728x90 AdSpace

Hot
Menu
Zon-ol na Donate

Latest News

KILAIHGAWPNA (REVOLUTION) APIANG SAK 'CHE GUEVARA’ TANGTHU

KILAIHGAWPNA (REVOLUTION) APIANG SAK 'CHE GUEVARA’ TANGTHU
Che Guevara

TOM KIM-A ET PAKNA:
A minpi : Ernesto Guevara de la Serna
A kisapna min: Che Guevara, Ernesto Guevara.
A suahni: June 14, 1928
A pianna: Rosario, Argentina
A sihni: October 9, 1967
A sihna mun: La Higuera, Bolivia.

A SUNGA OM THUTE
THUPATNA:
SIAVUAN A SINNA THU:
GALKAP TAWM KHA BEK TAWH GALDO (GUERRILLA) IN A PAN’NA:
MINISTER A LETNA THU:
MARTYR-A SIHNA THU:
A NASEPDAN KILUAHSAWN (LEGACY):
CHE GUEVARA’ NUNTAKNA:
LATIN AMERICA SUNG A ZINNA:
KILAWIGAWPNA PIANGSAKNA DINGIN A KIPIAK KHIATNA:.

THUPATNA:
Rosario khua, Argentina gamah mihau innkuan sung panin June 14, 1928 in Ernesto "Che" Guevara de la Serna piang a, zatui (medicine) lamsang sin in, a sangkahna a man khit ciangin a upna - Socialist leh Marxist (na khempeuh taangpite aa suahsakna lam ki-ukna) in bangci bangin South America gamte ah a kizeel hiam cih en khia dingin hong zin khia hi. Fidel Castro huh in, Cuba gam ama’ deihna bek tawh a uk Batista leh Batista’ kumpi (government) 1950s bei kuan in laih zo uh hi. Fedel Castro in Cuba president hong letin Castro ukna nuai-ah za lianpi tuamtuam hong len hi. Tua khit a sawt loin mun tuamtuam-ah galkap tawm khat tawh galdona (guerrilla warfare) ah hong kihel in, makai in pang kawikawi a, Bolivia galkap ten hing mat in, 1967 kumin that uh hi.


SIAVUAN A SINNA THU:
Che Guevara pen mihausa innkuan leh Karl Marl’ ngaihsutna (Marxist/Marxism) a nei innkuan leh lawm sung panin hong khangkhia hi. A khangno lai-in awm natna (asthma) tawh kikhen hun mel a neih loh hangin kimawl lamsang uuk ahih manin kimawlna tuamtuam siam in, tai hat mahmah hi. A lawmte leh a innkuanpihte pen kumpi gamvai ukna tawh a kitukalh Marxist (left-leaning political views) upna kip len vive ahih manin Argentina gam uk Juan Perón’ ukna laih sawm kipawlna ah hong kihel hi.

High school panin honors in a zawh khit ciangin Che in zatui lamsang (medicine) University of Buenos Aires ah sin a, ahih hangin zo man loin South America gam tuamtuamte ah mipi ten Marxist upna bangzah in sang zo ta hiam cih en khia dingin 1951 in a zatui sinna tawl khat nusiatsan phot in, a lawmpa tawh hong zin khia hi. Kha kua sung hong zin kawikawi uh a, mi zawngte gentheihna a muh tenChe’ lungsim lawngkha mahmah hi. 1952 kum bei kuan in University of Buenos Aires ah hong ciak kik a, mizawngte huh ding ngaihsutna lianpi nei-in zatui lam pilna hong sin kik a, 1953 in buaih (degree) ngah hi.

GALKAP TAWM KHA BEK TAWH GALDO (GUERRILLA) IN A PAN’NA:
Siavuan ahih hangin Marxism a upna hong khang tektek ahih manin kilaih gawpna (revolution) loin South America gam mipi ten thuman leh thutang ngah ngei lo hi ci cih upna lianpi a neih manin Che in zatui tawh kisai a nasepna hong khawlsan hi. 1953 in Guatemala gamah hong zin a, CIA ten gupna a piak ten Guatemalama leftist government a laih khiat hong muh ciangin a thangpaihna hong kuang a, kilaihgawpna (revolution) a deihna hong khang semsem hi. 1955 kumin Che in zi hong nei a, Mexico gamah tawl khat hong ten’ sungin Cuba gam-a revolutionary makai Fidel Castro leh Castro’ sanggampa Raúl Castro tawh hong kimu uh hi. Hihte unau tawh hong kipawl uh a, US in a gup Fulgencio Batista' kumpi ukna (government) laih ding hong kithawi ta uh hi. Castrote’ unau makaihna tawh galkap tawm no khat Cuba gamah December 2, 1956 hong lut uh a, Batistuta’ galkap ten na suam uh ahih manin mi tawm kha bek suakta uh hi. Tua khit nung kum tam lo gamlak pansan in Castro adviser lian pen in hong pang uh a, Batista’ galkapte suam kawikawi uh hi.

MINISTER A LETNA THU:
January 1959 in Fidel Castro’ makaih galkap (guerrilla kicite) ten Cuba gamte khuapi Havana hong la zo uh a, tua khit a sawt loin Cuba gam khempeuh hong la zo uh hi. Fidel Castro in La Cabaña thonginn mangpipa leh a kem dingin Che guang hi. Tua thonginn a uk lai-in Che’ thupiakna hangin Castro langpang mi za tampi kithat hi kici hi. A sawt loin Castro in national bank leh minister of industry minister len dingin Che guang kik hi. Che in hih zaate a let sungin Cuba gam Communist (a kikm-a ki-ukna) gam suahsakna dingin nakpi takin huh in, sem khia hi. 1960s bei kuanin Cuba ambassador zaa hong len a, leitung gam tuamtuamte ah hong zin kawikawi a, Russia leh China gam tawh kitauna hoih mahmah hong piangsak hi. Cuba leh US kikal ah sum leh paii bawlna vai-ah kitauna pen Che in laih in, Cuba in Russia sum leh paii bawlna lam hong nei a, Russiate’ tung panin Cuba in galvan hoih nono tampi tak lei khiatsak hi. Cuba gamte khangthu adingin a ciamteh tak “Bay of Pigs kisimna (invasion)” leh “Cuban Missile Thubuai (Crisis)” a pian lai takin nakpi takin na kigolh hi. Guerrilla warfare tawh kisai laibu tuamtuam gelh a, 1964 United Nations khawmpi ah thugenna nei a, tua hunin USte’ foreign policy ngiante leh South Africa gam-a mikang ten mivomte a deidanna (apartheid) thu hangsan tak leh nasia takin a mawhsakna gen hi.

MARTYR-A SIHNA THU:
1965 kum in Cuba gam sum leh paii bawlna (economy) lamsang nasia takin hong sia ahih manin Che in a zaa nusiatsan in kilaihgawpna ngaihsutna (revolutionary ideologies) a neihte leitung-a gam tuamtuam ah tangkopih ding hong kipan hi. A masa pen dingin Congo gamah hong lut a, kilaihgawpna deih a kiphinna neite gamlak pansan-a galdona sinsakna tentan (training) piak ding hong kipan hi. A ngimna lawhcing zo lo ahih manin Cuba gamah hong ciah kik hi.

Cuba gam hong ciahkik khit a sawt loin 1966 kumin Bolivia gamah kilaihgawpna ding deih-a hanciamte huh ding leh kilaihgawpna piansak ding ngimna tawh kumpi lehdo (rebels) tawm khat tawh hong kuan khia leuleu hi. Bolivia galkapte tawh kikaptuah kawikawi uh a, US in zong CIA secret agentte Che that dingin sawl hi. Bolivia galkapte tawh a kikaptuahna uh-ah ama’ makaih rebels/guerilla tampi in sihna tuak hi. Bolivia galkap ten hingmat uh a, thonginn ah tawl khat sung khum uh hi. October 9, 1967 in Bolivia galkap mawkmawk khat a that dingin thu kipia a, La Higuera khua-a thong sungah kaplum hi.

A NASEPDAN KILUAHSAWN (LEGACY):
Che a sih khit nungin gam makai lian bangin kingaihsun a, kumpi lehdona (rebellion), kilaihgawpna (revolution) leh na khempeuh taangpite aa suahsakna lam ki-ukna (socialism) vai a kigen ciangin mi ten ama’ nuntakna panin tha lakna dingin zang uh hi. Amah langpang leh mudah ten bel hehpihna nei lo leh bangmah khual lo (ruthless) leh thongkiate thukhenna mai-ah dinna ding hun pia loin Cuba gamah thongkiate mi tampi a thatsakpa hi ci-in ciamteh uh hi. Thonginn uk in a pan lai-in thongkiate mi 156-550 kiim thahna dingin thu pia hi a ci zong om hi. A hoih lohna lam a gen a tam hangin a hoihna leh ettehna ding gen tu dong bei thei lo a, Guevara tangthu pen mite lunglut leh gencim ngei loh suak hi. Che tangthu laibu tuamtuam tampi kibawl a, film leh documentary tampi mah kibawl khia khin zo hi. Che tangthu tawh kisai film a kibawl minthang diakte lak-a kihen pen 2008 kum-a kibawl “The Motorcycle Diaries” hi a, hih film sungah Che pen kilaihgawpna piangsak makaipi bangin Benecio Del Toro in piah hi.


CHE GUEVARA’ NUNTAKNA:
*1937: Kum 9 a phakin primary school ah tan thum sin a, Spanish Civil war tangthu lim takin sim in, uuk mahmah ahih manin galkapte kiphinna hong kipatna thu tampi tak a sinna hangin a lungsim hong zo zo mahmah hi.

*1947 in Argentine Communistic Youth member numei Berta Gilda Infante (Tita zong a kici) tawh hong kimu kha uh a, a uukna uh kibang ahih manin lawm hoih mahmah hong suak uh a, Marxist thu tawh kisai laibute sim khawm in, Marxist ngaihsutna a taktakin zat khiat ding dan thute kikup in nei den uh hi.

*January 1 1950 in motorcycle zangin Argentina leilu mah hong zin khia hi. Córdoba kianga om San Francisco del Chahar khua-a a lawmpa, miphakte a kepna inn a bawl, Alberto Granado kiang hong tung a, dam lote tawh a natna thute uh kikuppih in, a lawmpa tawh mun tuamtuam ah zin kawikawi uh hi. A sawt loin a university ah ciah kik a, scientific research tuamtuam a lutlutna lam - allergies, asthma, leprosy leh nutritive theory cihte hong sin kik hi. A lai sim kawmin Argentine national shipping-company ah “trading and petroleum ships” kici ah pasal siamah (male nurse) sem kawm a, Argentina leitaw lam, Brazil, Venezuela lehTrinidad gamte ah zin kawikawi hi.

• LATIN AMERICA SUNG A ZINNA:
*October 1950 Latin-America (South America i cih gam tuamtuamte) sungah zin kawikawi ding hong kipan hi. A lawmpa Alberto Granado tawh January 1952 ‘Norton’ 500-cc motorbike lui mahmah tawh hong ding khia uh hi. Valparaiso, Chile a tun un a diary gelh hong kipan a: “Khuataw lam en suk in, khutdawh tampi tawh ka kikho uh a, a gentheihnate uh ka zak ciangin nak ding haksa kasa mahmah hi,” ci-in gelh hi. Chile gam tawh kisai a gelhna ah: “Mite’ nungtakna dingin gentheihna a piangsak Yankee (USte a genna) te’ lawmte beisak ding pen hih dinga poimawh masa pen hi. Dollar tampi tak tawh sum bawlna ding mun bawl uh a, amau phattuamna ding bek ngaihsun in mite tungah haksatna tampi guan uh ahih man hih pen a masa pen a nasep ding lian pen hi,” ci hi.

*March 24 in Peru gam-a Tacna khua hong tung uh hi. Hih kiim-a tengte zawnna leh haksatna thu khua mite kikupkhawmna hong neihpih kawikawi khit ciang in hih bangin a dairy sungah gelh hi: “Ka mai lam hun ding tawpna/ tuna ding sehkholhsa muna tuna ding leh pelh theih loh tuna ding mun (destiny) dingin hih mun a tengte tawh ka hun teng ka zang khawm nuam hi,”.

*May 1 in Peru gam Lima hong tung uh hi. Hih gamah Che in Peru scientist, siavuan leh Marxist upna lenkip mi leh director of the National Leprosy Program director Hugo Pesce kimuhpih a, zan tampi khuavak dong Marxist thu tawh kisai kikupna nei den uh hi. Guevara in Dr. Hugo Pesce tawh ka kimuhna leh thu a kikupkhawmna hangun ka nuntakna leh khua leh tui ka veina nakpi takin hong laihsak zo hi ci hi.

* May 17 in Peru gam-a Amazon gammang sunga miphak kikepna San Pablo Leper Center zuan dingin hong ding khia a, June 7 in hih mun hong tung hi. Hih munah an, zatui leh puan zong om lo hi ci-in a lungsim lawngkha mahmah in, dam lote a veina lian mahmah hi. Nipi kal tam lo sung hih phakte kepna center ah hong sep khit ciang Amazon Tuipi tawnin Colombia ah zin suk hi. July 17 in Colombia gamte khuapi Caracas tung hi. Hih khuapi panin a lai sinna medical science zom dingin Miami tawn in van puakna vanleng tawh Buenos Aires hong zuan hi. A vanleng kisia ahih manin lam kal-ah kha khat sung phial awk kha hi. A sum neih khempeuh bei ta ahih manin a nuntakna dingin sumbuk-a nasem mawkmawk (waiter) sem in, bar ah kuang sawp in na hong sem hi. A nasepna munah police ten na nu leh pa communist hiam ci-in va dong thithe den uh hi. August 31 in Buenos Aires khuapi hong tung kik hi.

KILAWIGAWPNA PIANGSAKNA DINGIN A KIPIAK KHIATNA:
Che Guevara in a laisimna 1953 in zo a, galkap dingin sapna a ngah hangin cin zo loin kideih lo ahih manin ciah kik hi. July 7 in Km. 6000 a gamla La Paz, Bolivia zuanin meileng tungah hong tuang a, Panama gam October in hong tung hi. Panama gam makai ten USte maibiak in, a gam mite uh nak bawlsia lua uh ahih manin nasa mahmah hi. Costa Rica ah zong United Fruit company ten gam mite thuneina tawh ukcip uh a, tua hangin mite gentheihna leh zawnna a muh ciangin lainat mahmah hi. A ni, Beatriz kiangah hih bangin lai khak hi “El Paso ah United Fruit company ten nasemte leh mite a thuneihna tawh ukcip uh a, sum meet ding bek deih a sumbawl tui sunga ganhing octopuses kicite bangin ngongtat in thukham palsat uh hi. I baang ah maan lui i suang leh i kahpih i lawm Stalin (Russia kumpipa) kiangah hih octopus ganhing banga ngongtatte a siattumsak mateng khawl lo dingin ka kiciam hi. Guatemala ka tunin mite gentheihna ka muhna hangin kilaihgawpna piangsak makai tuam vilvel khat hih ding ka ut hi,” ci hi. Nicaragua gam tawn Honduras leh El Salvador gamah hong pai-in December kha-in Guatemala gam-a a lawm Jacobo Arbenz’ omna hong tung a, hih mun panin kilaihgawpna piansakna ding hong kipan uh hi. A nu’ kiangah hih bangin lai khak hi : “Ka ngimna ka tung ta a, na khempeuh a hoih lamin hong piang theih leh kum nih bang ka om ding hi,” ci hi.

*1954: June 14-16 in US ten galkap thahatna tawh thuneihna lak ding a hanciam Castillo Armas gum in vanleng zangin Guatemala sunga galkapte panmun leh mipite teenna bomb khiat uh hi. Hih thu tawh kisai hih bangin a dairy ah gelh hi: “USte’ bomb khiatna hangin Guatemala kumpi, a gam mite leh kei hong kipumkhatsak a, Guatemala gam itna piangsak hi,” ci hi.

*1954: June 18, 1954 in USte ngimna leh geelna bangin Guatemala president Arbenz zawhthawh thu tawh kilaih in, galkap ten thuneihna la uh hi. Che in galvan pua lut sim in, khangno ten galkap thahatna tawh thuneih lente a dona dingun tha pia a, gamvai (political) makaite mun bitna munah selsim hi. June 20 Che in a nu hih bangin lai khak hi : “Leitunga media (press) ten thuman loin khangno ten galkapte a suamna uh suaksak uh a, kidona in khuahun ukcip hi. Zatui tawh huhna kisamte huh dingin ka kipiakhia a, khangno galkap pawl (youth-brigade) sungah ka min khum in, galdona tawh kisai pilna ka sin a, a kisapna mun peuhah pai dingin ka kipiakhia hi,” ci hi.

June 26 national radio president Arbenz kitawp a, gamvai makai tampi leh a innkuanpihte uh gamdangah gal tai uh hi cih tangko hi. Hih thu hangin kilawhgawpna deih a galdote sungah buaina lianpi piangsak hi. Che in, “Guatemala ah galdo ding kisam napi kuamah galdo om lo a, lehnawhna leh nanna kisam napi kuamah ut lo hi,” ci-in a dairy sungah ciamteh hi. Galkap thahatna tawh gam ukte lehnan ding hong dau a, Latin-American embassies-te ah galtai dim phengphang a, gam uk ten Che pen Argentina communist lauhuai hi a, Guatemala gamah om nawn lo ding hi ci uh hi.

*1955: CHE GUEVARA LEH FIDEL CASTRO: 1955 Che in Mexico City aa “Hospital Central” kici ah siavuan sepna hong ngah hi. June kha-in Fidel Castro’ naupa Raul Castro tawh kimu in lawmhoih hong suak uh hi. July 8 in Fidel Castro in Mexicate’ khuapi Mexican City ah Fidel hong tung hi. Che in Fidel tawh a kimuh masakna hih bangin ciamteh hi: “Mexico gam zan khuavot nitak khatin Fidel ka kimuhpih a, ka kiho masakna pen uh leitung politics vai hi a, zan khuavak phial dong holimna ka neih khitun mai hun ading Granma galdo (Granma Expedition) dingpa ka suak hi,” ci hi. Fidel Castro in a kimuhna thu uh hih bangin ciamteh hi: “Che in Marxism-Leninism tawh kisai thu leh mimal ngaihsutna kician takin nei a, thuthak sinnopna nei in kilaihgawpna thu lim takin thei khin zo hi,”.

*1956: June 24 in Mexican police ten Che leh a Cuba gammi lawm teng man uh hi. July 3 press agency UPI in, “Argentina mi Dr. Che Guevara in Cuba Kumpi Fulgencio Batista ukna laih ding a vaihawmna hangin a pianna gamah kipuak kik ding hi,” ci-in suaksak hi. Tua hun lai-takin Mexico president lui Lázaro Cárdenas in Che gum a, July kha-in Che kikhah khia a, kilawhgawpna piangsakna dingin a nasepna zom kik hi.

November 25 in teembaw neu (yacht) Granma kici tawh huihpi nung lai-in zan pi-in Fidel Castro leh galkap (guerrillas) 82 tawh Che in Mexico gam-a Tuxpán lui panin Cuba hong zuan uh hi. December 2 in Los Cayelos, East Coast tung uh a, a zing ciangin Cuba leh Latin-American newspapers ten a galdo sawmna uh suaksak pah hi. “ . . . Fidel Castro, Ernesto Guevara, Raul Castro leh a galkapte uh hong lut ding uh na kima theih ahih manin kisuam a, tampi mangthang uh a, a suakta teng kikhenzak uh hi,” ci-in suaksak uh hi. December 5 in Alegría del Pino ah Che galkap ten buksim in suam uh a, liamna tuak hi. Che in, “Ka ngawng thautang in hong kha-in liamna ka tuak hi. Machine gun tawh kap cihtakin hong kikap a, ka thautang bawm ka tawi kha-in, tua hong tuan/leng in ka ngawng hong kha hi. Ka zawhmeng (thautang bawm) hangin suakta ka hih manin ka lungdam hi,” ci-in a dairy ah ciamteh hi. A lawmte huhna tawh kawltu lo khat tungin suakta uh hi. Hih bang hun lai takin Che adingin teel ding nam nih om hi: Siavuan sem ding maw? Kilaihgawpna a om theihna dingin galdo ding maw? A suahtakna dingin: Zatui bawm khai ding maw,thautang bawm khai ding maw? cih ahi hi. Thu nam nihte khatvei thu-in teel thei lo ahih manin a thautang bawm la-in kawltu lo panin pusuak a, lokhote’ teembaw tungah tuangin tai uh a, December 21 in Che leh a lawmte coffee lo khat hong tung uh hi. Tua lai-ah Fidel in ni nih na ngak khin zo hi.

*1957: CHE GALKAP TAKTAK A SUAHNA: January kha-in La Plata khua-a galkapte phual va simna ah kihel hi. Che in: “La Plata pen gualzawhna ka ngah masakna pen uh ahi hi. Hih ni-a kipanin kumpi lehdo galkap (rebel-army) ka hihna uh leh galdo dingin mansa hi ung cih ka tel uh hi. Hih gualzawhna in a tawp dong gualzawhna hong guan dingin lametna lianpi ka nei uh hi,” ci-in ciamteh hi. Tua khit nungin Cuba galkapte mun tuamtuamah buk simin suam kawikawi uh a, kikaptuahna nasia semsem hi. Cuba galkap ten zong bomb khiat hong kipan ta uh hi. April kha-in Fidel’ thupiakna bangin a omna kiim uh-ah lokhomite huhna hong ngen uh hi. Che leh a lawm galkappihte leh lokhomite kipumkhatna hong hoih semsem a, a gamtatna uh kuamah in koi mun pansan uh hiam cih tel zo lo uh hi. Che in, “Lokhomite tawh ka ki-itna uh leh a kipumkhatna uh kip mahmah a, koi mun panin hong kipan hiam cih kuamah in gen thei lo hi. Sierra Maestra khuami ten a kibawlsiatna leh a gim thuakna hangun kilaihgawpna lungsim hong nei thei uh hi cih tel zo lo uh hi,” ci-in a dairy ah ciamteh hi.

July in Che in laimal (alphabet) danin a galkapte (guerrillas) Joel, Israel leh a tuamtuamin khen diudeu hi. A dangte pen Cuba khangthu leh kumpi gilo in a bawlsiatzia leh kumpi hoih lo do ding ahih zia sinsakna nei hi. July 21 in Fidel in Che a commander dingin guang hi. Che in: “Fidel in commander of the second colonne of the guerrilla-army dingin hong guan pen thukham kantel in hong guan hilo hi. Hih bangin zaa hong piak pen leitung-a mi hampha leh angtang penpa hong suaksak hi,” ci-in a dairy ah ciamteh hi. September 17 in Cuba galkapte’ mawtaw (trucks) tampi tak Che leh kumpi lehdo (rebels) ten buksim in na suam uh hi.

*1958: January 6 Che in Fidel lai khak a: “Commander zaa nong piak pen citna/hoihna (merit) bangin ka ngaihsun a, ka hanciam ding hi. America ah mipite gupna hangin galdo ding kipiangsak zo hi cih ka lah bangin ka hanciam toto lai ding hi,” ci hi. February in Buenos Aires-a “Radio El Mundo” ten Che in microphone zangin interview uh a, Che in, “ America hotkhiatna dingin ama deihna bek-a gam ukte (dictators) pen zawh khiat ding hi cih ngaihsutna nei ka hih manin Cuba gam-a om ka hi hi. Tua bang a pian theihna dingin ka huh theih zahin ka huh ding a, kizo baih leh vai veng baih pen ding hi,” ci-in gen hi. Thudong ten Cubate’ buaina ah na kigolh pen gamdangte gamah ah kigolh hi ci-in a kingaihsut ding lau lo na hiam ci-in a dot uh leh Che in, “A masa penin Agentina bek ka gamin ka tuat kei a, America bup ka gam bangin ka tuat hi. Tua bangin na ngaihsut khak uh Marti’ nuntakna zong en uh. A pianna gamah a ngaihsutna leh a geelnate tangtungsakna ding nasem ka hi hi. Tua banah kigolh hi ci-in hong kituat thei lo ding hi. Bang hang hiam cih kei mahmah a vekin kipia khia-in ka sisan pia khia ka hih manin Cuba mi bangin ka kituat hi. Kumpi gilo khat tung panin suahtakna dingin gamdang kigolh in vanlengte, galvante leh galkap advosorte a kizat hangin zong gam mite nuamin na awng uh hi. Tu dongin gam khat beekin USte Cuba ah Batista gumin a kigolhna thu North-Americante newspaper khat beek in zong mawhpaih nai lo hi,” ci-in dawng hi.

May 24 leh 25 in ama’ deihna bek tawh gam uk kumpipa’ (Batista) galkap ten leisung sumpiang tohna (mines) Sierra Maestra khua-ah mun nih suam uh hi. Hih thu hangin kikaptuahna hong nasia semsem ding hong kipan ta hi. Batista’ galkapte mun tuamtuam panin hong lut beh uh a, mainawt dingin hong kithawi hehhan uh hi. Baptista’ galkap ten supply lampi leh kikawmtuahna lampite (supply and communication-lines) hong la uh uh hi. Tua khit a sawt loin Che in a galkapte tawh galkapte do uh a, Sierra Maestra khua panin Baptista’ galkapte zoin galkap 10,000 val guallel in tai keek uh hi.

August 21 in Fidel in hih bangin lai gelh hi: “Sierra Maestra panin ‘Las Villas’ province sungah kumpi lehdo galkapte (Rebel-army) ngimna bangin galkap lak ding leh galdo ding pen Commander Ernesto Che Guevara’ khutah ki-ap hi. Hih province sung leh a kiim teng-a galkap kikoih ‘M-26 de julio’ kicite makaipi dingin Che in mawhpuakna len ding hi. Eight Brigade ten galte suam zom zel ding uh a, a kizawhsiang mateng suam zom zel ding uh hi,”.
December 16 in Central Road kicihna lampi-a om Falcon lei bomb in kisusia ahih manin Santa Clara khuapi nisuahna lam teng Havana khuapi tawh kikawmtuah thei lo uh hi. December 26 in Che in hih bangin a dairy ah ciamteh hi, “Gal kizo ta a, galte guallel in nakpi takin khukdin in awng uh hi. Nisuahna lamah Baptista’ galkapte 10,000 kimatsak a, Camoguet ten paina ding leh taina ding lampi mu zo nawn lo uh hi. Hih bang hong pian theihna dingin thu khat bek om hi: Pumkhatin ka pankhawmna uh leh ka hanciamna hang uh ahi hi,”. December 27 in Che in Santa Clara khuapi manawh dingin pai dingin khentat hi. Hih bangin Che leh a galkap ten gualzawhna lianpi a ngah lai takun leitunga news leh media tuamtuam ten Che si hi ci-in leitung bup a khem hangin ‘Radio Rebelde’ in mediate thusuah kitukalh lian thu tangko uh a, “ Thu kiza nunung pen poimawh pen hi. Eight Brigade ten Las Villa ah gualzawhna lianpi ngah uh uh hi. Ernesto Guevara’ makaih galkap ten meileng khua mu lo khat man uh a, a sunga tuang galkap 300te tawh man khawm hi,” ci-in pulak hi.

*1959: January 1 phalvak kuanin ama deihna bek tawh gam uk Baptista in a gam nusiatsan in, tai sim hi. February 9 in Che in Cuba gammi hihna (citizenship) ngah hi. Cuba gam kila zo ta ahih manin July leh August kha sungin Cuba gam uliante palai dingin United Arab Emirates leh Egypt ah zin a, Egypt kumpi Nasser tawh kimu uh hi. Tua khitin India, Thailand, Japan, Indonesia leh Pakistan gamte ah zin kawikawi hi. Eastern Europe leh Western Europe gamte tawnin Morocco gam va zin a, Cuba ah kilaihgawpna a piangsakna thu hangin leitung mun khempeuh zeel hi ci-in mi ten a angtangpihna thute uh na ko ngeingei uh hi.

October 17 in Che in university sangnaupangte kiangah, “Tonumei khat in khutdawh khat sum peek khat a piak bangin na pilna uh leh na khat peuhpeuh tawh mite huhna ding bek piak sawm kei un la, Cuba gam kilaihgawpna ding a piangsak galkapte (revolutionary forces) hong tum un la na gam mite uh tawh khat leh khat kimuhpih/kizopih in, pumkhatna ding hanciam un. Kilaihgawpna a khanna ding leh hatna dingin na liangko uh hong zang le uh cin tuahna pan sinna (experience) poimawh zaw hong pia ding hi,” ci-in hanthawn in thu hilh hi. November 23 in Che in aana tawh sawl loh a kiphal tak-a nasepni “day of voluntary labour’” kici Cuba ah phuankhia a, tua ni pen “day of voluntary labour’’ kizat masakna ni suak hi. Che in taangpi taangta’ phattuamna dinga ki-ukna (socialism) tangkopih leh hinpih ahih manin amahmah in zong sila leh nasem nei tuam loin mimawkmawkte nasepte - Lokhoh cihte mah sem in, midangte zong tua banga nasem dingin tha pia hi.

*1960: 1960 kum bei kuanin US in Cuba tawh sumbawlna khempeuh khakcip (trading-embargo) hi. Hih thu hangin Che in Cuba uliante makaih in Socialist gam tuamtuam - Soviet-Union panin Eastern Europe ah, tua khit ciangin China leh North Korea ah zinpih hi. North Korea panin Soviet-Union va sik kik a, tua khit Eastern-Germany leh Czecho-Slovakia gamah zinpih hi. 1961 kum bul lam pawlin US in kumpi leh gam ulian tawh kizopna leh kitanauna (diplomatic relations) khempeuh Cuba tawh beisak hi.
*1961: April 15 in Cuba gam-a vanleng phualte ah USte’ vanleng ten bomb khiat hi. April 17 USte Secret Agent CIAt ten sum tawh galdo dinga a guaih galkapte (mercenaries) mi 1,500 in Bay of Pigs kicihna mun va sim uh a, USte galdona teembaw leh US Air Force ten huhna pia uh hi. USte ngian pen Bay of Pigs sunga teengte lahah kiphinna piansak ding cih ahi hi. Ahih hangin USte lametna guaksuak a, nai kal 72 bekin Cuba galkap ten CIAte’ galkap golhte zo khin gawp uh a, 1,200 hingmat uh hi.

*1964 : May 17 in Che in gamkeek US ten South America sungah a gamkeekna uh leh khalna a bawlna uh hi bangin na to hi : “Khangthu/tuanthu ciamtehna (history) tawh a sim in hun khat, mun khatah kimuhna (rendezvous) ka nei uh a, kihtakna nei dingin a mawkna in ka kiphal keu uh hi. Hih bang lawpna leh upna pen ka lencip ding uh a, van tuamtuam bawlna khawl/setzung (factories) ka veilam khutte uh tawh ka bawl ding uh a, ka taklam khutte uh-ah rifle (thau namkhat) ngimin, lungte (gamkeekte) ka khe uh tawh ka tuancil ding uh hi,”.

August kha in Congo gam-a thupiang tawh kisai hih bangin gen hi : “Africa ah a beisa kum nih in Prime Minister kithat a, tua khit in Prime Minister len ten kha thum sung bek len zo in a kilaih den pen USte a kigolh man leh amau zawhthawm kumpite gam kumpi dingin a koih man uh ahi hi. Bang hangin kumpi hoih lo leh North Americate’ (US) uk khumna Congo mi ten do napi-in lel den uh hiam? Bang thu bang hangin piang ahi hiam? Bang hang hiam cih leh Congo ah leisung sumpiang copper leh radioactive minerals kici a leitang uh-ah a tam luat man leh Congo gamah leisung sumpiang tuamtuam a tam luat man ahi hi. Tua ahih manin makai leh gam uk kumpi hai khatin thumanna pen vangliatna/aana (power) tawh ngah theih ding sa uh a, amau sangin a vanlianzaw leh aana nei ten laih kik uh hi cih thei lo uh hi. Hih thu hangin gam makai ten sihna tuak den uh hi,” ci hi. Tua khit a sawt loin New York, US khuapi ah UN kumpi khawmpi ah Che in thugenna nei hi. A thugenna ah Che in Congo Prime Minister Lumunba kithahna ding leh sai ippi (sack baggage) sungah a kithunna dingin gamdang ten a thatte huhna pia uh a, tu lianin Congo president len Tshombe in Katanga province sung leh Congo gam balkeekna ding vaihawm hi. Prime Minister kithahna leh Congo gam-a thupalsatna leh mawhna kibawlte tungah phuba lakna dingin a suakta gam khempeuh in a tangko dingin a kithawi hun ta hi ci-in gen hi. USte’ foreign policy ngiante leh South Africa gam-a mikang ten mivomte a deidanna (apartheid) thu zong hangsan tak leh nasia takin a mawhsakna genkhum miatmiat hi.

*1965: January 1 ni-in Brazzaville khua-ah Che hong zin a, Africa gam tuamtuam ah zin kawikawi hi. Cuba gamah a ciah kikin Cuba gamah kilaihgawpna piansakna dingin a galkappih a muan diakte mi 100 a sim in khawmpi (secret conference) neihpih a, hih khawmpi-a hong kihelte pen mai hun adingin Congo gam-a a galdona dinga galkapte hong suak hi. Cuba tung panin galvan, training leh sum tawh huhna a ngen Africa gam-a kilaihgawpna piansak ding a deih makaite leh Che February in Dar El Salaam khuapi ah hong kimu uh hi. Laurent Kabila leh a general staff-te zong kimuhpihna hong nei uh hi. Hih kimuhkhawmna nei ten Africate’ gal lianpen gamkeek North-Americate hih cih thukimna nei tek uh hi. Kabila in training pia dingin Che kiangah ngetna nei a, Che in mual leh guam hoihna munte ah galkapte sinsak leng hoih hi cin a ngetna nolh hi.

March 31 in Fidel Castro adingin mangpha khakna lai Che in gelh in, Fidel tawh hong kikhen uh a, Congo ah galdo dingin a muan diak a galkappih a lawmte tawh hong kuan khia hi. Hih thu tawh kisai US in Che minsiatna ding thu phuaktawm in, Fidel tawh a ngaihsutna a kitukalh luat manin Fidel in Che hawl khia hi ci-in news ah suaksak uh hi. Tua bek tawh hunsa loin US ten China ah a news broadcast uh-ah Che in Chinate a gup luat manin kithat hi ci-in suaksak a, ahih hangin China leh nisuahna lam gam ten USte’ thugen um lo uh hi.

March 24 in sum tawh kiguai Belgium galkapte mat khak lohna dingin a lawmte mi 14 tawh Tanzania gam panin Tanganyika Bual (Lake) teembaw khawlna munah Che hong tung uh hi. Tua mun panin Congo gam-a om Kibamba khua hong tung uh hi. May 9 in Congo kumpi lehdo dinga kithawi galkap tawm khatte (guerrilla) tawh hong kimu thei hi. Amaute kiangah galkap tawm kha bek tawh galdo dingzia (guerrilla education) pia dingin Gastón Soumaliot leh Laurent Kabila in Fidel Castro’ kiangah a ngetna bangin nasem dingin hong pai hi’ng ci-in gen a, no tawh kipawl dingin nong deih uh leh note tawh galdo khawm ding hi hang ci-in gen beh hi. Che in Congo gamah galkap tawm khat bek tawh galdo ding dan sinsakna mun sanginn “La Base” ah phuankhia hi.

July 7 in Che in Laurent Kabila kimuhpih a, Kabila in Congo gam sung mun tuamtuamah kong vakpih ding hi ci-in ciam hi. Kabila in a kamciamna palsat in Kigoma khua-ah zinsan hi. Che tawh kipawl galkap tawm khat ten (guerrilla) ten galkapte buksim in suam uh a, sagih that uh hi. Tuate lakah Belgium mi non-commissioned officer nih leh leh South-African mi thum kihel hi. November kha-in kilaihgawpna piansak ding deih makaite sungah kituah lohna lianpi hong piang ahih manin a galkap ten a teel ding mel uh thei loin a honhon in lom khat khit khitin nusia in tawpsan uh hi. Congo kumpi leh Cuba kumpi in hih thupiang hangin kamkupna nei uh a, Cuba pan-a galkap khempeuh ciak kiksak dingin thukimna nei uh hi. Che leh a lawmte Congo ah kha sagih bek galdo in om uh a, kidono mun 50 ah kihel man uh hi.

*1966: July in Cuba gamte’ khuapi Havana ah Che a sim in lut a, Fidel tawh kikum in Bolivia ah kilaihgawpna piansakna dingin galdo dingin hong kithawi leuleu hi. Che in Moscow, Prague leh Vienna khuapi tawnin Brazil panin Bolivia gamah November 3 in tung hi.

*1967: Che in hih bangin gelh hi: “Ka ngaihsutna ah Monje (Bolivian MP Under-secretary) omzia pen a kipat cilin hong kitheimawh bawl a, tua khit a sawl loin hong lehpei hi. A party in ko hong do dingin thau tawi uh a, tua-in bang ngahpih ding hiam cih ka tel loh hangin na gamtatna uh hong zia awlsak tuam ding a, hong zia awlsakna hangin ko adingin phattuamna ngah hong piang zaw ding hi cih ka tel hi. Mi citak pen leh kidemna ding a hanciam nuam pen ten ko hong pawl bawl ding uh a, ahih hangin gentheihna tampi tuak masa ding uh hi. Guavara khuami ten Che leh a pawlte hong pawl bawl thei pah uh hi. Monje leh amah gum galkapte bang ciang ding kip zo ding uh hiam cih hunin hong gen ding hi. Tawmvei sung bek galkap zanga galdona kipan ta a, gakapte kisittel (test) ta ding hi. Ko hong pawlpih ding Bolivia galkap ding mi lak ding pen a zia kai pen hi,” ci hi.

March kha-in Boliva gam thu lim tak-a sit leh kan (analysis) ten hih bang ci hi: “Tu kha-in kikaptuahna om kawikawi ta a, Monje in a ukna kipsak semsem a, Cuba panin Che leh a pawlte pawl khat hong lut uh a, tuate khitsiangna hun kipan ta a, Che’ galkap ten a galdona uh-ah lawhsam lua lo uh a, nih in taisan in, tuate khatin a lei uk zo loin thongah kikhum a, thum in liamna tuak in, nih thanem in bah mahmah uh hi. Che leh a pawlte (guerrilla) pen Bolivia mi 29, Cuba mi 16 leh Peru mi 3 hi,” ci-in gen uh hi.

La Paz leh Cuba tawh thu kizaktuahna hoih mel lo ahih manin Bolivia gam a lut khit uh kha tam lo sungin Che si hi ci-in kigen hi. Cuba gam na bang loin Bolivia gam-a lokho mi ten Che leh a pawlte na pawl bawl mel lo uh hi. Hih thu kisai May kha in Che in hih bangin ciamteh hi: “Lokhomi ten tu dong hong pawlpih nai lo uh a, ahih hangin hong kihtak bawl loin zong hong thupi sim tuan beek lo uh hi. Lokhomi ten hong pawl bawl theihna ding uh hun sawt la mahmah ding hih tuak hi,” June kha in Che in hih bangin lai-at leuleu hi: “Lokhomi ten hong pawl bawl nai lo lai uh a, lokhomi ten hong pawl bawl theihna dingun khuapi-a mi tamna munte suam ding kisam hi. Ahih hangin Bolivia galkapte muncih leh gamcih tengah dim uh ahih manin gamtatna hamsa mahmah a, lokomite kiangah ka ngimna uh a man loin a kigenna hang leh galkapte a kihtakna hangun mainawt ding hamsa mahmah hi,” ci hi.

Hih bang hun lai-in US in Bolivia galkapte galvan tampi piak beh in galkap adviser ding sawl behbeh lai hi. Galkap ten gammite a sep ding bang un semsak thei loin bawlsia gawp uh ahih manin lungphona hong kipan a, Che leh a galkapte gum hong kibehlap in, Che hong minthang pianpian ta hi. Che in hih bangin gelh hi: “Newspaper tuamtuam in zong kei thu tawh kisai nisim in suaksak uh a, gamvai lam phual sung (political field) leh kumpite thupulakna (official statement) ah Che Bolivia gamah om a, Cuba ah kithat lo a, Che’ makaih galkapte lim takin a kido kei leh Vietnam galah Vietcong ten US ten galkap sinsakna hoih a piak US Marines kicitte a zawh bangun Che’ galkap ten kumpi zo zo ding hi cih thu khawng suaksak uh hi.

September kha in Che leh a galkap ten Bolivia galkap buksim in a suamsuamna hangun tampi in sihna tuak uh ahih manin tam nawn lo uh hi. October 8 in La Higuera khuata ah Che leh a galkapte nih Bolivia galkap ten man uh a, Che kimatna munah Bolivian colonel leh CIAte adingin nasem Cuba mi khat helicopter khat tua mun hong tung uh hi. Uliante thupiakna bangin Che leh a lawmte gel - Willy Cuba leh Juan Pablo Chang manlang takin thah dingin galkap ten thungah uh hi. A that dingin Bolivia galkap mawkmawk khat thu kipia a, tua pa’n Che mai en ngam loin a kiang en in a thau tawh kaplum hi. International press barons ten Che’ thuciamtehna (diary) man dingin $125,000 ciam uh a, Bolivia gam-a kilaihgawpna deih ten (revolutionaries) a kithah kum mahin Che’ dairy Cuba ah puaklutna ding hanciam uh ahih manin US ten a kibangkim ciat-a ki-ukna (Communism) deih loh a thuphuahtawm a sawmna uh lawh sam dimdem hi.

# "Che" cih pen Portugal leh Valencia kammal hi a, Argentina, Uruguay, Valencia sunga Spanish autonomous sunga teeng ten nak zat mahmah uh "Lawm"a cihna hi a, Mikang ten "friend" "mate," "pal," "man," "bro," "dude," cih bangin a zatnate uh-ah kizang hi. Congo gamah kilawhgawpna (revolution) deih makaipipa Laurent Kabila in Che khemna in a lehpeina hang leh revolutionary makaite kituah lohna hangin Congo gamah Che lawhsam a, Bolivia gamah lokhomi ten Che leh a pawlte a pawlpih loh man leh US kumpi-in Bolivia galkapte a huhna hangin Che lawhsam in sihna tuak hi. Kum 39 sung bek Che a dam hangin Che’ ngaihsutna, lungsim leh ama’ ngaihsutna leh ama’ deih ki-ukna – kibangciat-a ki-ukna (Marxism leh Communism) tu dongin lawhsam loin nungta lai a, Che a sih hangin a ngaihsutna si nai lo a, zong si ngei lo ding hi. Che kum cing loin a sih hangin ama’ ngahsutna leh ama’ deih ki-ukna pen kumpi gilo in a ukna gam sunga nenniamna thuak mite adingin a beisa hun, tu hun leh mai hun ciangin zong nungta den ding a, Che pen nenniamna thuakte adingin a ettehpa uh leh a milim pasian (idol) uh suak hi.

A teikhia :
Thang Khan Lian

Source :
Biography.com,
/Histort.com
“Che Guevera”/
The CheStore “Che Full Biography”,
Wikipedia.

Zomi eLibrary/Laibusaal leh Laigelh  Thang Khan Lian kipawl khawm in hanciam khopna ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KILAIHGAWPNA (REVOLUTION) APIANG SAK 'CHE GUEVARA’ TANGTHU Description: Rating: 5 Reviewed By: Cinpu Zomi
Scroll to Top