728x90 AdSpace

Hot
Menu
Zon-ol na Donate

Latest News

ZOMI LEH PILNA. Agelh - Cope Suan Pau

ZOMI LEH PILNA 
Agelh - Cope Suan Pau


Thupatna 
Zomite pilna kipatna pen Bristish colony hunpan kipan ci ding himawk hi. Nidang in Zomite’n lai neingei kici a, tua lai pen savun tungah ki-at ahi manin, Ui-in hong nek sak khitteh lai nei nawnlo himawk hihang. Tua savun tung a ki-at lai pen Sen lai Chinese Character khawng hileh kilawm hi. Lai at i ci pen savun tunga temta tawh laimal character at cina hih tuak hi.

Lai Leh Biakna 
Leitung muntuamtuam aom minam dangte mah bangin Zomite zong lai leh biakna tawh akitawisangtote i hi hi. Mikangte hong tun maleh hongtun hun sung pawlin Zomite sungpan Pu Pau Cin Hau in Laipian movement tawh lai leh biakna hong piangkhiasak a, Pasian thulela, lai leh biakna lamah Zomite sungah khanlawhna lianpi khat hong om hi. American Missionary te’n Zomite, Pasian thu leh pilna hong guan theina dingun Pu Pau Cin Hau biakna pen amanlo cult in a ngaihsut uh hang, Christianity i amaitai forerunner in ngaihsun veve uh hi.

Colony Hun Pilna 
Colony hun ciangin, American missionary te tungtawn leh i Tote ahi Mikangte tungtawnin lai i neikik pan hi. Tua masiah pen Kawllai asin zo te’n, Kawlpi khuataw pan paina Taung U phunggyi sangah kawllai kisin hi. (Pu. Rev. Za Khup “Thuklai” zong khatin kihel a, Cope sangmangpa in Khuasak a Tan 7 sang middle school ah Zolai sangsiapi in semsak hi— Pu Za Khup diary pan). Colonial hunsung missionary sangmangte tungtawnin Kawllai leh Zolai namnih banah mikaanglai zong kisinto a, Zomite in lai namthum bang i thei hi. (Pu Pau Cin Hau lai tawh cileeng nam 4). Zolai Tan 4 khit ciangin mikaanglai Tan 4 sin uh a, basic education system hoih mahmah khat ahi hi.

Hausa te tate leh sumhaute tate bekmah lai kisinsak acih pen, ataktak in ei Zomite’n, lai leh pilna manphatna theinailo i hi manin deihnameel neilo a, tua hanga, hausate tate leh sumhaute tate beek in laisin un, hong cihna hituakzaw hi. Tua hunin numeite bang peuhmah pen laisin kuulkei acite i hi lai hi. (Mission leh colonialism pen a kipawlkhawm mah hong suak veve mawka, Khamtung Zogam ah Bristish colonialte uk sung, American missionary te tungtawnin Zomi te’n lai leh pilna kisin thei a, leitung ah laithei minamte lakah i kihelthei hi).
Japan Galma Leh Galkhit Pilna 
Japan galma in Zomite in lai manphatna tawmtawm kithei ta-a, laisin sangte ah laisin mi tawmtawm ki-om hi. Ahizongin numeite laisin kuulkei kici lai veve hi. Akhuamu zawdeuhte-in a tanute uh laisin saka, laitheite-in Lokhawhna dingin Tu ahizong Tupeek tangin laikung tawh lai-at, laikuui thei leh-uh, singpuak lokhawh sangin nuntakna a baih in kizong theizaw ding cihthu hong mukhiata uh hi. Galsung teng sang kikhak ahi manin leitung mun tuamtuamte mah bangin Zomite’n zong galsung pilna kisin theilo hi.

Galsung teng Zomite in, lai manphatna kithei ahi manin galman ciangin sang lam nasiatakin kihanciam a, amasa pen tan 10 sang innpi Thuklai ah 1947 kumin hong kihongzo hi. Tua zomah Tedim, Falam, Haka ah kumpi sangpi kingah toto hi. Tedim ah high school final taktak ahihloh hang, tan 9 sang khat om a, sum nei zawdeuhte in Sagaing ah atate uh sangkah sak uh hi. (Pu Za Khup- Tua hun lai-a, Thuklai Pawlpi kem siapa in a tapate nih Sagaing sangpi ah sang akahsak zawh pen thupi-in lamdang kasa mahmah hi).
Nero Le Zomi Makaite Kimuhna 
Gal venkhit ciangin mikangte’n suahtakna independence hong piata ding ahi manin Khamtunggam Chin Hills pen India tawh kipawlzaw ding maw? Ahih keileh Kawlgam (Burma) tawh kipawl zaw ding? cihthu, gamgi vai kikum dingin Nero (tua hun lai Indiate gam makai pipa) Zogam Khamtungah hong pai hi. Ei makaite-in, “tua ahileh no India tawh kipawl le-ung, laisinna sang nong vaihawmsak thei ding uh hiam?” a na cih ciangin Nero in “sang pen kei tawh kisaipah lianlo hi, kei kong pai na pen UN te’n gamgi khen ding ahih manin, no pen ko tawh kipawl ding utzaw maw? Kawlte tawh kipawl ding utzaw? Tua thu theinuam bek hi-ing”, acih ciangin ei makaite kikum uh a, atom in gen lehang, Kawlte tawh kipawl ding mah thukim in khensatna nei uh hi.

Zomite Leh Penlong Conference 
Khamtung Chin Hills buppi-in Kawlgam tawh kipawl ding akhensat ciangin Nero zong ciahkik a, Zogam makai Taangmi Pu Thawng Za Khup, Pu Kio Mang, leh Pu Hlur Hmung te zong Aungsan tawh kimu dingin Penlong ah hong paipah uh hi. Mukpau kampau kisiam nailo ahih manin, Kawlpau mikang pau asiam ahi Falam mangpi zuma lai at Pu Vum Ko Hau, kamphen dingin paipih uh hi. Thu kikupna-ah sangvai tawh kisai a kigen ciangin Aungsan in Tedim, Falam leh Haka ah State High School thum piak ding thakhatthu in kamciam na piapah hituak hi.

Thuklai Sangpi 
Pasian thu lungdamtaka a kisansiamna Zogam ah lai leh pilna deina na siatakin hong om a, Khuasak khua ah Japan galma pekin Private Middle School omkhin hi. Ahi hangin Mikang kumpite in Zomite ading Zolai Tan 4 ciang phazo ci-in 1925 kum ciangin Middle School hong khaksak hi. 1943 kum ciangin kimlepaam pan khua upate leh hausate vaihawmna tawh, “a sia dinglah om a sangnaupang dinglah om” ci-in, hanciamna lianpi tawh Private Middle School khat Khuasak khua-ah kihong kik hi. 1947 kum High School hong kingah tak ciangin mipite phattuamna dingleh, khua khatlekhat kikawmna anuam dingin Thuklai khua-ah sang hong kihong hi.

Independence Hun Sung Pilna 
UNuh ii Parliament Democracy hun sungpen Kawlgam Zogam ah nupi papite in hunhoihlai hun naci uha, na khempeuh baihtakin kingah thei hihtuak hi. Mikangte in, mualtung mite pilna lamah niam mahmah lai cih hong theihsa ahimah bangin, mualtung gampan sangnaupang pilte England ah sangkahsak ding, M.A. degree ciang state scholarship piading (tua hun lai M.A. pen asang pen degree hi) cihthu Kawl kumpite kiangah a gen ciangin Kawlmangte-in, komau pilna nasin sak nung ci-in, Yangon ah sang hong kahsak uh hi. Yangon ah Cushing leh St. John Convent sangte ah Zomite sang kikah pena, Zomite lakpan state scholarship tawh M.A hongzo pawlkhat zong ki-om hi (Sia Khai Khaw Lian ta nu upen ahi Anny Cing Khaw Pau zong kumpi scholarship tawh Zomi numei lahah M.A ong masapen khat ahi hi.

Pilna Leh Zomi Numeite 
Zomi numeite in pilna hong neih theihna ding leh, hong khantoh theihna ding deihsakna tawh Tan 7 hong zawh nakuh leh, Teachers’ Training College (T.T.C), Kanbeh leh Nursing, Yangon leh Namkham ah kikahsak hi. Hih pen Kawlpi ah Zo Zum pi a-om lai 1965 ciang dong, numeite ading hamphatna kihonsak hi. Haka ah Zo zumpi hong kituah ciangin, Leitung pilna tawh akituakin theihna sang zong, kisamtoto ahih manin tan 9 a zote kipaisak a, tua zawh ciangin tan 10 zote bek kikah thei hi. (Zomi numeite lakah sang siama seem masa pen Siama Cing Za Pau, Siama Pum Za Cing; Siama Lan Haw, Siama Ngan Hung, Siama Ngan Fung, etc. te hi uh hi. Zato lam ah zongh nursing kisinpha mahmah a, Tedim pan Siama Don Khaw Cing, Siama Niang Khan Ciin, [Mrs. Rev. Dr. Kam Khaw Thang bang India gam Jorhat pan asang ana zo hi] Siama Thian Huai, Siama Cingh Pau, etc., cihte ahi hi. Zomi numei lakpan madawk advanced pente ahi manin zahtakna i pia hi).

Zomi numeite pen pilna sinna lamah, kithahatzo taktak nailo a, ka neulai (1970s), hun khawng, Tedim sangpi-ah ka kah lai-in, numeite pen Zolai sang ciangciang ah numei leh pasal kikim mialmial lai napi-in, middle school ah, numei sangnaupang tawm mahmah ta-a, high school ah room khat ciang numei khat leh nih bekmah pha mawk hi.
Socialist Hun Pilna 
Ne Win hunsung ciangin Kawlgam, Zogam tangthu takpi aman leh amanlo kihelh in kisin a, political science khawng phuahtawmthu tampi tawh University te-ah compulsory in hong hilh uh hi. Colony hun pilna pen ahoihlo leh mihau tate bek ii sinzawh hi, cihthu tawh socialism hoihna hong prove pen ei Zomi sung zong ah tua propaganda a-um ahih keileh aki-um sak honkhat ki-om lai hi.

Socialist hun pilna pen niam ahih manin leitung gam tuamtuamte in i gam pan degree te hong thusimsak vet nawnlo a, tuni ciangdong mah ahi hi. Zomite ading pen theological studies lamah kipai thei ahih manin phadawm lai, cih ding hi. Socialist hunsung leh tuhun galkapte hun sungah Zomite gamsung gampua ah theological studies nei dingin kitam pai pen hi.
Pilna Thupi Kisa Nawnlo 
Socialist hunsung Zomite’n, kumpi naseemlo buang, khualzin gamvak kipan ciat hi. Pilna tawh sum kimuzo nawnkei cih, muhna leh ngaisutna khat Zomite lungsim sungah hong thuklut mahmah ahih manin pilna sinding sangin, sumbawl ding lamah kipai manga, khangno tampi-in sum ahauhlawh mahbangin tampi mahin zawnlawh in, kisiatlawh zong tampi mah om veve hi.

A taktakin cileng, colony hun pilna system pen ahoihlo hi zenzenlo banah, leitung tawh kikim pilna higige zaw hi. Tua hunlai a High School graduate khatin qualification nei mahmah in, B.A, I.A, ong khat ii qualification pen leitung level hipah hi. Nasep zonna-ah officer post ngah pah uh hi. 

Zomi pasalte in, a taang lungtup khat uh om a, tua pen galkhap lut ding, bu suak ding cih ahi hi. Khualam pan tan 9 hong zawhteh galkap lut leh sergeant clerk lai-atpi ahizong, zato lam lut leh zong army nurse suakthei pah uh hi.

Tuhun Pilna 
Tuhun ciangin Zomi khangthak sungah lia leh taang, numei pasal liangko kikimin pilna kisinkhawmta ahih manin lungdamhuai mahmah hi.

Galkapte hun zong hong sawttoto a, pilna systemte hong kheeltoto ahita zongin, leitung level pilna pen i gam i lei pan kingahzo nawnlo himawk hi. Tua banah Zomite, kawlgalkap dingin hong kideihnawnlo lai-a, galkap sunga aom laiteng zong Major tungsiah aza kikhangsak nawnlo ta hi.
Tua ahimanin, mailam khangthak Zomi momnote ading, pilna i pattah siam mahmah kisam dingin ka-um hi. Koici lehang hoih ding hiam? Pilna sinna plan leh project nei-in, khangthakte international level ah pantahzo lehang hoihpen dingin ka-um hi.
Thukhupna 
Zomite mailam pilna lambang i zon na-ah khangthak momnote ading minambup huamin hanciam pihzo lehang hoih ding hi. Tua ahih kei mawkleh pen, colony hunlai a, hausate tate leh sumhau tate bekin pilna sinzo i cihte, tuhunteh atatak hongsuak kha ding bekthamloin tu mahmah in zong suakkhin zota hi. Mai lamah Zomi leh pilna limtak ngaisunpha ciat ni.

Source : 
Ciimnuai Khuavak Vol II


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOMI LEH PILNA. Agelh - Cope Suan Pau Description: Rating: 5 Reviewed By: Cinpu Zomi
Scroll to Top