728x90 AdSpace

Hot
Menu
Zon-ol na Donate

Latest News

KHANGNO LEH CIDAMNA.

KHANGNO LEH CIDAMNA


Thupat na:
Zogam ah anteh theipuam a pianglo omlo hi. Tua mah bangin anteh, theipuam te i lo, ihuan sung pan ahing sitset a ilawh a ineek pen a cidam huai mahmah hi. A hizong in i zat siam lo mahmah khat in neekzia a hihi. Tua bek hilo in haksapi tak a i ciin mehteh, mehgah te i zat siamloh na panin zong natna pan kidal nading tampi hong susia mahmah hi. Bangdan in hong susia hiam cih mehgah te i zuak tak ciang’ tui itaih sak pahpah na pan endih ni.
(1) Tui in tai siat ahih manin damloh ni hong tun ciang Bamiton tangkhat zong leizo nawnlo.
(2) I lo ah i ciin mehteh mehgah te puahzo nawnlo.
(3) Atawm pen ni khat ninih luppih na hih manin na ciin mehteh mehgah te muat, (laak, neek ding omnawn lo)
(4) Tua tak ciang nang leh na innkuan te lungkham.
(5) Na lung akham ciang na pumpi in gimlawh in na thabei a hih hang’ ki bawl nading om nawnlo ahih manin sihna dong hong tun thei hi.


Cidam huai an Neekdan:
Cidam na dingin anteh, theipuam te neekdan isiam kul hi. I pumpi sungah Vitamin leh Minerals (dat) kisam a hih manin ineek idawn te pilvang tak a neek leh dawnna panin tuate kingah theihi. A nuai ah en suk dih ni.

(1) Lungkim/nuamtak in ne/ dawn in:
Gataam ciim bek i neek hangin i innkuan a lungnuam, thalawp takleh maitaii tak a i neek khawm liailiai pen cidam huai mahmah hi. I lung nuam leh i sivui, i thagui,te kizan in i neek bangbang  i sa sung ah kizen in thagui thatang in pianghi. Sin uuk sa, hehsa a anneek pen iheh ciang i thagui khauh a hih manin ineek andat te in zui zolo hi.

(2) A namkim an ne in:
Naungeek te a dingin Nu’ nawizuu sungah an dat namkim aki cing in a omkhin  ahihi. A khangsa te in Nu’ nawizu ki dawnkha nawnlo ahih manin nisim ineek idawn te a namkim in i zat hong kulta hi; An neek khat in a tawmpen nam thum neden zo leng hoih pen hi. Ei Zomi te’ anpi pen buh leh vaimiim ahih manin – vaimiim ciim en dihni. Vaimiim ciim ihuan ciang in be leh an teh tawh i huan khawm pen meh i nei kei zongin dat namthum ki cingkhin hi. Tua a hih manin nambat khat na bangmah in  lungkim/nuam tak  in i neek naak a leh a cidam huai mahmah an te a ne a dawn den Zomi te ihi hi.

(3) Ahoih bek in ne in:
Om lel ee, ei thu hi ci a duh zah ta a neek pen a hoihlo penpen  ahihi. Pumpi gihna khangsak hi. an neek na pan aki ngah leh nasep na ah i zatkhiat napan in ipumpi gihna/cidamna ki en a tua pen Calory kicihi. I zatkhiat zah sangin atamzaw anne leng ipumpi gihna khangkhang in amahleh amah in natna hau bek lo in natna lungno te dalzo nawnlo ahih manin supna tampi piang thei hi. Tua ahih manin a om bangbang thakhat thu in neeksawm kenla  tawmtawm in neek sawm in.

(4) Lohing nam te limneek in:
Lohing neek na in i pumpi, ici isa, hoih sak mahmah hi. Lohing sungah Vitamin leh dat tuamtuam tam mahmah a hihmanin lungtang natna, Cancer natna ngah na ding panin  tampi tak hong hu hi ci hi.

(5) Sathau dat tam a om te tam neekkei in:
Sathau in ankam limsak napi’n tamneek hoihlo leuleu hi. Sathau dat tam neekna in i pumpi sunga sathau dat (cholesterol) kici pen khangsak ahihmanin sikhang, lungtang natna cihte ki ngah baih mahmah hi. Sathau a nampi nam thum in kimuthei hi. Tua te in
(1)Saturated fats-Ganhing thau(vok thau,keel thau,….)
(2) Polyunsaturated fats- lohing thau(Nipi paak thau, be thau cihte pawl)in ipumpi sunga thau dat kiamsak hi.
(3) Monosaturated fats- Oliv, Rapeseed cihte pan aki bawl sathau nam hi a, hih nam te in lungtang natna hong tunlo in lungtang natna damsak zaw hi.

(6) A khum lamsa ng tam ne/ dawn kei in:
A diak in  akhum pen naupang te in ki duh deuh hi. Hih a khum naupang te in ineek idawn tak ciangin i ha amoi lai manin naupang hana, hasia, ki tam mahmah hi. Ulian sate a dingin ahih leh zunkhum leh sikhum piangsak hi. Zunkhum neisa te bangin themkhat a neek, adawn bek uh zong a natna tampi ki behlapto pah ziahziah hi. Hih sikhum, zunkhum te pen ei Kawlgam ah adam nading haksa mahmah lai ahih manin akhum neek leh dawn kidop zawh ding hoih pen hi.

(7) A ki huanmin tui tampi dawn in:
I pumpi sungahsehthum suah sehnih tui ahih manin tui tampi sawn zo leeng hoihpen hi. Tui tamsawn na in i pumpi  i vun te hingsak, no suak sak beklo in natna khatpeuhpeuh hong lut ding haksa sak tuam hi.

(8) Exercise bawldenin:
Nikhat in a tawmpen minit 30 sung exercises bawl ding hanciam in. A hih theih leh zingsang ni suah ma in bawlzo den leng hoih penhi. Exercise bawl na a phattuamna pawlkhat en dihni:
(1) Pumpi et lawmsak,
(2) Natna khatpeuhpeuh hongluut nading haksa tuamsakhi.
(3) Zunkhum, sikhum nei te damsakhi.
(4) Lungtangnat damsak zo hi.
(5) Tha khauhsak hi.
(6) Pum zaw natna dam sak hi.

(Pumzaw icih ciangin  a pumbit a azaw te in exercise bawl  thei lo ahih manin gentehna in khutzaw, khezaw te hi pha diak hi.)

Thukhup na:
Tawldam zawh ciang a an neek hoihpen hi. Tawl pipi a anneek pen gilpi , gilzang a ding leh sivui, thagui te a dingin hoihlo in lauhuai mahmah hi. Cidam na dingin an neek ma tui tawmbang dawnin minit 15 sung bang tawldam sak leeng hoih hi. An neek ma a singgah tuamtuam neekna in an (zan taak an) tam ki duh nawn pha lo a hih manin hoih lohi. A hih theih leh zantaak an mah tawh i gilvah sak leeng hoih pen hi.Pawlkhat te in a deih loh hangin music uuk te a ding in an neek kawm a music gin hiauhiau na in  lungnuam sak in lungnuam tak in an ki ne ahih man in cidam huai mahmah hi. An ineek ciangin dam tak a ne hithiat a haizan sitset in gilpi tawldamsak in cidam huaimahmah hi. Gilpi dam keileh anlim, tulim ineek idawn hang in limkisa zolo in zong ki ne zolo hi. An ne zo keileeng gilpi zawm behlap leuleu ahih manin sumle paai i bei hong kul leuleu hi. Damlo ihih manin sumleh paai ki zong zolo in pumthuak in sihna ciangdong hongtun theilai hi. Tua ahih manin cidam na dingin neek leh dawn zia, omdan khawldan leh gamtat, lukeek zong i siam dingki sam hi.

Source : 
Khangno Kahlei' laibu


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

1 comments:

Item Reviewed: KHANGNO LEH CIDAMNA. Description: Rating: 5 Reviewed By: Cinpu Zomi
Scroll to Top