728x90 AdSpace

Hot
Menu
Zon-ol na Donate

Latest News

Zi leh Pasal neihin hunnei. Agelh - Khoi Lam Thang

Zi leh Pasal neihin hunnei
Agelh - Khoi Lam Thang

Na sawm taktak leh!
Zi leh pasal neih na sawm takpi leh zangkhai ngaihsut kei in. Khatvei anneek ding nangawn thu a ngen masa ciatciat Khristiante adingin khantawn koppih ding thu-ah nakpi takin thungetna kisam hi.

Zi leh pasal na neih sawmna bang hang hiam, tamveipi ngaihsun pha kikkik in. Innkuan sung nopsakloh man peuh, mite hong hanthot man peuh leh naupaai kha na hih man peuhin kiteen ding na hih leh khuanung buainate hong tun ciangin kantan zawh nang haksa ding hi.

Na lungsim takpi tawh na it takpi mah a hiam? Amah tawh nuntaak lampi-ah tonkhawm zawh (theih) sawm takpi mah na hiam? Seemkhawm, nuikhawm, hawm-khawm ding, suan leh khak neikhawm taktak dingin na khensat ngam hiam? Na dang khempeuh peelin amah bek beelin nupa suak dingin na kibuppiak ngam takpi ding hiam?

Kiteeng cih pen pasal khat leh numei khat amau lungsim kizawhna tawh nungta khawm dinga khensatna hi a, kumpi thukhun (Dan) tawh zong a kizom ahi hi. Nihgeel kikalah seelsim om nawnlo, haksatna kitheihpih, deihdan duhdan kitelsiam a, nuntaakkhopna ahi hi. Nungak leh tangval mi nih hi nawnlo, pumkhat hi ta uh ahih manin tuamtat nawnlo ding uh a, kigawmin nungta ding uh hi. Khatkia thu tawh nungta loin, sungthu pua-thu kikumkhawm vaihawmkhawm ding uh ahi hi.

A manpha pen Moken
Mothak khat om leh ? moken bang a hia??cih kidong thei hamtang hi. Nu leh pate a hauh leh moken manpha tampipi keng thei hi. Moken a manphatzia sum leh pai, kham leh guunte (gold & silver) tawh teh masa kei ni. Nungak siangtho (virgin) I hihna i pasal tungah a manpha pen i Moken dingin koih tuam sinsen ni.

Nungak khat adingin a tenpih a pasal pen a luppih a masa bel pasal hi hen la, tangval in zong a zi pen a luppih numei a masa bel hi leh deihhuai pen hi. Tua in nupa kikal nopsakna bukimsak a, nulepa (sex) kilunggulhna khempeuh kicingsak hi. Nulepa kilametna khempeuh amau kikal bekah kinga ahih manin ki-itna khangsak seemseem hi.

Vaite a kiten uh ciangin a lupkhop masak nading uh lupna delhphah puan a kang dildel phahsak uh a, zingsang ciang a nit (sisan baang) leh a teekte (pasal nulepa) angtang mahmah uh hi. Sisan a baan kei leh kitelkhialhna tampi piang thei hi, kici hi.

Tulai leitung khuahun paizia en leng, nungak tangvalte a utut-un lumkhawm pahpah lel uh hi. A kicimtak khit uh ciang ki-akgualkhen ziauziau thei lai hi. Tua bang nungak-tangvalte in zi neiin pasal a neih taktak uh ciangin lungkim takin nuamsa thei nawnlo uh hi. Lawpna leh lametna kileep kiciam zo ahih manun nulepa nopsakna bucing thei nawnlo hi. A nungsang ciangin nupa kikhenna dong piang thei hi. Nungak Siangtho na hihna na Moken manpha pen dingin khensat in. Tangvalte zong ee… Zi leh Pasal neih in hun nei Leitung nuntaak haksatna leh khantohna delhna hangin sumlepai zong-in leitung gam khempeuh phialah Zomite i kithehthaang hi. Sumlepai i zonzonna lamah zi neih pasal neih ding don kha (man) loin, ni leh khate hong bei beibei a, I kumte hong tam hanhan hi.

Tangvalpi
Tangval zi nei hakte Tangvalpi, Tangvalkhaat, Lengkul cih bangin genna tuamtuam i nei hi. Nidanglai in tangval khat kum 25 bang a val leh tangvalpi-in kingaihsun hi. Tuhun ciangin kong pua piala pilna, hauhna zon hun, hanciam hun hi ta ahih manin tulai hun tawh kituak dingin tangvalpi i cihte kum 40 tungsiahte ci pong phot dih ni.

Tangvalpite in amau kum tawh kituak nungakte pen haam sa lua vial uh hi. Nungak moi-nonote mah en tantan veve uh hi. Pawlkhatte bang Siapa na zip kaito in!cih tangthu bang dana a maizumpih uh om thei hi. Ahi zongin a ham leh a moi kikop ding pen lungsim luanzia kituak ding haksa hi. Zawl va heel sun lezong,? ong it ing? a va cih ding haksa sa mahmah hi.

Tangvalpite in zi deih mahmah uh napi, zi neih taktak ding khensat haksa sa thei uh hi. Zi neih hak zong suan leh khak zekai hi, cih thei napi, zawlthu gen ding pan ngamlo uh hi. Kivaihawmsak leh niallo napi, mi?vaihawmsak ahih ding maizumhuai sa-in thangpaih lak thei zawsop uh hi.

Zawlthu genpih sawm leng ciamnuih peuh tawh hong dawng ziauziau thei hi. A kisapzia genpih leng, a genpihte sangin theizaw, gensiam zawlai thei hi. Hih bang lungpuakzia pen mikim ahih kholloh hangin a tamzaw ah man (dik) ding hi.

Tangvalpite in zi nei leh, a zi it mahmah phadiak uh a, kum 40 khit ciang bangin ta nei pan leh it cihtak it in, a zi bang keemsak man lo liang uh, kici hi. A zi neih hak bang kua ngawh ding cih hilo napi, kinungsik phial mawk thei hi.

Nungakpite
Nidanglaiin kum 20 val peuh leh, numeite nungakpi danin kituat hi ta leh, tunhun adingin kum 35 tungsiah nungakpi dingin seh dih ni. Tangval khat in a lawmpa kiangah ?ua nu na teenpih sawm, a kum tam ta lua hi lo maw?a cih leh, kumtam khin taleh lungkiat a sawmlopa in ?hamawh kei, a guh peh ding hi kei?cihsan ziau hi. A lawmpa in ? guh peh ding ding bel hi kei mah ven, a tui kang thei ei ve?ciin thuk kik leuleu hi. Hihmah hi, pasal neih in ?un?nei a, hong kheng thei hih tuak hi.

Nungak hun beina in nupi (zi) hihna hi a, sanggam pasal muanhuai sawm na nei phial zongin pasal na neih kei leh nuntaak bucing thei taktak lo, vaang kim thei lo hi. Na hat lai, na zon zawh laiin keilekei ding thei lel ing, na cih hangin nu leh pa? hong nusiat khit, sanggam pasalte in zi leh ta hong neih khit ciangin na ngaihsutna hong kikhel veve ding hi.

Tua i cih hangin, pasal neite peuhpeuh?a nuntaakna uh bucing pah, vaangnei pah cihna zong hi khin samlo hi.?ih nu banga pasal ka neih sangin nungakpi in ka om mah manpha sazaw ing?a ci khawng zong kiza thei zelzel hi. Nungakpi a tamzawte pen ?i deihloh, ngaihloh?na hi tuamlo uh a, lawmngaih tawh kikhen ngeia lungtang kitamsate, a khensat ngamlote leh nulepa khualna (thumanna) tawh pasal nei ngamlo (upente hi deuh) zong hi thei hi.

Bangbang i ci zongin, hunsau ading a ngaihsut uh ciangin pasal neih ding mah hi, cizaw uh hi. Numei in va pat masak ding taktak piang thei salo uh hi. Tangvalte hong pat ding ngak gige uh hi. A heel om leh ?i ngaih ki-angtangsak thei?a, a lungsim tawngah lungkim mahmah uh hi. A dinmun (a hihna) thupi simsaksiam peuh lecin hong neumuh tuanlo ding hi.

Deih teel thei ding na hih leh
Hih bang kawmkalah tulai zi zon pasal zon ding zong a ol hetlo thukhat ahi hi. Ahi zongin zi leh pasal ding a teelthei ding dinmun na hih leh, a nuaia thute lungngai kawm in:
1. Ka ki-it tuak thei ding uh hiam?
2. Nuntakna ding a kician hiam?
3. Biakna upna a kibang hiam?
4. Innkuan nuntaknopzia a kibang hiam?
5. Ngimna leh deihzia a kibang hiam?
6. Lungsim tawng kipia thei ding hiam?
7. I innkuanpih ciat in hong theihpih hiam?
8. Kei tawh a kituak hiam?
9. Amah tawh ka kituak hiam?

Vuntham melhoihna siksanin zi leh pasal ding teelhuai lo hi. Hoihna i cih a ente? khensat hi a, a hunhunin kikhelkhel thei hi. lungsim hoihna in a khang a khanga a kizom suak ding khaici ahi hi. Lam khatah, melhoihte a lungsim uh zong hoih pah lel a, melhoih napi lungsim sia tawm hi.

Melsiate a lungsim uh zong sia nuam deuh se a, melsia napi lungsim hoih tawm hi. Melhoih a lungsim hoih i ngah zawh kei leh, meisia lungsim hoih telhuai lai hi. melsiat leh lungsim siat a thuahkhop sangin melhoih leh lungsim siat a thuahte hoihzaw deuh ding hi.

Thukhupna
Khangnote in lawmngaihthu tam veipi ngaihsun pha kikkik leuh khiallo zaw hi. Khentat buatbuat kei in. Dot theih upate pastor-te kikuppih in. Khangmoi lua zi neih pasal neih pen pilna hauhna zon theihna ding hun manpha teng innkuan vaiah bei khin ahih manin a nung ciang haksatna tuak thei deuhse uh hi. Nungakpi leh tangvalpite in ?hensat ngamloh buaina?lel pen uh a, deih teel luate vaal suak thei ahih manin kum tamsa na hih leh khensat ngam lel in.

“Na it ma in teel masa in la,
Na teel khit ciang it in;
Na it khit ciang teel nawn ken” – Job Thawngno

Source :
“Sihna in hong khen mateng”  laibu.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zi leh Pasal neihin hunnei. Agelh - Khoi Lam Thang Description: Rating: 5 Reviewed By: Cinpu Zomi
Scroll to Top