728x90 AdSpace

Hot
Menu
Zon-ol na Donate

Latest News

CIDAMNA LEH BIAKPIAKNA.

CIDAMNA LEH BIAKPIAKNA.

Pasian in mihing te hong bawl cil limin, leitang pan a piang gah leh teh te bek tawh akivak dinga hong bawl hi cih mikim in ih theih hangin, a thupi na leh Pasian deihna taktak in bang hiam cih mi a tam zaw pekpek te in ih ngaihsun kha kei hi. Ih Pupi masa te, mawhna sungah ana puk khit na ngawn un, Pasian hong gelsak leh hong deihsak ahi leitang pan a piang annkung leh gah leh teh te bek tawh ana nungta hi in tui ciin tunma ciang dong ih pupi te kum 700, 800, 900 val bang na nungta lai veve mawk uh hi.

“Sa” ih cih pen Pasian in mihing te kivak nang a hong deihsak, hong gelsak hi masa lo napi tui ciin in nek theih khempeuh a suksiat ciangin, donghu in sa siangte bek nek dingin ana phal ahi hi. Hih hun a kipanin sa a siang leh a sianglo kikhamna na om khin cih kong phawk sak nuam hi. Adam pan Noah dong ensuk leng kum 900 kim vive na hi suk uh a, Noah pan Abraham dong ensuk leng, Abraham bang kum 100 leh cih khawng bek hong hi suk mawk hi. Bang zah takin kikhai hiam ngaihsun dih ni.


Pasian tawh kizopna Satanin Suksiat sawm
Hihte kawmkal ah Satan in Pasian a langpanna tawh deih takin na hong sem toto in Pasianin ih cidamna ding , ih hat, ih pilna ding a hong sehsak singgah leh annte “Gu” suak sak in ahi lolo in bawlin, Zu in ki huan, ki um, kibawl hi. Ih Pumpi tung khempeuh thu kizak sakna ahi khuak sazangte pan bek mahin, nuntakna sung tawng dong a sukha, mihingte tawh kithuzakna Vantung in nei thei hi.

Pasian in Amah tawh ih kizopna a siangtho ding Amah Phawk theihna sazang sunga om khawphia tha aluanna a nawngkai sak khat peuh in, lungsim tha kiam sak ahih manin , khawphawk theihnate zong hai sak pah hi. Kidek kidam lohna khat peuh in, phawk theihna hai sakin, khuak hatna kiam sak ahih manin, tawntung nate pakta zo nawnlo-in na dangte tawh kibang lelin ngaihsun hi.

Gimna leh lungkhamna sungah a thuk zaw semsem a mihing a tum ding Satan in deih hi. Mihing a zawh theihna pen duhna pan mah hi pena, tua mah a lawp theihna dingun sep theih sep mawhin sem hi.

Pasian’ lim tawh akibawl mihing khat peuh lungsim sungah Satan alut theihna ding kong ih hong kei ding hi. Pasian tawh ih kizopna hong su tat nuam Satan om hi. Pasian tawh ih kizopna hong suktat zawhna dingin Satan hanciamin man lah mahmah hi.

Tulai nuntak sunga ih zongsatnate in, a tawntung thute ih lawpna susia- a, a tawntunga ih tun na ding mun pen kidek kidamna tawh kisai ahih na thei hi lehang, nekna dawnna ah ih kidek ih kidam pha mahmah ding hi. Pasin in Amah tawh ih kizopna a siangtho ding leh Ama deih bang aphawk, amang siam, a telsiam dingin hong deih sak kimlai Zu leh Kham theih tuamtuam te ih zat ciangin, Pasian deihna bang ki deih thei nawnlo, kitel thei nawnlo in ih lungsim te ziingin, mial in, hai in Satan hong thangsiahna sungah ih awkta hi.

Tua pen mipawl khat te in theilo uh a, Zu, Za, Niangteh Coffee te zong Pasian bawlsa nate, annkung te pan maha piang hi in, nek ding dawn ding mah hi ci zaw lai uh hi. Bang zahtak in Satan in hong khiim hiam cih ngaihsun dih ni.

Pasian in tawlngak ding deih
Hih munah Phawk ding khatin a tunga ih gensa mah bangin, leitung piancil peka kipan, Pasian in mihing te’ tawlngak ni ding hong geelsakin, hong zangh to sak hi. Tua ni-in ni sagih Sabbath ni hi in, Ni guk sungin van leh lei, ni, kha, aksi te a piangsak pa pen Topa hi cih kiciaptehna leh Pahtawina in, Tua ni tawlngak dingin thu hong pia hi. Lai Siangtho sunga a om ngiatlo mihing te mahmah in “Ko ma bawl tawm, phuah tawm hi veh aw” ci a agengen uh SUNday ni tawh Satan in hong laih to in, Tu-in leitung bup ah mi a tamzaw tham tham in tua SUNday ni-in Pasian bia ci-in tawlnga duam duam mawk uh hi.

Pasian in Cidamna ding hong geelsak
Leitung bupa teng mi atam zaw tham tham te ii lungsim ngaihsutna sungah ut bangbang a omlel ding, duh bangbang deih bang bang ne in dawn ding, tua khit teh Siavuan (Doctor) ten ih natna khempeuh a damna ding zatang hong pia ziau lel ding cih bangin ki ngaihsun mawk uh hi. Tua bang ding hi hetlo hi. ih dam, ih hat nadingin tuma kum 6000 val lai pek in Pasian in Ei mihing te hong bawl cila hong ngim sak hong deih sak nek leh dawn te leh tawlngakna te ih zuih ding na hi zaw hi. Sum bekbek motor dim in nawnin Doctor pa kiang “ka natna hong damsak in” na cih hangin, “Lawm aw ahih theih leh sa ne ken, anteh thei puamte tam nek zaw in, tui tampi pi dawnin, exercise manman bawlin, ahun manin tawlnga in, ihmut cim sakin” hong ci lel ding hi.

Ih Pumpi Engine set tawh gentehna
Leitung a Motor car hoih penpen a kici khat nei le teh sathau a sianglo, tui kihel cih khawng tawh hawl ngam hetlo ding hi teh, Tua ahih leh tua motor car sanga tehpih theih loh a, aman pha zaw Universe buppi bawla, anei Pasian tapa in Ama sisan tektek tawh hong tat khiatsa Kha Siangtho omna biakinn ahi na pumpi bang dingin hong cidam saklo nate nakam pan in thunthun mawk ding na hiam? Ngaih sun phapha dih ni lawm aw.

Zu, Za, Voksa, Zusa, Coffee, Niangteh te in na pumpi cidam na hong susia in, Pasian tawh ih kizopna hong susia cih thei napi in bang dingin ne teitei dawn teitei ding ih hi hiam? Gil vah luatna in zong ih pumpi hong gim sakin mawhna hong suak sak hi. Gilpi natna nei cih thei napi cin, zasan na nek tei tei leh amawh na hi hi. Pasian in nek dinga hong koih ahih hangin, na pumpi a dingin ahoih kei leh Kha Siangtho tenna ahi na pumpi a susia mah na hi hi..

Tua ahih manin, hong bawlpa Pasian in ih pumpi adingin hong geelsak, hong deihsak tawlngakna, huih siangtho dikna, nitang, tui siang dawnnate leh meh teh meh gah ann teh thei puam te sungah gilvahna ding bek hilo in, damna, hatna, ciimna zatui te om hi cih pen mitampi te in phawkin kinei kha lo in zatui zaha bekbek in hong dam sak thei bek ding hi ci-in ih ngaihsun den kha mawk hi. Piancil sung ah “Numei in tua singgah amuh ciangin limtuak sa a” a cih mah bangin, limtuak ih sak peuhpeuh ih nek pahpah a, ei ut bang peuh in ih om a leh a tawpna ah nuntak tawntungna zong kitan thei hi cih Lai Siangtho in hong hilh hi.

Ih Pumpi in Pasian Kha Siangtho tenna Biakinn pi ahi hi. Satan in Kha Siangtho tenna biakinnpi a hi ih pumpi a suksiat sawm mah bangin, Pasian biakpiakna a ih zat Biakinn sung te ah zong Pasian tawh ih kizopna te hong nawngkai sak lai hi. Music gin ngaihlua te ahi zongin, Pasian tawh ih kiho laitak ahi thunget lai takin Music ging te ahi zong in, a zahtak huai mahmah Pasian mai ah ih omlai tak in kizepdan a uanglua te leh leitung lamah ih lungsim hong lut sak thei Music luanzia te tawh Satan in Pasian tawh ih kizopnate suksiat ding hanciam ahih lam phawk ni. Ih nuntakna leh Ih biakpiakna te ih kisit tel ding ahi hi. Lai Siangtho sungah Cain leh Abel te a hi zongin, Soul leh David kumpi te etteh dingin na om uh hi.

A Siahuai bel Satan Ngian
Mihing’tunga a sia thei bel ding na asep dan ding uh a kikum dingin Satan in apuuk van mite khawm tuah hi. Ngimna khat khit khat gen uha, a tawp na ah Satan mah in thu khat hong mu khia hi. Lenggah leh buhte-a kipan Pasian in ann dinga a bawlte, mihing’ pumpi, lungsim leh hatnate a susia “Gu” suah sak ding ahi hi. Tua bangin khua phawknate kisia in Satan in a uk cip zo ding ahi hi. Mite in zuhang ne leh Satan in amaute a tual niam zaw semsemin bawl ding hi. Zu, Zanah, Sahdah, Kunza, Khaini, niangteh, leh coffee zatna tawh Satan in leitung mite man cip hi.

Kham theih lenggah Zu
Kana Khua mopawi-a Khris in tui kimlai lenggahzu a suah sak pen, lenggah tui taktak ahi hi. Tua pen Lai Siangtho in, “Susia kei un, a sungah thupha omhi,”acih “lenggah bom pana kingah lenggah zu” acih pen ahi hi. Isaiah 65:8.
Lenggahzu, buhzu leh singgah zute in, Zuhang mah bangin kikham thei veve hi. Tuate nekna in akhauh zaw hong duhsaka, tua bangin zu ne lo-om theihlohna piang sak hi. Tawmtawm nekna in tampi nekna dinga Sangkahna ahi hi. Tawmtawm nekna in damdam in na sema, ane mi in ama lauhuaina aki phawk ma in, zu-hai mahmah khat suak khin ta hi.

Zu in Mihing Sila-in Khawi
Mihing in zu hang lim sa-a, a kam sungah a ki tulh tulh ciangin, Pasian’ lim tawh kibawl kimlai ganhing sanga niam zaw a tung suk ahi hi. Ngaihsut theihna nei nawnlo in, a lungsim hai gawpin, ganhing lungsim paai ta ahih manin a zum huai pipi thusiate hong bawl uh hi.

Zu a kham tak uh ciangin, tua ahai sak zu ne lo uh hi leh kihtak huai a sak mahmah ding uh nate amau te in hong bawl uh hi. Tua banga zu gui-a a om uh ciangin Satan in amaute a uk cip hi ta-a, Satan tawh amau te apang khawm hong hi ta uh hi.

Zanah In Gu Hi
Zanah pen dam taka adaplaan a siahuai bel “gu” ahi hi. Bangbangin kizang hita leh asiatna kibang hi; siatna abawl dan ze-ol ahih manin kihtak huai zaw sem hi, bang hang hiam cih leh kiphawk paklo hi. Phawk theihna sazangte a phawn gawp khit ciangin zaw gawp sak hi. Khuak thakiam sakin zing sak hi. Kham theih zu sangin phawk theihna sazangte susia zaw hi. Daplaan lua ahih manin pumpi tung pain paih khiat ding haksa hi. Za teepna in zu lunggulhsak a, zu-hai suahna bulpi khat hong suak hi.

Niangteh leh Coffee In Pumpi Khoilo
Niangteh in hong phawng hi. Gilpi a phawk theihna sazangte kilat sak hi; tua in khuak va phawng to hi, tua in lungtang nasep tam sak suk leuleu-a, pumpi bup tawlkhat hat tuam sak hi. Gim leh tawl mangnilh sak hi; hatna a khangsak tawh kibang hi. Lungsim khanglo sakin, naa vaak sak zaw hi.

Tua ahih manin mi tampi in, niangteh leh coffee in amau tungah a pha bawl hi ci uh hi. Tua pen maan lo hi. Niangteh coffee in pumpi khoilo hi. Ki gawi zana si leh sa-a apian ma-in suk khakna hong nei-a, hatna a kisa pen phawk theihna a kiphawng hi bek hi. Tha lawp saka aphawng teng abei ciangin, ngui-in zawm gawp thei hi.

Tua bang phawk theihna a phawngte ki zangzang leh lungtang natna, ihmut theih lohna, diip kuatna, gongsa, ci liing leh siatna dang tampi piang hi; bang hang hiam cih leh tuate in pianpih tha susia hi. A gim sazangte phawng phawnga nasep a vala sep sak sangin tawl ngak sak hi thiat ding hi zaw hi.

Source :

Khuavak Thupuak

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: CIDAMNA LEH BIAKPIAKNA. Description: Rating: 5 Reviewed By: Cinpu Zomi
Scroll to Top