728x90 AdSpace

Hot
Menu
Zon-ol na Donate

Latest News

Rev. Dr. Man Hau Cing Tangthu.

Rev. Dr. Man Hau Cing Tangthu
MC No. 0823

1. Suahna leh Sangkahna:
Rev. Dr. Man Hau Cing pen Tedim gam, Lamzang khua pan Pu Luan Khua Thang (Taangpua) leh Pi Kam Khua Man (Sukte) te tapa Pa Thawng Za Suan leh Tedim Sakollam a teng Pu Pum Khua Pau (Toging) leh Pi Cing Ngaih Dim (Naulak) te tanu Nu Niang’ Khan Mante tanu upapen hi-in Kawlpi ah suak hi. Suahpih sanggamte a nuai-a bang ahi hi.
1) Pa Thang Hau Lian   + Nu Lun Sawm Cing;
(Foreman, Co.Ltd, Singapore)
(1) Lia Man Sian Kom 
        (2) Lia Pau San Niang 
(3) Tg. Suan Sian Tan

2) Rev. Dr. Man Hau Cing B.Th; B.D; M.Th. Th.D (N.T)

3) Sm. Dim Don Niang (B.A, JAT) + Pa Lian Cin Pau
(1) Lia Cing Khawl Kim (Singapore)
(2) Lia Man Sian Taan (B.Sc)
(3) Lia Cing San Lian 
(4) Lia Lun Suan Cing 
(5) Lia Suan Sian Hung 
(6) Tg. Nang Sian Muan 

4) Nu Zen Khawm Lun (Nurse) + Pa Cin Suan Thang
(1) Tg. Langh Suan Khai 
(2) Lia Go Lam Niang 
(3) Lia Man Sian Hoih 

5) Sm. Cing Khawm Nuam (B.A, Nurse) + WO-I Neng Khan Pau
(1) Lia Niang Sian Tawi Lun 
(2) Tg. Cin Sian Suum 
(3) Lia Man Sian Sung 
(4) Tg Suan Sian Mung 
(5) Lia Don Suan Muang 

6) Nu Pau Suan Cing (B.Sc) + Pa Thang Sian Tuang (USA)

Dr. Man Hau Cing pen Haka, Tahan, Sakollam cihte ah sang kahin tan 10 dong tunga, 1998 kumin Tan 10 ‘B’ list tawh ong hi. Pawlpi Church School ah zong kahin 1.1.1982 kumin Rev. Dr. S. Pau Khan En in tuiphum hi.

2. Lai Siangtho sangkahna leh sepna
1985 kum June kha in Tahan Tuiphum Pawlpi Numeite sawlna, thapiakna leh huhna tawh Yangon  Insein Kawllai Siangtho sang, Myanmar Institute of Christian Theology (MICT) ah kahin 1989 December kha in L.Th Certificate tawh sang man hi.

Sang a man phet 1.1.1990 panin Tahan Tuiphum Pawlpi in hunbit Pasian’ nasemin zanga, WF Director leh Tuizang Missionary tawh thuah kawm hi. Tuizang khua pen Tedim gam hi-in tai 9 pan tai 12 bang a gamlatna a om, Tahan Tuiphum Pawlpi  Mission Field ahi hi. Tua khua ah a om sung khakhat khatvei kha bei Sani leh Nipi ni-in ciah a, WF te makaih zel a kum khat sung hun tampitak zang hi.

Kum khat leh lang a sep zawh 1991 kum June kha ciangin Pawlpi phalna tawh India gam Jorhat a om Eastern Theological College (ETC) ah sang zomto a, B.Th degree a ngah zawh ciangin B.D zong zop suak theih nading hunpha (Senate Women Scholarship akipan) Pasian in a Siapipa tungtawnin ngahsak ahih manin 1996 April kha dong sangkah suakin B.Th; B.D degree tawh hong ciah hi. Eastern Theological College (ETC) pen Serampore tawh a kizom India gam sang minthang, sanghoih khat ahi hi. Sangkah hunsung Pawlpi in Pawlpi sunga semsa ahihna tawh khasum bit tawh sang kahsak hi. Ahi zongin Kawlgam sum tawh India ah sangkah zawh ding hilo (sumkhekna tam) a, Senate Women Scholarship leh innkuanpihte huhna tawh akigawm ciang akah zo ahi hi. B.D a zawh kumin Pawlpi in A Thesis gelh nangin Ks. 10,000/- a tuam vilvel in pia hi.

Sang a zawh ciangin Pawlpi mahah sem zom suak pah a, WF leh E&M lam tavuan kilensak hi. Pawlpi in Siate kum 2 halin Department Director, Committee Convener cih bangin a khel zelzel ahi hi. Tua banah Tahan Theological College (TTC) leh Bethel Theological Seminary (BTS)) cihte ah hunlang (part-time) in laihilh Sia (Lecturer) zong a sem kawm zel hi.

Dr. Man Hau Cing in Pawlpi ah a kisap luatna leh ama utna tawh tan 10 zong limtak sim man lopi-in a phi khit ciangin L.Th sin ding a pai ahi hi. Biakna lam sinna a bul pan a a kah toto a, a kingaihsut kimlai B.D a zawh khit ciangin kimlepam panin “B.D khawng ahih hang Tan 10 ong lo” cih kampauna mun tam sim pan a zak ciangin a hoih lamin la a, ama Tan 10 sinlai bang hilo Syllabus te kilaih khin mang himah leh Pawlpi sung nasep kawm mahin Tan 10 lai enkik in 1998 kum March kha in Tedim sangpi ah Tan 10 phi dingin va pai hi. Tedim a tun ciangin a meltheihte khat in “na on nop takpi leh subject khat Ks. 1000/- pia leteh ong hamtang ding hiteh” na ci himah taleh a Khristian hihna leh Pasian nasem ahih manin mang zolo a, ama hih theih zahin a hanciamna Pasian in thupha pia in, “B” list tawh hong ong ahi hi.

B.D aman zawh kum 2 sung Pawlpi sungah asep khit 1998 June kha ciangin Pawlpi phalna leh deihsakna mah tawh khasum bit pia in, Serampore College (University) ah M.Th sin dingin va pai leuleu hi. 1998-2000 dong vasin a, M.Th (NT) zo in 2000 kum April kha in hong ciah thei hi. Hih a sangkah hunsungin a lauhuai mahmah Electric shock ngah kha a, a si lian ding kimlai, Pasian in Ama’ nasem dingin deih lai ahih manin ahingkik,a  nungta kik ahi hi.

Sang akah kik kum 1998 kumin Khampat ZBC Annual meeting ah ZBC WF in Asst. Secretary dingin teel a, ahi zong sangkah kik ahih manin sem man loin a tang ding a na teel nadingun laikhakin nolh hi.

Sang aman ciangin Pawlpi mahah ciahin sem kik leuleu hi. 2001-2004 dong (term khat) ZBC WF Secretary semin Falam ah om hi. Term khat a zawh ciangin sangkah zom nuam lai ahihna tawh Pawlpi ah hong ciah kik hi.

ZCLS in zong 2006 kumin Asso. Executive Secretary dingin teel hi mah leh sangkah kikna hang mahin lunggulh zahin kihel zolo a kum khat bek kihel man hi.

ZBC, MBC te deihsakna leh vaihawmsakna tawh 2007-2010 sung Lutheran Theological Seminary, Hong Kong ah sangkah va zom kik a, 6.6.2010 ni-in Pasian huhna tawh Doctor of Theology, Th.D (NT) tawh sang hong man thei hi. Sang aman ciangin hong ciah a, Pawlpi sungmah ah sem leuleu hi. Pawlpi in zong lungdampihna tawh bawng khat gawhin annekpihna nei uh hi. 

3.  KTC Principal leh KVBA GS sepna
2005 kumin KVBA in kum 50 cin Golden Jubilee bawl a, Jubilee gah dingin Lai Siangtho sang phuat ding geel hi. August 5, 2010 in Kalay Theological College (KTC) min tawh kihong takpi a, hunlang Siapi, Principal dingin Dr. Man Hau Cing sehin tuni dong a sem ahi hi. 2011 March kha ciangin KVBA, SKVBA, NKVBA cih bangin Association thumin a kikhen ciangin KVBA in General Secretary sem dingin Dr. Man Hau Cing sehin hunbit in a sem suak ahi hi. Zum nasep tam, sangvai van leh laihilh kawm ahih manin mun tuamtuam pan tintan pia dingin kisam zelzel himah taleh khualzin nawn lo hi. Pawlpi in zong khasum 25% tawh lenin KVBA zumah hunbit in a semsak ahi hi.

4.  Ordination kipia (ngahna)
KVBA By-law sungah Association General Secretary dingte pen Ordination ngahsa hi ding, cih om ahih manin, Tahan Tuiphum Pawlpi pan a naseppih Siate vaihawmsakna leh Pawlpi deihsakna tawh 2011 May kha pan kipan Tahan Tuiphum Pawlpi thukimna, Area EC thukimna, KVBA MC Ordination Council thukimpihna tawh 26.2.2012 (Sunday) ni-in KVBC-BM meeting Siyin Baptist Church ah Ordination kipia hi. Pawlpi in lungdampihna tawh March 4, 2012 (Sunday) ni-in nekkhawm piasakin mipi dawnkhop dingin niangtui awmna tawh lopsak hi.

Ordination a ngah ciangin lamen hetlo himah taleh KVBC gam sung, Association-te, Area-te, Pawlpite, naseppih lawmte leh thu-um mimal tampitakte in lungdampihna sumtang, vanlena tampitak pia uh ahih manin lungdam leh angtang mahmah a, a na a sepsak Pa Pasian in, a na a semte tungah thupha a bawlte  a zah tampi a thupha tawh a thuh ding a thungetna ahi hi.

5.  Hunbit Pasian’ nasep zawh kum 25 cinna 
       2014 kum March kha in a sangkah masak penna a hi MICT panin sangman zawh kum 25 cin pahtawina in Sum Singlamteh angsuan (Ngwe letwakatine) pia uh hi. Ahi zong KVBA ah MC member lut tawh kizui-in KVBA MC thukhun ciaptehna ah 2015 kum a cing hi a, KVBA MC vaihawmna tawh KVBA BM khawmpi biakpiak Nipi hunpi sungah pahtawina hun bawlsak uh a, KVBA, Area, Pawlpi leh mimalte in hunbit Pasian nasep kum 25 cin lungdampihin Pahtawina laipi, letsong tuamtuam leh sumtangin zong pia ngeingai uh ahih manin, a na a sepsak Pasian min phatin a lungdampihte khempeuh Pasian in a zah tampi in thupha a piaksak ding a thungetna leh a lunggulhna ahi hi. 

6.  Lungdampihna leh Pahtawina
1) MICT pan sang a zawh ciangin Tahan Tuiphum Pawlpi Numeite in lungdamna vok khat go in annekpih uh hi.

2) M.Th (NT) man kum
* ZBCWF in lungdampihna laipi hmanbawng tawh pia uh hi.
* KVBAWF in 23.2.2001 kumin lungdampihna laipi hmanbawng leh nik ten khat pia uh hi.
* Rev. Job Nang Khaw Thawng in lungdampihna hmanbawng hoih mahmah pia hi.
* Upa Al Khua Thang in nik ten khat pia hi.
              *   Apu Thang Lun Khup in a sangtuah pawi ading Puankang hoih mahmah khat pia hi. 

3) Th.D (NT) man kum
* 29.6.2010 vaitun nitakin Rev. Job Nang Khaw Thawngte innkuan in lungdampihna hmanbawng pia in Puandum silhsak, inn ah niangtui awm uh hi.
* 1.7.2010 ni-in Pianna a Pu Thang Lun Khup leh Pi Suan Za Cingten vok khat go in annekpih uh hi.
* 3.7.2010 (Sat) ni-in Tahan Tuiphum Pawlpi in bawng khat gawhin annekpih uh hi. Tahan Tuiphum Numeite (TBWF) in Doctor degree puan koih nan’g manbizu hoih mahmah (Ks. 85,000/-) leh pahtawina laipi hmanbawng hoih mahmah pia uh hi. Ordination a ngah in Pastor puantual kang (Ks. 70,000/-man) pia lai uh hi.
* 1.8.2010 ni-in Lamzang Tuiphum Pawlpi in lungdampihna lai hmanbawng tawh pia uh hi.
* 5.9.2010 (Sunday) ni-in Leipi Tuiphum Pawlpi in biakpiak kikhopna service sungah lungdamna lai hmanbawng tawh pia in, puandum silhsak banah hunpi hun zong zangsak lai a, vok khat gawhin zingan nekpihna thupitakin nei uh hi.
* 19.9.2010 (Sunday) ni-in Pinlong Tuiphum Pawlpi in biakpiak kikhopna service sungah lungdampihna laipi hmanbawng leh nikten khat pia banah hunpi hun zong zangsak lai a, zingan nekpihna thupitakin nei uh hi.
* 26.9.2010 ni-in BAG, Tedimte in lungdampihna laipi hmanbawng leh Lai Siangtho hilhcian bukhat pia uh hi.
* 26.9.2010 ni-in ZBC WF te in Thantlang ah lungdampihna lai hmanbawng leh sum Ks. 20,000/- pia uh hi.
* 15.10.2010 ni-in ZCLS in Munlai Tuiphum Pawlpi ah lungdampihna lai hmanbawng pia in Puandum zong silhsak uh hi.
* 19.12.2010 ni-in Munlai Tuiphum Pawlpi in lungdampihna lai hmanbawng tawh pia banah vok khat go in annekpihna nei uh hi.
* 19.2.2011 (Sunday) ni-in Bethel Tuiphum Pawlpi, Tamuten lungdampihna in delhphah tuamna pia uh hi.
* 29.10.2011 ni-in Tedim Association, Yangon in Zomi Khuado pawipi sungah pahtawina laipi pia hi.
* TCF Tedim pan Pahtawina laipi khat pia uh hi.
* Tua banah Pasian’ na a seppih alawmlegualte le Pawlpi mite in laidal ah pulak zawh loh ding zahin lungdampihna letsong tuamtuam pia ciat uh hi.
*   Hongkong ah Th.D a sin hunsungin USA a om a pu Go-te innkuan (Pa Vungh Kap Go) in a zat dingin Handphone khat leh Computer Laptop khat leisak a, tuni dong a zat penpen ahi hi. 

Rev. Dr. Man Hau Cing in Pasian nasepna ah hunbit Pasian nasep kum 25 a cin theih nadingin ama kia hanciamna tawh hi zolo a, a innkuanpihte leh u leh naute panpihna a bulpipen ahi hi.
1) A pianna Nu leh Pate kum tam lam manawhin natna nam tuamtuam zong nei uh a, a hunhunin cina lupmun ngakin om mah tase le uh a tanu uh Pasian nasepna nawngkaisak nuam lo uh ahih manin lunghimawh loin vaikuan dingin sawl tangtang uh hi. A dam loh hunin kemman, khoiman loin ompih man ta kei leh zong khatvei beek lawmlawm teh, ci ngei lo uh ahih manun amau zong Pasian in damna mah ngahsak pahpah ahih manin, nu leh pa damlohna hangin vaikuan theih loh ding paulap hun tam nei hetlo hi. 

2) A sanggam pasal khat neihsun Pa Thang Hau Lian innsung nuntak nading akisam bangin a zong a vai zo dingin Pasian in thupha pia ahih manin innsung nuntak nading ama lungkham kullo bek tham loin, a Lai Siangtho sangkah hun pan kipan tuni ciang dong mah a kisap bangbang sik leh a vaihawmsak zo dingin Pasian in thupha pia hi. 

3) A mo, a sanggam zong ahi, Nu Lun Sawm Cing in zong Pasian na suakta takin a septheih nadingin nisimin nek ding dawn dingte a baihsa in bawlin koihsak den bek tham loin a puansilh niktente zong a siangsa leh taihsa sitset, a baihsa in koihsak den ahih manin manlah, buaina hangin vaikuan theih loh ding paulap in nei ngei lo hi.  

4) A suahpih a sanggamte leh innkuante ahi, Nu Dim Don Niang, Pa Lian Cin Pau leh a tate; Nu Zen Khawm Lun, Pa Cin Suan Thang leh a tate; Nu Cing Khawm Nuam, Pa Neng Khan Pau leh atate in zong a Nu leh Pa a dam loh hun zato paipih ding leh innkuan sungah manlahna, kicin lahna  khat peuh a om ciangin akisam bangin puapial nading ahi zongin, sep ding bawl ding ahi zongin huhin dawn den uh a hih manun vaikuan theihloh ding paulap in nei ngei lo hi. 

5) A suahpih sanggam, Nu Pau Suan Cing leh Pa Thang Sian Tuangte in zong 2009 kumin India Motor Cycle khat leisak uh ahih manin a Pasian nasepna a vaikuanna ah mazangsak leh tawldamsak uh hi. 

6) A unau, sanggamte leh beh leh phungte in Pasian nasem ahihna hangin u leh nau vai, beh leh phung vai ah kihel zo ngei lo himah taleh theisiam uh ahih manin u leh nau beh leh phung vai tawh vaikuanna kipelhsak ngei lo hi. 

*******************************
Source : 
Muvanlai Thathak
(Rev. Dr. Man Hau Cing’ gen leh gelh Sermon leh Article)

Sianu Rev. Dr. Man Hau Cing in Zomi eLibrary / Laibusaal ading in phalna hong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Rev. Dr. Man Hau Cing Tangthu. Description: Rating: 5 Reviewed By: Cinpu Zomi
Scroll to Top