728x90 AdSpace

Hot
Menu
Zon-ol na Donate

Latest News

Siim le maal Zomite mapankhopna pan gam thak ah.... Agelh - Sia Khampeek

Siim le maal Zomite mapankhopna pan gam thak ah.... 
Agelh - Sia Khampeek

Thupatna: 
Sim le Maal, Sak le Khang Zomite’ sungah Zolai khantohna ding lunggulhna tawh Lai lam kipawlna kinei ciat a, Kawlgam (Siim lam) Zomite in biakna lam makaite’ hanciamna tawh Zomi Christian Literature Society (ZCLS) ci-in tuma kum 30 lai akipan na phuankhia in, India gam (Maal lam),Manipur Zomite sungah minam kipawlna lianpen khat ahi Zomi Council (ZC) bulphuh in Zomi Language and Literature Society (ZOLLS) cih nung kum 2012 sungin kiphuan khia hi. Hih banga I patkhiat Zolai kipawlnate in Sim le Maal a om Zomite kipumkhatna ding mapankhopna lampi hoih mahmah khat hi dingin I lamen hi.

Tua banah hih ZOLLS makaite in ZOLLS Journal hawmkhiat ding geelna a neih uh ciangin tua lai ah Tongsan Media Group min tawh Thului (Article) gelh dingin Dr. Neng Ngaih Lian (Chairman of ZOLLS) kiang pan cialna ka ngah manin, angtang in lungdamna lianpi ka nei hi. Laigelh ding thulu ka ngaihsutsut ciangin, tuhun Zomite’ dinmun le I kisap mahmah khat hi ding a ka lamet “Sim le Maal Zomite Mapankhopna Pan Gam Thak Ah“ cih thulu tawh kong gelhkhia hi. Taanglai hun gamgi khenna (International Boundary) akiseh ma-in Zomite muhna na zai nailo uh a, namneu dangdangte mah bangin galdona-ah a thahat masa ahi Colony gampite geelna bangbangin unau laizom khat kimlai gam 2 gam 3 ah i kikhenthang manga, I ngeina le I pau/laite in ong awh lingleng hikeileh akimelma semsem dingte ihi uhi.

Hih banga ong awh lingleng thute hangin Siim le Maal a om Zomite kithutuak tak a geelkhop, sepkhop, hawmkhop ding hun hong tungta ahih manin, I mapantheih kei leh I kiim I paam-a minam alian aneute in ong nopneh/ hong hencip ding uh a kithanem semsem ding hi hang. Tua panmun/dinmun awng (Area) tampite pen tuni dong Siim le Maal Zomite in geelkhop, sepkhopna maban kician kinei thei nai peuh mah lo cih kimuthei hi. I gensa bangin geelkhop, sepkhop, kikupkhop ding thu tampi om dinga, ahi zongin tuate kikum masalo zawin , kipawlkhopna le mapankhop theih ding lampi I tun theihna dingin ong khaktan le ong dal thubulpi pawlkhat I ensuk ding hi.

Ahuampi-in, ei Zomite sungah kithutuahna le mapankhopna ding a susiathei thu nam 5 te in;
(1) Beh le Phung,
(2) Biakna Pawlpi,
(3) Namhiang Pau le Haam (awkaih),
(4) Khua le Tui vai,
(5) Pilna /Khuamuhna cihte a tomkim in kong pulak nuam hi. A dang thubul tampi om kha phial zongin, a diakdiak in hih thubulpi 5 te ah ei aa bekbek thupitsakna / ultunsak nop luatnate in Siim le Maal Zomite i mapankhopna ding hong khaktan thubulpite ahi hi. Hih thute ah beh, pawlpi, namhiang, khua, pilna akl khuamuhnate ah khat le khat kikimlo/ kibanglo cih I theih ciat hangin ei beh, ei pawlpi, ei awkaih, ei khua le tui leh i muhnate lo peuh a dangdangte tungah akisam bangin itna le khualna tawh hopih, panpih,tawsawn, nungzui, makaih ding cihte kithanem thei hi. Ei a ciat bek mah athahat zawk nading, aliat zawk nading geelna le sepnopna lungsim kinei ciat hi.



(1) Beh le Phung:
Zomite pen beh le phung vai ah a thuklut (sensitive) thei mahmah minam ihi hi. Taanglai a kipan I pupate in beh khat le khat a kikholhkhop theihlohna pen tuhun khangthakte hun ciang dongin i ciin sawmsawm lai mawk pen minam sungah kipumkhatna ding, sepkhopna ding geelnale tupnate ah ong nawngkai sak mahmah thu ahi hi. I pu I pate ahileh akhuamuhna uh zai nailo uh a, tungnun /gualzawh kituh nopnate hangin minam khat, innkuan khat, sanggam khat gegu a mulkim huai zah dongin gal le sa kido/ gamta uha, sepkhop bawlkhopna tawh akingah ding gualzawhna tampite kisuplawh minam I suak hi.

Tua bang i cih ciangin i beh i phung neusek ding le thusimlo ding cihna hi lo hi. I beh i phung sung pan minam bup aiding bitna, daihna, khantohna le summeet zonnate ah phattuamna ong pia thei ding ngimna le tupna hoihte i phuangkhia ding hi. Ei bek tha tawh i zawhlohte beh dangdangte tawh holimin geelkhawm, semkhawm leng tulaitak i dinmun sangin asangzaw ah akitungto zo ding minam i hi hi. I beh le phung gamgi i thupitsak khakna hangin abeisa hun khat lai-in, Zosuan gige kimlai Laizom melma in, gal le sa bangin i kineih ngei ta zen hi. Tua manin Zomite sungah beh le phung vai ultunsak luatna hangin minam kipumkhatna ding tampi dongtang sak in, I lawhcin zah ding kilawhcinglo hi. I beh le phung minte sangin Zomi sungah Unau laizom i hihna mah thupitsak zawk ding kisam hi.

2. Biakna Pawlpi:
Pasian huhna tawh Zosuan kici khempeuh phial pen nidang Dawi biakna (Lawki) pan Khristian upna, zuihna leh Lai Siangtho khat alenkhawm i suah theih manin lungdam thu le Pasian thupha taktak ahi hi. Khanglui biakna, upna, kithoih kipaaina a kibang i nei khawm minam i hi hi. Asho, Khumi, Zomi(Tedim), Khalkha, Falam, Kanpetlet, Matupi, Mara, Zotung, Zophei, Mizo, Lusei, Hualngo, Hmar, Ralte, Biate, Gangte, Vaiphei, Kuki (Thado), Komrhem cih bangin a mun leh a gam zui-in kampau leh awsuah paulam in i kituam gennop hangin i biakna, i upna, dawi leh kau biakna cihte ah i biakzia le i ngaihsutna kibang khin hi. Tua bangin khanglui lai-in upna biakna nam khat sungah om khawm i hih manin biakna hangin nawngkaina leh buaina kituakkha ngei lo pah hi.

Kawlgam Zosuante’ sungah enleng 1953 kumin Rev. S.T. Hau Go makaihna tawh Zomi Baptist Convention (ZBC) kiphuankhia in, tua sungah kampau nam tampi kizangh hi. Ahih hangin gambup khoppi vaihawm ciangin lasak dingte Halkha, Falam, Tedim cih bang teng tawh kibawl in kisa thei ziahziah hi. ZBC kipatcil akipan Zogam (Tedim mite) sungah Khanlawhna lianpi hong pian hun (1970) kim lam ciangin, Siim lam Zomite’ sungah Lai Siangtho sin pawl khat ong omin Pasian nasem zong kitam semsem hi. Ahuhzuin Pawlpi thak kiphut ziahziah ahimanin ei pawlpi le i upna ciat thupisak nop luatna hangin, pawlpi zui-in Lai Siangtho le Labu kituambawl ciat-a siate lenungzuite teivang lahna hangin minam bup luan khat-a luankhopna nakpi takin susia hi.

Tua banga kalsuanna hangin, theihloh kalin i minam sungah kitotna le kikhennate nasiatak ong piangkhia hi. Hih kikhenna le kitelkhialnate i etkik ciangin Laisiang tho sin le a thei mipil kibehlap semsemna huhau-in i upna le i zuihnate minam vai tawh i kopkhop siamloh hang ci leng kikhiallo hi. Hih pawlpi kikhenna meikuang zomin tuhun i minam sungah kipawlna tuamtuam kiphuan khia in, kipumkhatna le sepkhop ding sangin kikhenna le kidemna lam vive kimanawh hi.

(3) Namhiang- Pau le Ham (Awsuah):
Tanglai-in kampau nam khat a zangh ngeisa minam i hi a, teenna mual leh guam in hong halna hangin i namhiang zui-in i pau/ i haam kilamdang i hi hi. Nidang lai hun bang nawn loin, tukhang hunah kikawmna le kizopna lampite hong hoih zaw ahih manin, kikawm kiphakna hong olzaw hi. Kam dang khatin gen leng,. kizopna in pilna le thumuhna hong piangsak na hi gige hi. Tuhun khangnote pen Kawlkam, Kalakam leh Mikang kam cihte akipan kampau tuamtuam thei/ pausiam thei ziauziau lel uh ahih manin, Zopau nangawn a siamlo liang nangawn omta hi. Zosuante’ sung zongah i namhiang zui-in, kampau akibatlohna a om hangin tawmvei om khawm peuh leng ii paute olnotak i kitheihpih ziauziau hi.

Tedim mi Halkha pau siam, Falam mi Lusei pau siam, Hualngo mi Ngawn pau siam, Hmar mi Thadou pau siam, Vaiphei mi Paite pau siam, Gangte mi, Simte pau siam, Biate mi Darlong pau siam, Cho mi Asho pau siam cih bang danin Zosuante sungah kampau kitelbaih mahmah hi. Hih in sul khat, zang khat suan i hihna ong lak hi. Kawlgam lamah Tedim kampau a zangh Zosuante’ sungah awsuah /Awkaih kilamdang tampi om hi. Gtn. Saizang pau, Sihzang pau, Teizang pau, Zopau, Khuano pau, Dim pau, Losau pau, Phaileng pau, etc.. cih bangin awkaih nam tuamtuam om a, tuate khempeuh in American Missionary Dr. J.H. Cope hong bawlsak Roman Alphabet laimal zangh khawmin, lai kinei/ kizangh khawm hi.

Tua manin Siim le maal, suah le tum Zosuante khempeuh pen i awsuah/ awkaih akilamdan hangin Roman Alphabet laimmal bulphuhin Zopau le Zolai zanghkhawm thei i hihna tawh i kampaute kitellahna bang mahmah omlo hi. Awsuah/ Awkaih kilamdanna in Unau hihna kilamdangsak thei ngeilo hi. Hih bangin khat leh khat Zopau kizang tuah thei kawikawi i hih manin kampau vai ah buainate a hun zui-in hong bei lel ding hi. Cihnopna ah, pau le haam (Awkaih) zui-in Zosuan sungah mapankhopna le kipumkhatnate nawngkai saklozawin tua awkaih kilamdang tuamtuam mah zangh ciatin khat le khat kizahtakna bulphuhin minam picing khat-a i din theihkik nading lampi om a ci nuam ahi hi.

Tu-in India gam (Maal) lam a om Zomite sung pan lai lam pilna nei makaite in i Zolai manawt zawkna ding le i kampau mahmah akinai semsemna ding ngimna tawh Zomi Language and Literature Society (ZOLLS) hong patkhiat theih manin angtan huai mahmah kasa hi. Hih ZOLLS in Siim le Maal, Suah le Tum Zomite Unau laizom hihna hong pulakkhia ding banah i pau i ham mahmah zong hong pehzomkik theih nadingin lametna i nei hi.

(4) Khua le Tui vai:
Sim le maal, sak le khang Zosuante khempeuh pen Ciimnuai pan piang Ciimnuai vontawite ci-in tangthu sulkanna ah kimuthei hi. Ciimnuai mun pan i pu i pate in khua le tui satin in na kithehthang uh a, mual le guam haalna hangin pau le haam kilamdang/ kibanglo i hi hi. Tua bak tham loin, khua le tui nuntak zia tawh kizui-in i ngeinate zong tawmtawm kilamdanna hong om hih tuak hi. Pau le ham pen amun le mual zui-in kilamdang thei mah le Zomite’ ngeina bulpite kikhelthei ngeilo hi. Tuhun ciangin i pianna le i khankhiatna khua le tui tawh kizui-in, i pau i ham kilamdang bek tham loin, I khua min khawng peuh thupisak kha thei lai ihi hi. I khua awsuah/ awkaih ciat le khuapih tuipih cih bek Zomibup in a zatkhop ding alunggulh mawkmawk peuh ki om thei hi. I gens amah bangin Kawlgam lam a om Zosuante ading in Sangmang Cope topa hong bawlsak Roman Alphabet laimal I zatkhop theih ding thupi hi.

Tua mah bangin Zomi Christian Literature Society (ZCLS) hong piankhiatna zong Cope topa’ bawlsaksa laimalte mah puahin, zuun a zatkhop ding deihna mah hikha ngel dingin ka um hi. Tua ahih manin, i gam sungah khua khat in gentuahna khat aneih leh, kei khua hilo, kei tawh kisailo, ci-a i khua le tui kipawlna nengnengte ultungsak nawnloin minam vai, gamvai, khua le tui vaite ah ahuampiin ahuai den lungsim i vom ciat ding hunta hi. Gtn – lai lam ah amasawn pawlte ahi ZCLS le ZOLLS te’ makaihna nuai ah kalsuankhawm ding kisam hi. Khua le tui kipawlna nengnengte ultunsakna le a tuamtuam zatna/ ciinna thupitsaknop luatnate in Zosuante mapankhopna tampi hong susia pelmawh ding cih i gen nuam hi.

(5) Pilna, siamna le Khuamuhna:
Rev. Dr. Gin Khan Nang (GKNang) in “ Zomite’ khuamuh cilna“ cih Thului (Article) a gelhna sungah Pianitit gamah galhuh a pai i pu i pate’ thu na gelh hi. Hih pen Zomite’ khuamuh cilna ahkl gamdang zin masak penna hi khangel ding hi. I pu le pate’ hun lai-in Zomite pen laisin kitawm, pilna tawh khuamuhna kinei masa lo cih kimuthei hi. Tuhun ciangin Zomite khuamuhna pen laisinna pan kingah Pilna le siamna, laisimna, zinna vaakna le kizopna tuamtuam tampi aneite i kicithei hi.

Pilna tawh kisai I gen ciangin ei mimal kivak zawdeuhna field khatta i nei ciat-a (Gtn – pawlkhatte music, pawlkhat lai, pawlkhat website, pawlkhat leuleu sum le pai zonna, cbt,) i pilna le khuamuhnate tehna Piciang (Ruler) tuamtuam om hi. Mipil khempeuh zong ciim khinlo uha amau kivakna zong atuampi tek ahi uhi. Scientist khat in politics lamah thanemna tampi nei dinga tuamah bangin engineer khat in cina khoi le kep dan tampi theilo ding hi. Apillo i om kei-a i pilna akibanglo hi bek hi. I gennop thu in, ei kivakna le siamna, theihnate hi taleh mi dang khatpeuh ii pilna, siamna le kivakna khatpeuh zahpih simmawh bawl ding hilo-a Zogam i lamthakna ah i kivakna mun tek pan i pantheih pen ciinhuai a ci ihi hi.

Ka zak ngei khatah “ Pianpih B.A” cih khat zong ka za ngei a, tua pen laisinna pan kingah B.A hi loin, pianpih ngiat a Cimna / thumuhna a neite a cihnopna ahi hi. Tua mah bangin kampau zattangzang khat a kizangh ngei khat” Na theih tamin na tel tawm” cih kkhat a om bang mahin, mi pawlkhatte in na khempeuh thei naal gawp pongin a taktak ciangin a tello/ a theilo takpi om thei hi. Thumuhna I cih pen sinna (Learning) le tuahkhak thu (Experience) tungtawn a kingah nam kici thei hi. Pilna siamna I cih leuleu ciangin atuam vilvel a lai le pumpi,lungsim ngiat tawh sinkhopna namte ci leng kikhiallo kha ding hi.

Tuhun in Zomite leitung mun thupi tuamtuam le i tuna gam ciatah amau hong kalh pilna le siamna I neih kei le nasep silbawlna ding mun kingah zolo hi. Kawlgam le Asia gamte pan I neisa pilna/laitante pen gam thupite ahi US, Canada, Europe le Australia gamte ah kizangh theilo hi. A hizongin amau ciangtanna le a deihna munah a kizanghthei ding khutsiamna/ hihtheihna khat peuhpeuh a neite in, pilna neite’ sangin nasep ngah baih zaw thei uh hi. Hih siamna I cih ciangin, kivakna/ teempaina ( Talent or Professional) namte ahi hi. Thukhat leuleu ah bangzah siamna/ kivakna a neih hangin, Lai theihna (pilna) nei kei leuleu zel leng gam le nam vai nasep thupite ah kithuklut theilo zel kawikawi hi.

Tua ahih manin, tuhun pen a pil taktakte mahin nasepna khat peuhpeuh ah panmun hoih ngahin a thumuhna tampite vang in mipi in muang pah uh hi. Zosuante sung zongah mipil, thumu zawte mahin I gam le nam kivaipuakna tuamtuamte ah panmun hong lak dinguh ahi hi. Thudot tham cingte mah I dot theih ding dinmun ah i koih theih ding zong mipite in nungzui hoih i sepna hi pah hi. Zomite sungah minam khantohna ding bekbek mah lunggulhna tawh kipawlna tuamtuam phuan khengkhang hi hang. Tua I kipawlnate pen asia hikhinlo-a amau munmun ciatah a mapannate uh kiciaptehpih, kithupibawlpihin atunga i kikup thu 5 te vaihawmna khatpeuh ah ultung sak lualosemkhawm, mapangkhawm le kikumkhawm thei leng kilangpanna le kidemna cihte ong bei ding ahi hi. Sim le Maal a om Zosuante khempeuh in Zomi min mah a deih le angtanpih nuam vive I hi hi. I khuamuhnate le I theihnate gawmin, I muhna le senate khanto in, kekbeh lai ding hi hang.

Thukhupna: 
Pasian huhna tawh siim le maal, sak le khang Zosuante’ sungah hong makaih dingin mipil, misiam le thumuhna zaipi a nei Zomi tampi mah kinei ta hi. Kawlgam (Siim)lam pan Zosuan kipawlna lian tuamtuam I nei khin a, India gam (Maal) lamah zong tampi mah nei hi hang. A hi zongin biakna bulphuh kipawlna le gam le namvai kipawlna tawh i khensiam a, i sepkhop siam ding bek kisam ahi hi. Bangbang lampi tawh i sem zongin, i tupna le i ngimna mongte in Siim le maal Zosuante kipumkhatna ding le Khantohna ding vive ahi ding kisam hi. India gam Zosuante sungah minam kipawlna adingin Zomi Council (ZC), ZRO, ZYA cihte le biakna le Social Development lam zongah adang tuamtuam i nei hi. Tua mah bangin Kawlgam lam Zosuante sungah zong Global Zomi Alliance(GZA), LZI, gam le nam vaiah Zomi Congress for Democrecy (ZCD/ZNC) , WZC le ZYA cihte banah Social Development lamah a tuamtuam kinei hi.

Tua ahih manin a tung a i gensate khempeuh khuituah kik hi leng, tuhun pen mapankhop hun ahih mah bangin, mapankhopna tawh I kilamdanna gamgi tuamtuamte kiphelkhia zo ding ahi hi. A diakdiak Sak le Khang Zomite in Pasian maipha kaai nuaiah kipawlkhawm-a thahatin gam thak i lamna ah Tongsan Media Group in zong ka hih theih zah tawpun ma pang ding kigingsain om ka hilam uh hih “Siim le Maal Zosuante Mapankhopna Pan Gam thak Ah“ cih thului tawh a tangko nuam i hi hi. Laisim Zosuan mimal khempeuh Topan thupha hong pia hen !

Zosuante mapankhop ding lunggulhna lianpi tawh,
Written by: Sia Khampeek (Tongsan Pu)

Source :
Zomi Language and Literature Society (ZOLLS) , Journal

Photo Credit : Samuel Khampeek (Fb.)
Source: http://www.zogam.com/articles/general-articles/1540-siim-le-mall-zomite-mapankhopna-pan-gam-thak-ah.html

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Siim le maal Zomite mapankhopna pan gam thak ah.... Agelh - Sia Khampeek Description: Rating: 5 Reviewed By: Cinpu Zomi
Scroll to Top