728x90 AdSpace

Hot
Menu
Zon-ol na Donate

Latest News

ZOMI TAWH KISAI THEIHHUAI THU TUAMTUAM. Agelh - Rev. Tuan Khaw Kham

ZOMI TAWH KISAI THEIHHUAI THU TUAMTUAM
Agelh - Rev. Tuan Khaw Kham 
Photo Credit : Thor Thorn
Amun : Tedim Thunget Mual

Tanglai-a I pu sawnsawnte Sen gam ah “Zo” in kumpi a seplaitak BC 256 hunsung teng in nateng uh a, tua hun a Sen gam a ipu sawnsawnten a minam min uh “Zo” na phuak pah uh hi. Tua khit BC 221 pan 207 dong “Chin” in Sen gam kumpi sem a, tua kum hun ateng ipu sawnsawnte in a minam min uh “Chin” na phuak uh hi. Sen gam pan in Mongolia gam ah lal uh a, khuadam lua ahi manin. Sawt teng zolo in, Tibet ah lal leuleu uh hi. Tua pan in Kawlgam khanglam ah lal in munkhat ah kibusa phot uh hi. Damdam in Kawlgam laizang lam ah lut uh a, Shan le Kachin-te ma tawh kibang in teng khawm uh hi. I pu sawnsawnten “Zo” le “Chin” minam min mah pua in natai kawikawi uh hi. “Chin” pen Sen pau hi-a, mangpau in “man” acihna leh ei pau in “mi” ahi keh “pasal taktak” cihna ahi hi. “Zo” leh “mi” igawm ciang in “Zomi” hongsuak hi.


I pu sawnsawn tepen AD 850 pan Tuikang dung zui in teng suksuk uh a, Gunkhawm, Kawlpi, Kale, Kabaw gamsung teng ah teng uh hi. Kawlpi gamsung a, aten lai hun uh pen Ava mangpa in Kawlgam ah ukhun ahi hi. Kawlpi ah Menzi khat koih a, tua Menzipa in I pute en thei hetlo ci uh hi. Tua the Kawlpi pan in, khamtung gam lam ah tawmtawm in lalkhia to uh a, isuah, nutumna lam cih bang in kikhenthang ta uh hi. Tangthu ciing pawlkhatte in, Kawllai a Chin kigelh pen Kawlpau a Bawm acihna uh hi cih za ngei hihang. Ahi hang in, a aw suah kibang dinga a gelh uh hibek a, Chin cihpen Kawlpau in Bawm cihna hipeuhmah lo hi. Sen gam a ten laipek pan ua Chin min aneih sa uh hi a, Kawlgam a ten ciang ua kiphuaktawm hi phing lo hi. AD 1700 Alaungpaya kumpi ahi lai-in Zomite galkap incial a Syriam sim uh tangthu-in kicing hi. AD 1777 ciangin Zomite inzong Chittagong khua sim uh hi. AD 1795 ciangin Zahau in Kamhau ciahkik sak ta hi. AD 1800 ciangin Taisun-te in Lophei khua sim uh hi. Ngawn mite zong khuangli gam ah lal uh hi. Taisun te in Khuasak khua sim uh hi. Zahau le Khuangli-te kido uh hi. Taisun-te in Mualbeem khua sim uh hi. Hualngo le Sukte kido uh hi.

AD 1856 ciangin Kam Hau Tedim khua ten kipan hi. Kam Hau le Za Hau kop in Meitei gamsim in uk uh hi. AD 1857 ciangin Tedim khua sim dingin, Meitei-te kuan uh hi. AD 1887 kum ciangin Capt. Raikes Kawlpi khua tung to hi. AD 1888 kum ciangin Capt. Raikes in Falam ukpi teng sam hi. Mangkang te khamtung gam ah paiding uh Con Bik in phal lo hi. Sihzangte in Kawlpi gam sim uh hi. Taisun le Sukte in Kabaw gam sim uh hi. Zokhua, Sakta le Khalkha-te in kumpite do sawm uh hi. Tua huhau-in India Kumpi lung himawh hi. Taisun(Tashon) te 1000 khat in Sihaung sim uh hi. Kam Hau le Sukte in Kangyi sim uh hi. Sihzang-te in lambawlte suam uh hi. 1889 February 23 ni-in, Sir George White, General Faune, Major Raikes-te Thuamvom tungto uh hi. February kha ni 4 nin Khuasak khua la uh hi. February 13 ni-in, Buanman te Thuklai khuat te la uh hi. Vangteh leh Saizang khuate la uh hi. Tedim khua ahawm in la uh hi. Khua Cin pen Tonzang khua ah tung ta hi. AD 1890 September kha ni 1 ni-in gal kilem thuciamna bawl uh hi. Upa tengtawh man kila uh a, upa ten’ manbu pen thausa in lau uh hi. Lt. R. M. Raney le Kanpetlet te a masa pen kimuhna nei uh hi. October kha sungin Kam Hau sita hi. A sanggam pa tapa Hau Chin Khup in ama’ nasep luah hi.

      AD 1891 February kha ni 11 ini ciang in Tonzang khua la dingin, Maj. Randull le galkapte kuanto uh hi. Tonzangte in na dawm lo uh hi. AD 1892 kum ciangin (April kha) Thantlang khua lazo uh hi. October ni 9 ni-in, Myo-ok kisuam hi. AD 1893 kum ciang in thau neih kempeuh kumpi ten khawm mang uh hi. Zogam ukpi 49 teng Mr. Carey in  Zangvung(Yangon) khua ah hawhpih hi. Khamtung khua vuandok zum omna khuapi teng kihona sikkhau kizom khin ta hi. AD 1895 kum ciang in Zogam teng Kawlzanggam tawh kigawm khinta hi. AD 1896 kum ciang in Zogam teng uk na’ng Chin Hills Regulations kibawl hi.

Chief Commissioner Sir Frederick Fryer, Tedim, Falam, le Hakha khua-te ah hawh hi. AD 1904 kum ciang in Khuasak le Tonzang khua-te ah Kawllai Tan IV sang kihong hi.
Zomi te palik in kila ta hi (Palik kilutsak). AD 1909 kum ciangin Zomi palikte kibei sak in, galkap palik ( military police) kisuak sak hi. AD 1910 kum ciangin Randull mangpa in Zogam, khua khat le khua khat gamgi bawl kipan ta hi.

AD 1917 kum ciangin Germany gal huhau in, Tedim mi pasal 1000 Piancit gam ah kuli in va kuan uh hi. May 27, 1917 in Tedim pan dingkhia uh a, August kha 15 ni-in Piancit gam Marseilles khuapi va tung uh hi. A pai mi 1000 sungpan pasal 21 te in alu uh Piancit gam ah hong phum uh hi. AD 1918 kum ciang in mi 979-te Piancit gam pan in Tedim gam October in tungkik uh hi. Kumpi George V in Zomite mu nuam ahi man-in, Captain E.O Fowler makai in Mang Pum, Thawng Za Kai, Song Theu, Kam Za Mang, Vung Za Kham, Thuam Pau, Vial Zen, Hau Za Nang, Hang Kho Chin le Chin Kam-te London khuapi ah hawh uh hi. Kum 1919 Piancit kuli pai nuam lo a, kumpi lehdo a sawm Thado le Hakha te Hau Chin Khup in lemtuah a lemzo hi.1921 kum ciangin Kawlgam galkap kipiang khiasak hi.

1925 kumciang in Zogam a Kawllai sangte kikhawlsak a, Zolai sang ki-omsak hi. 1927 kum ciang in Germany in gal a lelh man in Piancit, Italy, Belgium le English-te liau sum kum sim in dangka 858,000,000 piak kipan hi. 1931 kum ciang in Saya San gal piang hi. December 25, 1941 kum ciangin Japan te’n Hong Kong khuala uh hi. Tua banga alak khit uh ciangin hongpai in kum February 15, 1942 ciangin Singapore khua la leuleu uh hi. Tua kum mah March ni 7 ni ciangin Bandung khua la uh a, March ni 8 nin Yangon khua la uh hi. Japan galkapte 75,000 Kawlgam sung tungta uh hi. Kawlgam galkapte 402,000 India gam ah kikhin to uh hi. 2 ½ bang asi le amang pha uh hi. 1943 kum November kha ciangin Japante in Tedim le Hakha-te la uh hi. 1944 kum in Japan te Imphal va gal muh bek uh hi. Tua kum mah February, March leh April kha sungte in Arakan gam ah Japan galkap 5,000 kithat hi. Tua kum June kha ciangin Japan-te nung kik uh a, mi 50,000 sang tamzaw si uh hi. Kawlgam taikhawk 80,000 sung om Japan-te a vekpi un Kawlgam sungpan kinawhkhia mang khin ta a, Kawlgam siangtho ta hi. Tua ahi man in, February 12,1947 ciangin Kawl-gam zang le mualtung te kipawlna kikipsak a, tua ciang in February kha 12 nipen gambup kipawlna n thupi in kiciamteh hi. Kum 1948 kum ciang in Mangkang te khutsung pan-in Kawlgam in suahtakna kingah a, January kha ni 4 zingsang nai 4:20 in Mangkangte lan kilakhia-in Kawlgam lan kikhai hi. Tua ahi manin kum simin January kha ni 4 ni pen I gambup suahtak ni in ki ciamteh hi. Tua suahtakna ngah akipan Kawlgam in mipi deihtelna tawh gam ki-uk kinei hi.

Kawlgam buppi in Mangkang te khutsung pan suahtakna a kingah khit ciangin mualtung gamte ki-ukna ngeina, ukpi el siahtung siahpheite beina kum 1948 February kha ni 20 ni-in Falam khuapi ah kikipsak ahi manin, tua February kha 20 ni pen Zomi nam ni ci-in, tuni ciang dong kiciam the a, kizang hi. Kum 1958 ciangin I gamsung makaite sungthu kituah lohna huhau in, hun tomno khat sung galkap kumpi in, hong kem a, ahi hangin, 1961 kum ciangin mipi deihtelna mah tawh ki-uk to hi. Tuabang a I om hun laitak in makaite sung mah ah nawngkai nading lim le mel a om man-in Revolutionary Council in, hong uk in B.S.P.P tawh hong makaih uh hi. Kum 1988 ciangin gam a kisiat gawp loh nading in, State Law and Order Restoration Council in igam hong uk leuleu a, September kha 18 nin kipan uh hi. Kawlgam sung teng nakpitak in kikhangto a, gamsung galte in kumpi senate sangthei uh ahi manin, a thauvui, thautang uh tawh kumpite tungah ki-ap uh hi. Kawlgam sungah kilemna le khantohna om ahi manin nisuahna lam gam sawm kipawlna (ASEAN) pawl mi hihna kila khin hi. “ State Law and Orader Restoration Council” min pen “State Peace and Development Council” in kum 1997 November kah ni 15 ciangin khel uh hi.

Zomite tom nono a ilak tangthute I et ciangin Zogam nisuahna, nitumna a teng Zomite I hi zong in, zanggam a teng “Chin” kici-te ihi zong in, ivekpi in “Zomi” I hi a, I minam min tuamtuam I bulh hangin, nam khat I hi hi. I minam a tuamtuam a omna zong ahang khat om a, ipau aw suahzui a nei hi gige hihang cih kiphawk thei hi. Aw suah, awging in nali bang kinei hi. (1) A sikgin, (2) A nemgin, (3) A ciakgin, (4) A mawlgin cih bangin kikhen hi. Zogam nisuahna lam Kanpetlet le Mindat gam a I sanggamte bang, a aw uh “Niakgin” ahi man in “Cho” na kici uh hi. Mangkang kumpite in Zogam a laklai un, I pute kiang ah, “Kua mi nahi uh hiam?” ci-a a dotlai un, “Zomi” hi ung ci’n nadawng uh hi. Tua ahi man-in, Sen gam pek pan a hong paipih uh “Zo” le “Chin” te Zogam ah aten khit uh ciangin zong tua min mah na pua uh cih kimu thei hi. “Zomi” kicih bek tawh zong kicing tuan lo hi. Min man le akicing pen bel “Zomi-Chin” hi cih huai kasa hi. Mi pawlkhat in I Zogam min pen Chin Hills sakha hi. Mangkang kumpi te’n Chin Hills Regulations a bawl ciang un I gam min pen, I pu min nazang uh hibek a, a cil in Chin Hill pen I pute pu nahizaw hi. Minam dangte tawh I kiteh ciangin ei pen khangham nai lo hihang, I pute Zogam atun ua kipan tudong kum 609 bangbek phapan hi. Tua ahi man-in I tenna mun zui in, mual le guam le lui-te gun ten honghal a, khat le khat kikawmna tawm ahi man-in I omna phualte zat pau peuh kizui a kipau hi lel a, I minam “Zomi” pen a kheel hi tuanlo hi. Khang sawn sawnte lungsim ngaihsutna pum khat a suah thieh na’ng le minam itna lungsim kipawlna ah hita le sum bawlna lama kipawlna ah hita leh ki-ukna lam ah hita leh, “Zomi-Chin” cih zathuai ding cih upna ka nei hi. Gentehna in, Biakna lam a i kipawlna min bang “Chin” behlapin “Zomi-Chin Baptist Convention” (ZCBC) cileng ngaihzaw mahmah kasa hi. Hi thu tuamtuam kai khawm a kigelh thu pen in kuama heh-nang le kuamah kicihna hilo hi. “Zomi” bek hilo “Chin” zong hihang cih deihna bulpi hizaw hi.

( Hih a tunga article pen lai gelhpa’ ngaihsutna bang ahi hi. Committee te’ ngaihsutna bang hi kimlo hi. – Magazine Committee)

Source :
Tedim BEHS No.1 Sangpi GOLDEN JUBILEE MAGAZINE 
Laimai 326 - 329.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOMI TAWH KISAI THEIHHUAI THU TUAMTUAM. Agelh - Rev. Tuan Khaw Kham Description: Rating: 5 Reviewed By: Cinpu Zomi
Scroll to Top