728x90 AdSpace

Hot
Menu
Zon-ol na Donate

Latest News

ZOMITE PIANCILNA LE I MABAN. Agelh - Dong Za Mung

ZOMITE PIANCILNA LE I MABAN
Agelh - Dong Za Mung
Photo credit : Ngaih ang lai (Melmuh tongsan)

A. MIHING PIANCILNA
            Pasian in “piansakna” na sep ni nga sung sem a (Pian.1:1-23), a ni guk ni ciangin ama lim-le-mel sunin mihing a bawl hi (Pian.1:26). Pasian in ama lim-le-mel sunin Adam bawl a, amah ahuh dingin a nak guh khat la khia in Eve na bawl hi (Pian.2:18-25). Pasian in Adam leh Eve thupha pia in, suan leh khak nei sak a tua panin tuni dong leitungah mihingte khang kizom toto ihi hi. Adam leh Eve-te nupa in leitung mite piancilna bulpi ahi hi. Lai Siangtho thu kante in Adam leh Eve pian hun B.C. 4004 kum pawl hidingin ummawh uh hi.


B. MINAM TUAMTUAM PIANCILNA
            Adam suan leh khakte Noah khang ciang pen nam khat, pau khat bek tawh nungta in kalsuan khawm uh a kipi, kiteengin, khangin nuamsa in om uh hi.  Ahi zongin Noah khang ciangin mihingte tatsia mahmah uh a, leitung nin ahih manin Pasian in leitung tuiciin tawh sawp in a siansuah hi. Pasian in siahsuahna na sep a sep laitak in Noah leh azi, a tapa thumte leh a zite uh mi 8 bek leh ganhing nam kim sung pan kop khatta bek suakta hi.

            Noah tapate in Shem, Ham leh Japheth-te hi uh a, leitung minam tuamtuamte piancilna ahi uh hi. Amau khang panin mihing hong pung kik a, a kikhenthang loh nangin Shinar gam zanglei ah khuapi khat bawlin a teeng khawm uh hi. Amaute in a kikhenthang dinguh lauthawngna leh min thannopna tawh vantung aban dingin tausang khat hong lam uh hi. Mihingte lamsa khuapi leh tausangpi Pasian in amuh ciangin thukim lo ahih manin a kampau uh kitukalh sak hi. Tua ahih manin tua tausangpi min Babel kici hi(Pian. 11:1-9).

            Tua bangin pau kitukalh in a teenkhop theih nawnloh uh ciangin mun tuamtuam-ah hong kikhenthang uh hi. Shem suante Asia gam tung uh a, Ham suante Africa gam tungin, Japheth suante Europe gam tunguh hi. Amau tunna mun zui-in pau leh ngeina tuamtuam hong piang khia hi. Shem suante Mongoroid minam, Ham suante Negoroid minam, Japheth suante Europoid minam ci-in leitungah minam pi thum in  kikhen hi.

C. PAU NAM TUAMTUAM PIANCILNA
            Adam khang pan Noah’ tapate khang dongin leitungah kampau khat leh kammal tawmno bek nei hi(Pian.11:1). Ahi zongin a kikhenthang dinguh lauthawngna leh amau minthan nopna tawh khuapi khat lamin vantung a ban dingin tausangpi khat lam ding hong kipat uh ciangin Pasian in apau uh kitukalh sak hi. Tua mun panin amaute leitungah hong kithehthang uh hi. Tua panin leitungah pau nam tuamtuam hong piang khia hi.

D. ZOMITE PIANCILNA
            Noah tapa Shem, Ham, Japheth-te leh amau suan leh khakte in Shinar zanglei khuapi a tausangpi a lamna panun a pau uh kitukalhna tawh mun tuamtuam ah hong kikhenthang uh hi. Shem suante Asia gam hong tungin Mongoroid minamte pianna hong hi hi. Ham suante Africa gam hong tungin Negoroid minamte pianna hong hi-in, Japheth suante Europe gam hong tungin Europoid minamte pianna hong hi hi. Tua ahih manin Zomite pen Shem suan leh khakte ihi hi.

            i. Sengam ah
            Zomite pen Sengam kici, Mongolia gamah piang Mongolia minamte ihi hi. Tua ahih manin tuni dongin Sente tawh ih kibatna tampi om hi. Ih pu ih pate Mongolia gam panin Tibet gam nitumna lam a om Mual sang tung zuanin a teengte ahi hi. Tua hun lai-in sing leh suangte galhiam in na zang uh hi. Gal leh sa launa leh anneek tuidawn haksatna hangin munkip gamkip neilo in gam nuam mun nuam zuanin na lal kawikawi uh hi. Ih pu ih pate Sen gam panin Tibet gam, Tibet gam pan in Kawlgam sungah na lut uh ahih manin Tibeto-Burman zong kici hi.

            ii. Kawlgam sung tunna
            Ih pu ih pate Tibet gamah a teen hun sungun Kawlgamah Nigarito leh Indozini minamte na teeng khin uh hi. Tibet gamah neek leh dawn a kicin nawnloh ciangin Monkhama, Tai-Shan leh Tibeto-Burman minam lian thum in na kikhen uh a, a hunhun, a pawlpawl in Kawlgam sungah na lut uh hi. Tua minam thum sung panin Monkhama minamte in Salween (Thanlwin) gun leh Meechaung gun dung zui-in Kawlgam na tung uh hi. Kawlgam ah a teengsa Nigarito leh Indozini minamte hawlkhia in Irrawaddy, Sittaung leh Salween(Thanlwin) gun dung kuam tengah na teeng uh hi. Tuhun Kawlgam sunga teeng minamte sung panin Kawlgam ah a teeng masa pente ahi uh hi.

            Monkhama minamte Kawlgam sung a tun khit asawtlo in Tibeto-Burman kici minamte, Tibet gam nisuahna lam a om Bramaputra gundung zui-in na lal uh a, tua pan Irrawaddy leh Talawady (Chindwin) gun dung zui-in Kawlgam na tung uh hi. Tibeto-Burman kici minam sungah Burma, Chin (Zomi), Rakhine, Kachin, Kadu, Nagate kihel hi. Tuate sung panin Zomite Kawlgam sung a tung masate ihi hi. Tua minamte Takaung khua ah na teeng uha, Kawlgam a tung nihna minamte ahi hi.

            Tibeto-Burman minamte Kawlgam a tun khit uh a nung ciangin China gam Yangigun khanglam a teeng Tai-Shan minamte in China kumpi ukna thuak zolo in Shan gam teng ah hong teeng uh hi. Tua khit ciangin Asia gam lai zang pan in Karen minamte hong lal in, Irrawaddy leh Salween gun kikal tengah hong teeng uh a, tua lai pan pawlkhatte zanglei ah teengin, pawlkhatte mualtungah teenguh ahih manin Zanglei-Karen leh Mualtung-Karen ci-in nam nih in kikhen hi.

            iii. Minam thum pianna
            Tua hun Kawlgam sunga teeng mite in amau teenna mun ciat ah amau leh amau ki uk uh hi. Takaung khua ah Abirasa in kumpi sem a, amah a sih ciang a tapa Kanyasakyi leh Kanyasange-te apa kumpi za a kituh uh hi. Kanyasange in ngah hi. Tua ciangin a upa Kanyasagyi’ Takaung khua panin apawklte tawh Talawady gun kantan in Bunglung (Zasagyo) khua a saat hi.

            Kanyasange a sih ciangin Duatapong in kumpi sem a, Takaung khua pan lal khia in Tazekhittaza khua a saat hi. Duatapong a sih ciangin Tamuhdare in kumpi sem a, gam leh lei makaih zolo ahih manin A.D 721 kum pawlin Tazekhitaza khua a kisia a, Pyu, Kanyan, Tet kici minam thum hong piang khia hi. Pyu-te Kawlmi, Kanyan-te Rakhine mi, Tet-te Chin(Zomi) ci-in hong kikhen uh hi.

            iv. Unaute kikhenna (Zomi leh Kachin)
            Zomi leh Kachin unau hi-in, Zomi a u hi a, Kachin anau zaw ahi hi. A.D 721 kum Tamuhdare in kumpi a sep hun sung Tazekhitaza khua kisia in, minam pi thumte a kikhen khit uh Tet (Chin) minmate mun leh gam zong dingin a sul lui uh Irrawaddy gun dung zui-in khenpi nih in hong kah to uh hi. A pai masate Irrawaddy leh Chindwin gun kituahna mun a tun uh ciangin a nung a hong pai anaute theih dingin nahtang kung tem tawh bantan in lampi a lak uh hi. Chindwin gun kantan in Sagaing, Monywa, Pagan, Nyaungoo khuate saat in na teeng uh hi.

            A nunga hong pai anaute in Irrawaddy leh Chindwin gun kituahna mun hong tun uh ciangin a pai masa a ute bantan nahtang kungte a ziik suak saupi na pha khin ta ahih manin ‘Ih ute gun kantan in pai uh a, ih delh hangin pha zo nawn kei ni’, ci-in Irrawaddy gunpi nak Myitkyina, Bahmaw gam teng ah khuasat in a teeng uh hi.

            v. Zomi (Chin)te phualpi
            A naute tawh kikhen in hong pai uh a, Hokaung kuampi (Hokaung Valley) zuito in, tu laitak a Tanaing khua gei Sinbwejang (Simbuzang) tung uh hi. Pawlkhat paito suakin Lido lam pan India gam Nagaland, Mikhir Hills leh Arunachal Pradesh dong tung uh hi. Sinbwejang (Simbuzang) panin khanglam ah hong paisuk uh a, Tanaingkha, Tarongkha leh Tawangkha lui teng thum kituahna munah hong khawl uh hi. Tua ahih maninin Tanaingkha lui, Tarongkha lui leh Tawangkha luiteng kituahna mun pen “Zomite Tawlngakna Mun”(Chindwin) kici hi. Tua akipan in Talawady gun zong Chindwin gun in kilaih hi. Monywa khua kiang Sibani khuapan tai nih na ah Chinte Tualbualna Mualsuang Pi 13 a sang khat tudongin om lai a, tua mun pen Kawlte’n “Chin Phaya”(Chin God) ci hi. Sagaing khua sungah Chinsuhywa kici Chin mite kikhoptuahna mun khat om hi, ci-in kiciamteh hi.

            vi. Phualpi pan kikhenna
            Pagan khua min hong piankhiatna tawh kisai in a cil in Pugamah-Pigamah cih kammal hi-in tuapan in Pagan kici hi-a, ih pu ih pate min phuah hi, ci-in ki ciamteh hi. AD 835 kumin Nancho kumpi in Tet kumpi khua Pagan simin zo ahih manin a phualpi uh nusia in hong pai khia leuleu uh hi. Chindwin, Zomun, Zokuam, Zophual, Zokhuk panin Chindwin gunpi nitumna lam mualpi (Anauk Yoma) dung hong zuisuk uh a, tulaitak Gunkhawm (Kalaywa) hong tun uh ciangin, a kim apam mual bekbek ahih manin, “Leitung Mong” hi ci-in tua mun pen ‘Tui Tawbing’or ‘Khawkhen’ hong ci uh hi.Tawlkhat khit ciangin nitumna lam hong manawh leuleu uh a, zang kuampi khat hong tun uh ciangin hong khawl uh hi. Tua ahih manin ‘Khawlzang’ kici a, a sawt ciangin “Kawlzang” hong suak hi.

            Kabaw, Kalay zang kuampi (Kabaw, Kalay Valley) pan pawlkhat khanglam zuanin Myittha gun dung lehzuih uh a Gangaw, Pauk, Saw, Htaylin, Pakuku, Yesakyu, Kyaukthu,..etc.., khuate tung uh a Yaw mi kici uh hi.

            Tuate sangin a madawk zaw diakte Magwe, Minbu, Sagu, Aunglan(Myithe), Ngaphe, Tawngdwingyi,Natmawk, Pyi, Thayiet, etc..,khuate tungin Asho-Chin kici hi.

            Khanglam zuan a paite sung pan pawlkhat nitumna lam mualtung ah kahto uh a, khamtung mual dung zuisuk in Paletwa, Rakhine gam leh Bangladesh gam dong tung uha, Khami, Khumi, Chaung kici uh hi.

            Pawlkhat Mindat leh Kanpelet ah khawl uh a, Dai, Chin, Pong, Mindat leh Kanpelet mi kici uh hi.

            Matupi gam a teengte Matu, Zotung, Maram kici in, Mizoram state-Saiha, Lunglei, Lawngtlai, etc.., a teengte Pawi, Lakher kici hi.

            Kawlzang khanglam Natchaung, Weibula lam pan Meitei gun a lehzuih toh kikte Pu Song Za makai in Falam ah Lailun khua sat uh a, Laimi, Laizo loci uh hi.

            Pu Za Hang makai in Lailun pan Kakha leh Thantlang gam tung uh a, Lai, Zophei, Lautu kici uh hi.

            Zomite pen kikhenthang kawikawi ahih manin gamgi thum khenna Kawlgam, India leh Bangladesh gamte ah kiteeng hi. Chin Hills, Myanmar, Mizoram, Meghalaya, Assam, Tripura, Nagaland leh Manipur gamke India leh Chittagong mual dung Bangladesh-te ah kiteeng hi.

            vii. Kawlzang pan Ciimnuai ah
            Kawlzang pan AD 1200 kim pawlin ei Zomite pupi khat ahi Pu Song Thu makai in mi 40 te tawh hong vaihawm uh a, Tuingo lui dung hong zuito in Thangmual hong tung uh hi. Tua pan in Vaih mual ah hong tuaksuk uh a, Zangpi tam hong tung uh hi. Zangpi tam panin Ngatan lui dung zuisuk uh a, Khuulpi(Suanghuam) mun, Saizang gamah hong teeng uh hi. Tua panin Sialtang lui dung zuisuk in Khuulpi pan tai li bang a gamlatna munah khua hong sat uh a, “Ciimnuai khua” ci uh hi. Ciimnuai khua aa teeng te Zomi kici hi. Ciimnuai khua pen AD 1420 pawlin a na saat uh hi ci-in kigen hi.

            Ciimnuai khua ah mi hong tam semsem ciangin Duh Lian namte nitumna lam Ciau(Tiau) galkah in pai uh a, Mizo gamah teeng in Mizo kici uh hi. Pawlkhat sak lam zuanin pai uh a, Assam gam leh Manipur gam tung in a teen khoppih uh Assamese leh Bangali mite in Kuki na ci uh hi. Manipur gam sunga teengte Meitei (Kathe)te in Khongjai na ci uh hi.

            viii. Ciimnnuai pan Zogam mun tuamtuam ah
            Ih pu ih pate nuntak haksatna tuamtuam hangin mun hoih mun pha zongin Mongolia pan Sen, Sen pan Tibet, Tibet pan Kawlgam ah hong lal kawikawi uh hi. Kawlgam sung Pagan panin Kawlzang hong tungin Kawlzang pan Khamtung gam Ciimnuai khua dong hong tung to uh hi. Ciimnuai ah teeng khawmin sauveipi a om khit uh ciangin sak leh khang ah hong kikhen leuleu uh hi.

            Ciimnuai pan in Zogam sungah khua saat koikoi uh a, amau teenna, omna zui in kilawhna leh pau tuamntuam hong piang khia hi.

1. Dim mite--Ciimnuai khua pan pawlkhat in Geeltui khua sat uh a, Geeltui khua pan pawlkhat in Dimpi khua hong sat uh hi. Dimpi pan Dimlo khua hong sat uh a, Dimpi leh Dimlo pan a hong khangkhiate ‘Dim mite’ kici hi.                                                               2. Gangte mite--Hih pen teenna khua min hi-a, Tedim gamah Gawng or Gang a kici khua khat om in, tua khuapan a khangkhiate ‘Gawngte’ kici a, a sawt ciangin ‘Gawngte’ pan ‘Gangte’ kici hi.
3. Hualngo mite--Khampat khua a teeng Pu Thlapa ii ta, Lushai pan khang gukna ah Hualngo hong piang hi. Hualngo suan leh khakte khempeuh ‘Hualngo minam’ kici hi.
4. Khuano mite--Ciimnuai, Geeltui leh Dimpi khua a teengte sung pan Suante beh pawlkhat in Sasih khua saat uh hi. Inn 7 bek pha in, khang theilo uh ahih manin ‘Khuaneu’ cihna in ‘Khuano’ kici hi. Tua Sasih khua pan a khangkhiate ‘Khuanomi’ kici hi.
5. Paite mite--Mun khat pan mun khat lam manawh a, a paite ahih manun, ‘Paite’ kici hi. Adiakdiakin Ciimnuai pan saklam (Manipur)gam zuana paite cihna hih tuak hi. Mizogam ah Sailote a khan lai in, a ki thudonlo, a kipaite ahih manin ‘Paihte’a ci zong om hi.
6. Phaileng mite--Tedim gam Saizang khua gei, Phaileng khua pan a, a khangkhiate ‘Phaileng mi’ kici hi.
7. Saizang mite--Ciimnuai khua gei, gamsai tampi a po na zang khat ah teeng uh a, Saizang khua kici hi. Tua khua panin a khangkhiate ‘Saizangmi’kici hi.
8. Sihzang mite--Ciimnuai khua pan a kiang sihkhuk zang kim-a teengte ‘Sihzang’ mi kici hi. Tua pan in Thuanthak hong suak hi.
9. Simte mite--Sim lam cih pen khualumna mualniam zaw deuhna mun cihna hi-a, a sang zaw, a vot zaw deuh mun pen zo kici hi. Tua ahih manin mual niam zaw deuhna mun a teeng mite or khanglam a teeng mite pen a teenna mun pua in ‘Simte’(Southerner) kici hi.
10. Thahdo mite--Ciimnuai pan Pu Song Thu in a zipi tawh a suan leh khakte Tuimui, Nuamkhua, Ankhum, Tuithang, Ngalbual, Lalta, Tangkhawng, Zampi leh Mualpi khuate ah teeng in, tua pan India, Manipur ah teeng uh hi. Tua sung pan Thahdo pianga tua suan leh khakte ‘Thahdo mi’ kici hi.
11. Teizang mite--Ciimnuai khua pan in kimkhat in ‘Luika’ khua saat uh hi. Tua khua mencim in kisia a, nupi khat bek suakta hi. Tua nupi nu Bangzang khua ah teeng hi. Tua lai ah tapa khat nei a, a min ‘Sukzo’ phuak hi. Tua pan in Mualbem khua Teising pona mun kiangah a nuta un a teeng uh hi. A teenna uh teising min pua in, tua pan a khangkhiate ‘Teizangmi’ kici hi.
12. Vaiphei mite--Mual vaiphei mun a teeng mite, a teenna uh mual min pua in ‘Vaiphei mi’ kici hi.
13. Vangteh mite--Saizang khua gei Vangteh khua a teeng mite a teenna khua min pua in ‘Vangteh mi’ kici hi.
14. Zote--Ciimnuai khua pan Pu Hang Hil makai in Tungnung, Lianzaw, Taithtul, Tungdim leh Neuzawte tawh Balzang khua sat uh hi. Balzang khua pen mualdawn zopi laka om ahih manin tua mun pan a apiang mite ‘Zote’ kici hi.

            Ciimnuai, Geeltui, Kawlzang, Saizang, Dimpi,.etc... khuate panin mite hong pung, hong khanga, a unau, a innkuan leh beh tuamtuam kipawl in inn 10 bangin aisan khawm uh a, ai a phat leh khuasat in gam hong zong tek uh hi. Tua banga hong kikhenthang uh ciangin makai pen min leh a teenna mun uh tawh kizui in kisam kilo uh a, a sawt ciangin tua kisapna min pen beh min, phung min hong suak hi. Tua thamlo in kipahtawina, kiselphonate panin zong beh leh phung min hong piang hi. Zomite sungah beh leh phung min 295 bang om hi.

E. TULAI TAK ZOMITE DINMUN
            Tanglai pek akipanin ei Zomite pen gamgi thum khenna Kawlgam, India le Bangladesh gamgi khenin I teeng uh hi. Tuhun ciangin gamgi thum bekin hong khen nawnlo a, leitung gam khempeuh ah I teeng ta uh hi. Namdang sanggam pawlkhatte bangin, “Lei nuai to le’ng zong Zomite om in teh,” hong ci liang ta uh hi.

            Tua bangin leitung mun khempeuh ah i tunna ahang a tuamtuam om a, a tamzaw in gambel (galtai) in kitung ahi hi. Bangdan in tungin bang teng ahi zongin Zomite khantohna namkhat ahih manin lungdam huai mahmah hi. Gamdang a omte hanciamna le makaihna tawh Zomte ading khantohna le phattuamna tampi piang bek tham loin Pasian nasemte le lasiam, ninganzi siamte ading lampi kihong in nuntakna nuam tuam sak ahih manin Topa thupha ahi hi.

            Tua banah Zomite i tuntunna ah pawlpi phuan in kipawlna phuanin i khangto uh a, Topa minthang in eite hangin mite in Pasian muh lawh ahih manin tua zong lungdamna lianpi khat ahi hi. Ahi zongin lungngaih huai thu tawmkhat en suk dih ni.

I lungngaih ding
a.    Gamdang mun dang a omte
            Gamdang mundang ah ngeina, zia le tong kibanglo, gamtat luheek kibang nawnlo, pil sinzia, neek taak zonzia kibang nawnlo mun le gamah i om ciangin ei khangham upa nu le pate’n i Zo ngeina zia le tong le i pau i ham i theih hangin i suan le khakte in hong thei nawnlo uh a, leitung khantohna tawh kituakin hong nungta in hong kalsuan ta uh hi. Tua thu in makaite le nu le pate mawhpuakna khat ahi hi.

            Tuai i mawhpuakte uh bangci bangin hilh ding ihi hiam?
1.    Innsungah ei pau bek zatpih in Zo lai hilh ngiat ding!
2.    Zo ngeina zia le tongte hilh ding!
3.    U sung nau sung ki-it kilemzia dingte hilh ding!
4.    Ei mi om khawpna kipawlna sungah tualbual theihna dingin pantah ding!
5.    Eimi tawh kisai thu le late ah lunglut theih nadingin hilh in pantah ding-ahi hi.

b.    Zogam a teeng laite
Zogam pen leisung sung piang tam om hetlo ahih manin singkung, singgahte le lokhawhna panin neek le dawn kizonna mun ahi hi. Hunte hong kikhel in i sanggamte, i tate sum zong pai zongin Kawlgam Vaigam, leitung mun tuamtuam ah hong tun ciangin ei inn ngak pawl in nuamtakin kizang a, sep ding bawl ding kidawn nawnlo in kha bei ding bek kingak kha thei mawk ta hi. Kawlgam kikhelna tawh huhna le panpihna tuamtuam hong om ciangin sepna tawh khantoh pih ding ngaihsun nawnlo in tutsa a nek ziau ding bek ki ngaihsun kha ta mawk hi. Kawlgam makai le Zogam makaite tung panin huhna lianpipi hong tungin tuate nek ziau ding bek ki ngaihsun kha mawk hi. Pasian thu zong kikin lua nawnlo a, Pasian nasemte in zong Zogam lam lunghimawh nawnlo in gamdang, mundang, gam khangto lam bek mah mitsuan ta mawk uh hi.
1.    Pasian zahtakna tawh nungta in ei mahmah hanciam a kalsuan ding!
2.    Tate tute’n kha-ul le dip humsa a a thalawh a angah sumte uh neek bekin zang loin khol theih ding, khantoh pih ding!
3.    I ngah thuphate sung pan Pasian ading sawm-ah-khat khen hamtang ding!
4.    Kumpi le makai, kipawlnate huhna bek ngak loin ei mahmah hanciam a kalsuan ding!
5.    I ngahna khempeuhte sung pan koici behlap in bangci pun’sak ding cih ngaihsun a geel ding!

Thukhupna
            Leitung a mihingte piancilna le Zomite piancilna le pau le hamte thu tawm i theih beh uh hi. A beisa a Zomite omna nuntakzia le tulaitak Zomite nuntakna le omnate tawm i thei uh hi. Tu in i ngaihsut ding le i lunggel ding thu in Zomite pau le ham hangin kikhen ding hilo a, i pianna i pu i pate a kibang hi in unau laizom ihihna kitel ding i lunggulh hi.

            Unau ihihna tawh kizui in khut kilenkhawm in mapang a i kalsuan khop ding ahi hi. I omna koi mun koi gam ahiphial zongin i ngeina zia le tong, pau le hamte mangthang sak loin i ta i tute i hilh i theihsak banah i innkuan sungah i nuntak sak ding ahi hi.

            Eite hiciang hong kalsuanpih in hong lamto Pasian phawk gige in ama deihna bangin i nuntak i khuasak ding ahi hi.
           
Reference
1. Vungh Khan Do-Thawmte Beh Tangthu leh Khanggui (Kalaymyo, Myanmar, VKD, 2014).
2. Langh Thawn Pau-Lethil Innkuan Khangthu-2nd Edition (Tahan, Myanmar, LILBC, 2008).
3. Jamang Ngul Khan Pau-Zomi in Diaspora (India, JNKP, 2012).
4. Sukte Laibu Bawl Committee-Sukte Beh leh Tedim Gam Tangthu (Myanmar, SLBC, 1996).
5. Laibu Bawl Pawl-Tungtuang Christian Centenial Jubilee & Moriah Assembly of God Church Silver Jubilee (Yangon, Myanmar, Laibu bawl pawl,2007).
6. Magazine Committee- Chin Evangel Centenary (Yangon, Myanmar, MC, 1999)
7. Magzine Committee- Sezang Khua Kum 100 cin Magazine (Yangon, Myanmar, MC, 2004)
8. Beh Laibu Bawl Committee- Naulak Innkuan Laibu (Kalaymyo, Myanmar, BLBC, 2003).

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOMITE PIANCILNA LE I MABAN. Agelh - Dong Za Mung Description: Rating: 5 Reviewed By: Cinpu Zomi
Scroll to Top