728x90 AdSpace

Hot
Menu
Zon-ol na Donate

Latest News

MIKANG UK SUANGPI KHUA. (Suangpi Khua Laibu).

(E)       MIKANG UK SUANGPI KHUA

 Khuathang pan, Phinkhua-ah:
                Khuasak Pu KhaiKam te in, gaal hong lut kum 1894 zawh ciangin, Tedim gam pen, England kumpinu Victoria ii siah gam khat in om-a, Kawlgambup tawh a ki bang in, England Innpi ah ki to kai hi. Khamtunggam ah Upadi tawh ki-ukna ngeina hong bawlin, hong uk hi. Falam, Khalkha, Tedimgam teng Mangpi-uk, khat ah koih in, Tedimgam pen Vuandok-uk khat suah hi. Vuandok te nuai ah, Ukpi om in, tua Ukpi te nuai ah, khua hausa te koih hi. Tedimgam bup (Tu hun Tonzang tawh) Ukpi uk thum ki suah hi. Tua te pen, Sihzang, Sukte, Kamhau, uk ahi hi.


                Suangpi khua-ah teen theihkik nading thu aki ngah ciangin, khual-a om, tual-a om, u leh nau kigawm tuah kik uh hi. Pawlkhat te, khua-lai, Ngaal lo, Khamsau khawngah ahi zongin, pawlkhat-te Khuathang khualui-ah ahi zong in, pawlkhat te, Kawlkhiang-ah ahi zong in, kizau teen zelzul ahih mannin, khua leh tui vaihawm na leh kikawm kiphak na thu te-ah hamsatna a tuam  tuam hong om hi. Tua ciangin Phin Khualui-ah ki gawm phei uh hi. A nih veina Suangpi khua-ah a ki tuah hun pen, 1894 leh 1910 kum kikal hunsung ahi hi. Khuathang khuapan Phin khua a tai kum pen 1909 kum hi in um ing, Pu Ngin Thang in ci hi.

Phin pan Khuatung, Khuangnuai-ah:
              Bualpi Pu Son Thawng in, Phin khua-ah kum 11 sung kiteeng hi ci in, ciamteh hi. Phin khua-ah kum sawmval a teen sungin, inn (40), dong na khanguh hi. Phin khua ‘Tual’ pen tu hun bawllung tualpi sung hi. Phin khua in than nei-in mual zong nei hi.

              Phin teen sungin, pul natna hong tung hi. Tua pul pen ‘Piancit pul’ ki ci hi. Tua natna pen, buk khuh in, sii lua in, tawm vei ciangin si pah pah hi ki ci hi. Pawl khat in, tua pul natna pen, vompi tungpan a ki ngah hi ci in um uh hi.

               Nikhat ni in, Pu Ngen Ngin tate Ngulh Cin Khup, Neng Dim leh Dim Za Cin te, a unau khawngin lo kuan uh-a, a ciah ciangin, Ngawtee mual a tun lai takin, Ngulh Cin Khup leh Neng Dim kikal-a pai, Dim Za Cin pen vompi khat in, lamsakpan thakhat thu in bawhsuk-a, a gilpi phuai thap sak hi. Ngulh Cin Khup in, a liang-a a puak, a ngawl teh tawh tua vompi a khawh ciangin vompi tai pan hi. Dim Za Cin gil zang thun kik hi. Ngulh Cin Khup dial tawh huai in, a nau pua in, inn lamah ciahpih ving veng-a, inn a tun ciang in a nau si ve ve hi. Tua vompi khuazang in zui-uh a, Val gamlam ah vompi pai suak hi. Tua pan nusia in, sa zuite inn ah ciah uh hi. Tua nitak in Pu Kip Khual tapa Tuang Cin te unau Dimlo a hawh a ciah lamin, Tuilum tam a tun laitak in, “Na ngak un” cihna aw khat  za a, Tuang Cin in “hong hat meng meng un” ci in a dawng hi. Tuang Cin te unau inn a tun phet in, na pah in si pah hi ki ci hi. Tuang Cin ki vui nading kull ki to a, tua ah Tuang Cin luang a kiphum ma in, a innkuan un khat khit ciang khat si-a, Tuang Cin luang tawh kiphum khawm hi. Tua pan kipan in, khuazang in kilawh a, Pu Zuan Kham leh Pi Vung Ngin sim loh nakhin uh hi, ki ci hi. Tua ahih man in, tua pull natna pen, Ngawtee mual a Dim Za Cin a pet vom pi tungpan-a hong pai dawi hi a ci nuam pawlkhat om hi. Dim Za Cin siluang bawl a om, Pi Dim Zing, a si bawl na pan a nasa-in kipua a, inn a tun ciangin sipah hi ki ci hi. Piancit pai te za kisun sa in hong ciah uh ahih manin, tua natna in lawh zolo a, Piancit paiteng bek cidam in khuasung misi hui leh cina do teng ponglak uh hi. Tua pul natna hongtun ma in, sial pul om-a, tua sial pul natna mihing tungah kilawh kha hi thei hi.

                Phin khua pen a nuai a thu te hangin lungkia uh hi.
(a)        Khua mah mah dam diak hi.
(b)        Phaak natna tam diak sa uh hi.
(c)        Na se takin pul natna hong om hi.
(d)        Nikhat ni in, Dimpi te Pau Zel in Phaak natna nei hi napi, tuikhuk ah hong kisil lai zang a, tua tui ki ne nuam nawn lo hi.
Tua bang teng ahih manin, 1923-24 pawl in, tu hun khuatung leh khuanuai ah na kituah leu leu uh hi.

Khuatung leh Khuanuai:
                Khuatung khua pen Suangpi khuasat cilna hi. Khuanuai khua zong Suangpi khua mun lui mah hi. Phin khua pan tu hun khuatung leh khuanuai ah a kituah hun laitak in Tedim Vuandok pen Nela hi-a, Pu Son Khai Hauhsak zawh a hi hi. Phin pan khuatung khua ah kituah phei na ding Pu Son Khai in, Vuandokpa tungah ngen hi. Naulak te Tawng Phut bawngteng khuatung ah ut lo uh hi. Khuanuai ah ut zaw uh hi. Tua bang in khuatung ut leh khuanuai ut cih pawl nih pha uh hi. Tua ciangin Vuandok pa in, khuatung ut leh khuanuai ut inntang siik in dong sak a, khuatung ut zaw tam zaw hi. Vuandok pa in “khuatung ut teng khuatungah teeng thei, khuanuai ah kuamah teeng thei lo ding hi; khuatung ah na teen siat kei uh leh a teng sa teng zong Phin ah ki sam kik ding hi,” ci in thu a pia hi.

              Tua hun laitak in Pu Ngulh Khai pen Vuandok Nela ii an huan a sep laitak hi. Tua khua kituah na ding vai huhau in, khat vei Nela Mangpa Suangpi ah hong pai a, Pu Ngulh Khai leh Pu Pau Khaw Mang te-in hong zui uh hi. Tua laitak in, Pu Tuang Ngul, a nau pa Pu Ngulh Khai kiangah, khuanuai-a a teen nop na thu Mangpa tungah a gen ding a nuai a bang in a hilh hi.
“Ngulh Khai aw, na Mangpa tungah hi bangin gen in. Phin pan khuatung ah teensiat ding pen, tui kikham lo ding hi; ka u Tuang Ngul zong dam lo ahih manin, mailam ah dam kei sem sem leh khuapih te’n kih in nil hong tuam om sak ve ve dinguh ahih ciangin khuathang khua ah ka teng nuam zaw uh hi ci in”

                A U Tuang Ngul sawl bangin Pu Ngulh Khai in, a Mangpa tungah a gen hi. A hih hangin, Mangpa in, teeng mah un, teeng kei un cih thu pia tuan lo in, a ciah hi. Mangpa a ciah zawh ciangin a ni a kha hong bei bei-a, Khuathang khua-a teeng nuam pawlin, kampheen khat kam kawi-in donguh hi. Kampheen pa’n “A ni a kha hong bei bei peuh leh phamawh lo ding hi; nang na teeng phot peuh le teh, a dang te damdam in hong teeng thei dinguh hi” ci in Pu Tuang Ngul tungah a gen hi. Tua ciangin Pu Ngulh Khai in, “Mang dang khat peuh hong khan a hong dot leh, Ngulh Khai nget lai-in, a nget-na mun-ah damdam in teeng thei ding cih ka za mah bang hi, ci in hong gen sak in” a ci hi. Pu Ngulh Khai leh kampheen khat Kam te kikal-ah tua bangin sungthu sim a neihna uh a kip nadingin, Pu Ngulh Khai in, kampheenpa Rs.25 a piaksim ban-ah, Khat Kam ii inn sik-kang teng, Tulsuk pan a khuadong a khongin puak sak hi. Tua bangin Phin khua pan Khuatung leh khuanuai-ah kikhen in, Tual nih nei in, khua nateenguh hi. Khua nuai-ah, Naulakte Tawng Phut thahteng leh Buansing te nateeng uh hi. Ahih hangin Khuatung khua leh Khuathang khua, khuanih pen, Suangpi khua hi in, khua hausa uk-khat nuai-ah om uh hi.


               Phin pan khuatung leh khuanuai-ah kikhen in a kituah a ki pan in, khuatung khua in, khuatung khualui Tual puah in, khuanuai te in, khuathang Tual puah in Suangpi khuakhat Tual nih khua in a piang hi. Khuanuai ah Pu Tuang Ngul in Tual phuisam in, Buansing te Suan Khaw Hau in tualteek a sem hi. Khuatung khua ah Pu Suan Lam In tual phuisam in Tawng Nok in tual teek sem hi. Ahih hangin khua biakni ki bang in kibia hi.

******************************************
Suangpi Mualsuang Laibu in Zomite ading a manpha mahmah Mualsuang ahihna tawh kizui in Zomi eLibrary / Laibusaal in, hanciam in a-ki teikik/type kik ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: MIKANG UK SUANGPI KHUA. (Suangpi Khua Laibu). Description: Rating: 5 Reviewed By: Cinpu Zomi
Scroll to Top