn ding hiam?

UN-1972-WED a kici kimlepam ni kiphuankhia hi. Thu paipih motto tunai- a kimkhatte:
            Meikhu kiamnang tum dih                                           2008
            Gammang tulak: honghuh hongkem kimlepam         2011
            Kimlepam damask khantohna                                                2012
            Ngaihsun―ne khawm―khol in                                              2013
Sangmang Cope in hong bawlsak laisimbu te lak ah thulu khat a om hi:

Lokhawhna in leitung nasepna ka lianbel hi. SALT I,II,III
Mawhna namthumna leh gupna namthumna:
Ihtui kangsakin ihgam kei sak aa, khuahun zong asiasak den sing motphukna le gammot hal nate ipai san tading hi. Kial gim anamsak sing motphukna le gam mothal  nate nusia in Pasian khutma a langsak ding hunthak kimlepam kepzia SALT III, Sustainable Agroforest Land Technology ima nawh tading hi,

Kimlepam hoih eimau’ tuam : tawtawng tanpho doh ahkyu [ laisuan te zong manpha hi]
            Gamkeu, leikolh, lo ante tolh;
            Singlo’n leitang, hawkluang pahlian;
            Singkung nim leh, khuahun zong lem;
            Gamhing leinem, gam lei etlawm;
            Mualle guam hing,ciktui phul tuam;
            Sum ngo sum san, tulak pan piang;
            Gamlei et-lawm, ganhing kilawm;
            Gamsa vasa, tulak nuamsa;
            Sing nim dildial, tawldam lungnuam!

Kum 100 cin Jubilee thuciam nambat kua-na: ZOLUS 14/2010 Zomite leh I maban

Pasian’ hongpiak Zogam nuampi mei halna leh man nei lo aa singphuk na tawh siatsuah lo in singkung lopaa, nuntakna nei ginhing teleh huih le tui te ciing in, kem in, puah ning, zuun ning, ci-in hihlai mun ah kaki ciam hi.

Tulak eka khat, nikhat, meikhu 2000 cft huupin, huihsiang 1500 cft paai hi. Mi 1, kha 1 : meikhu huup-ding huihsiang pia-ding, singkung gol 4 kisam hi. Sapphulip kikap lum zel aa miksi le leikha tamta hi. Vasa tui-hun le singkung-ci kiat hun in gam hal mawhna kibawl nuam diak hi. Tuate in thei gah, hai gah tawmsak hi; lo-an vasa an asuak sak hi.

Pasian in leitung mimal kim aa ding hong koihsak nisa dal-phekhual ozone layer: khangto- sa gamte’ setzung khua le khangto-sa gamte’ gamhal, lohal khu in paasak, vangsak hi. Tua man-in iteenna leitung lum semsem in khua hun kikhel siat hi: global warming & cilimate change! Kimlepam a ding kisam meikhu 0.035 % hibek-a tu in 0.055% phato ta hi; hihdan hileh 2030 kum ciang in 0.063% tungto thei ding hi.

Side A pan in Side B lam ah!
Pasian thupomzia I et phat kulta hi: tatkhiatna thu redemption ihilh isin mahbang in piansak na thu creation zong ihilh isin mahmah kulding hi. Tua pen side A pan side B ah! kaci hi. Mithak in leitang thaksak hi. Leitang le minam kikhen theilo hi. Pasian’ minam le ama’ kimlepam tonkhawm den hi.

Nang pen aki nusia azubah hong kici nawnlo ding aa, na leitang pen gamkhing shamamah kici nawnlo ding hi. Nang pen ama tung ah na lungkimna om Hephzibah hong kici ding aa, na leitang pen a Kitenpih Beulah kici ding hi. Banghang hiam cihle nang tung ah Topa lungkim a, na leitang pen a kitenpih zi tawh kibang ding hi. Isa 62.4

Ngaihsut ding in:
1.       Zogam kial gim nam! lo-no lam ah zuanleng baihlam zawlo ding hiam? Banghang hiam?
2.       Mithak in kimlepam thaksak theiding in na ngaihsun hiam? Banghang hiam?

Gukna
Kizopna lam
Kizopna lam: leilam ahi-a vanlam ahi zongin khang- manlang hi. Kam tawh laitawh limtawh set-tawh huihsung ah cihbang in kizopna aom hi. Apoi mawh khat omhi kamtawh kizophun lai-in vaphual lim ahi ki lainatna cikzaw aa, huihtawn aa kizophun ciang in tua kikhualna dau-zaw mawkhi. Banghang hiding hiam?

            Speed thrills, but kills!
            Manlan na in lawpna hi-a, sihtheihna zong ahi hi.
We have been trained tobe successful [efficient]; but we have not been educated to care and love [ effective]
Ihsiamna zah in ki hoihzo nailo hi; cihding dan ahi hi.

Nau ngek na sil ciangin nau silna tuibek paaikhia in; nau ngektawh paaikhawm ke’n kici veh aw. Tau bang ding in kizopna lem nasepna peuh ah kha thu in gamtang in a omzo hi.

A sung apua kizopna hong nawngkai sak nekngian siamna nam pawl ihnung ngat tading hi. Asung apua kizopna hong muibun sak hoihna ciimna nampawl I maingat zaw ding hi.

Zomite zong kizopna lamsang ah ngongtat theizel uhhi. Maitang kituah lah ki ngamlo; lai tawh, huihsung tawn in kitawng thapai thei zel uhhi. Manlan na ahi tua siamna pen hoihna in azuih kei le, lahuai hi; hunthak tualthat na khat hithei kha ding hi.

Lai Siangtho in ahihleh limtak in hong hilh khinzo hi: tua in vanthak le leithak thu ahi hi.

Mothak khat a pasal tawh aki tuahding in aki zeem bang in vantung Pasian kiang pan khuapi Siangtho ahi Jerusalem khua thak ahong paisuk kamu hi. Mang 20.2
            Tua Thu mihing hongsuak in kote lakah hong om aa, Joh 1.14
… a dawn in vantung aban ding tausang khat lam in, eite’ minthan’ na ding khat bawl ni. Pian 11.4b

Zomite’ van-lam etna in lei-lainatna kiamsak ahi tam? Lai Siangtho’ hihcian bang in hileh Tapidaw kimkhat te in amau’ lam et Jerusalem khuathak tawh kipelh thei kha ding uh hi; amau’ Topa tawh zong kituak kha-lo thei laiding uh hi.

Khanglui te-in van leh van ki nam! Lei ka nu van ka pa, naci uh hi. Khuaknei-set in vantawn in nasem hileh meikhu kiam in kimlepam’ mel hoih mahmah ding hi. [mother nature should love cyberspace: working, reading and shopping online will save fuel and preserve forest.]

Zogam sung ah zangtam tawmlua naci kha ding hi; leitung gam tuamtuam aa piangte Zogam-ah kituak kim khin hi. Tua hi-a Zomite in: leitungbup ahuam ding zah in ngaihsun hang-a ei mau’ tualsung a gamtang-siam leeng! [to think globally, to act locally]

Ngaihsut ding in
1.    Kizopna lam nasepna ah siamna leh hoihna lutaw lukawng cihthu bangci in kizom in aom thei ding hiam?
2.    Kizopna lam leh kimlepam lai natna; hihte bangci in aton khawm thei ding hiam?

Sagihna
Mahialna
Mihing taktak le ama ban, atom in isin khin zo hi. Amah in vanmi hi-in lei-mi zong lah ahi hi; amah in van-lam en in lei- lainat hi. Amah in khua-mi hi-si, sa-mi zong hi-si hi. Tau hi-a kha le sa, van le lei khenlo in gawmkhawm hi. Amah in mihing taktak ahih man-in ama’ kimlepam akhantoh pih nuam hi. Amipih te tawh aki lamdang nate sang in, aki bat nate amasa sak zaw hi. Kawl te-in sa vut ne ye acih uh: ann nek tuidawn puansilh nintak omna khawlna cihte ah mihing taktak in sem in bawl in a om hi. Khat lam-in: amah in hih leitung mahmah ah nuntakna cingtaak tawn in ama’ lam-et ahi vantung nuntakna atelcian nuam hi. Ama’ nuntak-tawm theihna hang in midang te zong ahuh zawh sawm hi. Mihing taktak in singlamteh thu laigil leh tualthukham le vaphual’ ciamtehna te aki-unau sak thei hi. Tua hi-a atul theilo sunglam hoihna mah! Aci-nuam zaw hi. Amah in mihing taktak ahih na hang-in khawlna fullstop cihlam sang in zomlai comma cihlam alunglut theizaw hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Mihing taktak leh a maban. Agelh - Dr. Do Sian Thang Description: Rating: 5 Reviewed By: Cinpu Zomi
Scroll to Top