728x90 AdSpace

Hot
Menu
Zon-ol na Donate

Latest News

Sim leitung ah Lawm hoih pen ding? Agelh - Dothang, SMC

 Sim leitung ah Lawm hoih pen ding?

Agelh - Dothang, SMC

“ Lo zong khial leng kum khat ki zawn lawh a, Leitung lawm ding zong khial leng khan sung kizawn lawh hi”

Hih thu pen man ka sa mahmah hi. Khangno tampi in hih leitungah I nuntak sungah a kimang ding sang in tawm vei sung gualnopna ding peuh lunggulh citciat se uhhi. Hih kong gen thu pen kha lam thu, Pasian thu lam hilo hi. Ka gennopen in leitung I nuntak sungin nuam thei penpen a om ding thu ahihi. Ahizongin Zomi khangnote in hunte zang khial in, leitung lawm hoih pen ding thu neu ngaihsut mawk in om uh ahih manin ka theih bang kong hawm sawn nuam hi. Leitung ah I om lai teng a thupi pen in nupa kal sung a nuam sak pente a hampha vangam malepte a hi uhhi. Inn kuan sung nuntakna leh nupa lawmta kikal kizopna thupi mahmah napi ki neu seh mawh hi. Leitungah a pil khia pha mahmah, tuciang dong a pilna a kiban zo nai lo Solomon kumpipa in “ Zi hoih/ Pasal Hoih pen Ngun leh Kham sang manpha zaw hi ci hi. Kham leh ngun pen a kingah ziau na sa hiam? Sunsiah tunna ding nahtang teh lawh dan ziau hi mawk lo hi. Tua mah bang in Khan sung lawm hoih pen ngah ziau theih hilo hi. Kumpi Solomon in “ Zi hoih” pen Kham leh Ngun tawh na gen the hi. “ZI” ci ziau loin, “Zi Hoih,” ci se hi. Khan sung lawm hoih pen Nahtang teh lawh ziau dan hilo ahih manin Pil vang tak in a kiteng nailo khang thakte in ngaihsut ding thupi kasa mahmah hi.

              Tuhun Zomi khangno te’n Paltan lawm zon in a khan sung lawm ding uh zong ta uh hi. I Zo gamah numei meigong tam mukha ta ka hih manin a cing zo kei zong, “bang hang”  a kingai lo lah hilo hi bang aa, ki om thei cih ka muh dan hong hawm sawn nuam ing. Mel hoih mahmah napi meigong cih pen “ A hang” khat om hamtang ding cih ka um hi. Zomite pen Ken dang lak peuh,Sung thep lak peuh, mual tungah teng mite I hihi. Nuntak haksa lua mahmah I hih manin khan sung lawm ding pen a hau kideih pah hi. Tua mah bangin Mo khak ding neite’n zong Makhau deih in Mopi dingte’n zong Sungh hau mah deih pah uhhi. Itna pen hauhna hi masa lonapi-in, Itna pen hauhna kisuak sak ta hi. Ka lawmte tawh sangah “ItNa” thu ki kum zel hi ung. Tuate lak ah ka muh dan tek uh kong hawm sawn nuam hi. Tua Ka ki kup uh “ItNa” te in:-
1. ItNa In Sex hi 
2. ItNa in Sum Hi 
3. ItNa in Melhoihna Hi 
4. ItNa in Hehpihna hi. 
Cih teng ka ki kum zel uhhi. Hih teng tung ah ka muh dan hong gen nuam ka hihi.  Khan sung lawm tawh koi ci bangin itna kip thei ding cih leh koi ci bang itna man hiam cih ahihi. A kician in gen zawh ding hilo aa, a huampi in tawm ta kong gen ding hi.

Itna in Sex Hi

                      Ka lawmte tawh  Itna thu ka kikup uh ciangin “ItNa in Sex” hi a ci pawl khat ka om uhhi. Pasian in ADAM leh AVE tungah “ Sex” na pia ahih manin, “Note pung unla, leitung dim un” na cihi. Lawm ta kikal ah “Sex” pen “ItNa” hi takpi leh kilawm hi. “Sex” pen Pasian kiangpan I ngah letsong ahihi. “Sex” in “ItNa” hi masa lo na pi, Nupa kal kong kip hong khosak pen “Sex” na hihi. Nupa kal ah “Sex” bek lunggulhna pen Satan zeetna nan zawhlohna khat hi. Nupa kal sung pen kitel siam ding thupi mahmah a, Cidamna zong kitel siam kul a ahihi. “Sex” in “ItNa” hi a cite’n  nu le pa omkhopna bek thupi sak a, a ut hun uh a kituah loh ciangin kimuhdahna hong piangin, tua in nupa kal hong kikhensak hi. “ Sex” tungah na khempeuh kinga lua ahihmanin in a ki itna uh hong tullo uhhi. Hih ukna kikim lo pen Guih theih kham theih te, za tang kisun cihte pan in hong pian hi aa, lawmta kikal hong susia mahmah hi. Suan leh khak deihna bek tawh a zite  uh it aa, tua in itna kiam in kikhen lawh uhhi. Zi pen suan leh khak neih pih bek ding hilo hi. “Sex” Bek in Itna hong kipsak zo lo hi. Hih pen itna man lo ahihi.

      NOTE:  American Doctor khat in Nu leh Pa ta neih theihna a kituak hangin, ta ki neilo thei veve ci hi. Hih phawk inla, ta na neih kei leh zong kitel siam sawm in SARAH leh ABRAHAM Bat sawm in ki tul ta uh.

Itna in Sum Hi

               Zomite midangte sang ki zawng zaw ahih manin, sung hau maak hau khan sung lawm dingin ki deih hi. Hih lungsim pen a man lo khia mahmah ngaihsutna ahihi. Sung hau, Maak Hau deih pen “ Thadah Mite” lungsim vom ahihi. “ItNa” in sum hi acite’n kiten nungah haksatna tuak uh leh thuak zo loin nupa in kikhen ziau uhhi. Hih pen “ItNa” ziau ahihi. “ItNa” in hauhna acite adingin, hoihna tampi zong om aa, siatna tampi zong om cih theih ding thupi hi. Khan sung lawm ding ngaih sut mahmah kul hi. Tulai khang thak nungak pawl khat bangin ka lawmpa ding hau peuh leh pha zo ci uhhi. A khang ham sim tham khat in a hauh leh nungak no milmel ngah thei hi. Hihte zong kum kikhai lua thei ahih main nupa kal kizopna ah kikhenna piangsak baih hi. Nungak pawl khat leuleu in, nam dangte pen pi muh in hauh muh pah uh aa, zong kiteng mai uhhi. Hizong a hoihlo khat higige hi. Hauhna I lamet luat manin Nu leh pa, U leh nau kizopna hong gamla sak in, meltheih ki itna hong dausak hi.  Dr. Vumson in, “ Nam dang tawh kiten ding a tawpna kei hong pia un” na ci hi. Nam dang lua tawh kiten ding hoihlo a sak man na higige hi. Hauhna in zong nupa kal hong buaisak thei hi. Gentehna in: guih theih kham theih nupa a zang khawm iin kitotna piangsak hi. Ni dangin pasalte bek in zang ta leh tun numeite zong suk zaw mawk ta aa, hih in innkuan sung buaina hong piangsak bek tham loin kikhenna hong piangsak hi. Khan sung ki thuahpih ding pen a hau bek deih ahih man in, Biakna kibang lo poi sa se lo, Minam kibang lo poi sa se lo, pau ki bang lo zong poi sa se lo uh hi. Hih zong itna man lo khat mah ahihi.

NOTE:  ItNa in sum hi a cite zong khial tuan lo hi. Hauhna in nupa kal siasak khinlo a, buaina hong piangsak thei hi cih phawk ding thupi hi. Hauhna in u leh nau hong kikhensak thei aa, hong ki it sak thei hi. Nang tungah a hoih pen kinga hi cih phawk in.

Itna in Melhoihna hi

                   Zampi AG biak in ah Sia Pum Nang in ka neulai-in a thugen khat kha phawk khat om hi. Numeite kum15/21 sungin a khan sung lawm ding uh pen a hoih bek deih uh cihi. Kum21/28 in a khan sung lawm ding uh a pil bek deih ci se hi. Tua ciang, kum 28/35 te in a khan sung lawm ding uh a hau bek deih ci uhhi. A tawpna ah kum 35 tung siah in pasal hi peuh leh ci uh hi. Sai Pum Nang in a gen laitak in nau pang lai ka hih manin thupi ka sa kei hi. Tun ahih leh bel nuihzak huai buang, lah man sim tham ka sa ta hi. Itna koi pen ai tam cih ngaihsun in. Khang lui te’n “melhoih ning tui ki dawn thei lo “,a cih pen “Itna in Hoihna hi” a cite tawh ki leh bulh lian hi. Tuhun khangno te lungsim ah bel melhoihte a lungsim hoih khin uh cihi. Hoih bek suan luatna pen ki hoih den lo ahih manin mel hong siat hun ciang kikhenna hong piang hi. Nungak lai mel hoih mahmah ta leh ta 1 leh 2 hong nei leh a nungak lai hong bang nawnlo in tua in nupa kal kikhena hong piangsak hi.

NOTE:  Khan sung lawm ding melhoih muhna pen a sia hilo hi. Melhoih na ngah zawhna ding hanciam in la, mel tung kinga lua kei in zan mah ciang hong vul ziau uh hi. Mihingte paal sung pen tawm vei sung bek phawk den in. Hih zong kikhenna mah piangsak zel hi.

Itna in Hehpihna hi

                  Hih a tawpna thulu pen thupi ka sa pen hi. “Itna “, in “hehpihna” hi ci ngiat lel hi.  Hih itna pen Sex tung, sum tung, Mel tung ki nga ngiat lo hi. Bang mah tungah kinga lo ahih manin hih tawh a kiteng kha te nupa kal nuam leh nuam khawm, dah leh dah khawm, tuah bang bang thuak khawm ngam in ki khan tul uhhi. Na lawm ngaih khat pen Hehpihna leh na  it zo tawntung ding hi. Hih itna in nupa kal vai ah siatna khempeuh dal zo hi. Nupa kal sungah itna man pen hehpihna tawh itna hi ka ci hi. Hehpihna tawh khan sung lawm ding itna pen mailam ah thupiang dingte muh khollhna tawh it na hih man in buaina a om zong thuak hak kisa lo in itna kho tawntung hi.

NOTE: Khan sung lawm ding hehpihna tawh a itte in zeisu lungsim bang a puate ahihi. Na tungah ki nga ngiat lo in itna mah masuan in bang bang piang ta leh ka lawmpa/ ka lawmnu ci tawntung in ki khan tul uhhi. Hehpihna itna na neih leh  paul in, ICOR13:4-8  sungah te na nei lawm tungah na nei zo ding hi.

Na khan sung lawm koi ci zon ding

                     Khan sung lawm ding pen nuntakna sungah a thupi pen khat ahihi. Mihing te’n nuntakna ding oxygen a kisap mah bang in a thupi leh a kul khat ahihi.Tua ahih manin  na khan sung lawm ding pen neu ngaihsut kha kei in la, thungetna tawh pang den in. Khan sung lawm ding a hau a pil a deih masa lo kua ta om ding hiam? Ahizong nang theihna tawh zong ken la, pasian zong sak in. Na khan sung lawm ding na zon laitak in “ Na mittang nih te hong ngawh in la, Na bil nih te gel tawh khua lim ngaih in”.Lawm na zon khialh leh khan sung  a zawn loh na hih lam phawk in.Lawm hoihna muh kei leh vang tung nopna leitungah a ciam kha lo na hihi. A masa in na khan sung lawm ding Pasian zong sak in. Na lawm in na nu na pa na meltheih teng hong itsak ding thupi mahmah hi.A hih theih leh nang thu hong tel khat, pau ki bang khua ki bang, biakna kibang in buaina hong tawm sak pen ding hi. Pilna nein a hih leh nang tawh na kithuah pih theih ding zong in.

NOTE: Nupa na hih hang un, zeisu na neih kei uh leh na ki itna uh a tul dingin um ken. Nupa ki lung tuak in thungetna na neih nak uh leh satan in hong khen zolo ding hi. Na khan sung lawm ding na zon ciangin nang theihna tawh zong kha kei in la, pasian leh thu thei te dong ham masa hamtang in. Khan sung lawm pen leitung ah sum manpha pen Ngun leh kham sang manpha zaw cih tel in la pil vang tak in zong in. Ka tan 9 pan ka khan tawn lawm ding thu ka nget pen  tun a thupitna ka thei ciang ze kai kisa lua hi. “ Nupa ki lung tuak khua khat in zo lo” hi. Khan sung lawm hoih a mu zo ciat dingin Topan thupha hong pia hen la, na ngaih mahmah tawh a ki kha tul dingin hong ompih den ta hen. Hih teng na theih siam leh I khua sung I gam sung ah meigong om lo ding cih ka um hi.

Ka lai at endik man keng in nong na edit sak kik vo gen teh na in "teh" cih pen "the" tawh na om thei kha in teh......

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Sim leitung ah Lawm hoih pen ding? Agelh - Dothang, SMC Description: Rating: 5 Reviewed By: Cinpu Zomi
Scroll to Top