728x90 AdSpace

Hot
Menu
Zon-ol na Donate

Latest News

Makai Hoih le Ki-ukna Hoih (Good leaders and Good governance). Agelh - Pau Sian Lian

Makai Hoih le Ki-ukna Hoih
(Good leaders and Good governance)
Agelh - Pau Sian Lian
             
Makai Hoih
Makai hoih tawh kisai-in tehna piciang nam tampi mah om hi. Tua lak-ah Sen thuthuk ngaihsun mipil Lao-tzu in a muhkhiat makai nam (4)te’ thu i en dinghi. Lao-tzu  genna-ah, “Makai hoih penpente pen a om lamuh zong mipite’n phawk kha pakpak meello hi. Makai  hoih cih ciangte bel mipite’n phat-in pahtawi uh hi. Adang pawlkhatte mipite’n kihta-in, a suksia pente bel mipite’n hua uh hi. Makai hoih pente’n nasep a gualzawh uhteh, mipite’n ‘i nasep khop ngeingai zo ngawngaw hang-ei’ ci hi.” cih bangin makai hoih le hoihlote’ dan na khen dimdiam hi.

     Ki-ukna hoih cih kammal pen a diakdiakin khantohna tawh kisai lai tuamtuamte ah kilim muh phadiak hi. Bang hang hiam cihleh ki-uk khialhna, ki-ukna hoihlote in mite’ sungah siatna a piangsak ngitngetna, na hoihlote’ zungpi ahi hi. Gam tuamtuam a om, kipawlna tuamtuam,  huhna pia kawikawi kipawlnate’n huhna apiak dingte, huhna a ngah dingte’ ki-ukna a hoih le a hoihlo et masakin nei pelmawh den uh hi.


Ki-ukna 
     Ki-ukna in “thu khensat sepna lampi (process of decision-making) le tua thu khensatte taksuah sakna (a hihkeh tak suahsak lohna)” ahi hi. Veng hausa sepna, beh makai sepna, khua makaihna, gambup kumpi sepna cih bangin ki-ukna pen mun tuamtuam ah kizang thei hi.

     Ki-ukna cih-in thu khensat nasep sepna lampi le tua thu khensatte taksuah sakna cih mah bangin, ki-ukna pen telkheh zaw deuh lehang hih thu khensatna sepna ah mi namkim (nautang mipite le kumpi nasemte) panmun la khawm sakin khen satnate taksuah sakna hi.

     Kumpi cih pen ki-ukna-ah a kihel a meng khat hi zaw hi. A cialcial-in  omto diudeu kumpi nasemte’ dinmun tawh kituak-in ki-ukna ah a kihel dan uh zong nam taumtuam om dimdiam hi. Ki-ukna ah kihel kumpi nasem lote i cian-et teh, khuata lam ah bang gamvai nasem partyte, biakna makaite, lokho kipawlna makaite, NGOte, veng makaite, numei kipawlnate, biakna kipawlnate cih bangin nam tuamtuam in om diudeu hi. Khuapi lama om mipi kipawlnte-in khuata lam a te sangin a kihel tamzaw-in kikai-awh ngeingai zaw uh hi. Gambup huam mipi kipawlnate i et teh media-te, mi zolte (lobbyists), gam tuamtuam nasep mipi huh kipawlna (INGO)te cih bangin om kawikawi-in thu khensat na sepna-ah kilim hel mahmah uh a, thu khensatna bawl nang khat peuhpeuh ah a aw uh thawl mahmah hi.

     Kumpi nasemte le galkapte kihello hih thu khensat nasep na-ah a kihel khempeuh pen  “mipi kipawlna” (civil society) ci-in min kivawh hi. Gam pawl khatkhat-ah mipi kipawlnate tawh kizom-in limtak a kigawm, gamtatsiate’ kipawlnate in thu khensat na sepna-ah nakpi takin nawngkai sakzo uh hi. Tua bang khatmah-in kumpi ki-ukna lamte’n panmun tuamtuam la-in na a sepna uh ah zong thu khensatna nasep a tangtun mengmeng nadingin mipi kipawlna-in a mazang sak thei mahmahte ahi-uh hi.

     Gambup huam nasepna-ah, kumpi lamte’ phuattawm hilo kipawlna dang thukhensatna-ah a kihel mi dang zong om thei tham hi. Gentehna-in, ngaihsutna pia kipawlna,  anbuk lam tanute’ kipawlna, lokhote’ kipawlna cihte khawngzong a khauhpai lammah hi-uh hi. Khuata lam leuleu-ah, thu khensatna khat peuhpeuh ah thunei, aw ginngaih phadeuh innkuan, tanau om thei mawkmawk hi. Ahangin ki-ukna lam a uliante’ ukkhialhna, gamtat siatna le golhguk nekna lamte hangpan hiham tang lel hi.

Ki-ukna Hoih
     Ki-ukna hoih khat ngah theih nadingin a kihel kim hamtang ding thudik pi nam (8) om hi. Tuate in, kihel theihna (participatory), ipsim tuam neihlohna (transparency), tavuan lakna (responsive), mabutna le vaitam zawhna (effective and efficient), kikimna le mikim huamna (equitable and inclusive) leh thukhunte’ ukna (rule of law) cihte ahi hi.

     Hih thu (8) te a om nakleh kua makai peuhmah ut bangin pheng gamtat thei lo-in, golhguk nekna zong kiamtuam mahmah ding hi. Mi citawmte zong kipampaih thei nawnlo dingin, mi namneute’ thugente zong thu khensat nasep sepna-ah limtak-in kingaihsak ding hi. Tangpite’ zingvai kisapna le mailam ah a pelmawh ding thute tavuan kilaksak ding hi.

Kihel theihna (Participation)
     Ki-ukna hoih suahtheihna dingin pasal le numeite a kihel kim ding pen a khuampi, a mungpi  ahi hi. Hih kihelna-ah a mimal in kiteelna, kumpi zum lam le thukhun tawh kizui-in palai ding teelin kihelsakna, tangmi (representative) teelna cihte kizang thei hi. Kihel kimna om theihna dingin tangzai takin geelin sepna, kipawlna tawh kisai thute mipi khempeuhte’ tungah theihsaknate a kilem linlian dingin sep ding kisam hi. Tua ahih manin suakta tak-in mipi kipawlna neih theihsak ding kisamin, tua mipi lam pana kiphuan kipawlnate thanghuai nianua lo-in, siang takin septheih nading lam honsak ding thupi hi.

Thukhunte’Ukna (Rule of Law)
     Ki-ukna hoih a suah theih nadingin maitang piaktuam paihtuam a neilo, maipha piak tuan a neilo a dik, a man thukhun neih ding thupi hi. Tua thukhunte-in mihingte’ thuneihna, minam neute’ thuneihnate khauhtak-in kep cingsak cinten ding ahi hi. Mi khempeuh a  kibangin thukhen-in, maipha piaktuan a nei  thukhenna a bei nadingin  thukhen zumte le thukhen mangte-in kuama’ thu neihna nuai-ah a om loh dinguh kulmasa hi. A tuam vilvel ngiat-in tuam dinsak kul a, palik (police)te mahmah in zong golhguk nekna a pelh hamtang ding uh ahi hi.

Thu-ipsim tuam Neihlohna (Transparency)
     A kua mapeuh muh theih nadingin kihonna, ipsim tuam neih lohna cihin thu khensat bawlna peuhpeuh, zuih dingin a kibawl thukhunte mah siksanin khensat ding hi-in, tua thukhenna tawh kisai thu le la khempeuh mipi khempeuh in suakta takin a theih nadingun, zaksakna, theihsakna, ipsim neihlohna ahi hi. A diakdiak-in thukhensatna ah a kihelte, thu khensatna sepkhiat teh tua hangin a sia a pha a thuak kha dingte’n thu le la khempeuh cingtakin a theih dinguh thupi hi.  

Tua bek thamlo-in hih thute tangpi tangta theihsak teh thu vuicing takin theihsak ding leh tua thute mipi a kua maciatte’ tel baih theih pen dingin sut siam ding kisam hi.

Tavuan lakna (Responsiveness)
     Ki-ukna hoih cih ciangin kipawlna tuamtuate’n na a sep takuh teh mipi khempeuh huam kimin, a kilawm ciangkhat hun ciangtan in tua hun sung mah-in a sep zawh nadingin hanciam ding hi.

A tamzaw’ santheihna ultunsakna (Consensus Oriented)
     Tangpi omna khat peuhpeuh ah mi nam tuamtuam, a kibanglo deih le sap tuamtuam om nianua mah hi. Ki-ukna hoih cih in tua a kibanglo deihna, muhna tuamtuamte  sungpan maipha piaktuan, thupi san tuan cih bang omlo, tangpi a huamzo thei pen le tangpite’ ading hamphatna atam pen dingte zon siamin, sepkhiat theih ding kisam hi.

     Zingvai nitak vai ciang bek buaipih lo-in, mailam ading thukhualna tak tawh geel-in, ngaihsut kul hi. Mailam hun saupi a kip a kho khantohnate tawh mipite’ khansuah-in tua khantohnate ngah theih nading lampi hoih tuamtuamte’ zongin sep ding kisam lai hi. Tua ahih manin, thu khat peuhpeuh khensat ma-in a mun, a khuate’ dan, ngeina, tangthute kantel-in, mun le gam tawh kituak theithei ding geel masak pelmawh ding hi.



Ki-Ukna Hoih
A tamzaw’ santheih                               Asia apha puakngamna

ultunsakna

Kihel theihna                                                 Thu ipsim tuam neihlohna




Thukhunte                                                         Tavuan lakna
zuihna

          Ma butna le                               Kikimna le Huamkimna
          vaitam zawhna

Kikimna le Huam kimna (Equity and Inclusiveness)
     A cidam tangpi omkhopna a pian theih nadingin tua sunga kihel mipi khempeuh-in ke’n mun ka nei hi, kei ading mun khat peuhpeuh om hamtang hi cih a lungmuan nang uh le mipite’ sung pan huaidiak,  pampaih diak neih khak loh dingin kidop huai hi. Hih tengah mi khempeuh kihel ding kisam a, a diakdiak in a thanem, a zawm phadiakte a kipan khutzaw khebai, mittaw, bengnongte a kipan a cingtaak lote zong kihel kha-in amaute’n khantoh phattuamna a ngah nadinguh thupi hi.

Ma butna le vaitam zawhna (Effective and Effcient)
     Ki-ukna hoih cih teh kipawlna tuamtuamte le nasep nate’n sum le pai, vangil neih zahzahte tawh mipite’ kisap taktakna mah huh zawh, sepsak zawh, piak zawh nading tup hamtang kul hi. Hih ki-ukna ah vaitam zawh ding cih ciangin kim le pam kepcingna,  leisung piang vangilte hun saupi kicing takin zattheih suak nading, khom nading bulphuhna cihte kihel hi.

Asia Apha puakngamna (Accountability)
     Ki-ukna hoih neih nadingin a pelmawh khat-in vai puakngamna, ei sepna tungtawnin a sia a pha thuakngamna ahi hi. Kumpi zum nasemte bek hilo mipi kipawlna, nasep khopna limlimte ah zong amau nasepna-ah kihelte leh tua hangin in a sia a pha thuak dingte’ lam pan hong kileh kikthei kona, phatna, gensiatna a piang bangbang lubuk-ah suat ngamna ahi hi.
     Kuan, kua tungah vai puakngamna nei ding hiam cih pen kuan bang dan nasep koi tengah sem hiam cih tawh kidungzui-in khentat ding ahi hi. Amau khensatna hangin a thuak dingte tungah bel vaipuak ngam ding kisam hi. Thu ipsimna le thukhunte’ ukna zuihna a om lohna ah vai puakngamna neih ding haksa hi.

Thu khupna
     A tunga kikupnate hangin ki-ukna hoih taktak neih ding a hamsa veve, kicing takin sepzawh ding pen sunmang bek dan tawh hong kibang hi. Ahi zongin khang tampi a kip a kho khantohna ngah theih nadingin  bangzah ta-in haksa tase mahleh hih ki-ukna hoihte zangkhia-in taksuah sak tawntung zawh nading hanciam huai hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Makai Hoih le Ki-ukna Hoih (Good leaders and Good governance). Agelh - Pau Sian Lian Description: Rating: 5 Reviewed By: Cinpu Zomi
Scroll to Top