728x90 AdSpace

Hot
Menu
Zon-ol na Donate

Latest News

Ka Nu’ Kiangpan Laikhak. Agelh - Tuang Za Khai @ Khaikok (101)

Ka Nu’ Kiangpan Laikhak
Agelh - Tuang Za Khai @ Khaikok (101)


“Tu ni aa ka hihna khempeuh, zingciang’ hih dingin
ka geelsa khempeuh, a vekpi, a vekpi-in,
ka nu’ hong hehpihna khut sungah om hi”

~ Abraham Lincoln

Kapian kum (21) aphak laitak, Kalay University ah B.Sc (Hons) kasin hunsung, ka pianna khua Pakzang hi –in, Kawlpi meeltheih te’ innpan sang kakah zeel hun.

“Khangno nawilunghan’ hun” acih hunsung ah ka om hunlian ahih natawh kizui-in, ka ngaihsutna tuamtuam te hong khauhpai veva mawk hi. Ka ngaihsut bangin na khempeuh ka piangsak lianlain nuam hi. Tua ka lung-gulh bangin thu khatpeuh apian pahpah theihloh teh na khempeuh mawhsak in ka gaal bangin ka ngaihsun hi. Ka nu leh ka pa’ hong thuhilhna te phawk-khak in neilo in ka lunggulh leh katup thute bek thupisak in ka mitsuan cip kha hi. Itna leh deihsakna tawh thu hong ki hilh hangin ka lungsim sungah lut ngiatlo mawk hi. Kei leh kei –in hanciam lel ning cih lungsim tawh kanu leh ka pa tung’ pan ahi aa, midangte’ tungpan ahi zongin, ka ngah ding itna leh deihsakna te ka thupi ngaihsut ngiat loh hun ahi hi.


Hibang hunsung pan-in ka ngaihsut-tuamtuam te hong kipelh diamdiam mawk hi. Ka tup bangin bangmah piang theilo, ka vaite’ kipelh diamdiam in, ka ngaihsut khak ngeiloh haksatna tuamtuam in hongtuamcip ta hi. Mite’ neih bangh neizo ki salo, mite’ siam bangin siam ki salo, mite’ tawh ki kimzo ki salo in ka lungneu mahmah hi. Tuahun taktak ciang, lungkiatna in ka lungsim hong luahcip mawk hi. Sanginn pan kaciah sim phial in, inn ka tunphet leh phunlo paulo in lungkiatna tawh kalupna ka kideenna zinzeen den hi.

Ka-maitai zolo, ka thaneem, ka lungkia in, zan ihmut hunsung khempeuh ka puak thuhaksa teng ka ngaihsutsut na hangin, sawtlo-kaal in zingkhua hongvaak ciaiciai zel hi. Sunhun sung khempeuh zongh kei a dingin lung-gimna pi khat mah hizel ding, cih thei gige kahih manin ka lung–gim mahmah hi. Sangkah ding mah in Ka pai ngaungau den sam hi. ‘Lai’ peuhmah lungsim sungah omzo ngiatlo mawk hi. Kuama theihpih loh tak-khat in keikia ka gimmahmah hi. Khatveivei bangh ih lawmte nangawn ki mudah kha phial mawk thei hi. Tua kawmkaal ah, inn lam pan ka nu in hong hopih dihdih hi. Ka lung-gim’ khinkhian tawh ka hehsuak ahih manin ka nu ka tawng-gawp kha hi.Tua khit a sawt hetlo khat in, sanginn pan ka lamet hetloh laitak-ka lawmit mahmah khat ahi, Deih Tung (Mr. Mang Deih Tung, Sacret Heart Theological Seminary, Sillong, India) in laikhak khat hongpia hi.

Tua laikhak sung ah:-

Dear Khaikok,
Ka ta-aw, itna tawh hong hopih ingh. Na ngaihsutna tuamtuam te nadeih bangin apian theihloh manin, lungkia in na-om lam kathei hi. Kong itna leh kong thuhilhna te zongh na thudon hetloh lam katel hi. Ahi zongin ka ta-aw, bangbang na geel aa, bangh bangh seem in, bangzah tak in nong thupi ngaihsut kei phial zongin, kong itna themkhat zongh kiam tuanlo ding hi. Nang a dingin ihbiak Pasian’ kiangah khitui luangin thu kong ngetsak den hi. Nang leh nang ki muang lozaw in, Pasian’ tungah navaai khempeuh na ap zaw in!

A bei ngeilo ding itna leh deihsakna tawh,
Hongit na Nu

Hih laikhak thumvei, liivei, sim-in, athak in kasim pha kik-kik hi. Ka nu nangawn tawng-gawp in, hong thuhilhna te ka thudon hetloh hangin hong itna ki lamdang hetlo in, hong deihsak tawntung ahih lam ka telthei panpan hi. Ka nuntaakzia ka ngaihsun kik aa, ka buaina leh ka lung-gimna te’ sungpan ka nu’ hong itna pen kei a dingin lungmuanna leh daihna ahih lam, damdam in ka phawk thei sansan hi. Ka nuntaakna sungah bangbang apiang zong, hongittawntung ding ka nu’ hong itna leh hong deihsakna thute athak in ka telcian thei aa, Pasian kiangah thu hong ngetsak tawntung na hangin lawhcinna leh matut gualzawhna a ngah ding kahih lam teltak in ka theita hi. Tua ahih manin ka lung muangin, lungnuam takin sanginn pan, inn lam ka zuan theita hi. Lamdang mahmah hi.Tua-ni a kipan katuah haksatna te’ tungah gualzawhna la in, lungnuam tak in ka ihmu hithiat theita hi.

Tu in ahih leh bangbang haksatna katuak zongin ka nu’ hong itna leh, hong thunget sakna te tungah thala in lametna hoih kanei thei tawntung ta hi. A nung kik ngeilo, a kiptawntung itna in mihingte’ nuntaakna nangawn ki khelsak thei ahih lam ka nu’ kiangpan ka ngah laikhak tungtawn in teltak in ka thei hi.

William Carey in kum (40) sungbang India gam-mi te a ding,
a nuntaakna azat khit-teh asuahni pawi khatvei bawl hi.
Tua pawi sungah William Carey in :-
“Ka nuntaakna hun, abeisa thu khempeuh ka ngaihsut kikkik ciang,
Pasian’ ading ka nasepna, ka ki piakkhiat na te’ sungah
lungkim huai bangmah om zolo in,
a thaneem mi, Pasian’ na-ahi ding bang leh ahoih in asem zolo
mi khat kahih lam ka kiphawk hi.
Aw… ka Pasian aw…nang a dingin kei athak in kong ki ap hi.”
Ci-in a lungsim tamzaan in thu agen khiankhian hi.
A tawpna-ah a thugen hi bangin khup hi…
“Ka sihkhit-teh ka ki phumna hankhuk tungah a kiphut ding
mualsuang tungah
ka deih mahmah Isac Watt ii la ngaihno,
a kammal hoihte, a kigelh ding ka lunggulh mahmah hi…
tua kam-mal te ahih leh…
a thaneem, a zawngkhal, bangmah aa-a ki simlo,
tangteel khat-tawh a kibang lel ‘KEI’ ka nuntaakna,
ka hihna khempeuh, ‘NA’ hehpihna
‘KHUTSUNG’ ah kong ki-ap hi…”

~ J. David Lundy

Source :
A HIZOLO OMLO (Laibu).
(Tupna Kician Anei Khangnote a ding Thapiakna)

Page 13 – 16.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Ka Nu’ Kiangpan Laikhak. Agelh - Tuang Za Khai @ Khaikok (101) Description: Rating: 5 Reviewed By: Cinpu Zomi
Scroll to Top