728x90 AdSpace

Hot
Menu
Zon-ol na Donate

Latest News

Cidamna Thupha

Cidamna Thupha



Thupatna:   
Mawhna in leitung leh mihing a haamsiat masiah, natna satna cih kithei kha lo hi. Pasian in honog itin hong khuala, ih pumpi a cidam ding hong deih sak hi. Leitung ah a om lai-in Jesu in, cinate damsakna-in hun a tampen zang hi. Tua a hih manin cidamna dinga kikep zia ding Lai Siangtho in a gen pen a lamdang hi lo hi.

1.        Pasian in A tate' a ding A deih sak mahmah khat bang hiam? 3 John 2.
            Theih ding:    Pumpi cidamna leh kha cidamna kizom pha mahmah hi. Pumpi a dammawh mi in Pasian' huhna hong lunggulh hi. A hi zongin Pasian' thumaante thukzawa a ngaihsut ding haksa hong sa hi.

2.        Nekna leh dawnna in biakna ah bang hong sai hiam? 1 Corinthian 10:31.
            Theih ding:    In pumpi buppi-in Pasian' neihsa ih hih manin, ih sep ih bawl khempeuh zong Pasian tawh kisai hi. Ih cidamna thupi a hih zah khatin ih nek ih dawn thupi a hihna Ama'n thei hi.


3.        Bang hangin ih pumpi a hoih theipen dingin kem ding ih hi hiam? 1 Corinthian 6:19,20.
            Theih ding:    Pasian in ei hong Piangsakpa hi-a, Amah pahtawi maw pahtawi lo, Ama hong piaksa ih pumpi ih bawl dan tawh hong kisai hi. A nihna ah, ih pumpi leh ih kha hot khat ding Khrist hanciam hi (1 Thessalonian 5:23). Amah tawh eite in ih pumpi ih kem khawm ding hi.

4.        Tu hunin Pasian in koi bang biakpiakna deih hiam? Rome 12:1.
            Theih ding:    Biakna tau tunga ganhing tawh biakpiakna Pasian in a deih masa hi lo hi. Ei' hih theih tawp, a picing thei zahzaha eimahmah Amah ih kipiak ding a deih hi zaw hi.

5.        Kimawlna-a a gualzote' tung panin bang pilna kingah thei diam? 1 Corinthian 9:24-27.
            Theih ding:    Kimawlte in cidama a thahatna ding uh hanciam theih tawpin hanciam uh hi. Tua nangawn a bei pak thei thaman ngah nopna bek a hihi. Khristiante in a lianzaw mahmah tawntung thaman a ngah ding ih hihi.

6.        Nekna tawh kisai-in Pasian in bang hong hilh hiam? Isaiah 55:2.
            Theih ding:    Eite in lim ih sak bek hi lo-in, an hoih ih nek ding a  hihi. Ih pumpi' a dingin bang an hoihpen ding cih ih kan ding a hihi. Gong thak thoihna ding bek hi lo-in ih hatna dingin ih nek ding a hihi (Thuhilhsia 10:17).

7.        Pasian in a cilin mihing bang an pia hiam? A nung ciangin bang piak beh hiam? Piancilna 1:29; 3:18.
            Theih ding:    Ih pumpi' a dingin bang an hoihpen hiam cih hong bawl pa Pasian in thei hi. A masa-in an dingin singgah hong pia-a, a nung ciangin anvui hong pia thuah hi.

8.        Ganhingte tembaw sung a lut ciangin Pasian in bang kilamdanna om sak hiam? Piancilna 7:2. (Piancilna 5 leh 11 zong en in).
            Theih ding:    Pasian in sa nek ding phalna Noah a piak ciangin, "siang" a kicite bek a nek ding uh gena, tuate pen tembaw sunga kop sagihta a lutte a hihi. Moses tungah thukham a piak ma-in sa a siang leh a siang lo na kikhen khin ta hi.. A hi zongin sa nek ding a kiphal phetin mihing' khankum hong tom pah hi. Tuicin tun ma-a sa a ne lo mite kum 900 valval nungta hi. Sa a kinek zawh a sawt lo-in mihing' khankum kum 100 dong tom suk pah hi.

9.        Pasian in bang ganhing sate, bang hun bang hun hi ta leh ne lo ding ci hiam? Thuhilhkikna 14:7-10.
            Theih ding:    Nek dingin bang hoih cih a khentel tawmtawm dingin Pasian in hong nusia lo hi. Leitung, tuisung, huihlaka om bangte ne lo ding cih hong kham pah hi.

10.        Sa siang lote nek ding khamna in hun leh mi a khen hiam? Isaiah 66:15-17.
            Theih ding:    Mi khat in a nek cianga khialhna a hi pen, a dang khat in a nek ciangin zong khialhna mah hi veve hi. Jesu hong kum kik dong voksa leh sa siang lote nek dinga kikham a hihi (Isaiah 65:2-5).

11.        Guih theih zatui Lai Siangtho in koici gen hiam? Paunak 20:1; 23:29-32; 1 Corinthian 6:9,10.
            Theih ding:    Zu in khuak leh sazang susia hi. Thatang leh lungsim zong susia hi. Khuak hatna kiam sak a hih manin, kha lam khawphawkna zong hai saka, thumaan leh thukial zong khen haksa sa hi.

            Lai Siangtho hun lai-in za kiteep nai lo hi. Guih theih nam sungah kihel hi. Ama pumpi Pasian' a a  hih lam a thei peuhmah in za tawh buahbang sak lo ding hi (1 Corinthian 3:16,17). Zanah sungah gu am 19 om hi. Nikotin kicii gu in zateep zonggsang sak hi. Khrist' a a hi Khristia peuhmah zateepi sila-a a om ding hi lo hi. Zateep in pumpi a sung a pua, puansilh nikten, nazat tuamtuamte leh huih lak nin sak hi. Zateepna-a sum bei pen pammaih mahmah hi.

12.        Hih bang zongsatna hoih lote a kikhel zo ding hiam? Philippians 4:13; John 8:32.
            Theih ding:    Zongsatna  hoih lote in mihing' kha a matna ding Satan' thangzak a hihi. Satan khut pan Pasian in eite hong hot khiat theih bangmahin zongsatna hoih lo panin zong hong hon khia thei hi.

Thukhupna:  
            Pasian in ih cidamna ding hong deih sak a hih leh e'n zong ih deih zawksem ding a hihi. Cidamna dinga kikep dan ding Pasian a theipen hi-a, Lai Siangtho sungah hong gen a hih manin lungdam ih koh ding a hihi. Ih pumpi ei' a hi lo a hih manin, Pasian' hong sawl banga ih kep ding a hihi. Pasian' hong gen cidamna thute awlmawh kei teitei lehang, ih nat ih sat ciangin Ama hong dam sak ding, bangci lamet ngam mawk ding ih  hiam? Pasian' hong gen bangin cidamna thute zui ta ni.

Source :

Z.O.M.I. Zealous Optimistic Minded Individual

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Cidamna Thupha Description: Rating: 5 Reviewed By: Cinpu Zomi
Scroll to Top