728x90 AdSpace

Hot
Menu
Zon-ol na Donate

Latest News

MIKANG GAAL LEH SUANGPI KHUA. (Suangpi Mualsuang Laibu).

(B) MIKANG GAAL LEH SUANGPI KHUA
Suangpi ah, Sihzang te hong peem.

              Mikang gaalkap mang, General Faunce leh Major Raikes te ma-kai in, mikang gaalte 1889 kum Jannuary ni(23) ni in, Thangmual hong tung hi. Tua kum February kha ni 4 ni in, Khuasak khua hong sim masa hi. Tua a kipan in, Sihzang kual khuate a ban a ban in, nawkkhat suah in hong sim hi. Tua ahih manin, Sihzang te inn 30 in, a ‘tute’ (sila) hong beel hi. Biakna ki si lo ci in, Ngaal lo tengah kiteng sak a, kum 2 sung bang teng uh hi. Tua bang a, hong beel pawl pan, Lophei khua Luah Hang, Khan Hang, Dongh Hang, Doo Vum, Mang vum thah pan; Do Mang, Mang Tawng, Za Khup, Hau Suang thah: Awn Ngul, Phut Son, Tuang Suak, Suak Lam, Son Suan, Thuam Lam thah; Song Awn, Sawm Khup, Kip Sel, Zong Kim, Suak Hang, Khuasak khua pan, Gaalphuakpa Khup Pau  (a tapa Khai Kam tawh) Kang Son, Thang Hau, Kaam Sing; Thuklai khua pan Sumniang te Pau Thang, Hum Lian, Tuang Kam, Hang Tuang, Awn Lian, Khup Khai, Lam Hau, te a hi uh hi.


               Hi bang a hongpeemte lakpan, Lopheimi te Man Suang in hi bang in la na Phuak hi.
“ Thangtui khua ah mawngbang kapem thai le von kiak na hi e, vaivut leh pillei lak pan e,cialdawh sunnau bang kah’ng e”

Sihzang te Khuathang khua ah, hong pemp na thu hi bang in na gen hi.
“ Thangtui ka vangkhua aw, zangsih lim belh khua aw e. Zangsih limbelh khua aw e, zuateng a thanna hi e.

Mikang gaal tawh ki kap na:
              Mikang te hong khan hunin, Sihzang kualah Khuasak khua a phathun a liat hun ahi hi. Khuasak Ukpi Ngo Mang tapa Khup Pau pen Tedimgam ah lian in minthang hi. Tua ahih mah bangin, khuasak khua pen Kawlpi khua tawh a hi a, Sukte leh Kam Hau tawh a hi zong in, kido na om thei zel hi. Khuasak khua pen tua bang in a thahat khua khat a hih manin, Mikang gaalte in zong Khuasak khuamah hong sim masa hi. Tua Khuasak khuamite lah Sihzangmite omna khua, Suangpi khua pen mikang gaalte aa in koih mawk theih khua hi nawn lo hi. Tua mah bangin Suangpi te in zong, gaal te’n hong sim ding hi cih a theih kholh mah bangin, Sihzang tawh kopin gal kiging sa in omkhol uh hi.

             A lam-et uh mah bangin, 1889 kum November tha sungin Major Edge makaih, Mikang gaalte pawlkhat in, Suangpi, Dimlo leh Dimpi khuate hongsim takpi hi. Dimlo khua mei tawh a halcip khit ciangin, paiphei in Hawpmual pan a galet leh a kidawksuk dihdiah Suangpi(Phinkhua) galmuhin, a Metpi uh phut in a galkap pah hi. Tua mepitang in kongpal khawng kha hi ki ci hi. Gaalte’n tua bangin Suangpi te a tawnbawl hi. Ahih hang in, Suangpite lau tuanlo hi. Gaalte hong kuan na lampi ah va dawntuah in, lamngei lampaam panin, gaal a nawt hi. Tua mikang tawh kikap cilna ah Gualkha gaalkapte (42nd Bn) khat that in, nih a liamsuah hi. Gaalte a nawkik na lamtawn ah sun leh zan in nawt a, Cheshire Regiment panin, khuami nasem khat hong thah sak hi ci’n Cary in lai tawh ciamteh hi.

             Tua kum sungmah May kha ni 9 ni in, Gaalkap mang Fawn (General Faunce) mah mah in Makai in, Vangteh lam pan kipan in, Tedim sim dingin, Saizang ah, tua pan Tedim sim to suak hi. Vangteh leh Saizang ten zong a khua ciat u’ah gaalte ol takin lutsak lo uh hi. A nuntakna uh pia-in gaalte nang ciat uh hi. Tedim khuapi in, Zomite gaalhang samat nam  a hihna uh hoih takin a lak thei uh hi.

Mikanggaal do dingin Sial kiban:
             Suangpi khua ah, mikang gaal hong tunlai in, khuasak te Pu Khup Paute pawl, Suangpi khua ah hong tung khin uh hi. Sihzang leh Suangpi kilom khat in, mikang gal hong tung masa peuh na kap uh hi. Mikanggal te hong tun sawng in, Tedimgam mite in, “hi mikang te ih gam ah sawtpi hong tam zo ken teh, ciahkik pah un teh” ci in ummawh uh hi.

              Mikang gaalte-in Sihzang kual, Vangteh, Saizang, Suangpi, Dimpi, Dimlo leh Tedim khuapi teng kotkhat hongsim khit a ki panin, tua mikanggal te Tedim gamsung pan betkhiat kik ding bekbek mah ki hanciam a, gaal kithawi na a tuam tuam bawl uh hi. Mikanggalte in zong Tedim gam a sukcip gawp nading in galkapte vaikha thuahthuah lai uh hi. Tua bangin Tedim gamah galte leh ih pu ih pa te, amau santuak pan gal ki thawina leh gal kigingna te nei tuak uh hi.

              Tua laitak in Suangpi ah Sihzang inn 30 leh Suangpi mi inn 16 a kigawm inn 46 tengin, mikang galte Tedim sungpan betkhiat dingin hoih a sa uh hi. Tua mah bangin Khuathang khua Pu Ngulh Khai kongsak thei hia phungah Sial ban in thu ciamna a bawl uh hi. Suangpi leh Sihzang in mikang galte do khawm ding a, a kikhem zawzaw ih om leh hi sialmul pulh bangin pulh in, a sin a lung muat bangin muat ding hi hang ci in Sialmei at khia in, a siallungtang sung a si nuh in, tua sibaang Sialmei tawh mikim in ki saat uh hi.

             Suangpi leh Sihzang te bekin, mikang galdo ding hi lo in Tedimgam bupin do dingin, hi Suangpi khua ah ki phual in, ki vaihawm hi. Gungal Thuam Thawngte tawh kikum in, ki vaihawm hi. Tua bangin Tedim gamah ki vaihawm a, Kaptel hausapa Thuam Thawng, Zawlnu hausapa Vum lian te pata, Heilei hausapa te in zong mikang gal do ding mahin a thukim uh hi. Tedimgam mite ngaihsutna ah, galte ii a makai teng that lup ding a, tua zawh ciangin a galkap teng a ban a ban in, thatlum zo dingin kimuang uh hi. Gaalkap makai leh kamphen teng thahlup theih na ding, thu hong vaihawm uh hi. A mau in kamphenpa mi thupi thuvanpi khat bangin mu uh hi.


Miau-uk ki suam:
             Suangpi te Pu Khai Kam pawl leh Kaptel Pu Thuam Thawng te sun le zan ih mu lo in, mikanggal do na ding hong vaihawm uh hi. Gal kilem nading vaihawm ni cih thu paulap in, Pumva khua ah mikang uliante letsong piak dingin, Saiha paak tampi ka koih uh hi ci in, Miau-uk pa a khem uh hi. Pumva khua ah Miau-ukpa leh Tedim gam Zo ulian teng, kituah ding hi hang ci in, mikang ulian te a za sak uh hi. Galte in tuathu tak sang a, Miau-uk Maung Tun Win, kamphenpa Maung Aung Zan, Piada Maung Aung Gyi leh a lai-at pa leh gaalkap 8 tawh 1892 kum October kha ni 9 ni in, Pumva khua ah a paisak hi. Tedim te in a khem na uh a uphuai na dingin, Thuklai khua panin Zo ulian pawlkhat in, tua Miau-uk pawl na muak bawl lai uh hi.

             Miau-uk Maung TunWin te pawl a kiciam na  mun Pumva khua ah pai uh hi. Miau-uk pa te pawl Thuklai leh Pumva kikal suangbum a cihna mun a tun lai tak un, thakhat thu in gaalphawng in, a kap uh hi. Gaal te’n ummawh khol lo a hih manin ki ging lo uh ahih manin thakhat in thuk kik thei lo uh hi. Tedim te in hui le tang khia in, khua phelep bangin a kap uh hi. Galte alom alom in a tuk hi. Gaalte gaalkap nih bek kamko dingin a suakta hi. Tua te in Thuklai leh Thangpi, mikanggal phualpi te ah, kam a ko hi. Tedim te in galte a thah lup khit ciangin, tua munpan mundangah a kihem uh hi. Tua a kikap na panin, Tedim mite lungsim thukuh thu leh amau in mikang te a kihtak loh na thute mikang galte in tel pan uh hi. A seh kholh sa uh mah bangin galmakai teng sulum zo takpi uh hi. Ahih hangin mikang galte pen bangzah takin pawl cing in, bangzah takin lum leh tei hoih nei uh hiam cih ih pu ihpa te in thei nailo uh hih tuak hi. Thamlo in, makai teng si zo ahih ciangin galte lungkia in a innlam uh ah ciahkik lel un teh ci in zong um uh hi.

               Suangpi leh Sihzang in Sialban in a kiciam mah bangin Suangpi leh Sihzangte in Miau-uk a suam zo uh hi. Tua Miau-uk suam na ah, Suangpi mi kuakua galkuan uh hiam cih kiphual sel ahih manin tel lo hi.

Suangpi khua siakik:
              Tedimgam sungpan in, mikang galte bengkhia ding ci in, Suangpi leh Sihzang in sialban in a kiciam uh mah bangin, galte tungah a tuam tuam in gal a bawl uh hi. Gaalte ii ki ho-na a sik khaute suhsat sak in, galte vaksuk vaktoh na lampi ah, gaalguk in gaalte gaalphualte nawngkai sak in, mun a tuam tuam ah gaaltho ciat uh hi. Lophei te PemThang te pata in khuaipi ah Havidar(Bo khat) thah sak a la-uk(Dravi) te khat a khukbawk kap thamp sak hi. Sihzang kual leh Khuano kual ah, galthawh na leh Miau-uk suamna te hangin, lim tak in galte gal hong ki thawi san uh hi. Gaal leh Tual a ki khen theih nang un, thu kanna a tuam tuam a bawl kawmin, Kawlgam panin ani ani in ahun ahun in, galkap hong kibehlap hi. A gal phualpi te panin ani ani ahun ahun in, Tedimgam sungah galkapte hong khahzau in, a khua khua ah inn leh lo te hong hal tum sak in, an le tui a muh peuh uh hong suksiat sak hi. Lokho thei lo in hong koih hi. Tua hun sungin ih pu ih pa te gamsungah phingpi simngam ne in om uh hi.
                Suangpi khua pen Tedim gamah galphuat na phualpi khat ahih mah bangin mikangte aa in galkhua khat hi ta hi. Miau-uk suam zawh guahtui kan peuh ciangin Tedim sim dingin galkap pawlkhat kuan sak hi. 1892 kum November kha ni 5 ni in, Dimlo khua hong sim in, ni 6 ni in, a nih vein a Suangpi khua hong sim leu leu hi. Suangpi pan tawmvei sung bek mah gaalnang in nawkik uh hi. Khuasak te Pu Khup Pau te pawlin, Suangpi khua panin Thangkai Pimpih ah, a gaal phual a tuah uh hi. Galte in inn le lo teng hal tum in, tua panin Suangpi khua sia ta hi.

                 Tua hunin Suangpi khua inn 20 pha hi ci in, tua hun thu ciaptehna mikangte lai sungah ki-at hi. Suangpi khua mite Sial-ek den bangin sak leh thang ah ki theh thang uh hi. SuangZong teng leh Tomu teng ThangKai ah tai uh hi. suanphut te Dimlo ah tai in, Kop Ngulh bawng pawl Dimpi tawh ki gawm hi. Tua lo teng, Suangpi gam sung tengah ki zep kawi kawi uh hi. Tua bangin Suangpi gam sung a tai na Numtui ah Pu Ngulh Khai suak hi ki ci hi.

               Suangpi khuasaat lai-in Mualbem Pu Khan Thuam in “khua na saat un la gal a om leh hong huh ding hi’ng” ci in kamciam a piak na tawh khua ki saat, tua KhanThuam khua pen, KhanThuam in ahi a, KamHau in ahi zong in, kuamah in gumzo daalzo lo in sia ta hi.

Suangpi, Thavak ah kolkhai:
              Mikang te Gamuk Mangpa A.R Carey Suangpi khua ah hong pai in, thu hongsit hi. Tua thusitna ah, Mikang leh khua kikal ah, Pu Lam Thual in  “ Tongciin” a sem ahi Khua tungkhua tuhun Awn lang ( Awn Kim) te inn mun ah, buzung ding in sawlpaang bukno khat lamin, mangpipa tua ah tungsak hi.

Miau-uk kisuam thu ciaptehna:
                        Miau uk suamna thu ciaptehna a tuamtuam om a, pawl khat in, miau uk Maung Tun Win galkapte 30 pha in, tua lakpan 8 suakta hi, a ci ki om hi. Pu Thang Kam ciamtehna ah 8 pha hi ci hi. Tua miau-uk suam hun in mikangte leh Tedimte nawkkhat sung kidona kam in, Tedimte in gaallem ding bangin, mikangte up na ding in a om hun hi ci-in, Carey in na at hi. Tua ahih man in miau-uk suam hun in, tawmvei sung lung muanhuai hun a om sung ahihi. Tua ahih man in Miau-uk Maung Tun Win in, galkap 30 tak tawh Pumva ah a pai ding sang in, ngaihmuan paizaw ding up huai zaw hi. Tua thamlo in galkap 30 tak hi leh a ki genna zah sangin ol lo zaw ding hi cih ngaihsut huai hi. Tua ahih man in, mi galkap 8 pha hi cih thu uphuai zaw hi.

Suangpi gam sung khua kiteenna:

                        Suangpi gam sungah, mihingte teenna thutawh kisai in, ciamtehna pawlkhat na om hi.

                        Cingkual Khua:  Cingkual ah Thanghote teeng ngei hi ci in kigen hi. Tuhun dong in Khimua peuh kimu thei lai hi.

                        Sasih khua:  Sasih khua pen El Thuam khan hun in kisat hi leh kilawm hi. Tua hi a, Sasih khua leh Kaalzang khuasaat hunte ki gual leh kilawm hi.

                        Ngawzang khua:  Ngawzang khua pen, Khuangen khua beima hun in kisaat in, Khuangen khua beima hun mah in kisia kik hi.
                        Khawngi khua:  Khuangen khua pan Pu Lam Kip in, Khawngi ah lozuan in teeng a, tua hun in Sasih khua sia hi.

                        Sena mual khua:  Tuhun Khai Za Pau innmun tengah, hankhuk tampi kimu hi. Tua hankhuk pen hoihtak in ki to in,tua kull sungah hoihtak in suangphah in, suangpek tawh u’m in, tua ah misi kisial hi. Phin tenlai in, pull tung a, leisung to in tua ah kikhol hi kici hi. A hih hang in, khuat kik in ngeina bang in a lutang lakhia in limtak in kikem hi kici hi. Tua ahih man in tua hun pen Phinhan hilo ding hi cih ding hi.

                        Nidanglai in Dimpi khua ah, Thahdo minamte teng ngei a, tudong in leisungah tua minamte han kimu lai hi cih Pu Ngin Zam in gen hi. Tua Dimpi khua Thahdote han a cih leh Suangpi khua Senamual hante kibang hi. Tudong in Thahdo te leisungah kiphum ngeina zang uh hi kici hi. Tua ahih man in Dimpi khua saatma hun, Cingkual khua hun pawl in, Suangpi khua Sebanual ah Thahdo khua kiteeng ngei hihtuak hi. Tua hi a, Suangpi gam sungah, a teeng masa pawl pen Thahdote leh Thanghote pawl hiding hi ci in up huai hi.

                        Miau-uk suamzawh a kipan in, mikangte in, lokho singpua mawh in hong koih banah, a nuntakna zah in a it uh, vompi ngaltang a kapna uh,a thaute kaihkhop sak hi.Tua thu in, a diimmon pan in tulzum tawh sut bang in sun in, na sa mahmah uh hi.Carey mangpa Suangpi khua a tun ciang in, innmun sim a 16 mun mu hi.Tua tawh kizui in thaulawng 16 hongpia un, ci in ngen hi. Lawng 16 pia zolo in lawng 14 pia uhhi. Khua pan hih thaute a khop ma in, inn 20, thau lawng 20 om hi ci in, gaalte thau sazian ah kiciam teh hi. Khua thau 14 teng matsak pah hi. Innmun phazah thaulawng ap theilo uh ahih man in, dangka Rs. 80/- a liausak hi. Tua khit ciang in, na hausa uh kua hiam ci in a dot ciang in,”Tawng Phut hi” a cih uh ciang in, Pu Tawng Phut man pah uhhi. Mangpa in “ Na khua uh ah teengkik thei nawnlo ding hi uh teh, Dimpi, Dimlo ah taai un” ci in sawl a, dangka Rs.50/ liau thuahsak lailai hi.

                        Carey mangpa in, anuai a thuteng huhau in, Pu Tawng Phut man hi ci in Suangpi khua taangthu ah ki ciamteh hi.

(1)        Suangpite in, Mikangte doding ci-in, Sihzang tawh sialban in, akiciam na uh thu leh Suangpi khua pan in, Khup Pau leh Khai Kamte pata, Tomu pawl tawh gamsung beel in, gamsung pan mikangte a dona thu,
(2)        Lopheite Pemp Thangte pata in, Kawlpi leh Hawp ah a gaalguuk bawl pen Suangpi khuate hi ci in a gintakna thu,
(3)        Innmun phazah thaulawng pia zo lo ahihman in, Suangpite’n tavuan nei hi cihnopna thu’
(4)        Suangpi khua hausa ahih mah bangin Suangpite taang in hausapa tungah mawh a puaksak nopna thu’

Mikang gaalte in Suangpi khua phiatsak in, a hausapa matsak hi. Suangpi khuabup ai in, Pu Tawng Phut kiman in, gaalkap phualpi Thavak ah paipih uh hi. Pu Tun Thual in, a sungpa Pu Tawng Phut zui a, Pu Tun Thual leh Pu Tawng Phutte sungta mikangte khut sungah”kol khia” uh hi. Mikangte tangin kamphen Pau Thang in, Pu Tawng Phutte sungta, thu a sitna in, bungbu lehkhai a, saat a, Pu Tawng Phut leh Pu Tun Thualte a kam leh muk pan in siluang dong in gimna a thuak hi. Pu Tawng Phut leh Pu Tun Thualte luang tatkikna ding in, Zong Tuang tate in vaihawm uh a, Pu Tun Zel in “Tawng Phut ka sanggampa leh kamakpa Tun Thual tat na dingin ka sialpi vahawl un ci in, a kol a tol kei leh Tuang Ngul leh  Tuang Zen in a kol hong laih un” ci in Pu Tuang Ngul leh Pu Tuang Zen, khuapih pawl khat tawh gaalkap phualpi Thavak ah, a paisak hi. Mikangte in  Pu Kip Zel sial na sang in, Pu Tawng Phut leh Pu Tun Thualte sungta kol tol in, khua ah hongciah kik uh hi. Hi thu tawh kisai in, Pu Zong Tuang tapa u bel Pu Phut Lam in hibang in la khat a phuak hi.


“Pupa theih loh thang lomei hongkai ta e, lunmang vontawi anglai ah thel bang sia e. Vangkhua tu tawm lung nong muansak nam aw e theih loh suangmual nakhup ding lunglau veng e”

******************************************************************
Suangpi Mualsuang Laibu in Zomite ading a manpha mahmah Mualsuang ahihna tawh kizui in Zomi eLibrary / Laibusaal in, hanciam in a-ki teikik/type kik ahi hi.


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: MIKANG GAAL LEH SUANGPI KHUA. (Suangpi Mualsuang Laibu). Description: Rating: 5 Reviewed By: Cinpu Zomi
Scroll to Top