728x90 AdSpace

Hot
Menu
Zon-ol na Donate

Latest News

SUANGPI KI-UK GAM THU Khen Thumna. LEINGING TAINA THU. (Suangpi Mualsuang Laibu)

Khen Thumna
SUANGPI KI-UK GAM THU

(A)       LEINGING TAINA THU

     Leitung gaalpi nihna
              Nidang lai hunkhat sungin, Europe gamah, sumbawl sumzuak nasep na te, hong khangto a, sumbawl sumleengte, leitung muntuam gamtuam te-ah gam thak zongin hong zauvak uh hi. Mi gam mi lei ommuang hui leh tang tawh sim-in, amau siah-khua suah uh hi. Tu gam te pan a sumpiang tengtawh amau gam puah uh hi. Tua bang-a, a ngalpil a lol pen gampawl pen England leh France(Piancit) te ahi uh hi. Tua bangin Khamtung gam leh Kawlgam zong England kumpinu gam a suak hi. England leh France gamte mah bangin, Kumpi gamdang pawl zong hongkhan ciangin, England kumpinu’ neih bang siah-gam hong deih uh hi. Ahih hangin, tua hun ciangin gamval lei-awng om nawn lo hi. Tua huhau in, Kumpi gam ciat ciat, khat ii Siah-gam, khat in duh gawhin hong ki sia uh hi. Tua ahih manin 1914 panin, 1918 kum sungin, akhat veina leitung gaalpi hong om a, tua ah England leh Piancit te a lang-ah Germany te a langah pangin hong kikap uh hi. Tua a khat veina leitung galpi tawh kizom in, 1939 pan 1945 sungin a nih veina leitung gaalpi hong om leu leu hi. Tua ah Germany, Italy leh Japan kipawl in, a lang ah England, Piancit, Russia, leh Europe gam Kumpi dangte leh American gamte kipawl uh hi. Tua kumpi gam ki pawlte gaalkap pawl pen, A-laih (allied) te ki ci hi. Ni suahna lampan Japan te in, mikang kumpinu siahgam , Kawlgam hong sim a, tua panin, leitung gaalpi in, Kawlgam zong hong lawh hi.


             1942 kum March kha ni 28 ni-in, zangkong khuapi Japan te khut sungah kia hi. Tua a kipan in mikang kumpi in, Kawlgam nusia in, India gam ah tai hi. Japan te Kawlgamah hong tun ciangin hong naupang khemin Kawlgam ‘suahtakna’ hong kipia hi.

Suangpi khua amau leh amau ki-uk.
               Japan te Kawlgam sungah hong tun phet in, mikang galkap te-in, naang lo in, Kawlgam a nusia uh hi. Japan te in zong Kawlgam bup hong uk zo tuan lo hi. Khamtung-gam Tedimgam pen, Mikang uk sungah lah om lo in Kawlgam uk sung ah lah om lo in, amau khua ciat, amau ki uk uh hi. Tua bangin Tedim gamah Mikang kumpi te piak ukna za khempeuh a thu in bei in, khua khempeuh amau le amau hong ki uk uh hi. Tua bangin Suangpi khua zong amah leh a mah a ki-uk, “Suangpi ki-uk gam” a suak hi. Suangpi khua kisaat cil a kipan in, Mualbem uk sungah om in, tua pan in mikang kumpinu ukna sungah  a om leuleu hi. England kumpinu tangin, Suangpi khua a uk dingin Pu Son Khai a sawl hi. Pu Son Khai a sih khit ciangin, Pu Ngin Thang in a uk hi. Mikang kumpite India gamah tai in, Kawlgam pen sahang kamsung-a nusiat bangin, Japante kamsungah a nusia hi. Tua ahih manin, Mikang kumpinu ukna bei-in, Suangpi khua amah leh amah ki uk hi.

Suangpi khua ki-uk hausa upa kiseh.
               Kawlgam sungah Japan leh Mikangte hong kido ciangin, Tedim zong gaal leh sa sungah hong om hi. Gaalsung sasung pan, Suangpi khua a hin nading in, a lol a na vak a gal pil in, khua makaihna hong thupi hi. Gallehsa lak ah anuntakna pia in, khua makaih na a pia ding mi hong kisam pha hi. Tua a hih ciang in khua papite in, Phut Thang aw mikang hong khang in na pu Lam Thual in na tongciin hi. Tu in i khua ih tui pen a navak a pil a lol khat in, ih makaih ding kisam hi. Ngim ing taw ling ci ken la, na khua a ding in hong tongciin in (Hong palai in), Ci in a sawl huan uh hi. Tua ban ah Pu Phut Thang vaihawm pih ding in, a thah athah in anuai abang in khua vaihawm pawlpi (Administrative council) kiphuan khia a, a nuai abang a hihi.
Pu Phut Thang          (Suanman) Makai.
Pu Phut Za Cin          (Naulak) Makai huh.
Pu Tun Khai               (Suanman) Upa
Pu Tun Ngin              (suangzong) upa
Pu Nok Khaw Lian    (suanphut) upa
Pu Phut Tual             (Tomu) upa.

            Hi khua upa teng i galsung a nasepna lak ah a thupi pen pawl pan in anuai abang ahihi.
(a)        Suangpi gam sungah innlehlo vilkik theihna ding.
(b)        Biakna tuallehmual bawl theihna ding.
(c)        A-laih galkapte in naakzang ah tai a hongsawlna thu hong khelkiksak theih nading in vaihawm ding.
(d)        Gamsung a om galkap peuhpeuh mai et maivilna, biakna lutna, supna a om leh Upa teng in tangpite tang in, tavuan lading.

Thaulawng nung kizui:
            Kawlgam sung pan in Japante kinang zolo in, mikang galkapte India gam zuan in hong nungkik uh hi. Kawlgam Zo galkapte a mau khua ciat ah amau thau ciat tawh kiciahsak phot hi. Japante khamtung ah hong tun madeuh sung in, Keli mangpa in, Levy kici mikang tual galkap hong phuankhia hi. Tua Levy galkap ding in, kawlgam pan hongciahsak zo galkap teng leh khuamite a tumsak hi. Khua mite sung pan in zong mikang kumpite piak laisen nei thaulawngte a nei ciat zuisak hi. Mikang gal lai in, Suangpi khua ah thaulawng 14 ki ap hi cih i thei hi. Tuate lak pan in, pawlkhat kisiau kik a, laisen tawh tawi theihna hongpia hi. Japan gal lai in Suangpi khua ah thau lawng 7 om lai a, tuate  anuai abang in kizui hi.
Tawng Phut thau, nambat 4T.  Khup Zen
Kop Ngulh thau,    nambat 7T.  Ngulh Zel
Tawng Nok thau,  nambat 492 T. Nok Za Cin
Tawng Tun thau, nam bat 493T.  Tun Za Thang
Tuang Neng thau,nambat 494T.  Dam Ngin
Son Khai thau    ………………………   Son Khai
Son Khai thau ……………………… Khai Thawng

            Tua thau zuite kilaihsak thei hi. Thau zuite bek hilo in, tual galkap mahmah ding in, a khua a khua pan kidong a, Suangpi khua pan in a nuai abang in ki tum hi.

Khup Sing, Lam Khaw Lian, Zen Khaw Thang, Am Ngin, Phut Khup, Nok Khaw LIan, Ngul Za Nang, El Za Thawng, Zen Za Nang, Ngul Dai, Nok Za Thang, Suangpi khua Levy galkap teng in, palatun khat phuan uh a, tua ah a nuai a bang in maikaihna kiseh hi.
 Pu Son Khai, Palatun commander.
Pu Nok Za Cin, Section commander.
Pu Khup Sing,   Section commander.

A nih veina Suangpi khua kisia:
1942 kum sung mah in, Japante in kawlgam sungteng lakkhat suah hi. A hih hang in khamtungah gal hong notto suak nailo in, hunk hat sung kawlgam sungteng ah, gal kithawi phot uh hi. Mikang galkap 17th Divisionte in, Tedim gam sung pan in, tawm vei sung, galnang lai uh hi. Kala galkapte Phaiphek mual, Leiisan mual, Sena mual, tang teng pan in, gal nangsak hi. Tua ahih man in Suangpi khua ah teen lai ding hi thei nawnlo ahih man in, mundang ah tailoh phamawh ta hi. Amasa in Tualzang ah tai ding kici a, khua Makaite leh A laih galkapte kiho na mah bang in kitai nawnlo hi. Galsung sasung ah, Suangpi khua nusiat loh pha mawh veve ahih man in, Suangpi gamsung Leiinging ah kum 1943 November kha sung in ki tai veve hi. Tua bang in pute pate ih a sisan a khua-ul uh tawh a phut uh Suangpi khua khat vei sia kik leuleu a, Suangpi khua a siam a sa tawh tui bang in ki nusia leuleu hi.

            Suangpi mi Thangkai pawl pan in zong, pawl khat hongciah in, a u a nau uh tawh hong kingawm uh hi. Pu Kham Cin leh Pu Zuan Khamte hong ciah uh hi. Gal ven ciang in, Pu Kham Cin in thangkai gam zuan kik in, Pu Zuan Kham in a lutang hong koih hi.

            Innsung bum ngua a ki pua zolo vanteng, khuakiim gam sungah kisel a, apuak zawh teng a zat tawm teng uh tawh kitai hi. Inn pi leh tuangdung dolcial teng khua tawh ki nusia hi. Khuatung pawl pen, khua pan makok lam zui in, Naaltaang ah tawmvei kibusa phot uh hi. Khuanuai pawl khua pan pai in, Taambem zau ah tawmveisung busa uh hi. Khuatung leh khua nuai, Lei Nging, Cinzang bual taw ah kituah in, tua mun ah khuasat in teeng uh hi.

Lei-Nging Cinzang khua:
            Japan gal sungin Leinging ah kitai hi kici ahih man in, teenna mun taktak pen leinging hilo in, Cinzang bual taw teng hizaw hi. Cinzang guam pang sukteng ah, ki teeng hi. Tua ah kha 3 sung kiteeng hi.

            Leinging teen sung pen galsung hun ahih mah bang in, lo kikho sing kipua lo hi. Tua ahih mah bangin khua mite in, mikangte gal lampi bawlsak in, mikang in an hongpia hi. Galkapte pai na’ng Tedim leh Thuamvum kikal motor lam kitawh sak hi. Thu ki zaksakna sikkhau lam kisial sak hi. Tua motor lam bawlna leh sikkhau lam sialna a,  a kuante mihing akuanna zui in nitha hongpia hi. A neu a lian numei pasal a mi zui in, antang buhtang leh ci hongpia in, nasepna thatang tawh kizui in, nitha dangka hong pia hi. Lambawl ciah pen lokuan vai ciah mah tawh kibang hi. Lam bawlte bek antang kipia hi a ki cih ciang in, naupangte nangawn sengah pua in, lam ki bawl pih hi. Nitak lambawl tawp ciang in, antang thoh in ngiahbuk ah kiciah hi. Pasal tangval leh ngaknu pawl inn khat pan in tha khatta kikhon in, a sikkhau lam uh vatsak hi. Tua sikkhau lam vat pawl pen a na sep na tawh kizui in,  ki nilehlo in gam sungah ngiak uh hi. A na sepna uh inn tawh a ki nai ciang in nileh uh hi. Khat vei sikkhau lam vat pawl Lenzang ciangah angiak ni zan un,  Gawza galkapte ngiahphual ah hong pai uh a, Suangpi ngaknute a mu hi. Suangpi ngaknute in niksiing teng uh a hih mah bang in tua gawza galkapte lungsim a tho sak hi.Gawza galkap nih khawng hi in, Rifle thau hongpua uhhi. Tuate in Suangpi ngaknu limci lihleh a muh uh ciang in, zawhtawh thu tawh a thau keek in, tua ngaknute a zol hi. Tua ciang in ngaknute in Pu Nok Khaw Ngin a ko uh hi. Tua ciang in Pu Nok Khaw Ngin in a khua ngaknute tua bang a zawhthawh thu tawh a zolsak man in, a thang a pai mahmah hi. A mah bek in lah tua galkapte a zawhloh ding thei ahih man in, pawldangte ko in “ Phut Khup aw Eng Khup aw kam thei peuh aw hong tai mengmeng ve un, kua lauloh ding hilo hi. A thau lawt satsat petmah uh hi,” ci in a kiko hi. Tua ciang in Suangpi tangvalte in a ngalnute uh kua mah pia nuamlo ahih mah bang in a ngaknute uh sahang kamsung pan a honkhia zo uh hi. Tua bang in Pu Nok Khaw Ngin in a khua mite a kep a cinna pan in, Pu Nok Khaw Ngin pen “ Lawtsetpa” pa ki ci a, Pu Nok Khaw Ngin in, tua bang min akipiak man in kipak tuam hi. A kipaak huai min a hi hi. Tua bangin  Suangpi khua mite galsung sasung ah a ki-hu a ki-dal uh hi.

            Leinging khua ah kha 3 kha 4 bang a teen sung in, lungdamna leh dahna a tuamtuam kisin man veve hi. Pu El Khaw Thang leh Pi Ngul Dim, Pu Thawng Ngin leh Pi Niang Za Cin te nupa suahna ki bawl hi. Pu Neng Kam leh Pi Cing Khaw Nem ( Khai Cin Zam ni) kiteeng sak uh hi. Pi Cing Khaw Nem in a pasal ding in Pu Neng Kam deihlo lua ahih man in a ki sih bawl niloh hi. Suangpi gam sungah ‘Ciinzang zangbual’ ci a, a ki lim khap mahmah tua ciinzang bual cik nawng sungah pai in, “ ciinzang bual aw mi in a ngilo a hangsan ci a, hong ngen hi ve teh, kei hoh hong duhlo nom, hongne ta peuh un,” ci in bual sungah lum in, kibual in, ki ap hi. Pi Cing Khaw Nem in a nget bang in, ciinzang bual in lungkim tak in a sang hi. Leinging pan khua ah ciah khit a sawtlo in, Pi Cing Khaw Nem hong sipah petmah hi.

            Leinging teen sung in Pu Awn Thawng (Thawng Do Pau pu), Pu Nok Khaw Zam tanu Ngai Do Zen, Vung Dim u Nu Ngoih Zam Cing, Pu Nok Khaw Ngin minsel Ciang Za Luan, Pu Khup Khaw Thawng ta nu Don Dim, Pu Phung Neng tanu Cing Khaw Hau, Pu Dam Za Thang nau pasal Pum Za Nginte si uh hi.  Naupangte, Phinthan ah kivui a, Pu Awn Thawng pen khua ah innkun ah phum phot in, khua ah ciah kik zawh galven zawh ciang in hoihtak in kivui hi.

            Leinging teen sung in Thang Khan Ngin, Ngul Do Ciang, Ngin Do Cin leh Ning Suan Vungte piang uh hi.

Leinging pan khua kizuan:
            1944 kum khua khal hun ciangin, Japan te khamtung ah hongkah to ta uh hi. India gam va la nuam uh a hi hi. Thangpi, Bawngkhawk, Thuamdung tengah Japan leh A Laih galkap te, nasia tak in hong kikap ta uh hi. A Laih galkap a si a liamte, Tedim panin India ah sun le zan kitawl nga lo in, kipuak ta uh hi. Gal bawl na ah Japante pen, A Laih galkap te sangin hang zaw siam zaw uh ahih manin, ALaih galkapte in lel zaw zek uh hi. Tua bangin, mikang kumpi galkap te gallel in galnung akik uh hi. Japan te in BawngKhawk pan A Laih galkap phualpi khat a hi, Hawpphual hong ngal kap a, a mepi tang te Hawp ah tu zo lo in, Suangpi gamsung luitawng teng hong tu hi. 1944 kum March kha sungin, A laih galkap te zuk khat ki suah in, India gam Imphal ah nung kik uh hi. A puak zawh loh uh galvan te mei tawh hal thamp khin a, March kha hun khuamui leh galvan halna mei khu te kikop in, khua leh lei amial sak hi. Tua khua khal hun khuamial tawh kizom in, khuami te lungsim zongin, a mial pih hi. Japan te khut sungah, Tedim mite kia dinga, Japan te tawh koici bangin ki bia in, koici bangin kinungta thong ding ih hiam cih ngaihsun in, ki lung mang mah mah ta hi. Bang hang hiam cih leh Japan te pen, citha zawhngeu bangin misa ne Ngal khawhang bangin kigen hi lo hiam. ut leh ut loh tawh kisai lo in, Tedim gam Japan te khut sungah a kia ta hi.

              Kum 1944 March kha ni 13 ni ciangin Alaih galkap te India gam, Imphal lam ah zuk khat in, tung khin uh a, khuamite guak sahang kam sungah hong nusia hi. Pu Phut Thang makaih na tawh, 1944 kum March kha 15 ni in, Leinging khua pan khua ah kiciah kik leu leu hi. Khua ah upmawhna sangin, khua inn le lo te, nasia takin kisia lo zaw ahih manin, nuamtak in khua inn ciat ah ki tum kik thei hi.

Pu Zel Pum kiman;
              Khua panin Leinging ah a ki tai ma-in, ih atsa mah bangin, Phaipheek mual, Leisan mual leh Sena mual tengah, A laih galkap te in, gal a pang uh hi. Galsung ahih mah bangin tua gal pan na khawngah kuamah kivak khol lo hi. Galkap te in a vak suk a vak to te manin, thu a sit uh hi. A muan mawh uh leh man pah uh hi.

              Pu Zel Pum pen, tua kawmkal ah, a sungh te khua Phunom ah, Khuado siim in va pai hi. Hong ciah lam ciangin, Phaiphek mual a galkap te’n thu na sit hi. Galkap te in, “ Japan te na mu hiam” ci in a dot ciangin, Pu Zel Pum in, “Aa,.. Japan te om mah; ko, u leh nau bangin, zu le sa ne khawm ung,” ci in, a zukam nam tawh a dawng khial hi. Galkap te’n Pu Zel Pum man pah in, Tedim thong ah a kem hi. India lamah galkap te a tai toh ciangin hong khah sak pan hi. Japan gal ven ciangin Pu Zel Pum in, Japan gal leh mikang gal thuah in, a tapa Lam Khaw Lian gal a ai sak hi. Pu Kop Ngulh mual (Tanglapna mual) ah zulup in, galmin a sial hi. Gal hizah sa hizah lak-ah, gal khutlum sa khutlum tawh ki mansuah lo, cih lungdam na sut mual ah ki lam ngei ngai hi. Tua mual lam na ah, Pi Ngaih Dim in hi bangin na ci hi.

“Ma tawh lawm e, sen a nun nuam simlei cimci a ham lai in, hi ci din’ ka nging lo e. zin hong leeng a tho hong leeng a siam in nen ham bang hon huai a, ih zua khua mual lum hi e.”

Tedim gam Japan te’n tutphah:
              A laih galkap te Imphal ah zuk khat ki suah in, nungkik uh hi. A laih galkapte a nawkik phet in, Japan galkap te’n hong tuh to pah pah in, Kum 1944 March kha ni 19 ni in, Tedim gam hong tutphah hi. Japan te a galphualpi uh, Falam pan Tedim ah tuah in, Falam Mangpi zum a nasem teng zong tedim Vuandok zum a nasem teng tawh a sung suam khin hi. Tua mikang kumpi nasem teng a zangh pah uh hi. Tua aki panin Tedim gam Japan te khut sungah a om tak tak hi.

              Tedim gamah Japan to te tawh vaihawm nasep na hong om a, Japan te muanna takpi tawh na sem pawl a hong om mah bangin khat le khat kilawt kikhait na om in Japan te khutlum tawh sih na beina pawl leh ngimna a tuam tuam hong om hi. Tua bang hunsung in, pawlkhat in mikang kumpi te bek mah muangin, mikang kumpi te vang a tangmi zong tampi mah a om hi.

Tedim Tual Galkap kidong;
              Kawlgam suahtakna deihna in, Bogyoke Aung San makaih na tawh Burma Independence Army (B.I.A) kici, Kawlgam suahtakna galkap kiphuan in, tua galkap te leh Japan te kithuah in, mikangte’ khut sungpan Kawlgam tawmvei sung hong sut khia zo uh hi. Tua khit ciangin, B.I.A pen, Burma Deference Army (B.D.A) kici Kawlgam a cing a kem cih nopna lim la in, galkap min hong laih uh hi. Tua tawh kizui in, Japan te laksa a gam gam ah tual galkap hong phuan khia hi. Tedim gamah zong, tua banglim tual galkap hong phuan hi. Tua tual galkap min pen Chin Deference Army (C.D.A) cih min pua sak hi. Tedim gam Tual galkap Makai pawl anuai a bang in kiciamteh hi.
U Lian Cin Thang,            Company Commander
U Thang Za Hau               Company Commander
U Khup Sa Vungh)
U Vungh Suan      )           Platoon    Commander
U Kim Ngin           )
U Pum Za Kam                  Instructor
C.D.A te’ galphualpi, leilum ah ki saat hi.
              CDA tual galkap dingin, ut leh ut loh tawh kisai lo in, a khua khua ah hong kidong hi. Suangpi khua ah, tua Japan galkap dingin, a zang a zang in ak khai don in kidong a, a nuai a bangin kitum hi.

Ngulh Zel, Zen Za Nang, Nok Za Thang, El Za Thawng, Phung Za Nang, leh Neng Zamte a hi uh hi. Suangpi CDA tual galkap teng lakah, Ngulh Zel in Sergeant (San thum) suangin, Palatun commander semsak hi ki ci hi. CDA galkapte, Japan dangka pek 60/, Makai te’n sangin, 30/, galkap nautangte sang sak hi. Phung Za Neng leh Neng Zam in, Japan galkap mang Inada an huansak hi. Suangpi te tua CDA tual galkap lakpan, Neng Zam bek cinatna tawh a si hi. Tua bangin kumkhat dektak sung tual galkap nasep sem uh hi.

              Tua Japan galkap CDA te nasep tavuan pen, Japante’ ngahsa na gamteng amau leh amau a kem sak ding leh, India gam a tun        ```````````````````` ciangin, lam hilh ding thu kansim sak ding cih te a hi hi. A sep tak tak ciangun, Japan galte thu lamsang gungal a laih galkap te lamah tun zaw uh hi. CDA lapi ci in ki thangsak mah mah a, tua pen a nuai a bang a hi hi.

“ Japan galkap C D A te, sakam kei bang hang leh kilawm e, Sakam kei bang hang leh kilawm, gualtung va bang tuang leh kilawm e.”

               Leitung galpi khatna ah, England kumpi in, a siah gam khempeuh ah, galkap hong dong hi. Tua gal pen Piancit gal ki ci a, Piancit pai ding te, a zang zang in, aak khai don in, a kidong uh hi. Japan galkap CDA ding zong, tua bang mah in ak khai don in a kidong uh a hi hi. Tua CDA te pen a si ding bek a ki seh ahi hi. Khuapan CDA galkap ding a a pai sak te uh, a si leh khua leh tui in vui ding a, innmun logam zong a beh sung pan a deih deih na telsak in, kuli aana kimaap sak ding ci in kamciam ki pia uh hi ci hi. Tua hi napi in, Japan aak khai Neng Zam a sih hang in, Suanzong u leh nau in hi ta leh suangpi khua leh tui in hi ta leh a kamciam na uh bangin kuamah in hong vaihawm sak lo uh hi ci in Pi Huai Nem a phun phun lai hi.

Sik-kangte’n gaalphuak.
               1944 August kha sungin, Japan te, Ngawmual leh Phaiphek mual te ah hong kiphual uh-a, tua panin, mak leuh leuh ciangin, khua ah galvil hong pai thei zel uh hi. September tha sung ni khat ni in, Pi Nian Vung (Don Nem nu) Dimlo ah pai hong ciah leh Phinthan ah Japan te kiphual hong tuak a, tua thu inn ah a gen hi.

               Pu Tuang Ngul tapa Dam Za Cin pen, Kawlgam mikang galkap khat hi. Japan gal hong khan ciangin, Kawlgam sung, Nianglibin ah, Japan tawh kikap na ah asi hi. Tua ahih manin, Naulak te Tawng Phut thah in, Japan te tungah ‘thaam’ kisa in, tua Dam Za Cin phu a zon nop mahmah laitak in, Japan te tua bangin Suangpi khua daaiteng ah hong ta lui lam hi. Pi Nian Vung tungpan, Japante khekhap a zak ciangin, a u a nau hilh lo in, Sik-kang te unau teng in sawng beng dingin a kithawi uh hi. Suangpi daaiteng a hong ta, tua Japante vakhum dinguh a hi hi. Zing Sang ciangin Phulum taak dingte bangin, a kithawi thap thap uh hi.

               September kha ni 24 ni zingsang khuavak ma hunin, tua Japan te phual-ah va kuan uh hi. Pu Phut Za Cin in Keli mangpa piak Rifle thau-tawi in, Pu Thual Khai in, Phut Za Kap thaukaa, Pu Khup Khaw Thawng in, Pu Phut Za Cin thaukaa, Pu Khup Zen in Pu Tawng Phut thau, tawi ciat in va kuan uh hi. Pu Phut Za Cin leh Pu Khup Zen in, inn lam pan a pang uh hi. Pu Thual Khai leh Pu Khup Khaw Thawng in, Thawng Phut mual lampan in hong hawl ding a hi hi. Pu Phut Za Cin leh Pu Khup Zente, ciangah a tutkhit ciangin, Pu Thual Khai te pai in, Pu Tuang Tun mual ah pai inn , tua pan tham zui in  pai suk a, Phin Ngai Nem te innmun pan, Japante huu ngai ngam phot uh hi. Tawmvei sungin, Japan te khat, Tedim lamah hong pai phei sa sa mu uh hi. A hih hangin, kaplo in pai suaksak in, Thual Khai in, Japan te a phual ah va ngem phei in, Khup Khaw Thawng in tua mun pan, a buk hi. Japan te omzia a hoih tuak leh, a nih un, Japan te a phawng nuam uh a hi hi. Thual Khai in Japan phual lamah, lamtung singlak zui in, pai in va ngem a, lam nga na dongah, va nai hi. Phalbi sung ahih mah bangin, khuadam a, Japan te meiphual kiim ah, mei awi a om, a mu hi. Japante tuabang a mei awi a om a muh ciangin Thual Khai in a lawmpa a sap kik ding ngaihsun nawn lo in “Ka naupa hong thah sak hite hilo hiam ka tuptup ka sawm sawm hi hi ngaw ngaw hi” ci in a thau kek in a liangah nga in a kap suk pah hi. A ki zom in, tangkhat tawh a nawlh beh hi. Tua Pu Thual Khai thau gin lawng nih a zak khit ciangin Pu Khup Khaw Thawng zong, thau gin na lam ah, lamtung singlak zui mah in, a delh phei leh, Pu Thual Khai ii nuai lamah a suak phei hi. Tua hunin, zingsang khuavak ngilngial hun hong hi zo ta hi. Pu Khup Khaw Thawng a tun ciangin, Japan te huu en in, a ngaih leh Japan te nih khat ii nungah khat in a khut peek nga in, a om a mu hi. Pawlkhat ahih leh, cina tau bangin a humham ngam ngam leh a pau bual bual aw a za hi. Pu Khup Khaw Thawng zong, Sepi kung khat bel in, khatpa ii khutpeek a ngakna a sibin santak ngiim in, a tangpi tangkhat tawh a kap hi. Tua zawh phet in, a saklam pan, Pu Thual Khai in, lawng khat tawh a kap leuleu hi. Tua thau gin na lam, Pu Khup Khaw Thawng in a et toh leh, a khut taklam tawh leidom in, a veilam khut, awntawi a, Pu Thual Khai, Tun Awipu mual lamah, a sialbun sa-a, atai to suam suam mu in, a gallu tan ding nusia in, a nungdelh to hi. Tun Awi pu mual lampi pan in pha a, “U khai, U khai, ci in a sap leh Pu Thual Khai in nunghei in ngak a,” Thawng aw, ka khut hong hi ci thong tua hi kei leh, a vekin, kaplum siat ning ka cih hi.” A cih kawm in, a veilam khutpi tangkhat ciang-a, a kitan a lak hi. Pu Khup Khaw Thawng in, a dial baltham in, a u pa khutpi tuamsak in, Tun Awipu mual pan khuatung lam zui-in, tuhun Khan Thawngpu mual pan Pu Tuang Ngul mual lam ah, a taipih suk hi. Tua a tai sukna ah, Pu Khup Khaw Thawng in, a khe hek sawnsawn hi. Pu Khup Khaw Thawng in a u miliam, inn lamah ciahsuak sakin, a mah’n Pu Phut Za Cin leh, Pu Khup Zen te va sam hi.

             Pu Thual Khai leh Pu Khup Khaw Thawng te’n, tua bangin Japan te va nai in, lawngli tak tawh a kap dong in, Japan te in thukpak lo uh hi. Pu Thual Khai leh Pu Khup Khaw Thawngte a taizawh Tun Awi pu mual a tun zawh ciangin lawng tawh thuk pan hi. Tua bang a, Japan te-in, a thuh pah loh uh thu ih et ciangin, tua Japan te-in, Kawlgam sung, Nianglipen a, a thah sak uh Suangpi te, Dam Za Cin khua ahih lam phawk kha lo uh ahih mah bangin ngaihmuang in a om khial uh hi. Upmawh lo pi a tua bang a, a ki uapna teng tawh bangmah ngaih sun man lo hi leh kilawm hi. Thamlo in, koi lam pan, hong kikap cih zong khentel thei pak lo hih tuak hi.

               Sik-kang te in, a tup a deih bangun, tua mun ah gaallu tan zo lo uh hi. Ahih hangin, si leh nai suah zo uh hi. Tua ni a zing ciangin, Daammual pang dumkom sungah Japan te nih a sidek tak a, cina a om Dimlo pan hongpai Vungh Za Khup te’n mu uh hi ki ci hi. Sikkang in ahih leh Pu Thual Khai ii veilam khutpi dawn, mansuah hi. Tua banga a liamna pen, Pu Thual Khai thaukaa, a veilam khutpi tawh a letna pan, a kitap hang a hi hi. Galkap nading-a, thau tang bawlpa pen, Pu Khup Khaw Thawng hi a, a khauhsem a bun sem dingin a deih luat manin thaupi hui (3inch. Motor tang lawtna thaukaa tanghui) tam hel lua khial a hih hang leh a thaukaa mahmah zong, pan lua zo ahih hang a hi hi. Miliam Pu Thual Khai pen, Ngalo Pu Lam Pum lobuk ah, sel in, Pu Thuam Zam leh Pu Phut Za Kap te-in, a liam ma bawlin kem uh hi.
               Hih bangin, Sikkangte’ galphuak na huhau in, tua ni a kipan in, Japan te pen, Suangpi te’ gaal taktak ki suah hi. Tua mun tektek ah, gallu a ngah kei hangin, tua ah, Pu Phut Za Cin in, Japan te khat that hi ci in, Suangpi khua S.I.A tang thu ah ki ciamteh hi.

Gaal in hong vel.
               Tu zan in, Sikkang te-in, Phin than ah gal va gu hi cih thu, khua sungah a ki phawk ciangin khuasung ki ling sipsip hi. Sikkang te galphuan pen, Suangpi te’ gal phuan a hih thu khua upa vaihawm tengin a thei kim uh hi. Tua bangin Suangpi te’n Japan tungah, a khutlum a nga zo ahih ciangin, khuasung upa vaihawm teng ki kaikhawm in, tua Japan te a phual mah uh ah om lai hiam om nawn lo hiam cih en sim dingin, Pu Phut Za Kap te pawl khat a paisak hi. Tua te pai zawh diak ciangin, Don Nem te innpan kipan in, Japan te thum inntang sik in hong vak hi. Tua bangin, Japan te hong vak ciangin “ Khua ah, Japan te om hi, hong ciah nai kei un,” ci in, galvil Pu Phut Za Kap te ki zasak pah hi. Tua bangin, Japante hong vak ciangin, khuapih te pawlkhat in, “khuanuaite hangin, ih khua lal ding hi; bang hang a, khua nuai te in amau thu bek tawh tua Japan te va no se uh hiam,” ci in, khuanuaite mawh siatna kam a ki zak dongin, ki patau pian hi. Japan te in inn tang sik in hong ban sit khit ciangin, khuanuai Sikkang inn ah hong khawl uh hhi. Tua ah, khuasung upa pawl khat in, muak in, Japan te thudot khempeuh a siam tawpin a dawng uh hi. Tu zan a hong kapte a ngawng at sak ding hi ung a cih na bang kek in, Japan Mangpain, a namsau dawkin, Thawng Khan Dal leh Ngul Ngo Lian te’ deek ah, a ngat van van hi. Khua papi te in tu zan a no hongkap te pen Englik te hi in, Dim lam pan hong pai in, Dim lam mah ah, ciah kik zo uh hi ci in, a khut uh tawh bang tawh lak in, a khem uh leh Japan ten taksang pah hi. Tua laitak in, gaal phuak pa Thual Khai ahih leh Ngallo ah a om ngi nge hi.


               Khua sungah, ki itna lian in, khat leh khat kimuan na om a hih manin, khuavai tuivai ah, kipum khatna om a, tua gal bawlsim na thu phual sel zo uh hi. Tham lo in, Sikkang te gal bawl thu khua leh tui in kip sak in, gal kuan dingin, ki pan ta uh hi.

*******************************************
Suangpi Mualsuang Laibu in Zomite ading a manpha mahmah Mualsuang ahihna tawh kizui in Zomi eLibrary / Laibusaal in, hanciam in a-ki teikik/type kik ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: SUANGPI KI-UK GAM THU Khen Thumna. LEINGING TAINA THU. (Suangpi Mualsuang Laibu) Description: Rating: 5 Reviewed By: Cinpu Zomi
Scroll to Top