728x90 AdSpace

Hot
Menu
Zon-ol na Donate

Latest News

VANLENG TANU TAANGTHU

VANLENG TANU TAANGTHU



Nidanglai in Unau pasal nih a om ua, ki-it in a kingai mahmah uhi. A hohna peuh uah ki nusia, ki khentuam chih omlou in a ki zui gige uhi. Nikhat gam hongvaak in mun tuamtuam a hon tawn kawikawi uhi. Luidung khat a honzuih ua leh Nahpa san kelkel tuiluang in hon tuah a mu ua, hoihsa tuak mahmah uhi. A melpuak, a san kilkel dan khawng a etchiang un hoih asakna uh behlap hi. Inn lama hongpai in a Nu uh kiang ah, “Nu aw, hiai nahpa banga hoih mi a om diam?” chi’n a dong uhi. “theikei na’ng e maw bawite, na Pa va dong mah dih ua, aman ana theikha hiam” chi’n a Pa dongdi’n a sawl hi. “Pa aw, hiai nahpa san kelkel banga hoih mi a om diam?” chia a dotnawn ua leh, a Pa’n “ke’n leng thei kei na’ng e, hiai a kongpi tung a khaukhek deldel na dong mah dih uh” chi’n a theihkhak louh thu mah ana hilh hi. “Kongpi tunga khaukhek deldel, hiai nahpa banga hoih mi a om diam?” chia adot nawn chiang un, “Om na tham kei ding hiam, Vanleng tanu melhoih mahmah a om” chiin ana hilh hi.


Unaute leng a thu theihnop uh thei ta, hichi bang mihing om ahihleh chi’n hon lunggulh pansim ta uhi. Nidang a ki it, ki duat mahmah himah le uh a lunggulh uh leh a tup uh hong kibangta ahihman in hong ki ngeihkei pian simta uhi. Nikhat a U pen in a naupa  kiang ah “Tulaitak in bang na ngaihtuah a, bang hih na ut pen a?” chia a dot leh, a Nau in “Ka tuktum belta chia pha henla, vaphualmei palpek tot in Vanleng tanu hel in kuan leng ka chi” a chih tak in  a upa heh mahmah in “Ka tup bangbang na tum”  chi’n Sialbuan chin Buannawi lak ah sawnpai zok in amah Vanleng tanu  heelding in akuan ngal hi.

Lampi a hongpaipai a, gamla lawlou hongtun takin Zawng ten sum a na suih (bawl) laitak uh houh tuak kha hi. ‘Pu aw, koi a hohdek na hia?’ chia zawngte’n a dot ua leh “Vanleng tanu heelding ka hi” chi’n a dawng hi. Zawngten leng ‘Vangleng tanu heelding na hih leh ka sum suihlai hong suihpih in, na tong na zaam thei ung” achih ua leh “Bang tong bang zaam theikei uteh” chi’n a sumsuih lai uh akhuk mangsak a, paisan laulau hi. Mabaan sawn a hongpai zel in lampi khat ah Gul thaang a awklai hontuak kha nawn hi. Gul in mipa ana muh takin “Pu aw , koi a hohdek na hi hiam?” chi’n ana dong hi. “Vanleng tanu heelding a kuan ka hi” chi’n a dawngpah hi. “Vanleng tanu heelding na hihleh hiai ka thang awkna a pan hon suutdih ve, na tong na zaam thei ing” chi’n a ngen hi. Himahleh ama’n, “bang tong bang zaam theikei teh” chi’n khih gaak beh zawmahlai hi.

Mailam nawt in hongpai zel a, bangtan hiam hongpai nawn nung in lamnawl ah Gitta-hon tuiching lai ahon tuakkha nawn hi. Amau leng ‘Pu aw koi a hoh di na hiam?” chi’n ana dong uhi. “Vanleng tanu heelding a kuan ka hi” chi’n a hohna ding a hilhnawn hi. Gitta te’n leng “Eh! Vanleng tanu heelding na hihleh ka tuichin honchinpih phot in, na tong na zaam thei ung” chi’n a chial uhi. Himahleh malam a chialna te a pomlouh mah bangin tu’n leng ‘Bang tong bang zaam theikei uteh” chi’n a tuichin lai uh khaksak in a paisan laulau nawn hi.

Hongpai zel a, a tawptawp in khawmual hongtung ta hi. Khawmual ah Vanleng tanu  singpua toh hong kituak kha uhi. Vanleng tanu in “Pu aw, koi a hohdek na hi hiam?” chia a dot leh “Vanleng tanu heelding a hong kuan ka hi a, a inn uh  koisan hi a, a lampi koisan hi hiam honhilh dih ve” chi’n a dawng hi. “Ahihleh, hehpih in ka chiangkhun ding honsaat sak ve” chi’n a ngen hi. Aman leng chiang kawi lenglong khat sui mengmeng in a pia hi. Vanleng tanu in leng lampi saulam a kawkmuh a, amah lampi nailam ah a pai mengmeng hi. A mel uh kithei tuah nailou ahihman un lampi tuam tuak a ki khen in Vanleng tanu tuh inn ana tung masa zaw hi.

Vanleng tanu in innka tung ah siam ana gan a, lengla neiding chiin ana kisa khol hi. Mipa leng khawmual a hong tung ta a, thalpi hon lawn ta hi. A thalpi  lotpen  Vanleng tanu kiang a va tung geih hi. Vanleng tanu in a singpuaka theisa ahiman in tua thalpi tuh kuaigawp vek in innkhang buannawi lak ah a sawn tum suk hi. Mipa leng Inn hong tung petmah ta a, luutphei in Vanleng tanu kiang ah “ka thal lot nana mu hiam? Chia a dot leh, aman “Na mu mah ing ei, Naupang te a ka sa a ka kuaigawp a buannawi lak ah ka sawntum ta ve” a chih san hi. Vanleng tanu in “Ahihleh zinpa bang hihdia hong na hia ?” Mipa’n “Luidung ah nahsan kelkel kamu a, hiai bang mi a om diam chia ka dot leh, Vanleng tanu a om lam honhilh ua, a heelding a hong kuan ka hi” chi’n a dawng hi.

Vanleng tanu in “Kei heel dinga hongkuan na hihleh sa bangchiah a lian k’on goh dia, zu bang chiah a lian in ko’n luup dia le” chi’n dong nawn hi. Mikhual pa’n “Tuan-a tang-a Uzaw voktal ha-paak leh zu belpi sumpha hilou di hiam” chi’n ki liansaktak in dawng hi. Vanleng tanu in amah chihlouh dan tak in zu beltung geiheek leh voknou busi hon thah hi. Mikhual pa’n hon neek tak in khamzou lou kisa in haampheng buuk ah gilkial kisa in a lum dekdok hi.

Ni tum kuan hong hi a, a Nu leh Pa te leng hongtung ta uhi. A tanu kiang ah “Zinpa zu na luup hiam, sa na goh hiam?” chia a dot chiang un “Zu lah luup ing, sa lah goh ing haampheng buuk ah gilvah in lum dekdok hi. Nu leh pa te’n “Zinpa, bang hih dia hong na hia?” chia a dot ua leh, aman, “Na tanu uh heldia hong ka hi” chi’n dawng hi. “Huchia ka tanu uh heel a hongkuan na hih leh ka geente na hih theihvek poimoh masa ding. Ka inntung peek abul leh a leek thei inla, ka sing tuklah tu inla, ka khi anu-apa thei inla, ka taangchi um dimlou dimsak inla, ka nahtang ziik dohlah dokzou inla, ka kong a suangpi kimai tuah sak inla, tuinaak pot sak in” chi’n a thilhih ding tampi genkhum ta hi. Zinpa(mikhual) hong kipan a, theihtop suah in pang mahleh bangmah hih zoh, hih theih, neilou in hong lohsam dimdem hi. A lohngaihna theituanlou ahih chiang in innlam ah a hong thawnkik nawn maimah hi.

Inn hongtung ta a, lohsam sa a hong tung ahi chih a naupa’n a theih chiangin, Vanleng tanu heelding in a hong kisa kheta hi. Lampi a hongpai leh a Upa’n lampi-a a tuah bangbang zawng sumsui lai a hontuak pah hi. “Pu aw, koi a hohding na hia ?” chia zawng te’n a dot uleh “Vanleng tanu heelding a kuan ka hi” chi’n dawng hi. “Vanleng tanu heelding na hihleh ka sumsuih hon suihpih phot in, na tong na zaam ka thei,” a chih uh leh aman leng a sumsuih uh suihzoh pih pah hi. Huaitak in Zawngte leng kipak mahmah uh a, mipa tuh honzui pah uhi.

Lampi ah hongpai zel ua, saulou a hongpai nung un Gul thaang a awk hontuak kha uhi. Gul in “Pu aw, koi a hohdek na hia?” chi’n na dong a, Mipa’n , “Vanleng tanu heel dia hongkuan ka hi” chi’n dawng pah hi. “Vanleng tanu heelding na hih leh ka koltaanna a pan in hon suutkhia in, na tong na zaam thei ing” chi’n Tangvalpa tuh a na ngen hi. Tangval pa’n leng tua Gul thaang awk hon sutkhe pah a, Gul inleng a zui pahngal hi.

Hongpai zel ua, lampi gei ah Gitta-hon in tui a na chinlai tak uh ava tuakkha nawn uhi. Midangte dot bangngei in “Pu aw, koi a hoh ding na hia?” na chi uhi, Aman “Vanleng tanu heelding a kuan ka hi” chi’n dawng hi. Gitta te’n “Vanleng tanu heel ding na hih lehleh ka tuichin uh hongchin pih in, na tong na zaam thei ung” ana chi uhi. Mipa’n leng a tui uh baihlam tak in a chin zohpih pah a, ma hon sawn in hong kizui nainai nawn uhi. Lam saukhop hongpai nung un Vanleng tanu te khua hon naih mahmah ta uhi.

Khua a tundi kuan un, Nungak melhoih tak khat singpua in ana om hi. Vanleng tanu ahihlam kuamah in a theikei uhi. Hichi’n ana chi hi, “Pu te aw, koi a hohding na hi ua?” Tangval in leng Vanleng tanu heelding a kisa ahihlam a hilhpah hi. Singpua nungak in “Vanleng tanu heel ding a kisa na hihleh hehpihtak in ka chiangkhun ding honsuih/saat sak malam ve” chi’n a ngen hi. Tangval inleng chiangpum tang zitzet hoihtak hoihtak khat a suihsak pah hi. Nungak nu’n kipahthu gen in “hiai lampi zui le-uchin” chi’n a paina ding uh lampi, gamla lam a hilh hi. Amah lampi nailam a pai in Tangval te sang in innka a na tung masa zaw hi. Inn a tunphet in innka tung ah siamgan in ana om hi.

Tangvalpa leh a lawite khawmual a tuntak un tangval pa’n thalpi a hon lawn hi. A thalpi lot, nungak Vanleng tanu siamgatna kiang ava tu hi. Nungak nu’n leng lapah in sathau anuh zol hiuhheuh a bichingkawm ah akoih thiinthien hi. Tangvalpa leng a lawite toh inn hong tung ta ua, nungak kiang ah “ka thalpi lot nana mukha hiam?” chi’n a kanpah hi. Nungak in, “Mu mah ing e, naupangte’n ahihse kha ding chih ka lau a sathau nuhzawl in bichingkawm ah ka keem hi” chi’n a dawng hi. Nungak in, “Zinpa, ahihleh bang hihdia hong na hia?” Tangval in, “Vanleng tanu heeldia hongkuan ka hi” chi’n dawng pah hi. “kei heelding a hongkuan na hih le zu bangchiah a lian hon lup a, sa bangchiah a lian hon goh ding ka hia le?” chia adot chiang in, tangval in “Kipak lua ing, eibang nauzaw, beeltung geihek leh vok nou busi hon goh le chin leng a hun lawding” chi’n a dawng hi. Nungak in zu belpi sumphah leh voktal hapaak hon that a tangvalpa vah tak in nesak hi. Huchiin denchiang a nu leh pa hongtung chiang ua a dot ding teng uh leh aman a dawnna ding teng hoihtak in hilh hi. Tangvalpa leng an a nekkhit tak in hampheng buuk sung ah gilvah kisa in lum el-al hi.

Nitum ding kuan, khawmui kai zilzial ta chih dingin Vanleng tanu Nu leh Pa te loukuan hongtung ta ua, a tanu kiang ah “Zinpa, zu na lup hiam, san a goh hiam?” chia adot ua leh “Zu lah lup ke’ng sa lah goh ke’ng hampheng buuk ah gilkial in lum dekdok” chi’n dawng hi. Anu leh ps te’n lamdang sa a a et ua leh tangvalpa gilvah kisa in hampheng buuk ah lum ial-ual hi. Tangvalpa hong thohkhiak chiang in inn nei nu le pa te’n “Bang hihdia hong na hiam?” chi’n dong uhi. Tangval in “Na tanu uh heldia hong kuan ka hi.” Inn neipa’n, “Ka tanu uh heeldia hong kuan na hihleh: ka tuang peek, abul leh aleek thei in” hon chi ta hi. Tangval pa’n en vengveng ahon genleh, “Dik e, dik e” chi’n ahihleh , ka khi anu leh apa thei nawn aw le” chi’n innnei pa’n gen nawn hi. Tangval pa’n tua khi, anu leh apa hon gendik nawn hi. Inntek pa’n “Dik nawn e, tu’n ka lou a, sing ka tuk lah tu nawn awle” honchi nawn ta hi.

Tangvalpa leng hong kipan pah a, sing honsaat keuhkeuh hi. Vanleng tanu in innka leek a kipan in tangval panpih tuding in huih ana sam heuhheuh hi. Anungzui, zawng honte leng hong kipan ua, singleek a kalin, sing kahiang honluai noihnoih uhi. Huchia hong pankhawm tak in sing tuh hon zuukpuuk thei khong uhi. Inntekpa’n adang sepdi honpe nawn leuleu a, “ka nahtang ziik dohlah dok nawn mah di le” hon chi nawn hi. Tangvalpa hong kipan nawn a, gul in aleek apan pan sukin abul hon petta a, huchi’n baihlam tak in in tangval pa’n hon dok khe theipah hi. Intel pa’n “ka tangchi-um dimsak nawn aw le.” Tangvalpa hong lungzing mahmah ta a, tangchi-um dim loudimsak dingdan theilou in hongkuun ngeungau hi. Tualai tak in Gitta atonpih te’n “Ken lah muampheng” chi’n hon-sekhe phangphang uhi. Baihlam takin hongdim pah ta hi. Inntek pa’n atawpna dingin “Ka innkong ah suangpi kimaituah sakin la, tuisam pawtsak in, ngasa leng omsak in” chi’n nasep ding khat hongen nawn hi. Vanleng tanu in a tun tung ua a hihdidan bangkim a hilhsa a hih man in haksa louhial in honhih zounawn zel hi. A lawm tonpihte’n mangbatna leh panpih ngaia a om lai ua awlmoh taka a panpih mahin a nnasepte kouzaan huaitak in a lawmte panpihna mah in a zou ziahziah thei hi.

Inteekpa’n phal leh phallouh thu hita lou in a tanu a khak khiak hong ngai ta hi. Nungak leh tangval te lah a kimuh uapan kingaituah sim pah uh ahihman in, kitenna hon bawl-sawm ta uhi. Singtangpa daan diktak bang in gan hon-goh ua, niikten puansilh, sathau buuk, tu-zat hei-zat, a kendia kilawm teng hon guanta uhi. Tangvalpa le vanleng tanu toh kingai takin a zotna ding innlam uh zuan in hong kisa ta uhi.

Lampi sautak hong pai in, lamkim di khawng hongtung ta ua, hong kingaihtuah in, vanpuak teng bangbang hi hiam, mangngilh, puakkhak louh bang a om hiam chih ahon ngaihtuah thakthak chiang un, sathau um, a nute’n puakdia a koih sa uh a puakkhak louh lamtak uh hontheita uhi. Lakthak louh theihlouh hi a ngai in a pasal in, “Kei, a la ding in kava kuan ding a, ka hong tunnawn ma a na omna ding hiai singleek ah tau(omnang) k’on doh sak ding. Banghiam chia Tomi gahawngsiip ahongpai a, gahawng hong buaka ahihleh leng nana om kinken ding a, hon houpih a, kum ding a hongen lehleng, na ut het kei ding a, na ngaihsak hetkei ding. Kei ka hong tun ma-tan, hongtung haklou nading ka hi” chi’n sathau um lading in a kuanta hi.

A pasal genkholh bang in Tomi gahawngsiip tuh a tuanna singkung nuaitak ah gahawng bua in a hongta ngeimai hi. Nisa in a salh ziak a Vanleng tanu lim, leilak a kilang hon mu a, khi leh tau bun a hoihtak a kizeem hon muhtak in hoihsa lua in amah bangmah bun lou, lamdang satak in singbuk ah hong laamta hi. “Ka liim in khi ok biubiau, tau bun biubiau keimah bangmah tohlawhke’ng, ak nge talta tohlawh ke’ng,  honchih a leh Vanleng tanu in “Nang liim hi kei e, kei lim hi e” awl a a chih leh  Tomi gahawngsiip in aw ging za sim, lah zalou sim in tunglam entou loplop a, kuamah mu lou in honglaam non leuleu hi “Ka liim in  khi ok biubiau , tau bun biubiau keimah bangmah tohlawh ke’ng khangkha khiai khiai kasu van ah leng” hongchih non leh Vanlengtanu kideekzou nawnlou in “Nang liim hi kei, kei lim hi e” hon chih nawn leh a aw ging ngaih deuh kha ahi ding a, Tomi gahawngsiip in awging hon za ta hi. Singleek en a hong daktouh leh Vanleng tanu hon muta hi. “E he, lawm, ei vualngaih ei phaingaih laitak bang achia huai a nang kia a na tuang na hia? Hongkum in hongkum in kipawl ni e” a chi hi. Vanleng tanu in “kei ka pasal in kumkhe hetlou in na om kinken in honchi a hi” chi’n a dawng hi. “Na hong kum kei a leh singkung honphuk ding ka hi” chi’n a khutsiik in singkung hon sat keuhkeuh hi. Vanleng tanu in lau lua in “K’ong kum ding, k’ong kum ding, hon phuk ken” chi’n Vanleng tanu kumsuk tottot hi. Tomi gahawngsip in lawmbawl pah in “Lawm hik kiet sak tuah ni aw, ka lu a thak lua a, keia I en masa dia huaizoh chiang nanga” honchi daldal hi. “Kei ka nute’n hon etkap sak ua, tua zaw hiknei nawn lou ka hi” chiin Vanlengtanu in hon nial hi. “keia hon etsak himhim in in” chiin Tomigahawngsip in asawl teitei hi. Utlou sasa a honet paat kiangkiang leh asamkawm ah, mihinh ngeina dana omngei lou, lungmul lianpipi hon mu hi. “ka lau , ka lau” chiin hong kikou khe vomvom hi. “Bang achia lau na mai zeena, a hihleh nanga en zaw maini aaw le” chiin Vanlengtanu-a hon hon etsak teitei hi. “lawm hiai ah, amii neuchik khat san chiichiai ka mu, na siikphim honla in ko’n philkhe ding” A naak phil deuh chiang in “Lawm, analua, I khawl tamai ding” chiin Vanleng tanu in a ngen zel hi. “Ka phil khe dek, khawl in, khawl in chiin alu hondawt vangta hi. Vanlengtanu in na salua in hong kikou khia a, atawp in thuakzou nawn lou in hong sita hi.

Tomigahawngsip tuh Valengtanu taute, khite leh aki zepna vante a kizeem mengmeng singkung ah akal tou zotzot hi. Tautunga tuang in Vanleng tanu mah bang in ana kibawl hi. Tuanung sawtlou in a pasal hongtung tangei a, a zi hon et veng veng chiangin kibang salou sim in “Ka zi na hi kei, na mit mul s sau lua, na mit khuk leng athuuklua” honchi hi.m tomigahawngsip in “I mit mul asau in, akuak lengathuuk nakei ding hiam, I hon etetna a, I mutmul teng leng saugawp, I mitkuak leng thuk gawp” chiin siamtak in hondawng hi.

Houlim kawmkawm in hong paizel ua, akhua uh tungdi kuan hong hita uhi. “ka zi na hih taktak le ka uital zuiin la ka innah lut in” honchi ta hi. Uital toh kizui in innlam zuan in hongpaita ua, khawsung honglut tak un, a innveng te un zu analup ua, sa ana ne uhi. Uital leng kilawp takin, innlam don nawnlou in, saneek, zulupnamun ah a tuaklut pah lian hi. Tomigahawngsip in leng a pasalte innding sain, uital a zuilutpah geih hi. Apasalte inn ahihlouh lam hontheih takin kisuanglah lua leh zum seluain”TUni ka ka lam haih dan lawmlawm, kha khiai khiai kasu van ah leng” hon chikhe phong hi. Huaitak in apasal muanmoh na uang semsem hi.

Muangmoh I bang hita tawk lehleng, theihchetna taktak neilou ahihman iin, nupa kituakte bangin a gamtatna tang ua kizui in hong kithuah tou zel uhi. Lou bang kuankhawm zelin nna semkhawm zel uhi. Huchia sunchiang a nnasem a a pawtkhiak kal chiang un, khekhuan taw a uumliang kawi khat ki kawih sung a pan in Vanleng tanu hong pawt khia a, innsung niinte hahsiang in “Tomi gahawngsiip gamtatna lawmlawm” chi’n abuaithei mah mah hi. Nibangzah hiam innsung hahsiang a hong gamtat tak in innveng te’n lamdang sa in a pasal kiang ah, lou na kuankhiak kal chiangua inn sunga mi khat gamtang gige om ahi chih hon hilh ta uhi.

Nikhat tuh apasal inTomigahawngsip kiaing ah”Nang loou vakuan inla, tuni ke’n inn kana ngak ding” chiin amah innngak ding in om hi. Paulou hial in uanpi kawm ah sunkala gamtang gige pen taang diingin hong ki ihmut khembawl ta hi. Ngeina dan bangin Vanlengtanu leng, miteng gamkuan khinta uh chiin ummkawi sunga pan hongpawt khia in, innsung hahsiang dingin hong kisa ta hi. A pasal in ana en-gu giugiau a, a zi Vanlengtanu mah ahi chih atheih takin hon man belh chot hi. Vanlengtanu in “honkhah in na, honkhah in, na zi hilou ka hi” achih hangin “Ka zi na hih k’on theisa” chiin khah ut hetlou hi. Atawp in Vanlengtanu in leng “Na hon it taktak leh na zi, Tomigahawngsip, khahkhe phot in” a chi ta hi. Huchi’n a pasal inleng a hon khahkheta a, maban omdiniog dan a ngaihtuah hi.

Nikhat a pasal I Tomigahawngsip kiang ah “tuni zaw inn omphot ni in kisilsiang in, sampeuh I hiat dia, khawl tawldam phot ni” chi’n inn omni in hon zangta uhi. Tomi gahawngsiip theihlouh in a pasal in innka nuai ah a samsih honkhia hi. Eh samsih ka kesak kha, vatawm zual mah dih” a chi hi. Tomi gahawngsiip leng samsih tawm dingin a kumsuk pah a, hongkiheizual leh apasal in tempi zuma sundia kisa lai hon mukha guih hi. “Eh, lah n’on sun dek a” a chih leh “Honsun dek hiken’g e, sa hileh chin ka siam chi na hiam chi maimai ka hi” chiin suanlam a bawl hi. Samsih tawm di’n hong kuunsuk nawn a, tuaphet in a pasal inleng teipi zum in a sunsuk ta hi. Tawmi gahawngsiip sihsual a kipek in, innka khuamkhawng a peek tol lemlum zou hial hi. A hong sita a, innkiang ah saisuang in hongpou ta hi.

Vanleng tanu leh a pasal hong kiteng ta ua, nuamtak in hong khawsa panta uhi. A pasal in Vanleng tanu kiang ah “Innkhang Saisuang nah na lak hetlouh diing, sukleng na suk khak hetlouh ding ahi” chi’n a thuhilh hi. Bangtan hiam hun hongpai ta a, nikhat tuh saisuang nah poimohna mahmah a hon neita uhi. Vanleng tanu in “A sawt leng  sawtlawta hive’n tuchiang in bangleng a chi nawn khol dia” chi’n vala ding in hong kisa ta hi. A khoih pan kengkeng chih in Saisuang in ana man a, a valh ta hi. A pasal in a theihphet in hehlua in Saisuang a phelkhap ta hi. A sung ah Vanleng tanu nou ngiingei in ana nui siusieu hi. Saisuang satgawp dimdem in, bel in hon huan ta uhi. A hongsoutak in, a chiak bilhbilh a, nu it pipi, pa it pipi, Tomi gahawngsiip vakna a kinei” hon chi bilhbilh hi. A hon mintak un, atui innkong a honbuak ua le suangtum in hongdingkhe nawn hi. A pasal in theisiam pah in “hiai suang naih a na va om louh himhim ding ahi” chi’n a zi kham bikbek hi. Vanleng tanu leng pilvan theitawp suah in suangtum pumpelh zelzel mahleh nikhat ai-kaih chihdingdan a diam, puanphouna in va zangkha zel hi. Huaitak in tua suangtum in Vanleng tanu na valh nawnta hi. A pasal leng hehlua in tummeipi asehkhum leh Vanlengtanu, a khi leh tau teng toh ging bualbual in, meikhu zui in vanlam ah leng tum touta hi.

Source :

www.thaikawitongluan.com

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: VANLENG TANU TAANGTHU Description: Rating: 5 Reviewed By: Cinpu Zomi
Scroll to Top