728x90 AdSpace

Hot
Menu
Zon-ol na Donate

Latest News

UNITED PENTECOSTAL CHURCH TANGTHU ATOMIN. Agelh - Rev. Khen Za Sian B.A (Th.)

UNITED PENTECOSTAL CHURCH TANGTHU ATOMIN
Rev. Khen Za Sian B.A (Th.)
UPC Biak Innpi. Tedim, Zogam

United Pentecostal Church pen September 1945 kumin a hong piangkhia hi. A phualpi pen St. Louis 8855 Dunn Road, Hazelwood, Mo.63042-2299 U.S.A ah om hi.

I. A HONG PIANKHIATZIA
Kum zabi 20na kipat tungin Kha Siangtho baptaizna a ngah mite leh a deih mite ahi zongin, kam tuampau a zangte nakpi takin kibehlapin khang mahmah hi. Tua bang mite in Kha Siangtho nasepna a sang zo lo pawlpi tuamtuam panin hawlkhiatna a ngah uh hi.

Amaute in mapang khawma sep khopna a hoihna thu leh a kisap lam a phawk uh ciangin April 2-12, 1914 kumin Arkansas Hotspring (USA) ah thu kikupna a nei uh hi. Tua munah Assembly of God (AG) pawlpi a phuankhia uh hi. Chairman pen E.N. Bell hi a, Secretary pen H.A. Goss ahi hi. Tua hun laitakin AG pawlpi in thulet guipi nei tuam tuan lo uh hi. Form khat bawl uh a, tua pen pawlpi lutna a hih kei leh pawlpi mi hihna in a zang uh hi. Tua form sung banga gamta zote pen full member in a sang uh hi. Tua hun laitakin upna laigil (Article of Faith) kician zong nei lo uh a, upna leh Kha Siangtho kimakaihna (kamsanna or thuphuan) tung bekah a kinga uh hi.

E. N. Bell in thungetna tawh Lai Siangtho a kan ciangin, Pasian khat bek om a hih lam leh, tua Pasian in Jesu a hihna thu a mukhia hi. Tua bek hi loin, Pentecost Pawi ni a Peter nasepna a hi Sawl.2:38 “Na mawhnate uh kisikkik unla, na vekpi un, na mawhnate uh a kimaisakna dingin Jesu min tawh ki baptaiz un,” cih kammal a muh ciangin, im zo loin ong  genkhia hi. Tua bang thu a gen ciangin mi tampi in um-in tui a kiphum uh hi. Tua banga Pasian khat bek om a, tua Pasian in Jesu hi, ci a Jesu min tawh tui a kiphum khempeuhte pen AG sung panin kihawlkhia a, tuate lakah E.N. Bell leh H.A. Goss zong a kihel uh hi.
Tua upna in gam khempeuh zelin a hong kithehthang tak ciangin, a upna uh a kibat uh hangin kizopna kician nei nai lo uh hi. Tua banga upna neite khempeuh in ma pang khawmin nasep khopna in a hoih mahmah ahih lam hong theih tak ciangun Sept. 24-25, 1945 kumin Pentecostal Assemblies of Jesus Christ(PAJC) leh Pentecostal Church Incorporated (PCI) kigawmin “United Pentecostal Church” pawlpi a hong phut khia uh hi. Upna thu tawh kisai-in a hih leh Sawltak masate kalsuan dan ahi Sawltak Laibu banga kalsuan dingin a thukim uh hi.

II. KAWLGAM SUNGAH
1964 kumin Saikah khua ah UPC pawlkhat a na om khin uh hi. Tua kumin Rev. Ngul Kam makaihna tawh Bungtang khua leh Ngalang khua ah UPC a na om khin uh hi. Tua hun pawl mahin Sawbwayeshin khua ah Sanglura pawl zong a na om uh hi. Khampat ah zong tawm omin, Letpanchaung ah zong mi 70 khawng mah na om hi. Hih bang teng tawh Kawlgam ah hong kipan hi.

Rev. J. Ral Buaia pen India gam panin Lai Siangtho Sang  kah a man khit ciangin, 1973 kumin Zangkong a hong tung hi. Tua hun a kipanin Kawlgam kumpite’ theihpihna a kingah hi. Kawlgam ah UPC Phualpi pen: No.20 Kominkochin Avenue,
Shwegondaing, Bahan G.P.O Box 228, 
Yangon, Myanmar

Tua hun a kipanin Kawlgam sung khempeuh ah hih thuman thutak kizelin, tu laitakin Kawlgam bup ah district 7 in kikhena, tuate in:
1. Halkha District
2. Tedim District
3. Falam District
4. Tahan District
5. Kalaeymyo District
6. Yangon District
7. Kabaw Valley District- a kicite a hi hi.

Tua lo a dang pen Kachin gam leh Shan gam ah zong kinei hi. Siakhawk 27, khua 137 pha hi. License nei mi 173 pha a, ordained ngah mi 20 pha hi.

III. TEDIM MITE SUNGAH
1953 kumin kipanin Pu Vai Za Dal pen UPC na suak khin hi. A hih hangin ama omna munin zil lo ahih manin, Tuiphum Pawlpi ah a na om hi. Sia Dam Khan Hang zong galkap sunga aom laitakin August 24, 1985 kumin Zangkong ah Jesu minin tui a kiphum hi. S. Ngo Khaw Nang leh Vung Khaw Gin zong Jesu minin Zangkong ah tui a kiphum uh hi. Rev. S. Ngo Khaw Nang, B.A (Phil.) in hunbit nasem dingin a hong kipan hi. Amah pen Tedim mite sungah hunbit nasem masa pen hi. 1978 kumin Sia Vung Khaw Gin in ama pianna khua Suanghoih ah hong ciah toin pawlpi hong phutkhia hi. Tua pawlpi pen Tedim mite lakah a masa pen hi. Tua kum mahin Rev. S. Ngo Khaw Nang in ama pianna khua ahi Mualnuam ah pawlpi a phutkhia hi.

1978 kum pen Tedim gam adingin a ciapteh huai mahmah a hihna tampi a om hi. Bang hang hiam cih leh, kha khanlawhna a pian kum ahi hi. Tua bangin kha khanlawhna a pian ciangin ‘sawlna’, ‘kamsanna’, ‘thuphuan’ cih peuh hong tam zelzul ciangin, kha lamah lawpna a neite pen pawlpi a tuamtuam panin kihawlkhia a pawlmin nei nawn lo uh hi; amaute ‘khami’ a kici uh hi. Tua khamite’ sung panin Myo-uk Dai Khan Pau leh G. Khen Za Sian te in pawlpi khat peuh tawh kizop lohin hoih lo ding hi, ci-in Zangkong ah kizoppih ding pawlpi a zong dingin a pai suk uh leh, UPC tawh kituak pen hang, ci-in UPC ah  a lut pah uh hi. A hong ciah uh ciangin G. Khen Za Sian in ama tenna khua ahi Sawbwayeshin ah April 4, 1979 in pawlpi phut a, zang gam a om Tedim mite’ sungah UPC a din masakna pen ahi hi. Myo-uk Dai Khan Pau zong Tedim a tun toh ciangin, April 1979 kum mahin Tedim ah UPC a phut hi. 1979 June kha a kipanin G. Khen Za Sian pen India ah Lai Siangtho Sang va kah a, 1981 kumin ‘Diploma Certificate’ tawh hong ciah hi. UPC sung a om Tedimte sung panin Lai Siangtho a zo masa pen ahi hi. Hih bangin Tedim mite sungah UPC upna hong khang semsem a, tuin biakna picing mahmah khat hong hita hi.

UPC TE’ UPNA LAIGIL
Thu Masa: Lai Siangtho pen Pasian thu taktak leh bangmah khialhna a om lo, Pasian Kha Siangtho hansuahna (inspired) tawh ki-at hi, ci-in a um hi. “Pasian in a kam tawh hong piak Lai Siangtho sunga om khempeuh in Pasian mi in kicinga, a hoihna pawl pawlte a sep theihna dinga kigingkhol mi a suahna dingin thu hilh ding, mawhna lak ding, dikna ding thu hilh ding, leh thuman thutak hilh dingin thupha a bawl hi” (2 Tim. 3:16).
Lai Siangtho bekbek thunei dingin Pasian in mihingte a piak hi, ci-in san ding ahi hi. Thuhilhna ah ahi zongin, upna thu ah ahi zongin, lametna ahi zongin, pawlpi sunga kimakaihna leh, thupiakna khempeuhte in Lai Siangtho tawh kizomin kituak ding hi. Mi khempeuhte in a sim ding leh, a omna khempeuh ah simin a sin theih ding ahi hi (John 2:27). “… Pasian’ kamsangte’ thu in mite’ deihna bangin a hong tung ngei kei hi. Kha Siangtho’ hansuahna a ngah mite in Pasian kiang pan a ngen sawn uh hi” (2 Peter 1:2-21).

UPNA GUIPITE (Articles of Faith)
I. Pasian khat bek (The One True God)
Lai Siangtho in a hong hilhna bangin, a tawntungin a nungta Pasian khat bek a om hi, ci-in i um hi. Na khempeuhte tungah thuneihna a nei a siangtho, a deihna, a ngaihsutna leh, a geelnate kicinga, khentuam theih loh Pasian ahi hi. Tua Pasian in na khempeuh a bawlna panin Thuciam Lui hun in Pa in hong kilanga, hong hotkhiatna dingin Tapa za-in vangliatna tawh na hong sepna ah Kha Siangtho in hong kilang hi, ci-in i um hi, (1 Kor. 8:6; Efesa 4:6; 2 Kor. 5:19; Joel 2:28).

Lai Siangtho in Pasian a om lam i theih nading bekin hong gen lo a, tua Pasian um a  a sang mite in leitung panin tua Pasian theithei bek tham loin, ama kianga teng den dingin thu hong ciamna zong hong kilangsak hi (Rom.1:19-32; 12:15). Pasian in pumpi ci leh sa nei lo ahih manin, leitung mit tawh a kimu thei hi lo hi. Tua ahih manin bul leh tawp a nei lo Kha a hi hi(John 4:23). “Kha in guh leh tang, ci leh sa nei lo hi” (Lk. 24:40).

Thukham a lianpen Jesu in a genna ah, “Thukham a lian pen in, Israel mite aw ngai un, eite Topa i Pasian in Topa khat bek ahi hi.” (Mk. 12:29; Thu. 6:4). “… mi khempeuh tungah a om, mi khempeuhte Pa ahi Pasian khat bek a om hi” (Efesa 4:6). Hih Pasian in Thuciam Lui hunin nam tuamtuam a a kilatna a om mah bangin, leitung ah a hong pai lai takin zong, Mihing Tapa in a hong kilang hi. Vantungah a kah toh khit ciangin Kha Siangtho in eite tawh a hong khawm hi.

II. Pasian Tapa (The Son of God)
Lai Siangtho Lui sunga a kigen in Pasian khat hi a, tua pen Jehovah ci-in kithei hi. Tua Pasian pen Tapa in hong pai a, nungak siangtho Mary tung tawnin a hong suak hi. Paul in a genna ah : “Pasian biakna thu thukpi pen bangzahin lian hiam cih nial nading a om kei hi. Amah in pumpi ah kilang hi, a thumanna Kha Siangtho tawh a kilang hi. Vantung mite in a mu uh hi. Mi khempeuh lakah a thu kihilh hi. Leitung khempeuh ah a thu ki-um hi. Vangliatna tawh vantungah laktohna a ngah hi (1 Tim. 3:16). “Amah in ama mite kiangah hong pai-in ama mite in amah a sang zo kei uh hi” (John 1:11). Tua Pasian khat pen ci leh sa la a leitungah a hong pai pen in Zeisu ahi hi, cih i thei hi, Tua thu in Pasian in Khris sungah om a, leitung mite’ mawhna ciamteh loin, amah tawh kilemsaka, tua kilemna thu kote hong pia hi(1 Kor. 5:19).

Topa Jesu sungah Pasian hihna khempeuh kicing hi, ci-in i um hi (Kol. 2:9). Na khempeuhte ama sungah a cinna in Pa deihna ahi hi (Kol.1:19-20). Jesu pen ci leh sa lam panin biakpiakna a piak dingin tuuno ahi hi. Tua in Pasian leh mihing kikalah hong kikham hi. “… Pasian khat bek om a, Pasian leh mite kikalah mi mah ahi a kikham Jesu khat bek a om hi” (1 Tim. 2:5).

Jesu in a Pa lamah Kha hi a, a nu lam panin mihing ahi hi. Tua ahih manin “Pasian Tapa, mihing tapa, Pasian mi” hi cih i um hi. Na khempeuh a khe nuai ah koih hi, cih pen Lai Siangtho sungah om hi. N khempeuh khia hi (koih) hi a cih ciangin, na khempeuh a khiasakpa Pasian om lai lai hi cih kitel mahmah hi. Na khempeuh Jesu Khris nuai ah a khiat khit ciangin, a mihing hihnate bei siangta ding ahih manin, tapa ahihna in Pasian ukna mang ding hi. Tua khit ciangin Pasian ahihna in na khempeuh tungah na khempeuh ahi ding hi (1 Kor. 15:27-28).

“Keimah in Alpha leh Omega ka hi hi…. tu lai takin a om, tunung ciangin a hong pai ding, a vanglian Pasian in ci hi” (Mang, 1:8). “Lau kei in, Keimah in a masa bel leh a nunung bel ka hi hi. Nidang lai in ka sih ngei hangin, en in, tuin a tawntungin ka nungta a, sihna leh sihna gam kong honna ka nei hi” (Mang. 1:18).

III. Min (The Name)
Pasian in ahih leh a sepna tawh kizui-in min tuamtuam a nei hi. Jehovah-Ellohim= Na khempeuh a bawl Pasian cihna hi. Jehovah-Elsadai= Na khempeuh a hih thei Pasian, cihna hi. Jehovah- Adonai= Topa Pasian, cihna hi.

Jehovah cih kammal pen Thuciam Lui hunin hotkhiatna tawh kisai-in a zat uh Pasian’ min ahi hi. “… eite adingin naungek khat hong suak a, eite tungah tapa khat hong kipia hi; ama liangko tungah ukna om dinga, ama min Lamdang, Thulakpa, Vanglian Pasian, Tawntungpa, Nopsakna Kumpi, a kici ding hi” (Isaiah 9:6). Kamsangpa genkholhna pen Jesu a hong suah ciangin a kicingin kimu hi. “Amah in tapa a nei ding hi. Tua Tapa in Ama mi pawlte mawhna sung panin gumkhia ding ahih ciangin a min Jesu na phuak ding hi” (Mt. 1:21).

“Tua mi simloh midang tungah gupna thu a om kei hi. … ama min simloh eite gup nading vannuai mite lakah a hong pia ding min dang khat beek a om kei hi” (Sawl. 4:12). Tua ahih manin Pasian’ min pen Jesu hi, ci-in umin, a kisang hi.

IV. Mihing Piansakna leh Pukna
A cilin Pasian in mihing pen a siangtho, kihhuaina bangmah nei loin hong bawl hi. Ahi zongin Pasian thupiakna a zuih loh manun, mihing masapen ahi Adam leh Eve te in amau sianthona leh a kicinna mun panin a puk uh hi. Pasian in Eden huan sung panin hawlkhia hi. Tua ahih manin mihing khat thuman lohna hangin, leitungah mawhna hong lut hi (Pian. 1:27; Rom. 3:23). Tua ahih manin mi khat hangin leitungah mawhna hong tunga, tua mawhna thaman in sihna ahi hi. Mi khempeuh mawh khin ahih manin, mi vannuai khempeuhte tungah mawhna thaman sihna in uk hi (Rom. 5:12).

V. Kisikkikna leh Kikhelna
Hehpihna leh mawhna maisakna man tak pen lungsim taktak tawh mawhnei i hih lam kiphawka, kisikkik a, i mawhnate nusia in Jesu i up ciangin kingah thei bek hi. Mihingte in Topa Jesu i upna hang bek in diksakna a ngah thei i hi hi (Rom. 5:1). Baptaizpa Johan in mawhna kisikkikna thu hilh a, Topa Jesu in zong kisikna thu na gen hi. Jesu nungzuite in zong kisikkikna thu pen Judah mite leh Jentelte tungah nasia takin a na gen uh hi (Sawl. 2:38; 11:18; 17:30).

Kisikkikna cih kammal pen paubul lam panin a deihna bulpi in Pasian deihna tawh kituak lo, ngaihsutna, gamtatna, duhna, deihnate khempeuh panin Pasian kiang zuana Ama deihna banga nuntakna hi hi.

Jesu in, “Note zong na mawhna uh na kisikkik kei uh leh, amaute bangin na kisia khin ding uh hi” (Luka 13:3) a ci hi. “Ama min tawh kisikkikna thu leh, mawhna kimaisakna thu Jerusalem khua a kipan mipawl khempeuhte kiangah a kigen ding hi” (Luke 24:”47).

VI. Tuiphumna (Water Baptism)
Lai Siangtho in a hong hilhna bangin tui sung teekteek mah  ah kiphum ding ahi hi. Tua bang a kiphum dingte pen a mawhna kisikkik takpi a, tua mawhnate taisana, leitung ci leh sa deihna nusia nuam taktakte ading ahi hi. Lungdamna thu a gen thei dinga Pawlpite in license a piakte bek in a phum thei ding uh hi. Nungzui masate in a sep dan bangmah un Jesu um a, a sangte bek Jesu min tawh tui sungah phum ding ahi hi (Sawl. 2:38; 8:16; 10:48; 19:5,6). Matt. 28:19 sunga Jesu genna pen vaikhakna hi a, Jesu in a gen banga gen sawn kawikawi dingin thu pia lo ahih manin, a deihna bulpi in Pa min, Tapa min, Kha Siangtho min, na ci teektek ahi manin, tua a min in Sawltak masate’ zat ahi Jesu min ahih manin, Jesu min bek lo a tuiphum ding ahi hi.

VII. Kha Siangtho Baptaizna( Baptism od the Holy Spirit)
“Amah in Kha Siangtho leh mei sungah hong baptaiz ding hi” (Matt. 3:11). Topa Jesu in Sawltak 1:15 ah, “Ahih hangin a sawt loin, note in Kha Siangtho tawh na ki baptaiz ding uh hi,” ci hi.

“… amaute khempeuh in Kha Siangtho tawh kidimin, Kha Siangtho in thu a piak bangin kamtuam tawh thu ahilh uh hi”: (Sawl. 2:4). Kha Siangtho baptaizna, Kha Siangtho tawh kidimna, Kha Siangtho thupha cihte pen a tuam ciat ahihna leh, Kha khat pana hong luangkhia ahihna pen Lai Siangtho i et ciangin kitel mahmah hi.

Mi khempeuh in Kha Siangtho neihna ding thu pen Lai Siangtho’ hong genna leh a hong hilhnate lak panin a thupi penpen ahi hi. Tua ahih manin Kha Siangtho baptaizna, Kha Saingtho tawh kisimna, Kha Siangtho in thu a piak banga kamtuamtuam a paunate neih ciat ding ahi hi.

Kamtuam tawh pauna pen Sawl.2:4; 10:46; 19:5,6 sungah kician takin kimu thei hi. Korinth Masa a lian 12, 13 sungah zong kimu thei hi. Hihte khempeuh a piapa a kibang hi a, a zatdan leh a zatzia a kilamdang bek ahi hi.

Pasian in a kamsang Joel zangin hih bangin na gen khol hi: “… Mi khempeuh tungah ka kha ka bua ding…” (Joel 2:28). Peter in zong, “Pasian ziat lamah phatna ngah a, Pa kiangah Kha Siangtho kiciamna a ngah khit ciangin, note’n na muh uh nate ong bua zo hi,” a ci hi (Sawl.2:33). “Kiciamna in note leh na tate uh ahi zongin, a gamla a om Topa Pasian in a sapsate khempeuh ading ahi hi” (Sawl. 2:38).

VIII. Thuhilhna leh Upna Laigil (Fundamental Doctrine)
Hih Pawlpi thuhilhna leh upna laigil pen Lai Siangtho in gupkhiatna bucing (full salvation) a cih pen mawhna kisikkikna, mawhna maisakna dinga Jesu’ min tawh tui kiphumna, Kha Siangtho baptaizna ngah hi cih kitelna a hi, Kha Siangtho in thu a piak banga kam tuamtuam paunate ahi hi. Upna lam kipumkhatna a khenkham thei ngaihsutna kibat lohnate nuasia in, upna lama kipumkhat a i om matengin, lungsim kikhata om tawntungna dingin kihilh ding ahi hi.

IX. Cina Damsakna (Divine Healing)
Pasian in Moses zangin Israel minamte Izipt gam panin a paikhiat khit ciangin, Jehovah Pasian in thuciam a piak masak penpen in ‘cina damna’ (covenant of healing) ahi hi. “Note in na Topa Pasian thu kimtakin na ngaih uh a, ama mai ah a man nate hihin , ama thupiakte don a, ama ngeina kipte khempeuh na zuih uh leh, Izipt mite tunga ka tunsak natnate khat beek kong tungsak kei ding hi; bang hang hiam cih leh, keimah in Topa, note a hong damsakpa (Jehovah Rapha) ka hi hi,” a ci hi (Pai. 15:26).

Pasian in a hong damsak zato mangpa hi a, leitung khempeuh ah a hoih leh a pha penpen Topa ahi hi. Topa Jesu in leitungah a om lai-in, mun tuamtuam ah mi tampi a damsak hi (Matt. 4:23, 24).

Jesu in zan ni, tuni, a tawntungin kikhel ngei lo hi (Heb. 13:8). Topa Jesu’ hong thuaknate in  i kha ading bek hi lo a, pumpi ci leh sa ading zong ahi hi. “Eite khialhna bangin amah kiliamsak a, eite mawhna hangin amah kisatnim hi; eite hong damsakin a hong thuhilhna ama tungah om a, ama liamna tawh eite i dam uh hi” (Isaiah 53:5; Matt. 8:17; 1 Peter 2:24).
Pasian hong damsakna in a hong gupkhiatna tawh kithuah pah hi, cih tel takin i thei hi. Hih thu pen tu hun adingin zong kip lai hi. Topa Jesu in, “Cinate tungah a khut uh a ngak ciangun amaute a dam ding uh hi,” a ci hi (Mk. 16:18). Jeim in Khristiante tunga a laikhakna ah, “Note lakah cina a om leh, pawlpi upate sam hen. Tuate in Topa’ min suangin cinate sathau tawh zutin, amaute aa dingin thungetsak uh hen. Tua bang na bawl uh leh upna hanga thungetna in cinapa a noptuamsak ding hi,” a ci hi (Jeim 5:14, 25).

Hih Topa kammalte in tuhun donga pawlpite a ding ahi hi. Pasian in na khempeuh bawl thei in mi sisa nangawn a thosak thei hi.

X. Nekkhawmbawlna Thu ( Holy Communion)
Topa a kimat ding leh a kilehhek ding zanin, Paisan Pawi a bawlna uh ah, ama nasepna-in a tawntunga i sepdan ding thu a hong piakna hi . “Hih khomun in note adinga hong kipia keima pumpi a hi hi. Kei nong ngaihsutna dingun hih bangin na hih un. Hih hai note adinga kibua, kiciiamna thak a lak keima si ahi hi, a ci hi (Lk. 22:19-20). “Hih khomun in keima pumpi ahi hi; la unla  ne un. Hai zong la-in, Note’n na vekpi un dawn un; mi tampi’ mawhna kimaisakna dinga kibua, keima sisan tawh kiciamna thak ahi hi,” (Matt. 26:26-28). Sawltak Paul in zong Khristiante zat ding ahih lam a na gen hi (1 Kor. 11:23, 24).

A tunga Lai Siangtho munte i et ciangin, ei Khristiante adingin zat loh a kiphamawh leh, i zat den ding ahih lam kitel mahmah hi. Anlum leh lenggah tui zat ding hi a, tuate in Jesu’ si leh sa tang ahi hi. Jesu’ sihna in kuamah deidanna a om loh mah bangin, nekkhawm nekna ah zong kuamah kidei danna om loin, a ut peuhmah in nek khawm ding ahi hi. Hih banga Jesu’ si leh sa nekna in mihing te adingin, si leh sa lam ahi zongin, kha lamah ahi zongin, phattuamna leh thupha tampi hong pia hi.

XI. Khe Silna (Foot Washing)
Paisan Pawi a man khit ciangin Jesu in a nungzuite khe silsakin dial tawh a nulsak hi. “Jesu ding in a puanza suahin a kawng a gak hi. Kuang sungah tui sungin a nungzuite’ khe a sil sak hi,” (Johan 13:4-5). “Keimah in note Topa leh sia hi napi-in na khe uh kong silsak leh, note khat leh khat na kisilsak ding uh hi. Bang hang hiam cih leh, keimah in note tungah ka hih bangin, note in na hihna dingun lim kong lak hi,” (Johan 13:14-15). I Topa in ama pumpi tektekin a hong lah ahih manin, ei lam panin zuih ding leh sep ding bek i mawhpuakna ahi hi. Tua ahih manin ama hong lahna mah bangin, eite’n zong khat leh khat i khete i kisilsak ding ahi hi. Tua in kiniamkhiatna lahna ahi hi.

XII. Sianthona (Holiness) 
Pasian thu in a hong hilhna a om mah bangin Pasian tate in gamtat luhekna khempeuh ah a siangtho taka nuntak ding ahi hi. Pasian in hong lam lahna leh hong hilhna bangin nuntak ding ahi hi. Bang hang hiam cih leh, i pumpi pen Pasian Kha Saingtho teenna biak innpi ahi hi (1 Kor. 3:16). “Thupha lametna leh Pasian lian eite Honpa Topa Jesu Khris’ vangliatna hong kilat ding eite in lamenin, Pasian thu tawh kituak lo gamtatna leh, deih gawhnate nial in, tu laitakin khawvel zulhtat lohna, thuman gamtatna, Pasian biakna lamah nopsakna bawl dingin, Pasian thupha hehpihna hong kilanga, mi khempeuh gupna thu hong paipih zo hi” (Titus 2:11-12).

“Tua bang deihna in note hong sam zo hi. Khris in zong note ading gimna thuaka, ama khe khap na zuihna dingun a lim a koih zo hi. Amah in mawhna a hih kei hi, a kam in zong zuauthu a gen kei hi,” (1 Peter 2:21-22). “Mi khempeuh tawh kilem in nopsakna ahi zongin a siangtho gamtatna ahi zongin, na phak mateng un delh un. Tua bangin a siangtho gamtatna a om kei leh, kuamah in Pasian a mu thei kei ding hi” (Heb. 12:14). “A hong sampa a siangtho mah bangin, na hihna khempeuh uh na siangthosak un. Bang hang hiam cih leh, keimah a siangtho ka hih ciangin, note zong na siangtho ding uh ahi hi,”(1 Peter 1:15). “Khris in leitung a kipiansak ma in, a kiciamteh kholh hangin, ama hangin Pasian a um mite adingin a nunung bek hun ciangin hong kilang ding hi,’ (1 Peter 1:20).

Tua ahih manin, Pawlpi mite in Pasian tawh a kisai lo, Pasian deihloh nate tawh nuntakna khopna in pawlpi nuntakzia hi lo hi. Leitung a a kih huai nate khempeuh leh, tua nate a kisepna munte ah pai-in kihel het loh ding ahi hi. A zaw deuh in cinema, leitung gualnopna leh lamna mun, politics, zu mun, kisilna mun (nu leh pa kisil khopna mun), numei sam tanna, pasal’ sam khawina, a kilawm lo zah dong kizepna, numei puan ban tom silhna, zu dawnna, guih theih a tuamtuamte, vedio film hoih lo etna, leitung kimawlna leh, leitung nopsakna munte ah pai lo a, kihel lo dingin pawlpi mi khempeuh kihilh a kitai ding ahi hi. Kha Siangtho lamah tha i ngah theihna ding mun ahi zongin, Jesu hong paikikna dingte ngaihsun dena, a siangtho nuntakna tawh i nuntak den ding ahi hi.

XIII. Pasian Hehpihna (The Grace of God).
“Mi khempeuh tungah gupna a tung theihna dingin Pasian hong itna a kilang hi. Pasian thu tawh kutak lo gamtatnate leh, deihgawhnate nei loin, tulai takin khuavel zulhtat lohna, thu man gamtatna, Pasian biakinn lamah nopsakna bawlna dingin, Pasian thupha hehpihna hong kilang a, mi khempeuh kiangah gupna thu hong paipih zo hi,” (Titus 2:11-12). “Thukham in Moses khut tungah a kipia hi; ahih hangin hehpihna leh thuman thutak pen Jesu Khris khut tungah a hong piang hi,” (Johan 1:13).

Khristiante in gupna a ngah theihna dingin Pasian tawh a om khawm tawntung mi leh, Pasian itna sungah a pumpi a kem tawntung zo mite hi ding uh hi (Judah 21). Hehpihna in a deihna bulpi pen deihsakna tawh kibang hi. Pasian’ deihna tawh kituak lo a i gamtat ciangin, tua hehpihna panin a kitaimang suaka, kisikkik loin i nuntak tawntung leh, a tawpna ah hell khuk a kitung ding ahi hi (Johan 15:2-6; 2 Peter 2:20-22). Lai Siangtho mun tuamtuam ah zong na gen hi (Heb. 6:4-6). “Note in thu upna hangin hehpihna tawh gupna na ngah zo uh hi. Note ut thu a ngah na hi kei uh hi. Pasian letsong ahi hi (Efesa 2:8).

XIV. Na Khempeuh Bawlphatkikna
Na khempeuhte bawlphat kikna om ding ahih lam i thei hi. Hih thu pen Pasian in nidang lai a kamsangte zangin a gensa ahi hi (Sawl. 3:21). Ahi zongin dawimangpa leh nungzuite a hi mimawh mi khial khempeuhte adingin bawlphatkikna om nawn lo ding hi (Mang.20:10).

XV. Thumanlo Kipawlna (Illegal Society)
Pasian mite in Pasian thupiakna bangin, a man lo kipawlna Lai Siangtho tawh a kituak lo upna, politics leh, thu um lo mite’ kipawlna khempeuh ah kihel lo ding hi. Amaute tawh kipawl in kizawlmat kha lo ding hi (Jeim 5:5-7; 2 Kor. 6:14-18).

XVI. Mi Siangthote Kikhelna (Translation of Saints)
Topa hong pai kik nading hun naita hi, cih i um hi. Ahong pai ciangin Khris sunga a sisate hong thokik dinga, a nungta laite in mitphiat kal in kikhelna om dinga Topa dawn dingin vantungah i pai ding hi (1 Thess. 4:13-17; 1 Kor. 15:51-54; Fil. 3:20-21).

XVII. Kiteenna leh Kimakna (Marriage & Divorce)
“Ke’n kong cihin ah, a dang pasal tawh a mawh longal, thu dang hanga a zi ma a, numei dang tawh a kitengte in a vekpi in numei tawh a mawh hi” (Matt. 19:9; 5:32). Hih bangin mawhna a bawl uh leh, a man lo zawzaw numei ahi zongin, pasal  ahi zongin, Jesu min tawh a siangtho kitenna a nei kik thei ding uh hi. Pasian nasemte ading nuntakna a siangtho kideih ahih manin, zi/pasal nei nawn kei leh hoihzaw hi.

Kitenna thu leh kimakna thu tawh kisai-in thu kikupna om masa hamtang ding hi. Mi khat hang in nawngkaina zong om thei a, a thu telcianna in lopi-in, vai hawm thei lo ding hi. Thu tuamtuam hangin hih thute hong piang thei ahih manin, i ngeina cih tentan zong om thei lo hi. A thu tawh kizui-in ngaihsut ding ahi hi. Tua ahih manin, nupa kikal thu tawh kisai-in, amaute geel kikal thu leh, amau thu a vaihawmte’ khensatna tungah kinga hi, ci-in kingaihsun hi.

XVIII. Sawma Khat Thu (Tithing)
Abraham huna kipanin, sawma khat pen Pasian in ama nasep nading leh, ama gam a zaina dingin, a kipia ahih lam i thei hi. Sawma khat pen Abraham’ upna panin hong piangkhia hi a, Pasian in zong a deih a kipsak sa ahi hi. Moses thukham in zong na paai tuan loin, na zang hi. Jesu in zong nialna nei tuan lo hi (Matt. 23:23). Paul in zong Pasian thupha na ngah bangciat un na khia un, a ci hi. Pasian neihsa ahi sawma khat pen guksak dingin kilawm lo hi. Sawma khat leh a dang dang piaknate zong ahi hi. Sama khat piak pen Pasian kianga pan a thupha i ngah nading a vantung kong honna ahi hi (Mal.3:6-12)

XIX. Topa Jesu Hong Paikikna (Second Coming)
Jesu in ama pumpi mahmah tawh i omna leitungah hong kum kik dinga, vantunga a kilak toh laitaka a mel lian mah tawh hong pai kik ding hi. Jesu in zong a genkholhsa ahi hi. Khristian masate in hong hilh sawn uh a, tuni ciang donga Pasian a um taktakte adingin nihvei a hong paikik nading pen i lametna, i kihehnepna leh, i tangkona thupi pen ahi hi (Matt.24; Sawl. 1:11; 3:19-21; 1 Kor. 11:26; Fil.3:20, 21; 1 Thess. 4:14-18; Titu 2:13, 14).

XX. Kum 1,000 Manna ( Millennium)
Leitungah haksatna lianpi hong tung dinga, ahi zongin a kipatna hi ding hi. Tua khit ciangin leitung pian cila kipan a om ngei lo, gimna lianpi a hong tung ding hi (Matt. 24:3-8; Dan. 12:1). Tua gimna lianpi khit ciangin i tenna leitung adingin, ni  leh khate a thakin kum tul hun sunga dingin ahong suak ding uh hi, ci-in i um hi (Mang.20:1-5; Isaiah 65:17-25; Matt. 5:5; Dan. 7:27; Mikah 4:1-2; Heb. 2:14; Rom. 11:25-27).

XXI. A Nunung pen Thukhenna (Final Judgment)
Kum tulkhat manna a bei ciangin, misi sate hong thokik ding uh a, thukhenna tokhom kangpi mai ah a hong kikhawm ding uh hi. Nuntakna laibu pi kiphen dinga, tua sunga min om kha lo peuhmah meilipi ah a tawntung adingin a kikhia ding hi. Satan leh ama nungzuite adingin, a kibawl khol, a mit ngeilo meilipi ah a om tawntung ding uh hi. Midikte ahih leh, Topa tawh a tawntungin a mang khawm ta ding uh hi (Matt. 25:41; Mang. 20:7-15; 21:8).

Source : 
Zomi leh Biakna Laibu laimai 29-46

Laibu bawl leh ahawmkhia Dr. Khen Za Sian in phalna hong piakna tawh Zomi eLibrary / Laibusaal in aki tei(Type) kik ahi hi.


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

1 comments:

  1. Rev. Dam Khan Hang ki tuiphum kum 1975 in na sim sak un.

    ReplyDelete

Item Reviewed: UNITED PENTECOSTAL CHURCH TANGTHU ATOMIN. Agelh - Rev. Khen Za Sian B.A (Th.) Description: Rating: 5 Reviewed By: Cinpu Zomi
Scroll to Top