728x90 AdSpace

Hot
Menu
Zon-ol na Donate

Latest News

Mikim Theihhuai Lungsim Pumpi Cidamna Tawh A Kituak Naupang Pattah Zia. Agelh – Sianu Vung Hau Lun

Mikim Theihhuai Lungsim Pumpi Cidamna Tawh A Kituak Naupang Pattah Zia.
Agelh – Sianu Vung Hau Lun


Pi leh pu gual na hih leh na tunote na pattah zia ding, nu leh pa gual na hih leh na tanote na pattah zia ding, nungak/tangval na hih leh na naute ahi zong, nikhat ni ciang pasal/zi nei-in tano na neih hun ciang na pattah zia ding, na veng na pamte' naupangte, na kim na pam aa om naupangte a hoih lam in na pattah theih nadingin a nuai-a thute sim hamtang in.

Nu leh pate in na tate uh neih leh lam, sum leh paai, gamh kicingin na piazo kei phial zongin a nuntak sung uhah a zat theih ding pumpi cidamna, lungsim cidamna, mite lakah kihelzia, om daan khawl daan, kampau luhek zia leh thungaihsut zia siamna cihte tawh na pattah uh leh tate adingin Zeisu khit ciang a manpha pen gamh na hi pah hi.

1. A ngeklai na ta, ``Ka ta ithuai lua siteh" ci-in a biang mekkha kei in.
Naungek ahih mah bangin a bianga sihui/sahuite ngeklai mahmah aa tua bang in mekkha, nak lawngkha lecin kisia baih mahmah hi. Kisia leh paumawlna, pau-awkna leh ciltui-kaikaina cih bang piang thei hi.


2. Naungek nawizu a kham takin pia in.
Naungek a kap sim, nawi a zon simin nawi pia den in. "Nawi kham tak a ngahlote a khutpi khawnguh hong tep dinga a golciangin nanek lamsang ukna, zudawnna, zatepna leh mi gensiat, mi' heh theih nading kampau nopna cihlam hong uk ding uh hi," ci-in Sigmund Freud's in gen hi. Tua banah, "Mite tungah kinga deuh, thu khat peuhpeuh um baih deuhin khemnop, makai suak zolo in nautaang sem deuh uh hi," ci lai hi. (Oral stage of Freud's Stages of Pychosexual Development)

3. Zunteh ekteh lai naupang khat zunteh ekteh loh ding tawtgen in sawlzawh thu tawh ekbuk ah thasak kei in.
"Zunteh ekteh loh ding genin sawlzawh thu tawh ekbuk na paisak leh a gol ciangin tua naupang pen thu khat peuhpeuh ah ama thulo thu a sa lo mi hong suak thei hi," ci-in Sigmund Freud's in gen hi. Tua baanah, "Sianthona lamah uanglua thei, na khempeuh ah a hoihpen deih in lawm leh gual tawh kithuah thei mello hi," ci lai hi. (Anal stage of Freud' Stages of Psychosexual Development)

4. Nau na cin ciangin nau hong kap leh na zolna in ahi zong, nau na nohna in vantung lamah lawn/sing kha kei in.
Naungek' lu ngeklai ahih manin a pualam pan a kimutheilo a sungah siluangna piang thei hi.

5. Naupang kiangah ``Ka thu nong man kei leh dawi in hong man ding" cih bangin khemkha kei in.
Mungeilo pi-in thu khat peuhpeuh, na khat peuhpeuh ah hong lau theikha ding hi.

6. Naupangte mi gensiat daan, mi hamsiat daan hilh kha kei in.
Nu leh pa in naupang muhna ah tuabang na hih leh naupangte hilhsa hong suak ding hi. Tua bangin naupangte mai-ah na seploh nangawn naupangte in a kim a pam aa a muhnate tungtawnin tuabang ngeina hoihlo a seploh nading un hilh ding kisam hi.

7. Lampai kimlai naupang a tuk leh phong pah kei in.
`` Tho oo, Tho oo, bangmah ci kei" ci-in lungsim thapia in ama thu in thosak in. A thawh zawh kei leh bek phong pan in. Na khat peuhpeuh ah amah leh amah aa hanciam ding na hilhna ahi hi.

8. Naupang in khialhna khat a bawlkhak leh milak ah tawng gawp kha kei in.
Mai tai-in inn ciahpih inla a khailhna i a hoihlohnate a tel dingin hilh in. Milak ah kisuang lo-in nopsa ding hi.

9. Naupang khat a hai luat leh tua nangawn theilo ci-in simmawh bawl kha kei in.
Leitung ah ka kizattheihna/ka septheih om kei, ci-in lungneu thanem kha ding hi.

10. Naupang a pil leh zong pil lua teh..., siamlua teh... ci-in phat den kha kei in.
Siamtak kisa in kiphasak kha dingaa hanciamna hong khahsuah kha thei hi.

11. Naupang hong dot bangbang lungduai takin dawngkik tangtang in.
Na theihloh a omleh theilo ci pah lel in. Na gen theih nading na hanciam zawh zahin kansak in. A thutheihna hong khang semsem ding hi.

12. Naupang khemkha peuhmah kei in.
Sangkhak ni kimawlna ah hong paipih ning, ci napi na paipih kei leh, ka nu leh ka pa in zong hong khem, ken zong khem ning, ci ding aa khemna a hilh na hi hi.

13. Hong nget bangbang pia den kei in.
Hong nget bangbang a haksa lah hilo ci-in na piak det leh leitung ah na khempeuh olno takin kingah sakha ding uh aa hanciamna neilo ding uh hi. A kisap leh a deih uh khentel in a kisamte bek piak ding thupi hi.

14. Lungdamkoh ding hilh tangtang in.
Na khat peuhpeuh a kipiak ciangin lungdamkoh ding hilh tangtang in. Ei tungah thupha hong bawlte zahtakna tawh a hopih theih nadingun nu leh pate in zahtakna tawh hopih masak ding kisam hi.

15. Piakkhiat nopna lungsim a neih nading un lamhilh in.
Sum a thupitna hilh in. Sum bangci zat ding? Bangci khol ding? Ei sang a cimawh zawte huh ding cihte hilh in. Cimawh khat huh dingin na pai ciang tonpih in.

16. Tate cih bangbang a pia pahpah, a sepsak pahpahte nai-ah omsak kei in.
Tua daante nai-ah na omsak leh amau zong hong eng ding uh aa na khat peuhpeuh a thupitna thei lo-in amau utdan bek in hong gamta nuam ding uh hi.

17. Amau tawh kisai thu khempeuh ah kihel den kei in.
Na nuntakna ah haksatna na kantan ziate hilh in. Na khat peuhpeuh ah amau ngiat phusak in. A phut zawh vetloh haksatnate bek ah huh in. ``Lelhna in zawhna ding kalmasa" ahih lam theisak in.

18. Pi leh pute a zahtak siam theih nadingin hilh in.
Nang ngiat in na nu leh na pa na zahtak leh na tate in a pi, a pu, a nu leh a pa hong zahtak pah ding hi. Hun ngah kalkal in pi leh pute kiangah hawhpih zeel in. Pi leh pute tawh hunnuam la aa a kimawl hun ding uh pia in. Milim khatpeuh tawh a kimawlmawl uh saangin manpha zaw ding hi.

19. Na nuntak khuasak zia/na tuahkhak thute gen tangtang in.
A zenzen in mi nuamsa, mihau inn pan a khangkhia na hih leh na nu leh na pate nuntak khuasak zia, sum zon paai zon zia cihte gen in. A zenzen in a haksa, gentheih haksatna pan a khangkhia na hih leh zong na gentheihzia, na tuahkhak thu, haksatna na kantan zia cihte gen tangtang in. Tua hi leh nuntak zia tel ding uh a, kiniamkhiatna, mi hehpih theihna nei ding uh hi.

``Tate pen pate' gamtat hi a, nute' kampau hi".

Ref :
Gandawin Magazin
Mental Health Nursing Text Book

Source :

Hau Lun -> Na Dam Nuam Hiam?


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Mikim Theihhuai Lungsim Pumpi Cidamna Tawh A Kituak Naupang Pattah Zia. Agelh – Sianu Vung Hau Lun Description: Rating: 5 Reviewed By: Cinpu Zomi
Scroll to Top