728x90 AdSpace

Hot
Menu
Zon-ol na Donate

Latest News

Tonzang Khua Tangthu.

Tonzang Khua Tangthu


 A sunga om Thute:
      A.   THU PATNA
      Khua Omna Mun 
Lei Lupzia
A Zaina leh A Saanna
Kizopna Lampite
Mualsangte
Gun leh Luite
Khuahun
Lo Khawhna
Singkung Lopate
A gah kine thei kungte:
A teh, a paak, a gui kinei theite:
Innsing (khuam leh singpek) ding a kizang theite
Innlamna-a kizang theite:
A nim den singkungte:
Paak tuamtuam
Gamsung-a po-tawm paakte:
Inn-a kiciing tawm pakte:
Ganhingte
Innsa:
Gamsa:
Vasa nam
Zusa nam:
Awmtal, leivak nam:
Miksi kauphe nam:
 Khuai nam:

           A.   THU PATNA
Khua Omna Mun
Tonzang khua pen Khamtung Gam (Chin State) leilu lamah om a, leitung gamlim ciaptehna-in ci lehang Leilu lam latitude 23½° (Tropic of cancer) leh Nisuahna lam longitude 94° kituahna mun pawl ahi hi.  Tonzang gam (township) kigamgitpih khuagam (]rKdðe<f) te pen nisuah na lam ah Kalay leh Tamu, leitaw lamah Tedim, nitumna lam ah India gam Assam State leh Mizoram State, leilu lam ah Manipur State cihte ahi hi.

Lei Lupzia
Khua omna mun pen khamkhai hihiai a, nisuahna khuakhung lam pan nitumna khuataw lam ah niam suksuk hi.  A khua pen leilu leh leitaw kidungphah hi.  Khuakhung lamah mualsang vive kikhung hi.

A Zaina leh A Saanna
Tonzang khua a zaina 1 sq.mile hi a, khuagam (township) bup a zaina 1360.36 sq.miles ahi hi.  Tuipi maitang (sea-level) pan pi 4,739 sang hi.

Kizopna Lampite
Tonzang-Tedim mawtaw lampi tai 26 sau a, Tonzang pan tai 3 a gamla Tungtuang khua kinawk hi.  Tuk leh khal nuam takin kipai thei hi.  Tonzang-Cikha mawtaw lampi zong om a, Tonzang pan Tuitum ciang tai 2, Nakzang ciang tai 7, tua pan Cikha ciang a kigawm tai 60 kiim pha hi.  TedimTonzang-Cikha lampi pen Mangkang hun lai-a kisial hi-in Imphal dong kizom hi. Tonzang pan Phaitu tai 6, Phungtong tai 6 ciang mawtaw tawh kipai thei hi.

Mualsangte
Nisuahna lam ah Zopi, Singsiatvum, leilu lam ah Takheuh, nitumna lam ah Mukhuai cihte kidawk phadiak hi. Singsiatvum pen pi 5,700 sang a, Tonzang kiim ah a sangpen hipah hi.  Mukhuai mual pen pi 5,645 sangin a dawn zum ziuzeu a, a pangte ken mahmah hi.

Gun leh Luite
Tonzang khuataw pek ah Meitei Gun luang hi.  Meitei gun pen Meitei Gam (Manipur Gam) pan hong kipan hi a, Phaipi (Imphal) khua laizang pan hong luangin tua pan Thangsih khua leh Sialmei khua kikal tawnin Tonzang khuataw dong, leilu pan leitaw manawhin luang hi.  Tua pan nisuahna lam manawhin Gunkhawm (Kalaywa) sak deuh ah Myittha Gun tawh kigawmin Tuikang (Chindwin) Gun sungah lut hi.  Tonzang pan a kigal muhna, luika tunna munah Luangkual-lii a kici tuilii khat om a, a mun nopci mahmah ahih manin khangnote picnic pai thei zel uh hi.

Tonzang khuakiim ah Tuisawm, Tuizual leh Vialcian a kici lui gol thum om a, tuk leh khal tui tampi luang hi.  Leilu lama om Tuisawm pan tuitha-khuaphia mei (hydropower) kila a, Tonzang, Tuitum leh Phaitu khuate khuaphia mei kipia hi.  Tuisawm, Tuizual leh Meitei gun kituahna Naakzang kici munah mun zaangpi khat om a, tuibuh kiciingin tampi piang hi.  Vialcian lui pen leitaw lamah om a, gun tawh kituahna munah mun zaangpi mah omin tuibuh tampi piang hi.

Gasiat lui, Han lui, Kongpi lui, Suangkhai lui cihte pen mualdang zui-a luang luineute hi a, Tonzang leh Mawngmual kikal ah om hi.  Suangkhai lui pen suang lak-a luang hi a, tui vot kiuhkeuhin lim phadiak hi.  Takheuh ah bual khat omin tuk ciangin tui kipek thei hi. Takheuh dawi leh Thahpuang dawi kisim a, Takheuh dawi in a lelh teh nidang zahin tui tam zo nawn lo, kici hi.

Khuahun
Tonzang ah khuahun lumlua lo votlua lo in, nopbek tak hi.  Tuk, phalbi, khuakhal cih khuahun thum om a, Khuakhal hun a satpen laitak in 32°C ciang bang, Phalbi a votpen hun in 2°C ciang bang pha hi.  Phalbi zingsang tuungin innka tungah vuk na kiain na kaang pheuphau thei hi.  A votluat kum ciangin tuizawl dung zui-in a tawntawnin tui na khal thei hi.  Lampi dung ah tangtel tampi om thei a, hong paikhiatna mun kithei lo hi.  Khuakhal ciangin huih vot nunin khuahun nuam mahmah hi.  Ahi zongin khat veivei huihpi nung thei a, singkung golpipi puk in, innkhum khawng zong leen'khia thei hi.  Tuk ciangin meiipi in tuamcip in, sun laitak nangawn khua mial phial thei hi. Khuaphialep taang ziahziah in, vanging damdam in, kek zong kia zelzel hi.  Guahtui a tawmpen letmat 52, a tampen letmat 81 ciang bang zu hi.

Lo Khawhna
Khanglui lai-a kipan innlusi in logam a tawm pen nih leh thum kinei tek a, khat a kikhawh lai-tak in, adang tegel kihawi phot hi.  A tul ciangin adangte khat khit khat kikho a, tua kal in, a masa a lo tul pen ah singkung lopa na popo ahih manin khawhpha kik ta hi.  Tua banga a kikhelh manin logam lei hoih den in, an zong kikham hi.  Tu hun ciangin Kumpite in leicial tawh ding hong hanthawn a, Hanzang suk teng kumpi huan suak ta hi.

Tonzang lozaute lak ah, Phaipi, Sekken, Bilei, Bizang, Aizang, Khuamun, Hanzang, Bawnghu, Suangluang, Tonzang, Tualpi, Zangtawng, Khauzang, Zopi cihte minthang in, lo ciing tampi kikho a, an zong tampi piang hi.

Tonzang gam ah vaimim mah kiciing phapen, kine phapen hi. Tua ban ah taang, beli, belawi, behiang, ga, baal, kawlkai, hakai, long, manta, mehthuk, zasan, mehkha, samphok, mai, tangmai, simai, maipuang cihte pupa khang in kiciing hi.  Tu hun ciangin singmehthuk, mehnal, lo-uih san leh lo-uih kang, ankam namkim, leibe, bepum, aalu, sing-hakai, cihte kiciing behbeh hi.

Lo ah ahi zongin huan ah ahi zongin a gah nek theih ahi hai, sahawk, lengmaw, seekpi, manawi, meitei, kawlsing, singtangmai, nahtang cihte kisuan a, tu hun teh mang-kawlsing, thawhbat, pears, awza, nailungkung cihbang a nam tuamtuam kineih beh hi.

Singkung Lopate
Tonzang gam pen gamhoih mahmah khat hi a, khuakiim khuapaam gampalak pen dum diuhdeuh den hi.  Tua gamlak a po singkung lopate lakah a nuai-a kigelh teng tam phadiak hi.

A gah kine thei kungte: Hai namkim, thei, sialthei, theithek, theihia, gamsuaklu, tuaiteng, bil, mui, go, hu, langla, taat, se-kung, mawng, hongma, lingmin, samphok, nisuh, baklawng, zawngtah, bokthok.

A teh, a paak, a gui kinei theite: Tuaikiteh, pakngiam, naphui, anbong, anzang, aipak, aingek, singguithak, khaanglaang, lenmui, thaksing, lonamsia, sakol-khekhap.

Innsing (khuam leh singpek) ding a kizang theite: Ngainaw, cingsing, langvon, siasing, sialgawl, tehno, singgi, singsan, vong, bil, khuum, taak, tei, hiang, aksial, hual, zuang, lungkhap, gum.

Innlamna-a kizang theite: Gua, pumpeeng, bi, khautang, veihnamkhau.

A nim den singkungte: Mawngsing, buangsing, zamzing.
Ganhing nektheih lopa namte: Lobual, taham, lolong, lopi, phai, thalsing.

Paak tuamtuam
Gamsung-a po-tawm paakte: Tuk , phalbi, khuakhal a hun hunin gampalak ah ama' thu-a po a, gamsung a zeem, a paak zihziah paak nam tampi om hi. Tuate lakah phuitong, ngeisok, ngaingaw, vau, unok, zozam, heisa, palpi, leidi, sial-ek paak, sikha paak, laidum, tumtai, lingpaak cihte tampen hi.

Inn-a kiciing tawm pakte: Tu hun ciang-in mun tuamtuam gam tuamtuam panin pak hoih tuamtuam kila in, kiciing a, kisim zo nawn lo hi.  Ahi zongin pupa khang pek a kipan khuasung ah huang zepna, dai zepna in bi paak, gamsai paak, hainam paak, lingsi paak, thanglei paak, tedim paak, nipi paak, zan paak, singkung paak, ai paak, lengtong paak, sangpaakte kisuan hi.  Innpi-tungnung huankhang dai a kisuan paaksante bang Lungdam bawl hunteh paak zihziahin khuagal kensan khawng pan en lehang puansan kipho bangin etlawm mahmah hi.

Ganhingte
Innsa: Inn-a kikhawi ganhing lakahbawng, sial, sakol, vok, kel, ui, zawhngeu, ak cihte kitam khawi pen a, vatawt, vakhu, kii, vamim, cihte zong pawl khatkhat in khawi uh hi.  Tu lam ciangin ngasa zong kikhawi kawmkawm hi.

Gamsa: Tonzang khuakiim nai ah sakhi, sazuk, saza, sathak, ngal, zawng, ngau, ngia, se-al, sakuh, sangak, saphulip, gul, sumkuang, saham, tang cihte pawl kitam muh zawdeuh hi. Nidang in sapi a kici sahang, kamkei, vom, humpi ciang dong khuakiim ah kiman ngei zel hi.
A dang gamsa mawkmawkte a nuai-a bangin a namnam in kikhen thei hi.

Vasa nam: Akpa, vagik, vavu, valah, vaphual, vamim, vaka, thangho, liando, baibek, sihbu, huihtun, heiho, khankha, lailen, vahui, tawlawk, vabukngak, daiva, kawlgit, gitta, nahkhawk, vasingdangtu, va-ak, va-uk, puakhop, thokawlong, vabak, zawlai, langbawm, gialgiak, phialphiah, lailen, vameipalh, vasi, vataak, valawi gawlgek, keisiing, simbu, khawhkhel, kipi, kimau, khu-eu, khu-un, musi, muvanlai, pengpelep.

Zusa nam: Zutang, zuhei, innzu, sansip, zulei, thete, bui, tangteuh, ciikpi, thankik, thaithek, sa-vokphual.

Awmtal, leivak nam: Gulngawngsan, gulha, mualtan, gulvankah, sokpuang, sokval, thangtom, tangtel, liit, lungme, lungkhaap, sakhi-lunggam, hap, tangngol, phual, ballung, gualung, toktol, leihik.

Miksi kauphe nam: Tanai, huanghua, mikvom, miksisa, lingkhaw, miksitawdel, miksisan, kauphe, sialkhum, dumde, tengte, vansial, khuangbai, cimci, siko, kau.

 Khuai nam: Khuaivah, khuaidawk, leikhuai, zawngkhuai, khuaitaangdep, khuaipi, khuaikai, tunpi, ngaltun, ngalthen, zanta, khuaithum, khuaimu, innciingkhuai, khuaipi tawlnga.
Source :
Tonzang Jubilee Laibu
Khenpi I : Tonzang Tangthu

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Tonzang Khua Tangthu. Description: Rating: 5 Reviewed By: Cinpu Zomi
Scroll to Top