728x90 AdSpace

Hot
Menu
Zon-ol na Donate

Latest News

Makai Leh Kikhelna. Agelh – Lian Muan Kim

Makai Leh Kikhelna
Agelh – Lian Muan Kim


Ut in ut ta kei le hang i kikhelkhel hi. Tam vei simsim i kikhel khit ciangin i nu‘ gilsung pan i suakkhia a, tam vei simsim i kikhel khit ciangin tu a, i hih bang ihi hi. Ha neilo sa in i suak a, ha neilo sa mah in (i teek dong i nuntak leh) i si hi. Leitung ah a om ngei nai hetlo kimlai i omkha a, tawlkhat khit ciangin i om nawn kei ding hi. Lei pana hong kibawl ahih mah bangin lei ah iciah kik ding hi. I phawkkha kei phial zongin nisim in i kikhelkhel hi.

Pasian a kikhel ngei loh hangin a nasep ziate kikhel hi. A mite tawh kizui in khangkhat khit khangkhat hong kilaak zia ahi zongin hong ompih ziate kikhel a, hong makaih ziate zong kikhel hi. Mimal kim ciat tungah na hong sem hi na pi, hong sep zia kibang hetlo hi. A kammalte a kikhel loh hangin i hihna leh i tuahkhak thu tawh kituak in na hong sem a, i omna mun tawh kituak in zong na hong sem hi.

Tua mah bangin makai khat in zong a nasep zia leh a makaih ziate kul le a kisam bangin a khel theih ding thupi hi. Makaih zia leh a hihna a khel ngeilo makai pen bangmah semlo makai ahi hi. Nuntakna leh nuntak zia kikhel in i duh i deih leh i uk zong a kikhel mah bangin khuahun leh khuasak zia zong kikhel ahih manin makaih zia zong a hunhun in khel a kul nate ah khel theih ding ahi hi. A mun a mual, khua le tui tawh kizui in mite om zia khawlzia zong thei a, tua tawh kizui in makaih siam theih ding zong thupi hi.

Zum le hiam, hei le tei tawh ahi zongin thalbawm tawh ahi zongin gal kikuan nawn lo a, thauvui thautang tawh gal kikuan ta hi. Sai le sakol tawh kipai nawn lo a, mawtaw, vanleng le tembaw tawh kikuan ta hi. Ni dang ciangin hihte a kisap nawn loh hun zong hong tung kha ding hi. Suanglai kung kizang nawn lo a, laikung laidal kizang hi. Siktawlai kikhen nawn lo a, computer nam tuamtuam kizang ta hi. Kamtai kizang nawn lo a, phone kizang ta hi. Laito ah lai kitam khiat nawn lo a, email kizang ta hi. Nikten puansilh zia kikhel a, pau le ham, lasak zia zong kikhel hi. A hun leh a mun tawh kizui in nate leh nasep ziate kikhelkhel a, mite ngaihsut zia zong kikhel hi. Hi banga kikhel hun sunga mite makaih theih na dingin makai pa zong kul leh a kisam bangin kikhel a, a makaih zia zong a khel theih ding thupi hi.

Ahi zongin a dahhuai thu khat ah kikhelna khat peuhpeuh a pian theih na ding haksa mahmah vetse a, zong lauhuai mahmah hi. Supna baina piangsak thei a, nusiat a kul zong pawlkhat om sak thei hi. Zongsatsa tampi tak phiat kul a, na thak tampi tak sin kul hi. Ngaihsutna thak neih kul a, a thak in kalsuan kul hi. Bangbang ahi zongin haksa in lauhuai ta leh a hoih zaw dingin kikhelna a pian theih leh khantohna, hamphatna tampi piang a, launa tuamtuam hangin kikhelna a pian kei le lah kiamsukna leh hamsiatna tampi piang hi.

Kikhelna
A pian theih na dingin
Upna tawh
Kalsuan ngamna
Kisam hi.

Lauhuai in zumhuai phial ta leh kikhelna hanga  piang hamphatna pawlkhat i kikup ding thupi sa ing. Noah nuntakna ah cikmah huna a muh ngei nai loh guah zu ding, cikmah huna a zak ngei nai loh tuicin tung ding ahih manin tembaw bawl dingin Pasian in thupia hi. Kikhelna lianpi khat a piang ding hita hi. Tua kikhelna hangin gim mahmah tawl mahmah dinga mi dangte muhna ah zong haivai in zum huai ding hi. Tuipi pan tai 120 bang a gamlatna mun ah tembaw bawl ding, cih pen haivai mahmah hi. Haivai in zumhuai ta leh Pasian thu mangin a kikhelna hangin amah le a innkuanpih teng bek suakta uh hi. Leitung ah mi 8 bek cian lai uh a, nuntakna thak khat kipan kik uh ahih manin kikhelna lianpi khat a piang ahi hi (Pian 7:13). Kikhelna a pian theih na dingin haksa ta leh kalsuan ngamna kisam hi.

Abiahang ngaihsun in. Ama nuntakna sungah zong kikhelna lian mahmah khat hong piang hi. A gam a lei, a khua a tui, a inn a lo, a it a ngaih teng, a lawm a gual teng, a sumbawl paaibawlna teng nusia-a a theih ngei nai lohna, a zak ngei nai lohna gamah pai dingin kisawl hi. Gamlim om lah hi lo, lampi zong om tuan lo. Lamhilh ding khat beek om lo, a tun na ding na ngawn zong thei tuan lo. Kaw pai ding na hia Abiahang, ci in a dong khat peuh om leh, theilo, cih tawh a dawn kul ding hi. Koi khua pai ding, theilo. Koi lam tawn ding, theilo. Bang hun in tung ding, theilo. Theilo, vive tawh a dawn kul mai ding hi. Pasian in amah sam khia ahih lam a theih lohngal, a theih dang bangmah om lo ding hi. Midangte a dingin haivai a, ama a dingin gimhuai lua hi. Lunglen khuangaih huai mahmah a, zong lungzin huai hi. Ahi zongin Pasian thu a manna hangin haivai mahmah tawh a kibat hang, Pasian in a ciamsa khempeih pia a, zong pia lai ding hi. Bangbang hita leh kikhelna a pian theih na dingin upna tawh kalsuan ngamna kisam hi.

Mawsi, Joshua, Davuih, Elijah, Elisha-te ahi uh zong in Laisiangtho Thak a nungzuipite ahi uh zongin a nuntakna uah kikhelna a pian ding pen lauhuai in haksa ta leh piang sak ngam uh ahih manin makai hoihte hong suak uh ahi hi. Amau le amau kikhel uh a, tua ciangin a nuntak zia uh leh a nasep ziate uh zong khel uh ahih manin a tawpna ah leitung a khel zo uh ahi hi. Pasian mi zatte in leitung a khel ma un, amau le amau kikhel masa phot uh hi.

Laisiangtho
Tawh kituak
Kikhelna in
Zeisu
Sut semsem na hi.

Makai khat pen mipite a kikhel ma in amah a kikhel kul hi. Tua khit ciangin nate a gelkholh theih ding leh mipite a paipih na ding mun a etkholh theih ding kisam hi. Mipite in khua a phawk ma un makai pa in sep ding bawl ding teng gelkhin ding hi. A gelna tawh kizui in lamlak in a paipih kul ding hi. Na thak khat peuhpeuh a muh masak ban ah, ngaih-sutna thak khat peuhpeuh zong a neih masak kul a, Tua a muhthak na khat peuhpeuh a sep masak ngam na dingin zong hanna a neih kul hi. Kuama theih nailohna gamthak sat dingin kituat leng, makai pa in kuama theihma in tua ‗gam‘ a zon masak kul hi. Amuh khit ciangin zong gamvan dingin a vapai masak kul a, tua khit ciang bek in a nungzuite makaih thei pan ding hi.

Ahi zongin kikhelna khat peuhpeuh hong pian ding ciangin a kikhel nuam lo, makai pa a langpan den mi hong om kha ding hi. Tua bang mite in tanglai a kipan i thuzuih khat peuh ahi zongin i kalsuan zia khat peuh ahi zongin a hoih pen sa den uh a, khel theih dingin ngaihsun thei peuh mah lo uh hi. Pawlkhatte leuleu, kikhelna khat peuhpeuh om leh amau min mang ding sa uh ahih manin kikhel ding, hisa thei lo uh hi. Ahi zongin kul leh a kisam bangin makai pa in a sanna lamah a mite a paipih veve ding thupi hi.

Tua hi-in, makai pa in na khat peuhpeuh a khel ding ciangin hih a nui-a thuthum teng tawh a etkak phot ding kisam hi.

Na khat peuhpeuh
A hoih lam a,
A khel thei ding
Makai  Kimu nuam a,
Zong kizui nuam hi.

1)    Laisiangtho tawh a kituak hiam: kikhelna khat peuhpeuh in na hoih, ahih kei leh na hoih lo piangsak hamtang ahih manin kikhelna khat peuhpeuh neih ma in Laisiangtho tawh kituak maw kituak lo, cih sittel masak phot ding kisam hi. Laisiangtho tawh a kituah leh haksatna tampi a om hangin ma nawt veve ding hi a, a kitukalh a le bel a ngei bang mah in om hithiat lel ding thupi hi. Laisiangtho tawh kituak kikhelna in Zeisu sut semsemna hi a, Amah banga makai hoih i suah na dinga, ma sotna ahi hi.
2)    Laisiangtho tawh a kitukalh hiam: kikhelna khat peuhpeuh a pian ciangin Laisiangtho tawh a kitukalh khak leh tua kikhelna pen Pasian kiang pan a, hong pai kikhelna hilo hi, cih i theih ding thupi hi. Upna ahi zongin biakpiak dan tuamtuam leh nuntak khuasak ziate ahi zongin hong kikhel ciang Laisiangtho mah tawh sittel a, a kitukalh ngeingei leh tua kikhelna pen i nawlkhin ding thupi hi. Tua hi-a, kikhelna khat peuhpeuh hong om ciang ahi zongin hong om ding ciang ahi zongin makai pa in pilvang tak in a sittel phot ding kisam hi.
3)    Laisiangtho tawh a kisai hiam: kikhelna khempeuh pen Laisiangtho tawh a kituak om dinga, a kitukalh zong om in, a kisai kha lian lo zong om ding hi. Biakinn ah bang puan silh dinga, mopawi ah bang puan silh ding, cihte ahi zongin khualak ah bangci om dinga, biakinn sungah bangci om ding, cih zong Laisiangtho in hong gen lo hi. Kikhop kipat ma in la dawng bang zah sa dinga, kikhop bang ci khawl ding; tumging tuatging le kaihging kuihging tuamtuamte zang ding maw zang lo ding, cih zong hong gen lo hi. Ahi zongin i hihna khempeuh pen a kilawm a kituak leh Pasian minthan na dinga ihih ding hong gen hi (Kawlentu masa 10:31). I gennop in bang hiam cih leh, kikhelna khat peuhpeuh hong om ciangin tua thu lian tawh kisai Laisiangtho in hong gen kei leh daitak a i om pah lel ding thupi hi. Makai pa in tua bang munte ah pilvang takin nate mu thei a, a khinkhai theih ding thupi hi.

Mipite in na khat peuhpeuh a hoih lam a, a khel thei ding makai mu nuam uh a, zong zui nuam uh hi. Mite muh loh khat a mu thei ding, a theih loh khat uh a thei ding, a phawkkhak loh uh khat peuh a phawkkha ding leh a khel ngamloh uh khat zong Pasian deihna tawh kituak a, a khel ngam ding makai deih uh a, tua bang makai bek mah zuih tak sa uh hi. 

Banghang in kikhelna thupi a sa, makai pen zuih tak kisa hiam cih leh Zeisu tawh kibang a, i kikhel ding hun kilamen in kingaklah ciat ahih man hi. Kikhelna in i hihna taktak hong phawksak a, i hihna ding taktak pen hong mukhol sak hi (Kawlentu masa 2:9). Hih anuai a, unau kipengte tangthu, thugentehna sim leng…

Unau kipengte in a nu gilsung uah a om lai un, nuamsa mahmah uh hi. Kimawl zel uh a, diang khawm in lasa khawm zel uh hi. I nu thupi taktak ei ma te; aman a nuntakna hong hawm, ci in kikum zel uh hi. Ahi zongin khat in: lawm aw, hih i nuntakna hong bei ding hi petmah ta. Kei lah, hi pan koi mah paikhia nuam keng; hi teng bek mah ah teng nuam ing, ci hi.

Tua leh a khat in: Ei nial theih lah hi lo a; i nu gilsung pan pusuak leng, a pua lam ah zong nuntakna om in um sam veng aw, acih leh a khat pen in: Piang thei ding a maw, i lai hong kitat leh nungta nawn kei mai ni. Tua ban-ah, a pua lam ah nuntakna om hi, ci-a hong genkik lah om lo a; kua mah hong kilehkik ngeilo pi. Um zo mahmah keng, i nuntakna a bei ding hi ta, ci hi.

Tua leh a khat in: I nu gilsung pan i pusuah ciang i nuntakna a bei ding hi leh i nu gilsung ah i om thaman bang om a! Nu, cih bang a neilo hi mai ve ni aw, ci hi. Tua leh a khat in: Neih loh phamawh hi veh aw; Nu neilo pi in, ei hi tengah bangci tun dinga nu neilo pi in bangci nuntak ding, ci-in dawng hi. Tua leh a khat in zong: I nu na mu ngei beek hia; I lungsim sung bek a, om hi mai ven teh aw. Amah a om dan khat a, a bawlbawl pong hi mai leng kilawm; Nu a nei dan khat in kibawl leng i lungnuam pong aih teh, ci in dawng kik hi.

A nu gilsung pan a pusuah hun uh hong tungta ahih manin lau mahmah uh hi. Ahi zongin hong suahkhiat uh ciangin a tenna uh ahi a nu gilsung pan hong pusuak uh a, a mit uh hong kihong hi. Lungdam lua in kap uh a: I upmawh na zah sangin a pualam na nuam zawtham ei, ci uh hi.

Source :
Makai Pilna (Laibu)



Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Makai Leh Kikhelna. Agelh – Lian Muan Kim Description: Rating: 5 Reviewed By: Cinpu Zomi
Scroll to Top