728x90 AdSpace

Hot
Menu
Zon-ol na Donate

Latest News

BUDDHIST BIAKNA (Kawlte Biakna). Agelh - G. Tun Khan Dal

BUDDHIST BIAKNA
(Kawlte Biakna)
G. Tun Khan Dal
Myoma Tedim
Zogam (Chin State)

Zogam ah:
            Budhist biakna pen Zogam ong tun kum i etkik ciangin ah AD 1939 kum (Kawl kum in 1301 Nadaw kha) in tulai tak a Lungpi khua ah Siadaw U Oktamatara (A za’min “Abitdaya Ekkagahmaha Tahdanma yawdihga Bahdantah) leh Siadaw khat tawh Pakuku pan in ong kipan khia uh a, Kanpalet khua ah thuhilh hong kipan masa pen uh hi. Kanpalet khua bulphuh pha diakin tua mun phungzi suak theihna (Thein) zong phuan uh hi.  Tua hun pen Mikangte khutnuai a i om hun lai ahih manin, Kawl phungzite pen Zogam ah paikhuan pia lo uh hi. Tua thu hangin U Oktamatara in Zangkongah ciah in, Zogam ah thu ahilh theih nading ngen hi. Kum 4 a sawt khit ciangin, a mun ah om thei bek hi loin, Zogam mipite tawh kimuh theihna phalna a ngah hi.


            Tua letmat tawh Zogam ah ong pai kik in Tedim khuapi tung masa pen hi. Tedim khuapi sung a om Lamzum ah Galkap bute, sumbuk neite, Hausate leh uliante leh khua mipi honpi khat tawh kimuhna nei hi. Tua lai ah “Zogam a om mite, sum le paai, an le tui, lokhawh dan, cidamna, pilna akipan zanggam a teng mite a khantoh mah bangin  i khantoh theih nading thubul phuh pi in nei in thu nam 6 gen hi. A thugente pen Tedim khuapi sunga teng Pu Vung  Za Cin in kamphen in, Tedim gam mi 48000 tangin lungdamna thu na kokik uh hi.

            Tua khit ciangin Siadaw pen Khalkha leh Zokhua-te ah pai in, pasian thu gen hi. Tua pan in Falam ah pai in Menzi U Thein Maung vaihawmna tawh Falam phualpi in na nei uh hi. Taisun khua ah U Thiha in sia sem hi.

            Tedim khuapi ah pen Siadaw Dipikara U Paduma in 1946 September kha sungin Pu Gin Za Cin inn ah pasian thu leh khantoh nang tuamtuamte gen in ong tung hi. 1951 kumin Tedim khuapi huamsung Lennakot ah siadaw U Nanditara kum 2 tang ding ong om leuleu in damlo lua ahih manin ciah kik hi. Tua kum pawl mah in, Hangken khua ah siadaw U Damathami leh U Wetmarasara-te in sang ong phut uh hi. Phaitu khua ah U Tayzeinda, Tonzang khuapi ah U Wepongla-te in sang ong phut uh hi.

            Tedim ah suahtakna i ngah khit ciangin Kalaymyo pan in ah siadaw U Dipikara U Paduhma in sang ong phut in phungzi suahna (Thein) zong ong phut pah hi. Tua khit ciangin U Thilasarah kum khat ong om hi. Ama nungah U Razeindaia ong om hi. 1973 kum ciangin U Panditara kisuan in, tu laitak a siadaw Thadama za minphatna ngah siadaw Bandanda Pyinnyazawta in hong sem suak hi.

            Budhist biakna ah sia cih pen tu dong tuam neih nailo uh a, Siadawte pen thugensia hi pah uh hi.

            Zogambup myone kua (9) sungah, Tonzang, Tedim, Falam, Hakha, Thantang, Matupi, Kanpalet, Mindat, Paletwa-te ah Budhist a om tei hangin a sazian kician takin ki thei lo hi. Ahi zongin mi 5000 kim bang om ding a kingaihsun ahi hi. Tedim gam sungah, galkap kumpi nasemte tawh gawmin mi 200 bang om kha ding hi.

            Zogam sunga om khuapi lian zaw deuhte bek mah ah hi biakna pen om hi. Tedim gam sungah Tedim khuapi sung, Saizang, Tuithang, Thuklai, Khuasak, Lailo khuate ah a mimal in ki-om zilzel hi.

            Budhist biakna pen Zogam ah mangkangte huhau in ta zolo ahih manin, biakna hoih mahmah ahih lam Zomite in kimu thei nawn lo hi. Ahi zongin leitung bup in tu in Budha biakna pen biakna man khat ahih lam sang thei ta uh ahih manin, Kawlgam mual tung khuamial sungah zong siadawte thabek tawh kalsuan nawn loin siadawte khut nuai ah tazahaw sia koih dingin galkap kumpi in ngimna nei hi.

            Zogam a om Budhist biakna ki ukzia pen a kipua dimdiam hi a, tu laitak a Zogam a nasemte pen Zangkong Mualtung thupha puak pawlpi (Religious Ministry) Thatanzi Vuanzi i khutnuai ah om hi.

UPNA GUIPITE
            Budha biakna upna guipi a tom leh akicing thei pen in a nuai a bangin ahi hi:-
     1.  Leitung mihingte a nuntak hun sungun, cidamna, nuntaksauna, sin nopna, hauhna, liatna, gal le sa gilohte zawhna, sum leh paai zonna, pilna te ngah nading.  
    2. Sih theihna, nat theihna, dahna, kahna, beimanga, a tawntung a lungnuam tak a, nuntak tawntungna gam (Neihban) tung nading.

Hi atung a thu nihte pen leitung mi khempeuh in i deih pente ahi hi. Tua thu pen tuma kum 2500 hunlai pawl in, India gam Nepal gam sungah kumpipa tapa Gautama in na mukhia hi. Leitung leinuai, vantung a om hinna nei khempeuhte biak dingin, a manpha pen ‘Pasian’ ong suak hi.

            Kumpi pa tapa Teikdahta or Gautama pen pasian zaa a ngah ma in, hi leitung mite pen azawng, ahau, ahoih, ahoihlo, teek thei, na thei, si thei, hi cih thu a theih ciangin heh pihhuai lua sa in, teek theih lohna, sih theih lohna mun, nat theihlohna, taza thupha zong ning ci-in, a luah ding gamh kumpi inn leh a it mahmah a zi a tate nusia in pai khia hi. Gam mang tulak ah kum 6 sunga  gentheihna lian tampi in a kisin(Cihn) ni loh hi.

            Tua bangin kum 6 sung a bei khit ciangin Gautama in Kasung khalik nitak in hun paikhinsa, tuni a thupiangte, mai lam a piang dingte muhna nei thei hi. Tua a muhnate pen:.
Vantung leinuai hong kihawng a, mawhna nei lo Kuhtu leh Dannah thupha bawl mihingte kha a siangthote thuap 6 a om mu hi. Mihingte Tilah kuhtu dannah a siangtho phadiakte pawl kha siangtho mahmah (spirits)te pen puan hoih tawh thuap 20 dim in mu hi. Vantung mi (spirits) te thuap 26 dimin a om cih a mu hi.

Mihingte teenna leinuai pen thuap 4 pha in, thusia lasia bawlbawl leitung mite tunna hi in, genthei takin a om uh mu hi. Gautama pasian vanmite (spirits) a et tel ciangin a dei niam pan in a san semsem tawh kizui in a nuntakna uh zong a san zia kibang loin mu in tel hi.

Tua van mi (spirits)te a kum uh ciangin si thei uh cih mu hi. Tua tham loin tua van mi (spirits) khempeuhte duh hawp huaihamna, lunggulhna, hehtheihna, kihazatna, hukna leh lanna, (Lawba, dawtah, mawhah, manah) kici mawhna tuamtuam tawh 14 bang a tawm leh tam in nei kimciat uh hi. Tua van mite pen hehlua mahmah leh si thei uh hi.

Van mite a sih ciangin leitung mi suak zel, kim khat van mi siangtho semsemte suakto zel, van gam thuap 31 na ate sih uh ciangin leitung mi ong suak zel cih khawng mu hi. Tua bana ah leimi mawhna (ahkutu) bawlna hell gam nam 4 ah gimna thuak suk uh a, tua hell (ngaze) pan a kum a cin ciangin lei mi ong suak to zel cih zong va mu hi.

Gautama pasian in mikhat van mi suak zel leimi suak zel ngaze va tung zel, tua pan ong kahto in asia leh apha tel theihna mun hi leitung vive ah ong tung zel a, akipeipei cih mu h. Hi a kipeipeina thu a tel et ciangin thitsa 4pa (titsa nam 4) ong mukhia hi. Tuate in:
1.    Dohkha titsa
2.    Thamohdya titsa
3.    Nirawda titsa
4.    Mekgah titsa- cihte ahi hi.

Hi leitung mi, vantungmi, ngaze mite khempeuh in, lawba, dawta, mawhah, manah, mawhnate nei in mawhna na 14 a kicite zong nei veve uh hi. Tua bang ahih manin, a thuap 31 mah a omte pen gimveve ahih manin dohkha titsa kici a, damdam in nopnate lunggulh uh ahih manin, Thamudya titsa cih a mu hi. Hi tamuhdya titsa a lunggulhna huhau in hi 31 te kipeipei cih mu khia hi.

Tau ciangin lunggulhna bei in sin (cihn) le hang nirawda titsa akici thuap 31 i pualam neihban tun nang Mekgah titsa hi, ci-in mukhia hi. Tua pen Neihban tun nang thu a muh khiatna thu ahi hi. Tua hi a, Gautama pasian in, vantung mi, a vantung gam tunna ding thu Neihban tunna ding thu leh Hell (ngaze) gam tunna ding a thu bul teng a mukhia hi.

Tua tham loin leitung kumpi lian, vaihawm lian, ngun leh kham, sum leh paai ahau, leitang zaipi a neite asih uh ciangin akha uh van mi (spirits) a suahtei hangin leitung mi tawh kinai na mun penpen ah om uh a, Mualtung, Gun lian, Bual lian, Singlian, Suang lian or Suangpi, kuam lian peuh ah om in gual heu in a om van mi (spirit) te zong mu hi. Tuate pen leitung tawh kinai lua ahih manin mite tungah a vang uh lak sak in kibia sak uh ahih lam zong mu hi. Leitung mi galhang samang, gamuk, kumpite, ukpite khawngin hi spiritte a lau zong Gautama pasian in muh hi.

Tua mual ngak guam ngak van mi (spirit) kimkhatte Kabah pasian hun bei zawh pasian  thu a om loh hun lai takin Gautama pasian pianma sung teng in leitung mite khempeuh khem in gal na zawh nop leh pasian in hong bia in, vokno, akno, keelno, tuunote ngenin a kibiasak mawkmawk uh cih zong mu hi. Tua ahih manin, Gautama pasian in ong pian ciangin a mah hi lei leh van ah pasian in ong piang ciangin amah in van a sang bel a om vantung mi, a lai hawl a vantung mi, mite paina om a cian phan pasian ana kineih van mite (spirits) ngaze a omte khempeuh in lei leh van a zangbel a om khempeuh i biak ding pasian lian pen na hi hi, ci-in bia uh hi.

A tung a i gensa mi siangthote kha (spirit) van mi a suak pasian kineih kim khatte in vantung ni leh kha aksi, leitung mi, sa, leite ka bawl hi, ci uh hi. Ama kamsangte in mite kaikhawm in thuhilhin pawlpi pawlno khawm hi, cih zong Gautama pasian in mu hi.
Gautama pasian in hi leitung a abawl, ni leh kha aksite a bawl, mihing ganhing a bawl pasian dang a om loh lam mukhia hi. Kei mah in neihban tunna ding lampi ka hi hi, kei ong um mi in dawi gam kongpi kikhak a, vantung gam a tung ding hi, ci hi. Ka hilhna zui mi in, neihban kici hin tawntungna mun a tung ding hi, ci hi.

Gautama pasian a um a nei in hih leitung a hin sungun, nuntakna sauna, cidamna, melhoihna, thahatna, pilna, hauhna, hansanna, bangmah peuh mah in a dem zawh loh thupha ngah uh hi. Tilah danah bawlnate tawh kopto leh vantung thuap 26 sungah amah hatna tawh kituakin nopna a ngah hi.

Hi leitungah Budha bia gam a tam mahmah a, kawlgam zahin a hanciam gam om lo hi. Tua ahih manin Kawlgam mun a tamzaw ngunte khamte sing manpha suang manphate tampi tak piangpiang hi. Ei Zogam zong 1/3% ciang bek in Budha a bai hileng, a piang ngeilo suang manpha, ngun leh khamte ong piangsak taktak ding cih lamen ing.

Pasian i cih in muh theih loh vantung munkhat ah a o bembam hi lo a, pasian kici kammal pen ‘za’ (rank) ahi hi. Kumpipa, Vuandokpa, menzi pa cih bang a ’za’ min ahihna tel ding kisam hi.
‘Pasian’ ahi za  a ngah dingte pen Gautama pasian in hi bangin a tomin na gen hi.
a.    Hi van leh lei thuap 31 sungah leitung mite pen a thupi penpen mun ahih manin pasian pen leitung mihing sung pan a piang khia ding hi.
b.    Pasal sinsen hi dinga vantungmi, leitungmi, leinuai mite khat bek tawh kibang peuh mah lo ding a, mihing nampi sung pan ahih ban ah, pasal cinna nam 31 te pum kicinna nam 80 te nei ding hi. Thahatna nam 10 vangliatna nam 6, melhoihna tangkhia nam 6 Arahan kici mawhna, lunghamna, hehtheihna akici mawhna nam 14 te neukha bek neilo ding hi. lungsim sianthona akipanin a dang vang nam 8 tawh vangliatna nam 9 te nei ding hi.
c.     Pasian a suahna ding thu nen ngei ding hi. Parami 10te, 4 thein hi leitung tulza sawm vei dim hi ding hi.
d.    Marnat dawimangpna ze-etna bawlsiatna nam 5te a zo sa hi ding hi.

Hih a tunga bang a mi manpha, khat ong pian ciangin van mi le mi kuama ta in demzo lo ahih manin, van mi lei mite bia ding ‘pasian’ ong piang ahi hi. Hi leitungah a tunga thute bangin pasian pen 4 vei ong piang zo hi. A masa in Dipeingkala pasian, anihna Kattapha pasian, leh tu a eite kum 5000 sung tatana hong lamkaih Gautama pasiante ahi uh hi. Kha pen ing piang pasian ahi hi. Leitung ah pasian khat a pian ciangin a thuhilhna tatana uh tawh ong nusia uh hi. Gautama ma Kattaphah in tatana thu kul tul 10 sung tavuan la a, tul 10 a cin lian ciangin Gautam pasian ong piang hi lo a, pasian thu leh pasian cih pen kultul zatampi leitunah om lo hi.

Hi bang a Gautama ong pian ma khuamial hung sungteng in vantungmi (spirit)te in leitung mihingte kiangah lim leh vangte lakin, pasian ka hi hi ong bia un, a cih manin spirit god, spirirt goddesste hi leitungah tampi ong piang lamlam hi. Gautam a pianma deuh pasian thu a om loh lai takin, apiang spirit godte ah leitung vantung, mihing ganhing, ni le khate ka piangsak hi, a ci spirit god masa pen in Ausho-go hi in tua pasian biate leh tua pasian pen Rome kumpi niphiat sak hi. Tua zomin Hindu (India) te spirit pasian ‘Khrisna’ hi a, mite sate, leitung vantung a bawlpa hi, ci-in na um uh hi. Tua zomah Judahte pasian Jehovah spirit God mah hi in, mihing, ganhiang, mite khate a bawlpa, ci-in Israelte in tu dong amau minam biakna in la uh a, si le sa tawh bia uh hi. Rome kumpi Nipi spirit god, kha pasian numei cih bangin ni sagihte mite lak ah pasian numei pawl khen in na bia uh hi.

Gautam pasian in van mi spirit te nangawn, lawbah (duhhawpna) dawtah (huaihamna) mawhah (theihnopna) mahan (kihihsakna)te tawh kidim lai uh a, pasian za a ngah zo ding om lo hi, ci-in gen uh hi. Tua ahih manin hi leitung a mi a i pian ding haksa lua mahmah a, mi a i pian nangawn in khutkim, khekim, ngaihsutna kim ihih ding, ahaipi ihih loh ding thupi mahmah hi. Mi a i pian sungin pasian man zong theih hun hi a, vantung gam, Neihban leh Hell gam i ututna tel theihna mun ahi hi. Hi in Budha biakna upna zia hi hi.

Source : 
Zomi leh BIakna Laibu Laimai-261-268

Zomi eLibrary / Laibusaal in "Zomi leh BIakna" Laibu aki tei/type kik ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: BUDDHIST BIAKNA (Kawlte Biakna). Agelh - G. Tun Khan Dal Description: Rating: 5 Reviewed By: Cinpu Zomi
Scroll to Top