728x90 AdSpace

Hot
Menu
Zon-ol na Donate

Latest News

ISREAL PRIME MINISTER BENJAMIN NETANYAHU TANGTHU TOMKIM.

ISREAL PRIME MINISTER BENJAMIN NETANYAHU TANGTHU TOMKIM


Benjamin Netanyahu pen October 21, 1949, in Tel Aviv, Israel ah piang a, Jerusalem ah khangkhia hi. Unau 3 sung panin in a milai pen ahi hi. 1956-58 leh 1963-1967 sung a innkuan un Cheltenham Township,Pennsylvania, U.S. ah teng uh a, Cheltanham ah sang kahin, tua lai mahah graduate hi. A high school kah lai a kipanin thu kiselna [debate] ah kihel uuk mahmah in, tu dong Philadelphia awkaih mangpau in pau lai hi. Kum 13-19 ahih sung a taw zaw a pa, Benzion Netanyahu' sepna Philadelphia, US ah om hi. A pa pen tua laiah history professor sem hi.

A graduate man khit1967 in Israel ciahkik nawn a, Israel Defense Forces ah elite unit "Sayeret Matkal" a kici ah sem hi. Galdona tuamtuam ah kihel in, 1967 kum a Sabena passenger jet (vanleng) mi 571 tuanna,Tel Aviv ah kihijack suahtaksakna ah Prime Minister lui, Ehud Barak makaihna nuai ah Codename "Operation Isotope" pawlah zong kihel hi. Tua ah a liang thau in kap kha in liam hi. War of Attition kici [cross border assault raids] 1967-70 sungin zong kihel a, tua a pan a unit uah team-leader in a za khang hi, Operation Inferno [1968] ah zong kihel hi.Politics lutna:Netanyahu 1972 kum in Army Service a zawhin US ah paikik a, architecture leh business administration degree Massachusetts Institute of Technology ah ngah hi.


1976 in Boston Colsulting Group ah sem a, a upa Yoni, Uganda gamah Air France airliner hijack suahtakna ding ah a va kihelna ah va si ahih manin Israel ah ciahkik hi. October 1973 in Israel a ciah khit in Yom Kippur War ah Sayeret Matkal commando unit ah sem a, Suez Canal ah Egyptte tawh kidona ah kihel in, tu dong a kiselcip [classify] Israel commando te makaih in Syria gam va lut pih hi. Tua khit apat Counterterrorism ah nakpi takin kihel a, tua in a political background ding lampi kipatna ong suak hi.

Washington D.C. a om, Israel Embassy ah 1982-84 sung sem a, tua khit 1984-88 sung United Nations ah Israel ambassador sem kik nawn leuleu hi. UN ah a sep sungin Nazi War Crimes thuguk lai [archives] tampi ong pholak/declassify khia hi.Politics lamah a lawhcinna:1988 in Netanyahu pen Knesset ah (Israelte' parliament) member dingin right-wing Likud Party te'n telcing uh a,deputy minister for foreign affairs ah ong sem zom pah hi. Kum nga khitteh Likud Party chairman dingin cing kik nawn in prime minister candidate dingin za ong ngah hi.1996 in PM dingin telcing in ong om a, tua ah PM Shimon Prez [Labour candidate] zo hi.

Netanyahu in 1999 tan PM ong sem to in tua hunah Hebron and Wye Accords te sign in Palestine tawh kilemna ding 'Peace process" lampi ding ong pan hi. A term sungin government privatization, liberalized currency regulations and reduced deficits cihte ah nakpi takin pan la hi. Knesset Kitelna (election) ah a commander luipa Ehud Barak zo lo ahih manin kitawp (resign) a, tua khitin Private sector ah semin, private circuitte vehna nei kawikawi hi. Ahih hangin 2002 in politics ah ong lutkik nawn a, Minister of Finance a cin ma sungin Minister of Foreign Affairs ah ong sem kik hi.

March 31, 2009 in PM a nih veina dingin ong cingkik nawn leuleu hi. Tua a PM kiciamna a neih khit a thugenna ah gam kipumkhat na ding leh galvan tawh a kivaihawm lo, Israel gam a om a sang thei, Palestine a om ding deihna nakpi takin gen hi. June 2009 in Bar-Ilan University ah a thugen..." President Obama' kiangah Palestine gam in galvan zat khawlsan/nusia in, Israel gam pen Jewish state in namkip ding a ciam a, a thukim ding leh kilemna taktak om thei pan ding hi" ci'n gen hi.

Iran Nuclear Program a deih lohna: Netanyahu in P5+1 [ U.S., Russia, China, France, England + Germany] gamte leh Iran in Nuclear Deal thukimna ding a vaihawm na hang un United States tawh November 2013 a patin kitelsiam lohna nakpi takin ong nei uh hi. Netanyahu in U.S. leh Iran in nuclear deal a thukim ding uh deih lo hi. Hih nuclear deal pen Iran in gamdang tawh sum leh pai, galvan leh adang dang kizop pan gakna {Sanction} a neihna pan khah kolna leh beisakna dingin Nuclear galvan bawlna dingin a kizang Uranium a bawl (enrich) pen a tawmsak (reduce) ding hi ci hi.

Netanyahu in CNN thukante kiangah "hih deal pen khangthu- ah khialhna lian pen [biggest historical mistake] hi ding hi" ci'n deih lo hi. Tua banah "hih nuclear deal pen kizepna a bang lel hi a, Iran in nipi kal tawm khat sung khit teh palsat/nusia pah lel ding a, kumtampi tak a kibuaipih Iran tungah gakna [sanction] sutna suak lel ding hi" ci'n nial hi. Netanyahu in "Iran tungah gakna khahkol in om leh Iran in nuclear galvan bawlkik nawn pah ding uh a, Iran in nuclear nei leh Israel bek hilo in leitung pumpi a dingin lipkhap huai hi" ci hi.Gaza buaina:2014 nipilai [summer] a patin Middle East ah buaina ong kuang leuleu in, Israel tangvalno 3 Palestine Hamaste'n ong that khit ua pan Israel in zong Gaza a Hamaste' hatna leh bukna munte ong kap zialzial uh hi.

Leitung in Hamaste' rocket kap leh Israel in vanleng tawh Gaza ah bomb a khiatna hangin mipi nautang, numei, naupang tam si lua ahih manin in mawhsakna ong pulak kawikawi uh hi. Tua hunin Netanyahu in a cabinet minister 2 kumpi nasepna a gensiat manin tawp sak a, a coalition paliament phiat [dissolved] in kitelna 2015 March kha in neihpih kik hi. A cinkik thubuai:Netanyahu in March kha a kitelna ah Isaac Herzog' i Zionist Union Alliance te zo kik hi. Ama' party [Likud Party] in parliament [Knesset] ah tutna 30 ngah uh ahih manin Party teng lakah tam pen ahih manin kipawlkhawm [coalition] government makaihin PM dingin cing kik hi. Kitel ma-in Netanya in Arabte tuam bawlna in thugen, Palestine gam om sak loh ding hi ci'n a genna hangin Israel vote tampi ngah hi ci'n a langte'n mawhsak uh a, leitung gam tuamtuamin zong mawhsak uh hi. Ahih hangin a cin khit teh a thugenna ah gam nih [2 state solution] pen sabuai ah om lai hi ci'n gen kik hi.


Netanyahu' zi pen amin Sara hi a, naupang lungsim lam siavuan [child psychologist] hi.Ta 2 - Yair leh Avner, nei uh hi. A zi masa [1978 a a kikhenpih] tawh tanu khat nei hi. Laibu zong a tuamtuam gelh a, terrorism tawh kisai tam gelh deuh hi. A laibu gelh pawlkhatte - Self-Portrait of a Hero: The Letters of Jonathan Netanyahu (1963-76); International Terrorism: Challenge and Response (1979); Terrorism: How the West Can Win (1987); A Place Among the Nations: Israel and the World (1992); Fighting Terrorism: How DemocraciesCan Defeat Domestic; leh International Terrorism (1996). Netanyahu Israel Prime Minister dingin 4 vei kitelcing ta a,David Ben-Gurion cin zah tawh kikim ta hi. Ahih hangin 3 vei kizomin Israel' khangthu ah Prime Minister cing masa pen hi lai hi. Israel khangthu PM sawt sempen ahi David Ben-Gurion zom amah ahi hi. A term a tawp dong a sep suak leh Israel PM sawt sem pen suak ding hi. Netanyahu pen Israel gam a piangkhia PM masa pen hi lai hi.

Source :
MangTe Buansing

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ISREAL PRIME MINISTER BENJAMIN NETANYAHU TANGTHU TOMKIM. Description: Rating: 5 Reviewed By: Cinpu Zomi
Scroll to Top